مُـحـاولآت أرجـو أن تـرقـى لِــمُسـتوى الـشِعْـر ...

الشعر أصلو كلمات في القلب تتلمَّ
وعند الحوبة زي بلح استوى واترمّ
تنضما زي عقد على بعض تنضمَّ
تصبح بكرة طيب والفيهو طيب بنشمَّ...

عكير الدآمر...

هذه مجموعة محاولآتي في كتابة الشعر،
ومعظمها أفرزتها الغربة. أآمل أن ترقى
لمستوى الشعر.

لكم مني كُلّ الوُد.



ود المدير...

خـيـول الـريّـح ...

شحدتك الله
يا الشديت خيول الريّح
وناوي سفر
اكان شقيت صحاري كبيرة
وآسعة وسآع صدور
ناساً مجافية الشر
ودخل غابات من الباباي
وبهرك لونهم الأسمر
اعرِف إنو ديل أهلي
ناس سمحين
ناس زينين
اعزّ بشر
نفوسهم ليّنة زي النيل
وصافية صفاهو
ما بتعكر
وكان في لحظة
يوم عِكرت
اخير يا زول
تمِش تِنجر
هناك بتلقى حلوة جميلة
نبع الطِيّبة
من واديها يتفجّر
اغريها السلآم،
وقول ليها
ليك يا العآزة
شوقنا بحر
يمين لا كلّ، لا ملّ
ولا في لحظة
صابو فتر
الشوق لضِليل رآكوبة
في عِز الهجير والحر
لتربال عفيف ونضيف
عرق الخِدمة من
اطرافو يتقطّر
رمى تيرابو وإتوكّل
زول مبروك
ضُراعوا اخدر
شوقاً لليالينا
للعب الشليل والتر
لقعداتنا فوق القيف
لتمرآت وكِسرة كر
للفح السموم الحآر
لميهِيّة من الجر
للدخري البكرم الضيف
الفي أهلوا ما قصّر
ومافقدوهو يوم في حآرة
لا من حآضرة إتأخّر
يا رآكب خيول الريّح
قول لأهلنا
قطر الرجعة إتأخّر
إلا وحاتكم آلزينين
ما ناسيين
ومشتاقين
والشوق يوّت ملآزمنا
فوق ارواحنا إتحكّر
دموع العين
ملآزمة الخد
دوآم لبلدنا نتذكّر
وقدُر حاولنا نتصبر
لقينا نفسنا ما بنقدر
.
.
.
ود الـمـديـر...

حـلـيـل بـلـدي...


حليل بلدي.. حليلها حِليل..

حِليلها الخُدرة حافاها.
ودالق في رُباها النيل
حليل ناسها الحُنان وعُدال
وباقيين للحيارى دليل
حِليل عآزة المولعة نور
حِليل أبآمنة جمل الشيل
وصِبياناً تهِز وترِز
مسرجة فوق رِكاب الخيل
والعاداها بيناتُن
بينضرّه ويضوق الويل
وسواقيها التدور وتنوح
باكية مساهرة طول اليل
تدلق فيها من النيل
ساقية خدار في وسطو نخيل
صبيط المِشرِق الرويان
وصُبر الجاوة والقُنديل
ده شيتاً ما خطر بالبال
وحاتكم ما لقيتلوا مثيل
ودرافيناً فى ضو القمرا
تعبانين يكوسوا شليل
والقمرا المبهرجة ديك
هربت من حبيبتى عديل
خجلت من بدور سطعت
ومن زولاً سمح بالحيل
في وسط الخدار تتهادى
والنسام يهد الحيل
شايلة القش قاصدا مُراحها
وغنيماتها هللن تهليل
بعد عشت غنيماتها
قعدت فوق ضفاف النيل
تفكر في حبيب غايب
بعد يوماً صعيب وطويل
يكون بدّل هوانا وفات؟
ليل الغربة قالوا جميل!
بعيش في الحسرة والآهات
واقول يا ناس حليلوا حليل
وحاتك يا منى روحى
ووحاتكِ يا فريدة الجيل
وحاتك لحظة ما نسيتك
بلاكِ الغربة ليلها طويل
وطيفك لحظة مابفوتنى
باقي لي أنيس وخليل
أغالب حسرة الغربة
وادافر في مدالق السيل
مُناي العام يفوت باكر
واجيك يا السمحة دربى عديل
أمسح لدِميعاتِك
واخُت فوق راسك الإكليل
ونمشى على الجروف نتقادم
في وقتاً أظنوا أصيل
ونقعد فوق حصير مفروش
تحت راكوبة رآمية ضِليل
ونهمس يا روحي نتنآجى
ونرتل في الكلام ترتيل
فروع اللوبيا تتطاول وتتنى وعلينا تميل
عشان تسمع كلام بِشويش
تقول عسلاً مصفى تقيل
وأنسى الغربة والآلآم
وأسعد بجِدي الريل
بلاك يا سمحة السمحين
وحاتك صبري أضحى قليل
مناي يا السمحة أجيك ظافر
وهموهم الدنيا تبدا رحيل
وابدأ حياتي بلقياك
وسعد الدنيا فوقنا يخيل...



ود المدير...

هذه محاولة إحتجاج علي التزوير الذي
قام به حزب المؤتمر في الإنتخابات في
الدوائر الإنتخابية في البلد.


رسالة إلى ادروب...

قول ليّ يا ادروب
عليك وجع السنين...
خجيتو ليه؟؟؟
خليهو يا ادروب
عشان ناساً غلآبة وكادحين...
خليهو يا ادروب
عشان ناساً بتحلم من سنين
بوطن صحيح من غير جراح
من غير ألم، من غير انين
خاجيهو ليه؟؟؟
خليهو يا ادروب
عشان شجر الأراك
يفرح يعانق ديم عرب
وترب هدل
ووطن السمآح ينسى الجرآح
ينسى الحصل...
قول ليّ بس...
خاجيهو ليّه؟؟؟
وادوّك كم؟؟؟
مبلغ بِسد رمق الصغار؟
والآ الفتات،
من بعد ما نهبوا الديار؟؟؟
خلوها خاوية على عُروشا
كما الصريم وضح النهآر
لا راعو لطفلاً
بيصرخ في الظلآم...
لا احترمو شيخنا بعد وقآر...
بمدخل الدين...
جونا داخلين التتآر...
خجوها خج...
خج السوآد...
خج الرمآد...
ما خلو شِي
ناس لابتحس، لاتختشي...
ما بين مُرآبي ومُرتشي...
وسفآك دماء نام مُنتشي
من بعد ما لعق الدماء
من بعد ما انتهك الحِمى...
جوغة ضِبآع،
وقطيع سباع متوحشة...
اسرآب نسور
تغتات على جُثث الصغآر...
خجوها خج وضح النهار...
قول ليَّ بس...
خجيتو ليه؟؟؟
وشِن دار تجيب
لي ها الوطن!!!
غير المِحن
غير التخلف والفتن...
غير الشتات
غير العذآب...
غير الكلآب
تنبح تهوهِو ليل نهار
شيخها العجوز دقولو طآر
ينقُز يهِز...
ما راعى في نفسو الوقار
ينفخ نفخ!!!
زي الورر
عامل جعيص...
عامل خطر!!!
قول ليَّ بس...
شِن دار تجيب لى ها الوطن؟؟؟
غير الضياع
غير الفِتن؟؟؟
غير ناس بتعترف النفآق...
عشرين سنة!!!
من الضياع، من العناء
من الألم والعكننة
من الوجع ومُر الضنى...
وبرضك تخُج!!!
يا زول اقيّف...
خلي الوطن
ينجمَّ من رهق السنين...
خلي الغلآبة الكادحين
يرتاحو من طول الأنين
يتنسمو الحُريّة
في الزمن الضنين...
إنصرفو، لا صفى، لا انتِبآه...
يا عُصبة الحُكم اللعيّن...
يا ظآلمين...
يا غادرين...
إلى الجحيّم...
إلى الجحيّم...
إلى الجحيّم...
إلى الجحيّمــــــــ...


معاوية المدير...

إهداء إلي الأخت ماجدة عوض خوجلي...


عجِز اليرآع...


لملمتُ كلَّ محابري ودفاتري
وجلستُ كي أكتب إليك
لكنما عجز اليراع
تبعثرت كُلّ الحروف
تحرقت في ناظريك
والشوق في وجداني
ينفث إلتياع
والحبر قد وقف انسيابه
في شرايين القلم
والصبر ضاع
فاضت بُنيات الكلام.
تدفقت في أرض شوقي
فقمتُ أجمعها
لأنظمها عقود
تزين عنقك
ثمّ أنثر ما تبقى
على مساحات الخدود
أشتمُّ وردها
أنتشي حتى النخاع
فالذكرى لاترحم بعادي ولوعتي
إنت معي
في كلّ سكناتي وحركاتي
إن كنتُ أهذي أو اعي
أنت معي
رُغم المساحات
الممدة في البقاع
هاقد كتبتُ إليك
أحرف في الهواء
أودعتُها الطير
المحلق في السماء
قبضتُ أثر الطير
في حِفنة تُراب
حتى يطيب له الإيآب
قلتُ الوداع
ورجعتُ كي أنظر
إلى نون والقلم
أحسستُ في أعماقها
مُر الألم
قالت: ما كنتُ أعصيك
وأمرُك لي مُطاع
واسيتُها...
أخبرتُها...
لا لومّ، لا تثريب، لا...
بل أنت أجدر بالخضوع
وبالولاء
لكنّ تجريدك لوصف حبيبتي
هو إبتلاءٌ
لا يُدانيهِ ابتلاء
عذراً حبيب الروح
إن قست الظروف
ما عدتُ ذاك الفارس المغوار
تتبعه الحروف
حتى أُشيّد الحرف
شوقاً والتياع
عذراً حبيب الروح
إن عجز اليراع...

.......
.....
...
.
ود المدير...

فـطــوّمـة...

شِتيــلـة مفرهــدة ونـايــرة بـرآءة الدنيـا فـي عــيونـا
فـوق عِــز الأهـل قايـمـة حِـليــوة صغيــرة درفــوّنـة
نسـايـم الريـد تمـيل بيهـا عشـان هـى لِوينــة عـرجـونـة
شاربـة الـفـرحـة مـن الـنـيل لــون الـبُـرتُـكـان لـونـا
بالأدب الرفــيـع والـذوق والحِــنــيّـة مــفــطــومـة
وِديعـة فـآل بـخيـت وسـعيـد فـي رِويحــتـنا منـضـومـة
فضـايـلها تـرمى لقـــدآم بِــنـيــات الـفــريـق دونــا
بِـسـيمتا تـرضى كُـلّ الـنـاس وحـاتـكم جـد قـلـيـل لومـا
محـصنة بالضُـحى ويـاسيـن مـن الفـارغـة مـعــصـوّمـة
مـع أنفـاسـي طالـعـة ونـازلـة فـي عـينـيا مـرســوّمـة
بحِـس بالـحُـمى فـي جُـواى كـان حسـيـتا مـحــمـوّمـة
وأقالـد الفـرحـة لمـا أشــوفا فـي ضحـكاتـا مـخـتـوّمـة
أكـان وصـفــوهـا بالـقــمـرا أقــول واللهِ مـظـلـوّمـة
دِى أحـلى مـن القمـر يـا نـاس وفـى السمحات كبـيـر كومـا
وكـان فـتشـتو كٌـلّ الكـون بتـلـقــوا حـلاتـا مـعـدومـة
بـســم اللهِ مـا شـــاء الله بـســأل ربــنــا يـصــونـا
يحفـظا مـن سهـام العـين بِنـيـتـى الحِلـوّة فــطــوّمــة


ود الــمــديــر...

بِنيتي الحِلوة فطُومة...

Quote: شحدتك الله يا الشديت خيول الريّح وناوي سفر اكان شقيت صحاري كبيرة وآسعة وسآع صدور ناساً مجافية الشر ودخل غابات من الباباي وبهرك لونهم الأسمر اعرِف إنو ديل أهلي ناس سمحين ناس زينين اعزّ بشر نفوسهم ليّنة زي النيل وصافية صفاهو ما بتعكر وكان في لحظة يوم عِكرت اخير يا زول تمِش تِنجر هناك بتلقى حلوة جميلة نبع الطِيّبة من واديها يتفجّر اغريها السلآم، وقول ليها ليك يا العآزة شوقنا بحر يمين لا كلّ، لا ملّ ولا في لحظة صابو فتر الشوق لضِليل رآكوبة في عِز الهجير والحر لتربال عفيف ونضيف عرق الخِدمة من اطرافو يتقطّر رمى تيرابو وإتوكّل زول مبروك ضُراعوا اخدر شوقاً لليالينا للعب الشليل والتر لقعداتنا فوق القيف لتمرآت وكِسرة كر للفح السموم الحآر لميهِيّة من الجر للدخري البكرم الضيف الفي أهلوا ما قصّر ومافقدوهو يوم في حآرة لا من حآضرة إتأخّر يا رآكب خيول الريّح قول لأهلنا قطر الرجعة إتأخّر إلا وحاتكم آلزينين ما ناسيين ومشتاقين والشوق يوّت ملآزمنا فوق ارواحنا إتحكّر دموع العين ملآزمة الخد دوآم لبلدنا نتذكّر وقدُر حاولنا نتصبر لقينا نفسنا ما بنقدر

سلامات يا ود المير ـ ـ
كان محاولة ما عارف !ـ ـ
عليك أمان الله مع كل حرف سامع نقرشة طنبور أسلاكو مشدودة ظط ـ ـ

Quote: شحدتك الله يا الشديت خيول الريّح

بس ياريت لوبقت (ودعتك الله )ـ ـ
أكثر من رائع ـ ـ
والله صحي ( اللتنا).

ودرافيناً فى ضو القمرا
تعبانين يكوسوا شليل
والقمرا المبهرجة ديك
هربت من حبيبتى عديل
خجلت من بدور سطعت
ومن زولاً سمح بالحيل
في وسط الخدار تتهادى
والنسام يهد الحيل
شايلة القش قاصدا مُراحها
وغنيماتها هللن تهليل
بعد عشت غنيماتها
قعدت فوق ضفاف النيل
تفكر في حبيب غايب
بعد يوماً صعيب وطويل
يكون بدّل هوانا وفات؟
ليل الغربة قالوا جميل!
بعيش في الحسرة والآهات
واقول يا ناس حليلوا حليل
وحاتك يا منى روحى
ووحاتكِ يا فريدة الجيل
وحاتك لحظة ما نسيتك
بلاكِ الغربة ليلها طويل
وطيفك لحظة مابفوتنى
باقي لي أنيس وخليل
أغالب حسرة الغربة
وادافر في مدالق السيل
مُناي العام يفوت باكر
واجيك يا السمحة دربى عديل
أمسح لدِميعاتِك
واخُت فوق راسك الإكليل
ونمشى على الجروف نتقادم
في وقتاً أظنوا أصيل
ونقعد فوق حصير مفروش
تحت راكوبة رآمية ضِليل
ونهمس يا روحي نتنآجى
ونرتل في الكلام ترتيل
فروع اللوبيا تتطاول وتتنى وعلينا تميل
عشان تسمع كلام بِشويش
تقول عسلاً مصفى تقيل
وأنسى الغربة والآلآم
وأسعد بجِدي الريل
بلاك يا سمحة السمحين
وحاتك صبري أضحى قليل
مناي يا السمحة أجيك ظافر
وهموهم الدنيا تبدا رحيل
وابدأ حياتي بلقياك
وسعد الدنيا فوقنا يخيل...

شكرا معاوية المدير علي الجمال من استهلالك بي عكير عرفتك شاعر ..! وفطومة او فاطمة او الزهراء او فطين او فطينه هي رائعة ونضمك فوقها رائع ربنا يحفظها ويقر عينك بها وفي الراتعة الاولي السمر الزينين السمحين ....! خليها ضراع اخدر بدل ضراعو بتكون موزونة.....!

ود عمنا معاويه
دي مش محاولات
دا شعر نجيض مستوي

وعلي رأي محمد سليمان في نجوم الغد ....فنجره ساكت
انت نجم من نجوم شعراء الاغتراب
صح لسانك

الـبـاوقـة ...

دُغشا بدرى فوق المشرع المصيوب
لقيتا هناك واقفه تصارع الألآم
قُلت سلآم
قالت لىَّ مرحب بيك
كسر دفارتى عاتى الموج
وقصّر أجلى عرقاً خاوى والهدآم
بِقيّت يآ الله أمسك...فى بعضى وإتلملم
أكان أقدر أشابى وأقوم
يا ولدى الزمن ماراح
زمنكم هادى شوم وغشوم
خلونى الصبين راحوا
شالوا البقعه والخرتوم
خرابات تمرى تسمع فيها
خاوى الريح وصوت البوم
حليل الكانوا ناس هِمّة ويقينهم تام
حليل الكانوا بصدورهم
بصدوا الشيمه والهدام
حليل الكانوا فى درك الضلام
يتبنوا ويفقدوا الأيتام
حليل الكان تقاويهم
مصوبره قبله للعُدام
آه يا ولدى إيدك جاى
كان أقدر أقوم لآ فوق
ترابة جسمى من زمناً بعيد
نشفت وعدمت الماروق
وتمرى الكان زمان شامخ
وعاتى مواسى روّق فوق روّق
صبح ميت نِشف يا ولدى
عِدِم التمرة والكروق
عِميرى كِمل بعد ما حاسه
إنو خلاس نشف دمى
حليل زمنى والغناى
يغني لي يجر نمى
يا خالى ويا عمى النروح الباوقه
اليروق دمى
ومن نخيلى يشيلو طرحه
ومن لذيذ تفاحى أرمى
حليل زمنى هجرونى ولفظونى
ومنو البقدر يشيل همى
ومنو الداير يشيل همى
كدى قول لى إنت منو وجيت من وين ؟
جناياً ليكِ كُت فى الغربة لىَّ سنين
وجيّت الليله أكرف ريحتك
أحضن جرفك الراسى ورزين وحنين
أقالد أهلنا الطيبين
وأنشد جملة الغايبين
يرجعو للديار سالمين
يشدوا الساعد المليان
يمرقوك يمه من وحل المطر والطين
يا ولدى...السواى مو حداث
منو البقدر يشق بحراً
متسّب وطين
منو البقدر على الواسوق
والسلوكه والكاردين
منو البقدر يساسق يوّت
بين الجول وسام اللمين
خلاس أدمنتو عيشة اللين بقيتوا
سراب سجمانين ورمدانين
أرقدو عوافى ونومو عوافى
نحن ترانا مستورين
أقولك قول كدى أسدُر فوق
وعُقُب أغشانى لا تنسى
ودعتك الله يا يُمّة
قِليبى عليك من تبيت
لا بينساك ولا بيقسى
وبالدرب التحت شاققت
كان فى المُدرا إتمسى
مشيت ومشيت مشيت وفتر
لا حس طير ولا صوت زول
ولا فى الواطه شفت أتر
يقيت فى شقوقا إتعتر
وحاصرنى الغبار والحر
وقفت أناشد الفضل من الشرام
جناينا بالتمور والمنقه
كانت زاخره طول العام
دى كانت قبله للعدام
وكانت ملجأ للأيتام
وناسا كانوا فوق عزاً
مكمّل وتام
يخلفو الساق فوق الساق
يرقدوا ويكرفوا النسام
حواشاتم حواها
المشرق الرويان و ود لقاى
وللعاقو الزمان وجفاهو
صوت قمريها كان هداى
وطيت قدمو لى ديارا
ينادوا الناس هوى يازول
تعال بى جاى وقرب جاي
دِي كانت للبطش هداى
وكانت للحزين واساى
العرب...من الضهارى بجوها
بالنغم الطروب
يملوا بالأموال جيويبهم
يغنو من تمر الهبوب
بى مرح تقدل جمالهم
والسعون مليانه روب
ينسوا لفحات السمايم
والمعاناة والكروب
طيف خيالهم فوقى حايم
طُفت فى كل الدروب
طُفت أنشد جملة العابرين
ناساً فى السراب داقسين
هوى يا ناس وين
المتره والحاجاب وسام اللمين
وين تنقوره والبيضا
وين الكانوا...بيعزو التراب والطين
وين الكانوا ناساً خلقه مسرورين
هوى يا ناس هوى يا ناس ما سامعين
لقيتهم فيّ لا سالين ولا ناشدين
وقفت حزين وحزنى حزين
وصدى صوتها الحنين ورزين
تسرّب فى دواخلى انساب
وداعب كل أوتاري
وخدّر لى أحاسيسى
وعزف نغمات بمزماري
حزينة تقول عُقُب أغشانى
ما تنسى
كان بتعز صحيح داري
بدور الرجعه ليك يا يُمّة
أدوبيك شوق فى مسداري
لكنى لقيت دروب الرجعة
فى عينيّ ما واضحات وما داري
وجرف الخُدره فى ربوعك
بقى صحاري
وحسيت إنو دمع
الحسره فى عينى متضاري
وسموم الحُرقه يوقد فى لهيب ناري
ومشيت هايم ألملم
من هجير الصي...فى أوذاري
وما داري،
وما داري،
وما داري...




معاويه المدير...

تمّ نشر هذه الصورة هنا في المنبر، فأوحت بالمحاولة.

مِـحـنـة سـيـول طـوكـر...

يا عازة، كيف الشوّرة عاد؟
هم السنين الليلة زآد!
رضينا بعِيشة الكفآف
داهمنا سيل من غير مِيعآد!
البرقا شالها معاهو فآت
خلآنا بايتين القوا
بين الحياة وبين الممات...
يا محمد احمد تعترض!
ورِزِقنا عِن خالق العباد!؟
يا ربي تلزمنا السُكآت...
استغفر الله العظيم
يالعازة ما قصدي اعتراض

بس عارفة كان السيل
نزل وادينا خدّر للنبات
والعيش فدع قندولو
فرحو بي الجِنآت
والطير شِبِع من نقدو
فوق قصباتو بآت
والبرقا درّت وولدت
والخير غمر وادينا زآد...
كان جونا حُكآم السجم
كان جونا حُكآم الرماد
نهبونا في وضح النهار
حتي اللبن قسموهو
مع السخل الصغار
خدمة يمين
وعرق جبين
في لحظة من إِيدينا طآر
وحاكم البلد داقلوا طآر
يعرض تملي ومنتشي
ماراعى لطفالنا الصغار...

عآد شِن نسوي يالخزين؟
ظُلماً وقع فوق راسنا
من حُكماً ضنين
نصبر مِتِل ايوب صبر
يمكن نواتي الصابرين
يمكن نرافق الصالحين
ما قالوا حُكامنا بيجو
يفقدونا يا دُخري السنين!؟
يالعازة ماظنيتو فايقين
شان يوم يفكروا
في الغلآبا الكادحين
شان يطرو ناس
في السهلة قاعدين

ايّه يعني زينا لو يموت؟!
ويعيشو سادة مُنعمين!
ومُدللين!،
وممسحين!،
ومنعمين!
ايّه يعني زينا لو يموت!؟
ويكونوا فيها مُخلدين؟
مُترفعين،
ومقندفين،
ومهندمين،
ومنفخين!
يالعازة مافرقت معاهم
لو كان نعيش فوق البسيطة
مشردين،
ومقطعين،
ومبشتنين،
ايّه يعني تفرق
لو نموت؟
ماهُم بيرقصوا مُنتشين!

يالدُخري بس لينا الكريم
شاحدآهو رب العالمين
يلفى الغلآبة الكادحين،
ويهِد حُصون الظالمين،
ويقصِّر اجل الحاكمين،
ويكفينا شر حُكماً لعين...
يا العازة ما عرفنا الحرآم
بيقبل دُعآك خالق الأنآم
لا تدعي يا بنت الكِرآم...
استغفر الله العظيم
يا ربي تغفر لينا
ذنبنا يا كريم،
وتلزِمنا صبر المُرسلين،
وتكفينا شر حُكماً لعيّن.
استغفر الله العظيم.
استغفر الله العظيم.
استغفر الله العظيم...



ود المدير...

كان القى غردي انا فرّ اطِيّر...

يا اخواني مُشتاق شوق كتيّر
شوقاً يهِد حيل البعير
شوقاً قدُر جرف الكِرير
شوق المريض للعافية
اضناهو السرير
شوق البِتِب في قيدو
للحرية في الظلمات اسير
انا شوقي للنيل والبلد،
شوقاً قسَم بالحيل كتيّر
كان القى غردي انا فرّ اطِيّر
الحق بنياتنا البِيردن
في الحفير
واشرب مع حبوبة
فنجان جبنة في ضُل العِصيّر
واخدِم مع تربالنا في وهج الهجير
وإتغدى في الرآكوبة
بدمعة وفطيّر
والنِيّمة مكدُوّن فيها زِيّر
مويّة بحر، تحلف تقول
مويّة عصير...

اكان القى غردِي انا فرّ اطِيّر
الحق مع صِبيانا لمآت النفير
ولماتنا في الحوش الكبير
ود العوض، وعلي الصغير،
عبد الحفيض و ود النِعير
يشاغلوا في شنبو العوير
ورُقادنا في حوش التمُر
فوق عنقريب، مافوق سرير
القمرا فوقنا ملجلجة
وبابور حسن يهدر هديّر
مِندلقة في الحيضان
جداولوا معربدة
وبحرنا كِيّر

كان القى غردي انا فرّ اطِيّر
للسمحة في حِلتنا اقدِل زي أمير
وإدسى في دِيسا الغزير
حبوبتي تنهمني وتقول،
يا ود مشيت سابل وليدآت البصير؟؟؟
رحل اللكان دُخري وعديل
الدنيا تب ما فيها خيّر
وحفيان ازور شيخنا الضرير
يا شيخنا واقع في حوآك
ومن الفُرآق بيك مِستجير
انا وين اروّح؟
انا وين اطٍيّر
يا اخوانا عُووووووووك
حالة البلد مازي زمآن
والغربة عِيشتا زمهرير
ياخواني عآد انا وين اطِيّر؟
انا وين اطِيّر؟
انا وين اطِيّر؟
انا وين اطِيّر؟
انا وين اطِيّر؟
؟
؟
؟
...........إلخ
ود المدير...

و نواصل إن شاء الله...

Quote: بس ياريت لوبقت (ودعتك الله )ـ ـ أكثر من رائع ـ ـ والله صحي ( اللتنا).

ود الملك يا اللِيّلنا، يعني هُوّلنا طب.
مشكور علي لفت النظر والتعديل. كلآمك في محِلو،
وتمّ التعديل.
كتّر خيرك، وابقى واصل...

أطـفـال الـمـايـقـومـا...

انا من متاهات العدم
ساقتنى ازمات الضمير
وسكنتَ في جوف الرِحِم
مستنى في الظلمة المصير
عآلم غريب!!!
في جوفو بسمع
كُلَّ همسات السكون
ممزوجة بوخذ العيون
صخب الجنون
طعم المجون...
ناس دآيره تطرحني وأموّت
والعآر يفوت،
والخلق في إيد الكريم
لو قالوا كُن...
لآبُد يكون...
وجع أُمي
كان ساعة الوضوع
وخذ الضمير...
وِلدونى في عِزّ الهجير
فوق التُرآب
ما فوق سرير...
وصرخته في وجه الزمان:
رجعني لدُنيا الأمان..
لكن مُحآل...
لافرحة طافت بالمكان
لا ضُل عشان بيهو استجير،
وبسمّتَ في كُلّ الوجوه
بسمة غرير..
لا شالني اب طاف بي
يباركولو الرجال!
لا عم لاخال!!
وحُضن أُمي
كان عين المُحآل،
وانا روعة آية من الجمال
فرحان أضاحك في الملآك
ما حاسي بخطر الهلآك...
والوضع كان بالجد خطير...
ساقتني خطوات القدر
إجتزتَ مرحلة الخطر...
في الدنيا
شان احيى واشوف...
الدنيا طوّف شآقي العُبآب...
مليانة هم...
مليانة خوف...
مدّ البصر...
قدامي ابحُر من سرآب
اثآر حُطآم...
اثآر خرآب...
ظُلمة، وضبآب...
شاهدتَ نور شاقي الظلآم
همسآت وِئآم،
وشتات كلآم...
وقفتَ أسترق السمع...
برق الأمل...
في جوف دواخلي سطع لمَع،
لمآن سمعتَ الناس تقول:
حق اللبن!!!
ياريت كمان...
الناس تقاسمنا الحنان.
ما تقول علينا اولآد حرآم.
كِلمة بتقد طبل الأضان...
جُرح السِنآن ببرى ويطيب
ما بتبرا جرحات الِسآن...
بالعآزة دايماً نستجير
لمآن يصيبنا الزمهرير.
حق اللبن...
اوتآر كمان...
صمآم أمآن...
عايزين نحِس لاتحرمونا
كلّ أُم هي أُمنا،
وكلّ أب يا عآزة أبونا
وكلّ أخ بالحيل أخونا...
يا عآزة، ناديلنا البنات...
خيرك كتيّر...
لابقولوا فآت... لا بقولوا مآت...
عايزين يكون فينا المدير،
فينا السفير،
فينا الأمير...
يا عآزة تقرير المصير
سبناهو للطيبين أهلنا،
ونحن في غمرة جهلنا.
طالبين حنان بالحيل كتير...
للمجتمع بنمد إيدينا
ما ترموا كوم اللوم علينا
إن كان أبينا، وكان رضينا
للدنيا نحن قدرنا جينا...
يا عآزة
ما دايرين نعيش
عِيّشة غريب.
جيناك بقسمة ونصيب
وسهم القدر لا بُد يصيب.
أدونا فُرصة نعيش عُزاز
نمطر في وِديآنك رزاز...
يا عآزة، كلمي لينا أولآدك
وبنآتك...
وحياة غلآتِك
وحياة حلآتِك
قولي ليهن:
بنمدهن إيدينا ليكم
وكبير، كبير ده عشمنا فيكم
وصآفي اللبن،
ليكم نقدمو فرحة
في دارنا الحبيب
ولمآن نشوفكم،
والله خاطرنا بيطيب
يا اهلنا صلوا علي الحبيب
وتعالوا في الزمن القريب
حق اللبن...
ضحكات صغار
في إنتظآركم
يا ابواتنا دارنا
حقيقة دآركم
ونحن يا أُماتنا
زينا زي صغآركم
جبيبوهم أطفالكم هنا
نعلب معآهم
في محبّة وفي هنا
ونغني
بفرحة وحبور
هودنا يا هودنا...
هودنا يا هودنا...
.
.
.
ود المدير..

شعر مبشتن جنس بشتنة عاد

وبعداك شايفك قاشر بصورة بتي سارة فوق، اين حقوق الملكية؟ يا بكري اصحي.
علي بالطلاق صورة بتك فطومة دي ما اشيلها اعمل بيها دعاية لسلة واقول ليهم تشترو سلة نديكم معاها واحدة من الضفائر دي مجاني.
اصلو هم بنات السودان كلو بقي شعر و فتح لون.

النمشي نعمل المشوار دا واجيك راجع

أحلام بالعودة...

في فترة من سنين غربتي كنت قد تغيبت عن البلد والأهل لمدة
11 سنة متوآصلة، كانن التومات بنات أخوي في خلالها يرددن
بصوت يطرق سمع أُختي الكبيرة آسيا:
يا رمال حِلتنا زولاً كان يآنسك يا حِليلو
فات رحل من بلدو روّح فاتلو لدار ماها هيلو.
فتزرف أُختي الدموع حزناً على فراقي وشوقاً لِلقيآيَ، إلى أن
أذنت لي الظروف بالعودة، فحزمت حقائبي فكتبت وأنا أتاهب
للتوجه للمطار، أحلآم بالعودة.
كانت لحظات اللقياء بمطار الخرطوم من أفظع اللحظات في
حياتي أحسست فيها أنني أعانق كلّ الوطن في شخص أهلي
وآسيا أختي التي ذهبت في آخر زيارة لي للسودان لعيادتها
بعد أن أٌصيبت بجلطة أثّرت على نصفها الأيسر إثر سماعها
تعرض إبنها لحادث مرور في ديار الغربة. أسأل الله سبحانه
وتعالى أن يمنحها الصحة والعآفية، وان يعيد كُلّ الطيور
المهاجرة لأرض الوطن زمن الخريف...

يا رِمآل حِلتنا زولِك ليكِ عآد هيا ابسميلو
جاي يتبّع دِريبو الفوق بياضِك كان دليلو
صوت قماري الشوق يحآدي لشُدرنا ولضِليلو
لبحرنا ولتمُرنا لعِنقريبو ومقيلو
فوقو ينجمّا ويزحو كلما الرقراق يجيلو
والعِصير يمرق يطايب ناس فريقو الهم يزيلو
يمسح اللوم والعِتاب بالأمارة يتم جميلو
في سلف صالح يعزي بحُزُن في الجوف نزيلو
وبفرح طآمح يبآرك للصبى الإنتم عديلو
والمِغيرِب يمشي ينزل للبحر يكرُف عليلو
لهموم الغربة يغسل نفسو من فيض سلسبيلو
وجاي سآدر فوق دِريبو النِخيلآت تِنتكيلو
يشيلو تمرآت من صبيطا بيها يكتُل نآر غليلو
فوق رِمآل حِلتنا يقعد والقمر سآطع في ليلو
فوق خدود رملتنا عآكس فيض دموع أفرآح يسيلو
تروي أرضك يا بلدنا ونحن كوم الهم نشيلو
ومهما أرض الغُربة جآدت الوطن مافيش مثيلو
وحتى لو نزلو النجوم حآشآ ما دآيرين بديلو
وضُمّة ما بندور بديلو...

ود المدير...

سلام ودالمدير
كلام بالنسبة لينا العوام والله شايفنو جميل ونضم عديل ومقفى لكن زي هلال مريخ محلي بس والمحلي داخل عطبرة
كان اديتو لي ناش الشعر الجد بطلعوه ليك كسور وبواقي لكن ناس نحن انت نضام خلاس
تخريمة
ذكرتني الطريف والظريف من اخبار العرب كتاب جميل
واحد مشا للشعراء الكبار ديلك قال ليهم عندي قصيدة عايز اسمعكم ليها وادوني رايكم
والراجل اول ماخلص مستعجل عايز يعرف راي الخبراءا
رد عليه احدهم اظنك من اهل النبوة
فقال الاعرابي مستغربا كيف
فرد المُحكم
لان الله قال وماعلمناه الشعر وماينبغي له
واصل ومدنا بالمزيد فالغربة تولد الابداع

Quote: شكرا معاوية المدير علي الجمال من استهلالك بي عكير عرفتك شاعر ..! وفطومة او فاطمة او الزهراء او فطين او فطينه هي رائعة ونضمك فوقها رائع ربنا يحفظها ويقر عينك بها وفي الراتعة الاولي السمر الزينين السمحين ....! خليها ضراع اخدر بدل ضراعو بتكون موزونة.....!

شكراً الأخ عبيد الطيّب علي المرور والتنبيه.

تمّ التعديل، بس أنا ما داير أعدّل هنا، فلربما
يمر بعض الناس ويلقو بملآحظاتهم أيضاً.
بالنسبة لفطومة، آميّن، وكتّر خيرك كتيّر
يا عبيد.

شكراً ليك تاني، وابقى قريب...

آآآآآنـجـيـمـآت...

الرسول آآآآنِـجـيـمـات
في ضلآم الغربة ضاويات
وفوق بيوت حِلتنا طالآت
اغرن السمحين سلآمي
انا شوقي فوق الحد طمح زآد
شوقي لنيلنا وجروفنا
وكيف تِميراتنا مسويات
شوقي لرملآت فريقنا
لسمرنا وللملمات
التمُر جبّد وسلّ
فوق ارضنا رمى الدِفيفِيق
كُل صبياً مآلي عِبو
وختَّ بصمتو في العراريق
بكرة يبقى أُم راس وعجوة
ويهدي للسمحة الشخاليّب
شوقي لبسماتا تضوي
فوق مدارآت الفريق
شوقي ليها بحورو طآمحة
دي نور جمالها بضوي الطريق
آآآآنِـجـيـمـآت...
اضوي لتربالنا يقرع
يروي لحيضانو يزرع
في ربوع بلدي السلآم
يسقي في وآديكِ خضرة
يا بلدنا يقصر الكلآم
في جروف واطاتُو ينقح
طيفو فوق احلآمي حآم
انا في ليالي الغربة ساهر
طرفي جافاهو المنام
آآآآآنِـجـيـمـآت...
شوقي لحبوبة داقسي
مع نِسيمات الصباح
للرواكيب والكرآرِق
وللغِنيمات في المُراح
للتقابيب والخلآوي
العامرة بأهل الصلآح
شوقي فات حد التساب
شوقي تب ما شوق نَصآح
داير اقعد في تُكُلنا
إتغدى بكِسرة ومُلآح
الرسول آآآ نِـجـيـمـآت...
في سماء قريتنا ضاويات
طُلّن القُمري المعشعِش
في سباليق البيوت
أرمن الضو فوق رمالنا
أشرحن لأهلنا حالنا
نحن اضنانا السُكوت
حظنا العاثر قهرنا
لبلدنا نهاجر نفوّت
بدعو شاحد المولى
يحفظنا ونعود
تِنعدِل ختوتنا تِنحلّ القيود
في ديار الغربة
لا نشقى لا نموّت
آآآنِـجـيـمـآت...
النوصيكن تقولن لأهلنا
يدعو لينا،
دعاهم المقبول يصلنا
يسألوا المولى الكريم
لينا يتحقق أملنا
بكرة نرجع تاني
لمرتع جهلنا
لسواقينا ونخلنا
فوق مشارع الريدة
يا الحبان نزلنا
نودع الآم البُعاد
ونبلل الشوق الكتلنا
آآآنِـجـيـمـآت...
في مجال الغربة دايرات
فوق ديارنا هناك طالآت
كيف أهلنا؟
كيف سواقينا ونخلنا؟
نحن حرّ الشوق كتلنا
آآآنِـجـيـمـآت
آآآنِـجـيـمـآت...
.
.
.
ود المدير...

دي قصيدة إخوانية لا تخلو من روح المزاح مع حبيبنا
صديق الموج نتيجة مداخلآت كانت بيني وبينه.
صديق الموج دا طبعاً بيبقى لي حبوبتي، وأنا بسأل
الله سبحانه وتعالى يديهو طولة العمر، والصحة
والعافية.

Quote: شوف يازول انا المره الجايه بفرع ليكم الموت وبعدين بعد بكرى ينزل البوست بتاع الوفاة حا يجو ناس ود الصائم وهو يضحك يقول ليك وقد كان الفقيد ملء السمع والبصر وكان احسننا وكان دسم الاخلاق او دمث لايهم المهم بجو يشكرونى كتير كده وانا خايف اقوم اقول ليهم خلو الكذب يا ناس حمزاوى ودينق وشول اشوانق ووالعوض المسلمى ده ماانا وارجع تانى الى رقدتى الابديه. انتو مادام انا كده ماتقولوها لى وانا حى خلونى ادلع شويه واتغرغر ابقى مغرور يعنى. وبعدين الجكس يجى يقول ليك فايت مروح وين ما بدرى يامنقه شنو ياود الموج بالغت وقطعت قلبنا وكلمتنى هنايه السماعه وقعت من يدى لما ناس البيت اتخلعوا وقربوا يلحقو المرحوم. اها بصراحه الحاجه دى بترضى غرورى وانا ميت، رغم علمى بكذب البعض من الجنس اللطيف ناس طلعت بفستانى حق البيت الشارع وهى تكون اتمكيجت لايمانها من ما سمعت ببكاى ،وناس دايره اركب بص الكلاكله ركبت مواصلات سنار ولما رفعت راسى لقيت روحى فى ام بده السبيل ديل... لكن كترن منها،بتدى الحبكة بعد درامى وكان لقت ليها موسيقى تصويريه تبقى حاجه ما تخلص. وبعدين تجى قصص ناس الرياض تلقى الواحد خمسه شهور ماسمع صوتى يقول ليك تصدق امبارح كان بتكلم معاى وصوتو ماعجبنى سالته قال لى عادى كنت نايم وصاحى هسه والبقول ليك لاقيته فى سوق البطحاء وشايل ليه كيس قلت ليه دى الشيله يا ابو الموج قال لى قول كفن ياخى، تصدق لما خفت والبجى يقول ليك ليه زمن بهاتى بالسفر،والبقول ليك كلم امه من تلفونى ده والله كان بتكلم كان قال ليكم وودعه وداع مفارق وقال ليها اعفى منى.. ودالباوقه وغريبه يقول ليكم لكن مافاحت منه روائح مسك لكنه كان طيبا.لوووول وخدوم، واحدين ولا بعرفهم يقول ليك والله سفر لى اولادى وماكان فى حجز ولاشال منى قرش مع انه لو قال لى جيب الفين ريال لظروف البنت فى الجامعه كان دفعت ليه الله يرحمه ياخى،مع انو اكون شحدته حق علبة سجاير شحده وقال لى انت عارف الظروف والتذاكر غاليه وقسط الجامعه للبنت لميناه بى الله ويامين. اها وفى نوع كده خيالى يبداها ليك بى والله مازول حياة..ودالموج ابدا مازول حياة يا حليلو والله كان بضحكنا مع انو بكون قال لاصحابه وقتها الزول السغيل ده ما يحترم نفسه عامل نفسه دمه خفيف بالله دى مداخله يكتبها.. اها ديل ماعافى ليهم مفروض يكلمونى وانا حى كان اتثاقلت لان المؤمن مراة اخيه.. الرجاء الاخير يابكرى اخوى انا عافى ليك ماتسود المنبر يوم اموت املاه زهور وبوكيهات ورد وبالونات ملونه وكده..sudansudansudansudan24.gif Hosting at Sudaneseonline.com احبكم مووووووووووووت،،،،

مُدآخلة صديق الموج في احد بوستاتي،
ورديت عليها بالقصيدة ادناه وهي تقع
دآخل إطار الإخوانيات:

صـديـق الـموج...

هو برآهو قال. ما قلت انا
ما يجوني ناس العكننة
ما يجوني ناس الفلسفة
ما يجوني ناس الشفتنة
انا أصلي حالتي مبشّتنة
لا عندي مصدر، لا دليل
هو برآهو قال زولاً سغيل
ما تجوني تحموني المقيل
انا زول نحيف ما فيني حيّل
وما عندي حيّل للجهجهة
ولكآك، وكآآآآآك
ولغاغ وغآآآآآآآآغ
والبهدلة...
لو جيتو بس انا بستغيّل
واحرد واشتت من هنا
هو برآهو قال ما قلت انا...

قال ماهو حوض الموت،
بيفرعوا لينا تب
واوآت ينزل بكري طرف البوست
تشوفوهولعجب!!!
يبداهو ود الصايم المطموس
يقرقر ومنتشي
ويقعد يشكِر فيني ما يخليلي شي
يا حليلو، كان اخلآقو دسمة
وزول عديل
امانا ما كان ود بلد
راسي واصيل
يردم يشيل فوق الدبَر
يردم يشيل
فوق الضهر
يردم يشيل
فوق الكتف
يردم يشيل
حا شاهو ما انهدالوا حيّل
وحمزاوي يستلم الشُكُر
حرّم صدق
حاشاهو، ما كان زول فقُر
وطول عمرو ما عرف الخنا
ابكيهو يا بت الهنا
الزول دا زولنا ومننا
هو برآهوقال، ما قلت انا
ما يجوني ناس العكننة...

وأخونا دينق عينيهو
وِرمن بالبِكا
قال الفقيد كان زول
شِفِت ومقدِدا
ولمان تجوّط بيسدِدا
وشول بهناك يبكي وينف
وجنبوالمسلمي دار يسِف،
والسفة بس باقيالوا شيّنة
مع الأسف
وآقف متوّز،
ووشو منفوخ بالورم
ورمان من الآم الفُرآق
والقريفة ووجع الخرم،
ومرحومنا قال:
الناس دي ما كنت تشكِر
من زماااان!!!
خلاس إتلحسنا!!!
وظهروا فاقدين الحنان ؟؟؟
والله غايتو جِنِس مِحن!!!
يا الدنيا تب ماليك امآن
فتناكِ يا دار العنا.
هو برآهو قال، ما قلت انا
ما يجوني ناس الزهجنة...

والجِكس يكوّن في الهدوم
ويوصِفن:
يا حليلوصديق ابجِضوّم
يا حليلو صديق ابكُضوم
كان دِيّمة في المنبر يحوّم
الليلة عآد كيفِن ننوم؟؟؟
يا حليلو شيال الهِموم
الليلة ووووب قلبي انقطع
ما قايلة جمل الشيل بقع!!!
احيييييا مُصراني انفقع
وناس سلمى بت الشيخ
يجن متحزِمآت
واميرة بِت الشيخ
تكتِح في الرمآد
وشغآلة تش:
الليلة ووووووووووب
وبِت العجب جات طايرة
شايلآها الهبوب،
وفادية بِت اليمني جآت
ما مصدقة ومِتجنِنة
معقولة بس!!!؟؟؟
صدوقي يا ناس إتلحس؟؟!
وين ناس حبيبا وناس سحس؟؟؟
احيييييييييي انا،
يا ناس خلآس
هجر الكنار زاهي الغصون
سآب الغُنا؟!
آآآآآآآآآآآآآآه يا انا...
نار الهوى الوقادة
والشوق والعنا
حا يخلني اصبح مجننة
آآآآآآآآآآآآآآآآآآآآآه يا انا !!
سنة يا جنا
هو برآهوقال ما قلت انا
ما يجوني ناس الضهبنة...

هارون ديآب بالخُلعة
وآقع كركرب!!!
معقولة بس!!!
الزول دا دقا لي قريب!!!
ما عرفتو، صوتو اكان غريب؟
قُت ليهو: محتاج لي كشف؟
قال لي: من النوم صِحيّت
ما حاجة تحتاج لطبيب،
وكوستاوي قال: لاقيتو في
السوق الصباح شايلو كِيّس
قُت ليهو، يا موج البحر،
كِيّس الخدار؟
قال ليَ، يا زول قول كفن!
بالله لمآن إتهجم! وبِغِم كضم!!!
طارق ولد جبرين، حزين
يبكي ويوصِف:
امانِي ما كان زول حنيّن
وامانِي ما كان زول طرب،
وزول دندنة!
الليلِي عاد الزايلِي
لفحتو مِننا!!!
هو برآهو قال، ما قلت انا...

غريبة قال، الزول دا
ريحتو فسيخ، فسيخ!!!؟
الباوقة قال، زول المعارضة.
لا بُدَّ إنو يموت فطيس
غريبة قال،
لا كِنو كان زولاً عديل!
الباوقة قال،
يا اخ قول سغيل
لو كان معانا، كان عِطرو
هسا مِسِك يفوح
والحُوّر عليو يطاقشن
ولجنّة الفردوس يروح.
ابصلعة إتمحّن وكضم
قال المِرِق إنقصّا
والبيت إنهدم،
وحمد لبد حصد الندم.
وود المحرب يرثي قال:
رحل اللكان شيال تقيل
البيتو كان مفتوح سبيل
للدآجي عِز الهجعة ليل
وللطاشي حار بيهو الدليل.
ومرحومنا قال:
يا بكري، ختيني السوآد
انا زول محنّة، وزول غُنى
انا زول موسيقى ودندنة
ود المدير، كاتلني مالك يا جنى؟؟؟!!!
تتجازى شاحد ربنا
انا جِدو في عِز الشباب
وافراحي زي السوسنة.
يا زول برآك جِبتَ الكلآم
علي الحرآم ما قُلتو انا
الزول دا هُو الجاب الكلآم
والله يا ناس ما أنا...
.
.
.

ود المدير...
صـديـق الـمـوج، قـال حـا يِـتـلـحِـس ... اشـعـار و...ـقـة الـزرآزيّـر ...

Quote: ود عمنا معاويه دي مش محاولات دا شعر نجيض مستوي وعلي رأي محمد سليمان في نجوم الغد ....فنجره ساكت انت نجم من نجوم شعراء الاغتراب صح لسانك

علي الكرار يا إبن عمي،
كتّر خيرك كتيّر علي الطلة والإشادة.
آ زول مستوي عدييييل كدي ؟؟؟
والله ما قصّر معانا تب.

عليك امان الله في صورة الباوقة يا علي، شُدرة المنقة
قرّبت تشرب من الجدول.
التحايا ليك وللجميع طرفك.
أشواقي الكتيرة...

انــا والأشــواق...

انـا والأشـواق في بُعـدك بقينا اكـتر من حبايب
كم سِهِرنا الليل وحاتك وإنـت مـن عيني غايـب
يا حـبيب القلب أصلو الحياة مـحطات عـجايـب
واصلو دنيانا وحاتك زحمة من اغرب غرايـب
فرقـت بينـا الـلـيـالـي وزادت اكـوام الـنوائــب
كم كنا في أفراحنا دايبين للحبايب يـوّت نطايب
صبحت فـي اشواقـي سآبح لجروفنـا وللزرايـب
لأهلنـا الجـد وحاتـك بلـحقـو المـمكـون وضايـق
لبـيـوت الطيـن والنـخيـل للكـتـاتيـح والـهبـايـب
وبرضو لعصرية حآلمـة وهبهبت نسمـآت تطايب
جايبة ريحتو لبن مقنن وفي الشراب بندورو رايب
بـس وحـاتك مانسيـتك ونحـن اكـتر مـن قرايـب
فرقـت بـينا الليـالي والمـقـدر اصلو صايـب...
.
.
.
ود المدير...

الشم خوخت بردن ليالي الحرة
والبراق برق من منه جاب القرة
شوف عيني الصغير بي جناحه كفت الفرة
تلقاها أم خدود الليلة مرقت برة
***
الخبر الأكيد قالوا البطانة اترشت
وسارية تبقبق با الصباح ما انفشت
هاج فحل أم صريصر والمنايح بشت
وبت أم ساق على حدب الجميل اتعشت
**
برق القبلة شال شالت معاه بروق
ختت له أم رويق عم السحاب من فوقو
العفرت رحل يبكي ويسوي القوق
والضحوي اتردف ليله ونهاره يسوق
***
البارح بشوف يشلع بريق النو
وحس رعاده يجرح في الضمير كوكو
داك طير القطا الدور مشارع الهو
وفرقان البطانة اتماسكت بالضو.


من أدب شعراء البُطانة.

و
نوآصل إن شاء الله...

عــــطــــبــــرة...


يا غالية ريدك في مسارب
روحي إسرّب سرى
ومازج دمايَ معاها
في الشريان جرى
ما إنت يا حبي الكبير
داخل قليبي محكرا
وبلاك ما بطيق الحياة
تصبح رِويحتي معكّرا
يا حلوة يا مصدر غُناي
وشموخي وأكبر مفخرا
من جوف مشاعري الهايمة بيك
بهديك حروفي معطرا
وأنا ما نسيتك لحظة
شان أطراك يوم يا عطبرة
سيالة يا مرتع صِباى
أوتار غُناي
ينبوع سعادتي ومصدرا
أنا ببدا مِنّك شوط طوافي
على المدينة وبندرا
بطرا الجزيرة نواوي
كيف زمن التسآب
النيل حواها وحاصرا
والعارفين ناس ود نواوي
أهل العِلِم
ورثوا الصلاح من الورى
الداخلة في جوارهم أمان
روعة وحنان
ما أحلى ناسها ومنظرا
السكة الحديد والسودنة
آيات جمال، وكرم خِصال
جلّ البرا
في حِلة الصاج
الكنيسة ومدرسة
ودار الرياضة وجمهرة
في القيقر السوق القديم
والمدفعيّة وعسكرا
حوش المخازن والوِرش
ومبنى العموم
آيات فخار ما أظهرا
في ساحة المولد
فرح في كل عآم
بمولد النور السرى
الجامع الكبير وشارع السلك
وللهندسة كلية فيك ما أشهرا
وبين أُمبكول والسوق دوام
أجمل حديث ومناظره
الأتبراوي مع الطليح
والقلعة نورا وجوهرا
بيهدي الحصايا أجمل غرام
وبنورو دايماً يجهرا
ليك يالغُريبة مكانة
في داخل قلوبنا مسطّرا
ومين فينا بس مدني الفكي
يا أهلنا ما بيذكرا
يا إمتدادنا الشرقي فيك
أطياف جمال
تسري الخيال ما أكثرا
منسابة من حي المطار
وفيض الشمالي
معينا دافق ومصدرا
وحِلة الصنفور بتفتح
للقطر هيمان جرى
إنت يا قلعة نضالنا
فيك حي عُمال مفخرة
في عمومك بنهى الطواف
والجمال والذوق حاصرا
ليك خليوة منارة ثقافة
فيض فنون ومآذرا
بشبابها وبرحابها
تعلو بيك فوق الثرى
فيك قضيت أحلى السنين
ليها طاري وبذكرا
وكيف كان لياليك الحُنان
العطبراوي بيسكرا!
يشجيها بالنغم الطروّب
بريدو هايمة مخدّرا
أعلام شموخك عآلية
فوقك وآضحة
للبيك مادرا
المحطة رصيفها وناظِرا
النقابة عرين أُسد الشرا
الوِرش وعيون ساهرا
حاج الريّح والمُلتقى
العمارة ورفعة مِنبرا
وكُبري للحُريّة إنبرا
الجبابرة رقابهم كسرا
النضال سيرتك طهرا
بالحديد والنار سطرا
وفي سِجِل تاريخك حكرا
وأنا ما نسيك لحظة
شآن أطرآك يوم يا اتبرا...
.
.
.

ود المدير...

عــازة...

عازة كم نادتني من أعماقي
أشواقي إلي يوم الرحيل
عن ديارٍ ليس لي
فيها وجود
غير أنّي
مثل مسجوناً في جوف
الأرض يرسُفُ
في القيود
طال شوقي
إلي رُباكِ الخُضر
يا مهد الأُسوّد
طال شوقي إليك
يا عازة الخليل
حُبُك المكنون في الأضلآع
أرّق مضجعي
وصوت مِزمارٍ
تسربل مقطع الدوبيت
دآعب مسمعي
يا خُطى الأيام هيا أسرِعي
أحمِليني إلي ضفافٍ
جوُها حُلوٌ جميل
حيث تغريد القماري
فوق أهدآب النخيل
حيث تتلآشى الهُموم
حيثُ أهلي
حيثُ أرضاً قد روتها العِزّة
من كبد الغيوم
حيث تجلس في إنتظاري
غادٌ حسناء في ظِلٍ ظليل
قد حبتها وهدة الصحراء
لوناً مثل لون القمح
في فصل الشتاء
وكستها زُرقة السموآت
ثوباً قد ترصّع
بالنجوم مع المساء
ووشحتها نضرة الغابات
خضرة لونها المحبوب
تألفه الرشا
تنتظرني تحت
أهداب الأصيل
تحت أقدآمِك أجثو
يا بلآدي
قد نذرتُ الروح
تفديكِ إذا غدر الأعادي
وقلبيَ الولهان كلما
أرهقته خُطى السنين
واصطحبهُ زمان غدرٍ
بآت بالوصل ضنين
لِسِوآكِ،
لا ولن يخضع يميل
يا بلآداً،
تصحب السُمآر
في الليل الطويل،
يا دياراً،
تمنح الأفرآح
الحان الأغاني
وطلّة الأمل الجميل
تحت وآرِف ظِلِك
الطلق الظليّل
يحلو لِي وقت المقيل
عازة يا بِنت الخليل
إن بقى من سنين العُمر
معدودٌ قليل
سوف القاكِ بوآدٍ
ماؤهُ
عذبٌ
ذُلآلٌ
سلسبيّل.
.
.
.
ود المدير...

الله لا تاجرك ياود المدير

الجمال دا كلو وتقول لي محاولات والله
دقنوسي دا لو بيقدر يعصر زي الشعر دا
تاني سلام الله ما أديهوا زول .


يازول طريقك أخضر والله صحي واصل ساي

Quote: علي بالطلاق صورة بتك فطومة دي ما اشيلها اعمل بيها دعاية لسلة واقول ليهم تشترو سلة نديكم معاها واحدة من الضفائر دي مجاني. اصلو هم بنات السودان كلو بقي شعر و فتح لون.

سجم السجم،
بتدور تسحر فطومة يا السجمان؟؟؟
قهرتك بالقاهر والنبي الطاهر...

سـاقـيـة حـسـن ...

يا اهل السواقي الديش
مآدين كروشكم ليش؟
ساقية حسن شِقيش
تدى المُلآح والعيش
يا والدة وينو حسن؟
الكان زمان صِنديد
شافوهو في البندر
بيعاني من الضيق
ضِيّق الحياة الخلّت
المِتلو يمشي بعيد
يا حِليلو يا ما كان
زولاً سخي وضكران
ما مخلِى زول عدمان
الحِلة والجيران
ما شافو يوم زعلآن
كان بيرفع الآذان
يا حليلو يا خِلآن
شافوهو في البندر
بيصارع الحِرمان
ساقيتو يا حليلا
شالوها ناس جونا
زنديّة حكمونا
حسن اللكان ضو بيت
وسط الظلط حيران
راح مِنو راس الخيط
يسأل في أهل الخير
يا أخوانا وينو شبير؟
قالولوا روّح فآت
قام بجماعتو بعيد
غنولو الف نشيّد
يعرض تملى سعيد
أيامو كُلها عيّد
إتحيّر المسكين
سألوهو ناس عآبرين
يا عمو ما عندك سرير؟
رآكوبة من حرّ الهجير
مكتوف على عيدانها زير
لآزم الرُقاد قطعة حصير
توب من فحيح الزمهرير؟
فوق خدو سآلت دمعتين
قشاها بوجع السنين
الصبر بس عاد لآمتين؟
شاف طيفها يترنح حزين
وصوتها القِبيل
مُنساب حنين
في سمعو كان
زفرآت أنين
تنادي في
الأطياف بشيش
يا اهل السواقي الديش
وين فات حسن شِقيش؟
من تفتحت مطآميرو
لجارو وعشيرو
المابي تقديرو
ما دقّه لسديرو
الهيبة في شالو
كان القدر شالو
الجنّة فاتحالو
والراجي فيها عمآر
خشمو التُرآب كآلو
يا اهل السواقي الديش
ساكتين تتنطنو ليش
دلوني وروني
كان السمِح فآرق
ما اظنى بعدو أعيش.
.
.
.
ود المدير...

Quote: سلام ودالمدير كلام بالنسبة لينا العوام والله شايفنو جميل ونضم عديل ومقفى لكن زي هلال مريخ محلي بس والمحلي داخل عطبرة كان اديتو لي ناش الشعر الجد بطلعوه ليك كسور وبواقي لكن ناس نحن انت نضام خلاس تخريمة ذكرتني الطريف والظريف من اخبار العرب كتاب جميل واحد مشا للشعراء الكبار ديلك قال ليهم عندي قصيدة عايز اسمعكم ليها وادوني رايكم والراجل اول ماخلص مستعجل عايز يعرف راي الخبراءا رد عليه احدهم اظنك من اهل النبوة فقال الاعرابي مستغربا كيف فرد المُحكم لان الله قال وماعلمناه الشعر وماينبغي له واصل ومدنا بالمزيد فالغربة تولد الابداع

ههههههههههههههههه.
سلآمات يا عادل خياري.
يا اخي ناس الشِعِر الجد ديل أنا تب ما بمشي عليهُن. عشان كدي باقي عليكم إنتو بس.
تعرف،
ذكرتني زمان فرآج الطيّب كان عندو ديوان بيتلمو فيهو الشعراء والأُدباء كل يوم جمعة بعد
الصلآة. أها، أنا كنت بمشي أقعد معاهم، وطبعاً لآني شاعر لا أديب بس قلة أدب مِني، لكن
أُكُنت أصلي ما بفتح خشمي، بس بقعد أسمع كلآمُن كلللللو وامشي أهلي.
من ضمن فقرات البرنامج كان عندهم حاجة إسما (السمكرة). الشعراء كانو بيجيبو قصايدهم
يعرضوها علي فرآج وهو بيقوم بسمكرتها. يعني تعديلها من النواحي اللغوية وناحية الوزن،
وكدا. أذكر من ضمن الشعراء الأخ عوض ابراهيم عوض. بس عارف أنا كنت ماسك خشمي
عليَّ، طبعاً فرآج الله يرحمو كان قطيّم جداً، خاسةً في حكاية اللغة دي. عشان كدي أنا كنت
زول سمع ساكت، عشان ما يطلعوني من أهل النبوءة. نفس طريقة السمكرة دي كان فرآج
الطيّب بيقدم بيها برنامج في الإذآعة، كنت أتابعه عندما أجد سانحة. أها، عندنا صاحبنا من
أهل النبوة، بالرااااحة رسّل قصيدة للبرنامج، وصادف اليوم دآك أنا حضرتو. يا اخي فرآج
الطيّب دا زلآلك صاحبنا جِنِس زِلّة !!! ما خلآلو صفحة يرقد عليها. والله صحي. الصباح
أنا قابلتو في الشُغُل، وهو طبعاً داسي الموضوع. قلت ليهو البارح سامع بعض إنتاجك في
برنامج فرآج الطيّب... الراجل إتخلع وبسرعة قال لي: عليك الله شُفت الزول دا زلآني كيف؟؟؟
قلت ليهو الزول دا أنا قاعد أمشيلو عند اهلو ما بنضُم معاهو، إنت الشلآقة العليك شنو؟؟؟...

قـطـعـة أرض...


وطناً متمسح في فِجاج الدنيا
مليون ميل مُربع طول عرض..
وهموم أهلنا
الفيهو يكدحوا ليل نهار
قطعة أرض!
يا أهلنا يا إبل الرحيل..
شايلة السُقى وعطشانة
ما بتقدر تعاند وتعترض..
مدخور عشمكن
إنو في حال السفر..
تتيمموا ترابو الطهور
وتصلوا تدوهو الفرض..
وما بتعدموا الشبر البيستركن
أكان حكم القدر وواحد قِرِض..
وإن شاء الله
ما يبيعوهوا يوم..
شان ما صقور الجو
تنقرنا وتفوت..
وتصبح بطونها قبورنا
وكتين يكملن أيامنا
والأرواح تموت..
يا أهلنا، يا القاعدين
تحت ضل العمارات
والبيوت..
مبنية بطينة الحرام..
وأساسها أوهن
من بيوت العنكبوت..
إنجمعوا قوموا
نشد زواملنا ونفوت..
نرحل نفوت،
ناساً بياكلوا لحوم
بنى الإنسان،
وحاديهم ظلوم..
نرحل نهار
والفأل سحابة تظلنا
تبارينا فوقنا دوام تحوم..
باليل يداعبنا النسيم
تسهر تأنسنا النجوم
يا أهلنا يلاكم نقوم..
نمشي الشمال..
نسكن في رملات الجروف..
الناس هناك عُدال حُنان
وهم السكن ما منو خوف..
نسكن في أعشاش الطيور..
تفرح تغنيلنا الصباح
ما الطير هناك ولوف عطوف..
والناس نفوسها الطاهرة
تخدع إستحالات الظروف..
يا أهلنا يلاكم نقوم..
نمشي الجنوب..
في غابة الأبنوس
بنسكن دون إيجار..
وسُبُل المودّة البينا
بين ملوال وجون
مفتوحة ما بتقبل حِصار..
المنقة والباباي، وحبات المطر،
وزاهى الخدار..
نفرح معاها،
معانا تفرح تذدهر..
ويعم ربوعنا الإذدهار..
يا أهلنا يلاكم نقوم..
نمشي الغرب..
نرقص مع عروس الرمال
نفرح نعانق كردفان..
الناس هناك زي التبلدي..
جواهم الخير والأمان..
نسكن تحت ضل الدليب
ما بالضرورة شقق وبيت..
وحتى السُحُب لو أمطرت
ما تخافوا، بتمطر حنان..
يا أهلنا يلاكم نقوم..
نمشي الشرق..
نسكن مع أدروب خيم
منصوبة في وسط الأراك..
(دبايوا).. كسلا الحلوة..
يا القاش جينا
واقعين في حواك..
ننضم أغاني الشوق اليك
بين الخدار ننساب معاك..
ننجمة من حر الهجير
توتيل نقيل في ضراك..
يا أهلنا يلاكم نقوم..
نسكن بوادينا الحُنان..
في القرية ننعم بالأمان..
الناس هناك عُدال حُنان..
ونفوسهن، إن ضاقت أرض،
تسع اللضاق بيهو المكان..
يا أهلنا يلاكم نقوم
الناس هناك عُدال حُنان...



ود المدير...

أشـوآق لـلـبـلـد...

مِن مسافاتاً بعيدة
لتراب بلدي الحبيبة
بنضُم الأشواق قصيدة
شوقي لتمرآت بلدنا
ولغِنيمات في الزريبة
وللجزيرة انا شوقي طامِح
لخدآرا وهمبرِيّبا
شوقي لي خُدرة جروفنا
ولتقاويها البريّدا
الدِيّمة فوقا الطير يغني
يردد الأنغام يعيدا
شوقي لي حجرة بحرنا
للكماين ولي حريقا
للبِفِقدو الشآدا حُمى
ويسعلُوهو، نعلّو طِيبا ؟
للبركزو جبال شوآمِخ
دِيّما في اللحظة العصيبة
نفسي أرجع لي ديارهم
أبقى زولاً ليّ صِيّبا
ليه حُطاي طشّت وتاهت !
والدروب صبحت غريبة !؟
فرقتنا وباعدتنا،
ونفسي ما بتفوّت نصيّبا
والمقدّر مهما حِرصت
أصلو لآ بُداً يصيبا
دِيّما بالأشواق تلآهِي
لما شاخت وجفّ ريقا
ربي سهّل ليها طلّة
للديار بالحيل قريبا
أمشي أكرُف طين بلدنا
والنفِس يهمد لهيبا
وليّ تتردَّ الرِويّحة
بمُلآح ويكة وعصيّدة
يا بلد ربتنا بي عِز
دمي ليك مدفوع ضريبة
نفسي ابرُك في مسيّدِك
اردد الدعوآت، اعيدها
ربي أحفظ لبلدنا،
ونمّي فيها الخير وزيدها.


ود المدير...

يا زول نحن راجينك بغادي،
إنت وين ؟؟؟

Quote: سـاقـيـة حـسـن ... يا اهل السواقي الديش مآدين كروشكم ليش؟ ( صارين وشوشكم ليش ؟ ) ساقية حسن شِقيش تدى المُلآح والعيش يا والدة وينو حسن؟ الكان زمان صِنديد شافوهو في البندر بيعاني من الضيق ضِيّق الحياة الخلّت المِتلو يمشي بعيد يا حِليلو يا ما كان زولاً سخي وضكران ما مخلِى زول عدمان الحِلة والجيران ما شافو يوم زعلآن كان بيرفع الآذان يا حليلو يا خِلآن شافوهو في البندر بيصارع الحِرمان ساقيتو يا حليلا شالوها ناس جونا /أو/( قلعوها أيدية ) زنديّة حكمونا / أو /( حكمونا زندية ) ــــــــــــــــــــــــ ( باعوها بى مية ) ـــــــــــــــــــــــ (نصيبو كان كية ) ــــــــــــــــــــــ ( معاها طورية ) ــــــــــــــــــــــ ( قديمة مرميه ) حسن اللكان ضو بيت وسط الظلط حيران راح مِنو راس الخيط يسأل في أهل الخير يا أخوانا وينو شبير؟ قالولوا روّح فآت قام بجماعتو بعيد غنولو الف نشيّد يعرض تملى سعيد أيامو كُلها عيّد إتحيّر المسكين سألوهو ناس عآبرين يا عمو ما عندك سرير؟ رآكوبة من حرّ الهجير مكتوف على عيدانها زير لآزم الرُقاد قطعة حصير/ أو / سمحة الرقدة فوق قطعة حصير توب من فحيح الزمهرير؟ فوق خدو سآلت دمعتين قشاها بوجع السنين الصبر بس عاد لآمتين؟ شاف طيفها يترنح حزين وصوتها القِبيل/ الواو دي مافي ليها لازم مُنساب حنين في سمعو كان زفرآت أنين تنادي في الأطياف بشيش يا اهل السواقي الديش وين فات حسن شِقيش؟ من تفتحت مطآميرو لجارو وعشيرو المابي تقديرو ما دقّه لسديرو الهيبة في شالو كان القدر شالو الجنّة فاتحالو والراجي فيها عمآر/ برضو الواو زياده خشمو التُرآب كآلو يا اهل السواقي الديش ساكتين تتنطنو ليش دلوني وروني كان السمِح فآرق ما اظنى بعدو أعيش

أبيات غاية في الروعة والحنية ـ ـ
تعكس واقع معاش ـ ـ
واصل ياخي

Quote: شان احيى واشوف... الدنيا طوّف شآقي العُبآب... مليانة هم... مليانة خوف... مدّ البصر... قدامي ابحُر من سرآب اثآر حُطآم... اثآر خرآب... ظُلمة، وضبآب...

واحدة من الصور الجميلة التي يزخر بها شعرك يا استاذ
معاوية المدير

شكرا

علي اتاحة الفرصة لنا لنطلع علي قصائد جميلة
و اشعار راقية

طه جعفر

ستي نوُّر ...

شتلة من أرض الشمال
قايمة فوق كيمان جليّد!!!؟
شوفو كيف القسمة جابت
بِذرة من بلداً بعيد
شايلة روح ترهاقا جُبة
وإنكست في العم سآم
وإنبلج من صدرو نوُّر
يحكي لكلَّ الدِهوّر
قصة الشتلة المفرهدة ستي نوّ...
نابعة من أعرق حضارة
لونها خلطة
من سمار أهلي البيرهج
ومن صِبيات النصارى
حاملة طِيبة أرض طاهرة
خلّت الألباب حيارى
تايهة تسأل، آيه تكون؟؟؟
بس ملآك؟؟؟
واللآ من الجنّة حُوّر؟؟؟
فوقو يا عقول يا سُكارى
دي سِتي نُوّر...
بطبايعا بصفاتا،
ستي نُوّر قريتنا زآتا
إبتسامتا نُور صباحا
بتبعث الأمل الجميل
في نفِس تربال مكافِح
خلآ شتلتو فوق طرف
جدول بيمرح
مآخدة رآحة
ووسّد الراس الضُرآع
أخدلو دقسة تحت ضراها
وصوتا صوّت قمرية حآنة
علي الصغار ضمّت جناحا
نظّمت عُشا الصغير
فوق شتلة التربآل براها
وخلّت النسمة الرقيقة
بِشيش تطوُّف
سابحة في وسط الجروف
تلثُم أكمام الزهور
وتمسح احزآن اليتامى
لمّ تبقى النسمة زآتا
هي ستي نُوُّر...
وجهِك المُشرق وحآتِك
صافي يلصِف زي رِمال
لمّ يعكس فيها نُور القمرا
تلمع في التلآل
يحكي لي عن صُفرة القمح
المصوبر في التقاوي
وشعرك المجدول ظلآم حِلتنا
والحبوبة سرحت في الحكاوي
تحكي فاطنة السمحة
لي وكت السحُوّر
وفاطنة يا حبوبة في غربتنا
بِنتِك سِتي نُوّر...
فيك بشوق كُلّ الأهل
داقسين تِحِت هدب الفريق
وفيك بشوف كلما التسآب
هدم البيوت نجدة غريق
فيك ملآمح من بيوتنا
الرآسخة تمثال للبساطة
في ضِليلآ الرآمي مجلس جبنة
وآخر إنبِساطة
وناس نفوسهم طيّبة
ما فيهُم ضجوّر
ديل أهلك الصامدين هناك
يا سِتي نُوّر...
نُخبة من فرسان
مسرّجة فوق ضُهور الصبر
في زمناً صعيّب
شاقة تيار الزمن رغم القساوة
خايضة في وسط اللهِيّب
تترك الشقى في قفاها
لو صِبِح في الدآر غريب
وتبدو بسمة مرآبضة فوق
كُلّ الثغوّر زي بِسيمتِك
يا ملآمح من بلآدنا
يا سِتي نُوّر...
هادي طبعِك
زيو زي النيل في
ساعات المغارِب
صافي مُتقطّعِ دوآير
والطيور الطايرة فوقو
تدآعبو بي جِنحينا
يستمتع ويتشكل دوآير
في ملآمحِك خُدرة
زي خُدرة جُروفنا
كلما حاولتَ اوصِف ودآعتِك
خِجلت إتوآرت حُروفنا
إنت يا أجمل صبيّة
فايحة زي ريحة
البرم عِزّ الخريف
شالتا النسمة الوديّعة
وعطّرت كُلّ الجنايِن
إزدهت أقبل ربيعا
وحلّت اسرآب الفراش
زي مهرجان الوآن
تغازل في الزهور
فتّحت كل البرآعم
وإنفجر شلآل عطّوّر
ضمّخ القرية
البترمُزي ليها إنت
يا سِتي نُوّر...

عانقت افريقيا قِمم الروكي،
فتفاعلت سُحُب الحرآرة والبُرُودة
واعتلت في الجو،
فصطخب الفضاء
بلآمع البرق
وأصوآت الرُعُودة،
فجاش صدر الأرض
بالماء الزُلآل،
فأنبت شتلة آية من الجمال
في لآفح الحر والهجير
تهِب النسيم، تهِب الظِلآل
في موجة البرد الفظيع
هي الدثار من الجليّد
في وآقع الغُربة الأليم
تصبح القلب الرحيم
إنها بلدي الحبيب
عِزّ الموآسِم
في زفّة الأفرآح تشارك،
وبرضو لألآم تقاسِم
إنها حلفا ونِمُولي
إنها الخرطوم تنضح بالجمال
إنها القرية الصغيرة الحُلوة
في أرض الشمال
وهي رمز الحُب
في أرض الجذور
أحلى شتلة من بلآد النيل وحآتكُم
زيّنت أرض البراري
هي سِتي نُوّر...
.
.
.
ود المدير

ودالمدير الفتان
انت ماعارف انو من فتن مسلم فتنه مسلمين اخرين ولاشنو
عندك دين عندى حالفه اردو ليك خاصه انى من المعتقدين اعتقاد تام فى مقولة من سد دينو نامت عينو ... وهى من ابلغ الكلمات
الكانت من انتاج وتلحين وترديد الحاجة عائشة بيت عبدالحفيظ حاج على ... (حبوبى لاامى وامى انا ) الى ان تسترد ماقمنا باستلافه منها من المال
وكانت اسرع واكتر طريقه مضمونه خاصه اذا كان معاك ضيوف ... البوست جميل لكن انا دينى مامخلينى اشوف الجمال ده ... بعين متجردة النصيحة لله
المهم انا بس حبيت اوضح موقفى واحتفظ بحقى فى رد الدين ..


الحقيقة انو ذه شعر عديل ... وجميل جدا اصلو مامحاولات ... الحاله وانا داخله وقاصدة امر اخرههههههههه
تسلم يارب

ونواصل إن شاء الله.

تحياتي...

نسيت ان اعلق علي الصور الفعلية
not the depicted
in the poetry
فهي فن فتوغرافيا راقي ايضا
يعتقد الكثير من النقاد ان الشعر هو سيل و فيض من صور
علي هذا الاساس
يكون هذا النشر المتواتر للنصوص هو نشر لشعر مليء الصور الموحية الدالة
يحتاج كل نص الي وقفة
يحتاج الي نظرات تفكك غموض صوره ، لست من نقاد الشعر
لكني متذوق له
اعتقد ان ارفاد البوست بالصور سيجعل فهم النص الشعري ميسورا
و ربما يضيف اليه الوانا
عند الكثيرين
فانت تكتب و صورا في ذهنك
لتكون صورا في ذهن القاري
كلها جميلة و فنانة
فلك الشكر


طه جعفر

Quote: ودالمدير الفتان انت ماعارف انو من فتن مسلم فتنه مسلمين اخرين ولاشنو عندك دين عندى حالفه اردو ليك خاصه انى من المعتقدين اعتقاد تام فى مقولة من سد دينو نامت عينو ... وهى من ابلغ الكلمات الكانت من انتاج وتلحين وترديد الحاجة عائشة بيت عبدالحفيظ حاج على ... (حبوبى لاامى وامى انا ) الى ان تسترد ماقمنا باستلافه منها من المال وكانت اسرع واكتر طريقه مضمونه خاصه اذا كان معاك ضيوف ... البوست جميل لكن انا دينى مامخلينى اشوف الجمال ده ... بعين متجردة النصيحة لله المهم انا بس حبيت اوضح موقفى واحتفظ بحقى فى رد الدين .. الحقيقة انو ذه شعر عديل ... وجميل جدا اصلو مامحاولات ... الحاله وانا داخله وقاصدة امر اخرههههههههه تسلم يارب

هوووووي يا ماجدة بت خوجلي.
بعد السلآم،
أنا لآني فتان لا حآجة إنت برآك اللفحت الكلآم بلا جيّهة. ما تسويلك فوقي ديون ساكت.
هسّع الإهداء الفوق دا شفتيهو، واللآ برضك جيتي ضايقة علي مناكفة الديون؟؟؟
عشان تعرفي ليك معزّة خاصة عندنا، وتعفي الدين.

إهداء للأخ الحبيب يعقوب العجب
صاحب الأبيات الأُولى من المحاولة.

أُمـنـيّـة ...

أأكوُنُ فارسك الحبيب المُنْتَظَر ؟؟؟
ذآك الذي يأتيك فوق جواده
قد قاتل الغيلآن عنكِ وإنتصر ؟؟؟
يخطفك من أوكار غول نائماً
مُتوسداً من حِرصِه
خُصل الشِعِر !
يا فرحتي... لو كُنتُ
فارسك الحبيب المُنتَظر
لكنما آهٍ،
خطايا تثاقلت عنك
وأشقاني السفر
قد ابحرت سُفُني
مع الحيتان
والمرجان
من بحرٍ لِبحر
حتي قذفني الموج
في اقصى شمال الأرض
حيث هناك كان المستقر
حيث الظلآم الدآمس
المجنون
يبتلع القمر
والأرض ألبسها الجليّد
الشيب إلي مد البصر
والزمهرير مع الرياح العاصفة
إحدى الكُبر
لكنني ما زلت
يحدوني الأمل
رغم السنين الظالمة
خطت علي وجهي اثر
قد شاخت الأوصال
مني كلها
والرأس شيباً إستعر
لكنما ذكرآك دوماً
خاطراً ما اظنني
من قربه اقضي وطر
هو دآفعي
ومُرآفعي
ومدآفِعي
إن لآمني أو صدني
عنك البشر
إن كانت الغربة مطر
هو ساعدي
سأخوضُ اوحال المطر
أو صارت الغربة
اعاصيراً تزمجر
في السحر
هو سابغات السرد
اصدُ بها أعاصير الخطر
أو صارت الغربة شياطيناً
تنادت كي تجرعني السهر
هو لي حجاباً
في يدي اليُمنى
يدآفع كلّ جنيٍ كفر
حتي إليك اعودُ
اشلآءً ممذقة القوى
قد هدها مر الدهر
لأجدكِ كالنيل الذي
ما شاخ يوماً أو فتر
كالزهرة يغمرني عبيرك
عبر نسمات البحر،
أنهض الملم كل
شتاتي وقوتي،
فأصير عملآقاً هدر
هل يا تُرى
أأكون حققت الذي
في خاطري ؟
أأكون عنترة قد ظفر ؟
أأكون قيس ؟
ذاك الذي في الحب
كل الذنب عنده يُغتفر ؟
يا فرحتي،
لو كُنتُ فارسك الحبيب
المُنتَظر
ذآك الذي يأتيكِ ...


ود المدير...

إســـتـــرآحـــة ...

ودالمدير عنك طيب
اها انا مابعرف اكتب ميشان اهديك لكن بعرف الفح من اليوتيوب وداليمنى فنانى المفضل فى الطنبور
شكرا ليك كتير على الاهداء وتسلم يارب ...

Quote: الله لا تاجرك ياود المدير الجمال دا كلو وتقول لي محاولات والله دقنوسي دا لو بيقدر يعصر زي الشعر دا تاني سلام الله ما أديهوا زول . يازول طريقك أخضر والله صحي واصل ساي

يا ود الباهي ما تجي تورينا سويّت كيفِن مع غجر السجم،
أكان نقوم علي مُشهادنا.
قلت لي النضمي المبوجن دا عجبك !!!
سبحان الله !

Quote: واحدة من الصور الجميلة التي يزخر بها شعرك يا استاذ معاوية المدير شكرا علي اتاحة الفرصة لنا لنطلع علي قصائد جميلة و اشعار راقية طه جعفر

الأخ الأديب الحبيب،
طه جعفر.
ألف شكر لك وأنت تعطر هذه المساحة بمرورك الجميل.
وشكر تاني علي إطرائك علي محاولآتي المتواضعة.

مودتي...

يـا شـعـب ثـوّر...

للخلف لا... لا لن ندوّر
إلي الأمام يا شعب سِر
انفُض غُبار الظُلم ثوّر
يا شعبنا العِملآق
يا اسداً هصوّر
يا من كسرت الظُلم
والطُغيان في ماضي العُصوّر
يا قائداً كلّ الشعوب
إلي العُلا عبر الدُهُوّر
دمّر جِدآر الصمت
كالبركان فُوّر
سنُحطم الأغلآل
نجتاز المتاريس الجِسوّر
سندُكُ هامات الصخوّر
ونسير نحو المجد
عزمنا لن يخوّر
وسنملأُ الكون هُتافاً داوياً
يدُكُ جدرآن القصو القصور
لا بديل للتتغيير..
لا بديل للتتغيير..
لا بديل للتتغيير..
لا بُدَّ للطغيان حتماً ان يزوّل
يا شعبنا الجبآر ثُوّر
مذّق سِتآر الظُلم
في الطُرُقاتِ صُوّل
حطّم قُيُود الذُل
في الطُرُقاتِ جُوّل
سنسيرُ نحو منابع الحُريّة
نزبِد كالسيوّل
وإلي سِنام المجد
نجمح كالخيوّل
سندُكُ عرش الظالم
الباغي الجهوّل
وسنغرس النصر المُؤذر
فرحةً تزهو بها كلّ الفصول
سنهُبُ فجراً للمصانع
للمكاتب للحقوّل
للمساجد للكنائس
للمدارس للفصوّل
وعلي ثغور براءة الأطفال
يندآح الحبوّر
وعلي سِمى الأجداد والأباء
والأُمات يرتسم السرور
وإليك يا وطني تسيل دماءنا
اغلى المهوّر
وتُطِلُّ فوق مقابر الشهداء
الآف الزهوّر
ونغني مجدِك يا بلآدي
مع أهازيّج الطيور
يا عازة أرفُلي في ثياب
العِز يا بنت الأصوّل
لا بُدّ للطُغيان
حتماً ان يزوّل
للخلف لا... لا لن ندوّر
إلي الأمام يا شعب سِر
أنفُض غبار الظُلم ثوّر...
.
.
.
ود الـمـديـر...

التِويمات ديّل بِنيات أخوي...

النِسيمات و التِويمات...

النِسيمات المِن مسامات الجروف
مرقن دُغُش يتبخترن
رشفن حِبيبات الندى
الفوق الزهور وإتبسمن
شالن خيوط من الفجُر
نسجن طِريحات إنكسن
طافن علي نُوآر جناين
النيل مِنّو اتعطرن
نغم الطيور عند الصباح
هيّج شجوُّنن ودآعبِن
رقصن مع سِرب الفراش
نشوان يرفرف لآعبِن
ضو الصباح إنشرّا
فوق زاهي الغصون
هآم وآدعِن
والوادي بصدرو الرحيّب
قبّل خُدُودِن وودعِن
غِشن التِويمات
في ضرا البيت الكبير
قاللهِن ناويين قيام
لعمكن ود المدير
بي مهلة قولنلوا الوصية
ونحن ليهو نوصلا،
قاللهِن ادنن قُرآب
أشواقنا ليهو نفصِلا
قولنلوا،
شوقنا كتيّر، كتيّر
مِنشري زي بحر السرآب
ما ليهو حد،
مِترامي زي قيزآن رِمآل
ما ليها عد،
مُمتدي لي حد السما
بين الضلوع
بتّق نمى
شوقاً كتيّر،
كلّ البلد مُشتاقة ليك،
تمراً تِحِت
شُدر السُنُط،
قيفة البحر،
شُدر الحراز،
كلّ الشوارع و الدِروّب
ناساً عُزاز،
كلّ الأهل راجين مجيك
وكلّ البلد مُشتاقة ليك.
قولنلو بس،
لمتين تعود ؟
ما شوقنا فات كلّ الحدود
لو تسخى بالطلة وتجوّد
كلّ المشاعر الحلوة
في دآخلنا تتفتح وُروّد
ونفوسنا لزوامل الفرح
تصبح مشارع للورود
قولنلو بس،
لمتين تعود ؟
قولنلو بس،
لآزم تعود.
بدن الرحيّل
رِكبن علي عكف السروج
شقّن بُساط الخُدرة
في زآهي المُروج
خاضن بِحآر،
قطعن مُدُن،
طون القفآر،
وصلنو ليل الرحلة
بي طُوّل النهار.
وردن مرآسي الشوق
لِقني هناك غريب
قالن، سلآم.
قُت ليّهِن،
ادنن مِني جآي
أبقن قريب
فيكن بشم ريحة التراب
وهبالِي من تلآكِن
أطيّب همبريب،
فيكن بشُم ريحة التِويمات
عابقة فاقت كلّ طِيّب.
بالله كيف عاملآت
مع حِلتنا والناس الحُنان ؟
والله طيبات روّقة،
في امن، وأمان.
بس دِيّما مِنّك ينشِدن
راجيات مجيّك،
راجيات رجوعك للفريق
البرضو بِسأل ومِشتهيّك،
ووصّن عليك،
لآزم تعود
قالن، كفاية الإغترآب.
والله لو كان يعلمن،
أصلو ما كان في الحِساب.
لكني في لوح الأزل
مكتوب علي في الدنيا
اضوق طعم العذآب،
مكتوب علي هجر البلد
الفيها كان مرتع صِباي
ولمّة الناس والصِحاب،
الفيها توماتي البريّدِن
وريدا في انفاسي دآب
وريّدِن الجواي معشعِش
في ضلآم الغربة
باقي لي حِجآب.
أمشن هناك قُوللهِن،
درباً يودي
لابُدّ في يوم مِن يجيب
وعزانا بس نرجع نقول،
سهم القدر لآبُد يصيّب
والغربة تبقى في حدِ زآتا
مكتوبة لي قسمة ونصيّب،
لكن مصير الزول يعوّد
لوطنو لو طال الزمان
ومصيري لو طال العُمُر
ارجع لتوماتي الحُنان،
ارجع اضُم حُضن البلد
إتهنى واشعُر بالأمان
وتبقى سيرة الغربة
كلها في الزمان
الكان
و
كان...
.
.
.
ود المدير...

إشـتـهـيـت أهـلـي ...


إشتهيت ساعة العِصيّر
شبورة نزلت فوق
فِريعات السُنُط
ريحة الدُعاش
ممزوجة بي ريحة البرم
وريحة المُرآح
حبوبة تحلِب في الغنم
ندهت جميع أهل الصلآح
مطراً يخدّر أرضنا
مطراً يحيّن ضرعنا
القِبلي يشلع في السحاب
ودُكناً بُعاد صِبحن قُرآب
والوادي خدّر
زي تقول ما كان يبآب
نُوارو فتّق في الغصون
لمّ الفراش
الزِيّفة والمطر الدُعاش
طراها زول من اهلو غاب
رفعت إيديها اضرّعت
للمولى يرجع للصِحاب
نزلت دُموعا علي الخدود
سآلت مع مجرى الشلوخ
يا ربي تِنحلّ الصِعاب
ويعودو للبلد البُعاد
إشتهيت،
شهقة صباحات الفريق
وضو الشمس
ينسج وِشاحات يوم جديد
وناعس الخدآر
الفوقو نام قطر الندى
صحاهو نسام البحر
الهابي من تلآ الصعيد
مرقن تخايات في السما
نُصّت نهار
كايسات يضارن للشمِش
يوماً مولّع نار وحآر
لكنو كان يوماً سعيّد
والدِنيا عيد
عيدية واطفالاً سُغار
الفرحة في عيونهم تلُوّح
وناساً كُبآر
الهيبة فوقهم والوقار
إشتهيت
قيفة البحر
مويتو المنقِعة سلسبيل
وبحرنا في واديهو نِيّل
جُرُوفنا والليل الطويل
والقمرا بينات النخيل
القعدة فوق صافي الرمال
السمحة والزمن الجميل
كلآم دُقاق وعبير جروف
خدر العِشِق وندى الحروف
والدنيا ليل
كل الوجود رآخي السمع
حتي الخدآر بفوقنا مال
يِصنّت النضم الدُقاق
لمتين اعود للسمحة
ما طال الفُرآق؟
طال الفُرآق
والغربة ما بتصير وطن
طال الفُرآق
وشوق السنين
في الجوف سكن
ومهما السِنين إتراكمن
وقِسى الزمن
الغربة ما ممكن تكون
لزول وطن
والغربة ما ممكن
تكون لزول سكن
.
.
.
ود المدير...

إســـتـــرآحـــة ...

مِنشري زي بحر السرآب
ما ليهو حد،
مِترامي زي قيزآن رِمآل
ما ليها عد،
مُمتدي لي حد السما
بين الضلوع
بتّق نمى
شوقاً كتيّر،
كلّ البلد مُشتاقة ليك،
تمراً تِحِت
شُدر السُنُط،
قيفة البحر،
شُدر الحراز،
كلّ الشوارع و الدِروّب
ناساً عُزاز،
كلّ الأهل راجين مجيك
وكلّ البلد مُشتاقة ليك.
قولنلو بس،
لمتين تعود ؟
ما شوقنا فات كلّ الحدود
لو تسخى بالطلة وتجوّد
كلّ المشاعر الحلوة
في دآخلنا تتفتح وُروّد
ونفوسنا لزوامل الفرح
تصبح مشارع للورود
قولنلو بس،
لمتين تعود ؟
قولنلو بس،
لآزم تعود.
بدن الرحيّل
رِكبن علي عكف السروج
شقّن بُساط الخُدرة
في زآهي المُروج
خاضن بِحآر،
قطعن مُدُن،
طون القفآر،
وصلنو ليل الرحلة
بي طُوّل النهار.
وردن مرآسي الشوق
لِقني هناك غريب
قالن، سلآم.
قُت ليّهِن،
ادنن مِني جآي
أبقن قريب
فيكن بشم ريحة التراب
وهبالِي من تلآكِن
أطيّب همبريب،
فيكن بشُم ريحة التِويمات
عابقة فاقت كلّ طِيّب.
بالله كيف عاملآت
مع حِلتنا والناس الحُنان ؟
والله طيبات روّقة،
في امن، وأمان.
بس دِيّما مِنّك ينشِدن
راجيات مجيّك،
راجيات رجوعك للفريق
البرضو بِسأل ومِشتهيّك،
ووصّن عليك،
لآزم تعود
قالن، كفاية الإغترآب.
والله لو كان يعلمن،
أصلو ما كان في الحِساب.
لكني في لوح الأزل
مكتوب علي في الدنيا
اضوق طعم العذآب،
مكتوب علي هجر البلد
الفيها كان مرتع صِباي
ولمّة الناس والصِحاب،
الفيها توماتي البريّدِن
وريدا في انفاسي دآب
وريّدِن الجواي معشعِش
في ضلآم الغربة
باقي لي حِجآب.
أمشن هناك قُوللهِن،
درباً يودي
لابُدّ في يوم مِن يجيب
وعزانا بس نرجع نقول،
سهم القدر لآبُد يصيّب
والغربة تبقى في حدِ زآتا
مكتوبة لي قسمة ونصيّب،
لكن مصير الزول يعوّد
لوطنو لو طال الزمان
ومصيري لو طال العُمُر
ارجع لتوماتي الحُنان،
ارجع اضُم حُضن البلد
إتهنى واشعُر بالأمان
وتبقى سيرة الغربة
كلها في الزمان
الكان
و
كان...
.
.
شكرا ليك كتير كتير الاستاذ ود المدير يشهد الله بأني استمتعت بهذه الخريدة الرائعة جيتك وارد ضمي مِربِع
وغرفت من اضاتك ومليت الري وقمت سداري صادر
بين الضلوع بتق نمي شوقا كتير
وحتي شدر الحراز بشتاق.....! والله ريد اصم
لو تسخي بي الطلة وتجود
ونفوسنا لي زوامل الفرح
بدن الرحيل ركبن علي عكف السروج
والله نضمي دقاق كيف قوقاي القمري وكيف لود الزمبارة خلانا من الغربة نشاشي ....!
ليك المحبة يا جدع

Quote: ودالمدير عنك طيب اها انا مابعرف اكتب ميشان اهديك لكن بعرف الفح من اليوتيوب وداليمنى فنانى المفضل فى الطنبور شكرا ليك كتير على الاهداء وتسلم يارب ...

لكن اللفحي ما عندِك يا ماجدة. لفحي
طاعم بالحيل.
والله صحي...

إليها بمناسبة العيد.

طلّ الصباح
زافاهو طيات الغمام
نفس الأرض ضماهو
بي شوق مُسهام
قُرب المسافات
بينو بين شدو الطيور
وعِطر الزهور
خلق إنسجام.
يا زهرة لونِك
أحلى لوّن
يسبي العيون
من غير تلآمسِك
حتي قطرآت الندى،
ولو لآمست،
بس كيف يكون ؟؟؟!!!
الناس ينادوك نادية
ثغرك يبتسم
يا حلوة يا زينة الحقول
لو شُفتِ يوم سِت الإسِم
في لحظة عُمرك ينقسم
لونِك يصيبو الإصفرآر
وآدِيّك يموت فيهو الخدآر
يا زهرة شآن زاهي المروج
إنسحبي من درب الودآر
في السمحة
ما بنقبل هِزآر.
.
.
.
ود المدير...

ود المدير
و الله أنا بحبك لوجه الله
كلامك و شعرك بذكرني بأزهري الحاج
يا الللللله أين يركن هذا الزول في هذه الفانية
أجمل إنسان تعرفت عليه في مسطرة هذه الدنيا

بالمناسبة (ود الصول) أو ود الموج
صديق
لبرالي فطرة و وعي

علاقتي اللصيقة لأبي الصول
الزول اللبرالي بالفطرة

said so

شاهد عيان
_________________________________________________
و الدنيا ماشا لي قدام

Quote: ود المدير و الله أنا بحبك لوجه الله كلامك و شعرك بذكرني بأزهري الحاج يا الللللله أين يركن هذا الزول في هذه الفانية أجمل إنسان تعرفت عليه في مسطرة هذه الدنيا بالمناسبة (ود الصول) أو ود الموج صديق لبرالي فطرة و وعي علاقتي اللصيقة لأبي الصول الزول اللبرالي بالفطرة said so شاهد عيان _________________________________________________ و الدنيا ماشا لي قدام

كوستاوي يا أعزّ الناس،
وأنا أحبك في الله الذي أحببتني فيه حباً سرمدياً باقياً
لا ينقطع. أسأل الله أن يجمع شملك بصديقك أزهري
الحاج.

عفواً يا كوستاوي أطلت عليك، لكن والله العظيم قلت
أصلوا ما أجيك إيدي فاضية، دحين أقبل مني النضمي
التحت دا ولك مني العذر حتي ترضى.

محبتي...


جـرف الـحـروف...

تيراب حُبنا المطمُور
من زمناً بعيد بالحيل
فوق جرف الحروف
شتتو بتق لي غناوي الريد
مقاطع ترسمك درفوّنة
في زمناً،
راح خلآني ليهو أعيّد
زمن فوق ضفة الأشواق
كنت أتاتي دابي وِليّد،
وكِت شبيّت، وشبّ
معايَ ريدي وزآد
قالوا علي بقيت عِربيّد !
أنا العِربِيّد رآسم إسمي
فوق سلوّكة في الحيضان
تاكِل حِملِي فوق تربال
يقرع في الجروف حفيان
مِتوسِد ضافير نخلة
فوق جدول طروّب هيمان،
وأنا التايه،
ممدد في صحاري الغربة
بحلم يوم أجيك هيمان
نعيد الماضي من أوّل
وسط أصحابنا والجيران
أجيكي، أشيل عصاتي
الفي رُكُن أوضتنا متكيّة
ادرع فوقي عراقي
زمان علقتو فوق
أعواد رِوِيكِيبتنا يا بنيّة،
وامرُق اطايب الخِلان
أقالد فيهم الطيّبة
عِناق واسُوّق وطوريّة،
وارجع ليكِي من تاني
نقعد فوق رِمال النيل
مُشتاق ليك كتير بالحيل
القاكي الزمان ياكي
وياها الفيكِ محريّة
احكي ليك عن ريدتي البتاتيها
عن الغربة ولياليها
عن الآما ومأسيها
وتحكي ليا عن صبيان
في دارتك دوآم راكزة
دروب القِدة في ضهوُرُن
دوآم نآزة
وأنا الخجلآن
بعد ما كنت فيك مُرتاح
جريت مِتل الوحوش
مِن اللسد فازة
ولو سمحت ظروفي بقيت
اجيك في كل عام مرّة
طلّة سريعة في إجازة
أقابل فيكِ ناس سمحين
أبِل أشواقي يا العازة
والكان السبب في البين
شاحد المولى يتجازا.


ود المدير...

نتلاقى في الربع الجاي،
إن شاء الله.

ليكم محبتي يوّت زايدة لا كلّت لا ملّت...