البشير ضرب امه في عضم الشيطان والشعب السوداني في عموده الفقري

جاء في مقابلة مع حاجة هدية ام الرئيس البشير المكتفي رئاسياً بـأن ولدها وهو صغير ضربها في عضم الشيطان بسبب قنقر ولما كبر ودخل الكلية الحربية وبعدين جابوا ناس الإنقاذ بدل فاقد للرئيس الفعلي المرحوم مختار محمدين الذي مات في حادث طائرة قبل مواعيد انقلاب يونيو لم يكن غريبا علي البشير حكاية الضرب هذه

أول بالتبادي ضرب شيخه ذاته في قفاه زي ما بقولوا المصريين وضرب القفا عندهم عيب كبير .. في رمضان 2000 في ما سمي بالمفاصلة ضربه مع شيخ علي عثمان ضرب غرائب الأبل وخلوا ريحته طير طير.. وده بسبب أنه شيخه لمح بأنه حياخد قنقر الرئاسة من البشير وزملائه التانيين.

تاني بالزبادي ضرب ضربته الكبري بازاحة قرنق صاحب مشروع السودان الجديد وأدت هذه الضربة لإنفصال الجنوب وبدء تقسيم السودان لأنه قرنق لو عاش كان اخد قنقر المشروع الحضاري واداهم مشروع السودان الجديد.
وهو رئيس وافق علي ضرب ضباط حركة رمضان 90 موقعاً علي مرسوم اعدامهم الذي احضره المرحوم ابراهيم شمس الدين بما معناه وقع يا ريس الجماعة ديل خلاص انتهوا كانوا عاوزين ياخدوا قنقر الحكم مننا.

ضرب الشعب السوداني كله في عموده الفقري:

اصبح افقر شعب في العالم العربي ويكاد في الإفريقي رغم ما يذخر به السودان من ثروات وموارد.

حرب إبادة في دارفور .. ولما سئل بان القتلي عددهم تجاوز المئة ألف قال: بأنه لا يتعدي ال 10 ألف جاي يكحلها عماها وده كله بسبب قنقر السلطة
حرب مستعرة في ج كردفان والنيل الأزرق يموت فيها المواطن دوساً تحت أرجل المتصارعين جريا وراء قنقر الثروة والسلطة
موت فجائي وبطيء بسبب امراض فتاكة من سرطانات وفشل كلوي وحمي تايفود وصفراء وأنيميا وايدز وزهايمر اصاب معظم ايناء الوطن بسبب هم المعيشة وده كله بسبب قنقر الرئيس.
وضرب الشباب في اعز ما يملك نخوته وشهامته ورفضه لواقع مرير وحوله لشباب مغيب مخدر لا بورك فيه حتي لا يثور ضد قنقره العجيب.
ضرب النساء بسوط الشريعة بسبب البنطلون والجزمة اللون وشرايط انحلال الرقيص الماجن تأتي من قلب سجنه في حفل سجاني راقص خلاف حفلات اخري مانعاني اكل فيها البعض مع الريس قنقر الانبساط والانشراح.
ضربك يا حاجة هدبة بحديدة في عضم الشيطان وضرب الشعب السوداني كله بمرزبة في عموده الفقري؟

نسين ان ابارك الجمعة للجميع وده كله بسبب القنقر