Post: #1 Title: قون غانا الأول ... Author: محمد البشرى الخضر Date: 03-25-2013, 11:43 AM Parent: #0
بصراحة يا خوانا سبيت للمعز لكن بعد رقت وشفت الفيديو تاني لقيتو معذور تخيّل فجأة كدة تلقى أربعة مهاجمين قدّامك واحد منهم تحت رجلينك صارّين ليك وجارين عليك زي ناس الكشّة ولا في مدافع واحد من تيمك جمبك يخت الرحمن في قلبك فا ليه حق يفنجط كدا و يغلبو اليسوّيه
من ناحية تانية دي جملة تكتيكية بنت كلــب, تتلعب الكورة على اليمين ورا الباك في واحد لابد هناك وفي نفس اللحظة اي مهاجم قريب بس يجري على القون لا يلوي على شيئ طبعا الباكات بكونوا مركزين على الح يشوت الكورة و خاتين احتمال انو يشوتها مباشرة وطبعا واقفين مدين القون ضهرهم يعني لحدّي ما يلفّوا و يدوّروا تكون أم الحسين اتنفخت ناس الحيطة طبعا انساهم بعيدين و مركّزين على حماية العدّة وبالهم مع الح يشوت الكورة و الجمبو اها لمّا يكون عندك تلاتة اربعة مهاجمين قدّام القون وواحد فيهم مضايق الحارس ومافي اي مدافع كل ما على الجناح يعكس الكورة بعيدة من الحارس و أكيد ما حتجلّي من التلاتة الباقين اتيامنا بتلقى خرتمية ضربة ثابتة في المباراة الواحدة غير الركنيّات و كلّها - أو اغلبها - بتتنفّذ بالبركة ساي يا صدفت و جابت يا اصلها ماشة الكشّافات جمل زي دي بسيطة و لو الناس اتدرّبوا عليها وأجادوها ممكن تحسم مباريات عندنا جوانب نقص كتيرة و تعويضها ما بالساهل ناس لياقة و جماعية وفكر بل و موهبة حتى فحقو مدربين يركّزوا على حاجات زي دي ممكن نعوّض بيها النقص في الجوانب التانية خاصة وأن المجهود المطلوب ما كبير
أبو حتوت خبير تنظير رياضي :)
Post: #2 Title: Re: قون غانا الأول ... Author: محمد عبد الماجد الصايم Date: 03-25-2013, 12:06 PM Parent: #1
هذا المعز سبب أساسي في معظم خسائر الهلال أو المنتخب!!
Quote: بصراحة يا خوانا سبيت للمعز لكن بعد رقت وشفت الفيديو تاني لقيتو معذور
هههههههههههه يعني لما سبيت ليهو في المرة الأولي دخل النار ؟؟؟ ولما لقيتو معذور في المرة التانية دخلتو الجنة؟؟؟ قول سبيتو وعذرتو من إسي للعيد البعد الجائي يعني ح يخسر واللا يربح شنو ؟ قوم لف .
Post: #5 Title: Re: قون غانا الأول ... Author: أمير محي الدين محمد Date: 03-25-2013, 12:26 PM Parent: #1
Quote: فا ليه حق يفنجط كدا و يغلبو اليسوّيه
و..يشوّت ويشلّت الهواء زي شلاليت الأيام دي المدورة هنا لا تفرز صاحبك لا عدوك القون التاني مروحوك طوطحوك القون التالت برضوا نطحة عدوك الرابع ..ماعايز إإإي نتظير بس قول زي ما أنا قلت ياااااا النبي داوؤد
Post: #6 Title: Re: قون غانا الأول ... Author: محمد عبد الماجد الصايم Date: 03-25-2013, 12:29 PM Parent: #5
زمن زغبير واخوانه كان في مهاجم يقدر يدخل في المنطقة دي ؟؟؟ غاني واللآ جن أحمر ؟؟؟
سلآمات يا ود البشرى.
يا أخوي أعمل حسابك من الدغت. أنا أصلوا جاني...
Post: #9 Title: Re: قون غانا الأول ... Author: محمد البشرى الخضر Date: 03-25-2013, 01:03 PM
المعز شقي حال غايتو يا اخوانا المعز دا ما تقارنوه بي حامد بريمة, دي ياها كورتو العندو كدا وعلى العليه الدفاع القدامو سلطة طحينة
بعدين بصراحة كدا تنفيذ الغانيين للجملة التكتيكية دي بجهجه اجعص حارس, تخيّل أربعة مهاجمين قدامك وانت الله وراسك ودي الحتة الانا عايز اشير ليها في البوست دا كورتنا بصفة عامة سجمانة و مدربينا سجمانين أكتر, لكن بي سجمها دا ممكن نطلع منها بي فايدة حكاية التدريب على جمل تكتيكية معينة تحرز بيها اهداف و كيفية التنفيذ السليم للضربات الثابتة دي نقاط قوة لو استغليتها كويس بتعوض فارق القدرات تخيل لو عندنا واحد زي يوسف الثنيان* مثلا يجيد تنفيذ الضربات الثابتة, زي دا لو واقف الكورة كلها ما عامل شي و الناس بي جاي بي جاي يسلفقوا ليه فاولين تلاتة باي طريقة هو يبصّر منهن واحد ينهي الكورة الضربات الركنية لو اتدربوا عليها الناس بخطة معينة معروف الحينفذها منو و كيف و لمنو و ح تقيف ليه وين ممكن تكسب بيها عادي و باقي الكورة يتموه غلاط وتقفيل دفاع احنا عندنا نقص في جوانب كتيرة و قصة معالجتها كلها مرة واحدة قاسية و صعبة لكن ممكن نبدا بي الأسهل و الفي متناول اليد
__________________________ *ما متأكد لكن لاقتني معلومة من قبل ان يوسف الثنيان ودّوه البرازيل سنة وشوية للتدريب على الضربات الثابتة ما عارف مدى دقة و صحة المعلومة دي
المعز حارس غلبان حركته تقيله + لا يحسن تقدير استقبال الكرات المعكوسة . يجب على الفريق القومي والهلال إيجاد بديل للمعز
Post: #11 Title: Re: قون غانا الأول ... Author: جمال ود القوز Date: 03-25-2013, 05:02 PM Parent: #10
الشئ العجيب .. المعز برغم مستواه المتدني جداً .. بيلعب أساسي طوالي .. كان في الهلا ل ولا في المنتخب .. وفي حال غيابه بس .. يستطيع باقي الحراس ان يلعبوا .. مفارقه محيراني شديد .. المعز حركتو تقيله .. وبيتأخر شديد في اتخاذ قرارته .. يخرج ام يبقى في المرمى .. والكرات المعكوسة وضعفه في التقاطها .. دي مصيبة المصائب البيعاني منها .. رغم اني هلالابي .. لكن حامد بريمه .. كان حينما يقرر الخروج من مرماه .. يكر كالأسد .. ومابيرجع إلا والكوره في يده .. مش زي معزنا ده .. التقول لاعب ملوص في ضل العشر .....
ــــــــــــــــــــ
قطعاً لن نحمل المعز كل ما حاق بكرتنا من دمار وتراجع .. وخسائر بالاربعات .. فهو تدهور وتدني حال بلد بي حالو .. والكوره لن تكون قاعدة في برج عاجي .. فقطعاً سيطالها ذاكـ التدني المريع .. الذي تجري فصوله لتشمل كل مناحي حياتنا ...
