سيسجل الهلال أكتر من خمسة أهداف..ولكن!!!

لا أضمن إن كنا سنحافظ على نظافة شباكنا أم لا امام الفريق العاجي !!!

في الفريق الشفناه داك
ممكن واكتر كمان

صباحو عمر

نلعب باربعة مدافعين

كايا سيف بويا فداسي

وارتكاز واحد نزار

مع مهند وبشة وخليفة


ترواري كاريكا


ونجيب قون في اول خمسة دقائق مع صيحات الجمهور ليبيا تفتح

شاهدت مباراة الهلال والفريق العاجي مسجلة ..وما شاهدته كان عكس ما قرأته في الإعلام ..
وما أقرأه في الإعلام في مرات كثييرة فاز فيها الهلال يكون عكس ما شاهدته..
يفوز الهلال فنسمع عبارات الثناء وخوارق الطبيعة وفنيات كرة القدم ..
يخسر الهلال فنسمع ونقرأ عبارات الهجاء والذم وننصب المشانق ونصدر القرارات..

حسب رؤيتي الفنية اكاد أجزم أن ما قدمه الهلال من مستوى في مباراة الفريق العاجي أفضل كثيراً من ما قدمه الهلال في مباريات كثييرة كانت داخل استاد الهلال وفاز الهلال بالأربعات والخمسات..
نعم النتيجة كانت صادمة وثقيلة ونعم هنالك أخطأ ..ولكن انا محتار في وصف الصحافة للمباراة بعد سماع النتيجة مباشرة وكتابة الصحفيين وكتاب الأعمدة قبل أن يشاهدوا المباراة ..
عن نفسي وبمشيئة الله أكاد أجزم أن الهلال سيسجل أكثر من خمسة أهداف وبكل سهولة في الفريق العاجي ..ولكن وبكل صراحة لا أضمن إن كنا سنستقبل بالمقابل أهدافاً أم لا ..
خسرنا المباراة السابقة والهلال كان الأفضل اداء وسيطرة ..ولكن (جلطات) الدفاع وحارس المرمى اصابت الهلال في مقتل ..
الفريق العاجي اذي شاهدته لن يصمد كثيراً في وجود جماهير الهلال الهادرة ولو ركز لاعبو الهلال فإن كل هجمة للهلال يمكن ان تختتم بهدف هلالي ويعبر الهلال بنتيجة خيالية ما لم تحدث معجزة ..


تخريمة :
اها يا طلحة قاعد اتمرن للصحيفة بتاعتك وبحاول أتعلم كتابات الجدية دون التهريج :) :) :)

يا حمزاوي ..
الفريق داك كويس وما عندو عوجة ..لكن الهلال أكوس ..وشكله في الميدان كان الأفضل وفرض إيقاعه ..
مشكلتنا لمن فرقنا تظهر بالمظهر الكويس ما بنديها حقها لكن بنضعف الفريق الخصم ..

كويس خالص ي أبو عمير لكن أظن العنوان فيهو ريحة ..
أكتر من خمسة أقوان كم يعني ؟ ستة سبعة تمانية مثلا ؟
غير العنوان وتكون كدا كتبت عامود يجعل القراء يتهافتون على
قراءة عمودك الجائي .

إن شاء الله أنا زاتي بتفق معاك يا عمر الفاروق

وبتفق مع طلحة برضو في كلامو التحت دا

Quote: كويس خالص ي أبو عمير لكن أظن العنوان فيهو ريحة .. أكتر من خمسة أقوان كم يعني ؟ ستة سبعة تمانية مثلا ؟ غير العنوان وتكون كدا كتبت عامود يجعل القراء يتهافتون على قراءة عمودك الجائي .

فالنفترض الهلال ده فاز 25

لكن سُعالي

فريق يستقبل 4 اهداف وكان مفروض تكون 5 لولا ضربة الجزاء الضائعة

ماشي وين ؟؟

وحتي لو مشي

ماشي يسوي شنو ؟؟

مفروض الموضوع ينتهي هنا بالفضيحة الرباعية دي

والناس ترجع لزنقة الاهلي عطبرة

ـــــــــــــــــــــــــ
شكرن

يا خوفي من نغمة الثقة الزائدة دي عمر !! تتحول لإستهانة بالخصم و عينك ما تشوف إلاّ النور
من اسي اتوقع مهند يلعب تحت ضغط عصبي غير عادي خاصة اذا اتأخر القون الأول
التيم العاجي وضح انو مدربو قرا الهلال كويس في الشوط الأول و استفاد من ثغرات الدفاع في الشوط التاني

الاخ عمر الفاروق

لك التحايا

غايتو دا بيكون تفاؤل تحمد عليه لكن انامن ما البرير دا جاء فى الرئاسة اصبحت متشائم
و قلت انه الهلال سيخرج من دور ال 32 و لو ما الاتحاد الافريقى عفاه من دور ال 64 برضو كان خرج


على العموم كل الامنيات للهلال بالصعود الى المرحلة التالية

يا خليل دي كور صالح الأمين وسامي ..مع إنو سامي ده ما خالص لكن بيلعب كورة أولاد الحلة حقت القلب الحار ديك ..وده المحتاجينو للكورة دي..

يا طلحة انا بقول ستة ..
العنوان ما فيهو شي لكن بالجد ما بقدر اضمن يجي فينا قون ولا إتنين ولا تلاتة ولا ما يجي زاااتو ..دفاعنا مزاجي يوم في السما ويوم في الأرض..

يا الصادق ..إتفق معاي وسيبك من طلحة ده :)

ود البشرى يا حبوب:
كلامي ده ما كلام ثقة زائدة ..عن نفسي كتبت قبل مشاهدة الفريق الخصم ..كلامي مبنية على النفسية السودانية ..
عارف لو في خوف فهو الخوف بعد إحراز هدف تالت إن شاء الله ..التراخي بيبدا من هنا ..
اللاعب السوداني لو لعب كورة وجاب 3 اقوان بيفتكر إنو بعد كده الكورة إنتهت ويبدا يلعب الباصات والكورة البي الكعب عشان يسمع صفق الجمهور وعشان إعلامنا بكرة يكتب وقدم الفريق تابلوهات رائعة..
ما شافو الخواجات ديل عندهم نظرية اذا لقيت الحامام ميت اضررربو ..
امبارح الانجليز في شوط واحد جابو خمسة اقوان والكورة برة بلدهم..

حبيبنا
عمر الفاروق

المتفائل باحراز أكتر من خمسة اهداف

كدي شوف الزول القصير ده





غايتو لو قدرتو تمسكو الزول الفرفارة ده ... حا تضمنو سلامة شباك المعز من الاهداف
+
سيف مساوي ده الا تشوفوا ليهو خانة تانية غير الدفاع .. عشان ما يرتكب ليكم ضربة جزاء


ــــــــــــــــــ
شكرن
عفون

طارق يا طارق..
فرق ومنتخبات كتييرة بدأت البطولات بخسارة كارثية تبدأ من خمسة صفر ورغما عن ذلك وصلت للمباريات النهائية ..
البرير وغيره انا ما شايلهم..انا همي الله الوطن الهلال دي..

يا أبوعمير
طبعا الهلال لو جاب تلاتة صفر ح يتأهل وأكيد إتا كهلالابي ح تفرح صاح ؟
طيب ليي إتا ما تخت حساب تفرح مرتين .. مرة عشان الهلال إتأهل ودا المهم بالتأكيد
ومرة عشان نظريتك أو تحليلك أو إستنتاجك أو توقعك كان في محلو ..
وقس على ذلك لو الهلال دا مثلا جاب أربعة أو قول خمسة أقوان بس والفريق التاني جاب قونين
تبقي عليك ميتة وخراب ديار أكيد ..
كلامك دا بالمناسبة قاعد يقع فيه مزمل أبو القاسم كتير جدا .. دائما بحصل عكس ما يتوقعو تماما ..
مزمل زول كتاااااب لكن يفتقد للفراسة ويمكن دا عشان عايز يغيظ الهلالاب أو عشان يبيع
جريدتو.. لكن لو حسبا صاح ممكن توقعاتو تطلع زييي ما قالا وكدا يغيظ أكتر ويبيع أكتر .. هههه
خليك صحافي ذكي وأشرب شاي ما تشربش قازوزة يا أبو عمير .

إحساسي نادراً ما يخيب.. اتوقع نتيجة كبيرة لهذه المباراة..

وأتوقع تاهل الهلال..

مع سينكارا مش حتقدر تغمض عينيك ......

تحياتي ليك اخ عمر غايتو زول كتاب وتستحق لقب الصحفي الرياضي بجداره مشكلتك الوحيده هلالابي وريالابي
بالنسبه لي الهلال حتى لو اتأهل ومشا وصل الاربعه كالعاده اونزل الكنفدراليه فالنهاية حتكون

النتيجة 3 /1 للهلال ويقعد في زريبتو

Quote: سيسجل الهلال أكتر من خمسة أهداف..ولكن!!!

سلامات الفاروق




أكثر من خمسة!!!!!!!!!!
ههههههههههههه
الحلم ليس بفلوس!!

أنا غايتو مجهز لي صيغة خطاب اعتزال علشان يوقع عليهو مهند بعد المباراة ..

مشكلة الهلال في الخمسه مواسم الماضية ولا زالت في حراسة المرمي ..جمعة كان سبب مباشر في خروج الهلال الموسم الماضي من دوري الاربعه وحاليا هو المسؤول علي الاقل من هدفين اي حارس مبتديء ممكن يطلعوم (2 و 4 ) قبل كدا بي سبب ابوبكر الشريف فقدنا بطولة كانت في متناول اليد ..والمعز برضو ممكن يفاجئك بي اخطاء بدائيه ..

الهلال وبمدافعنو التلاتة ديل ما حيتأهل يا عمر .
كل المدربين عرفوا يستغلوا الفراغات الموجودة في دفاع الهلال ,والفريق العاجي ممكن في ام درمان يجيب قونين عااااااادي طالما دفاع الهلال تلاتي ومتهالك .

كلامك دا يا عمر بحسابات الفريق العاجي الإنت شفته في الذهاب! لكن ما تنسى انه كل مباراة عندها حسابات مختلفة عن التانية!
الفريق العاجي اللي ح تشوفو في الإياب ح يلعب بطريقة مختلفة تماما لأنه جاي مرتاح وما محتاج من المباراة دي كلها إلا الحفاظ على شباكه باقل اهداف
عشان كدا من المتوقع جداً إنه يتكتّل في الدفاع ويعتمد على الهجمات المرتدة اللي هو أصلا بيجيدها واحرز منها تلاتة اهداف من مجموع أربعة!
احراز اكتر من هدفين في فريق متكتّل مهمة ما بالسهولة الإنت بتقولها دي حتى لو كان حماس لعيبة الهلال في التأهل أكبر من أمكانياتهم.
اضف على ذلك الشد العصبي والنفسي المختوتين فيهو لعيبة الهلال ومدربهم ووجود الجمهور ح يزيد العامل دا على تيم الهلال أكتر من الفريق الضيف
وممكن يجيب نتيجة عكسيّة تماماً في حين انه الفريق العاجي داخل المباراة مرتاح وما زي ما قال خليل ح يتهز من الهدف الأول!

المباراة صعبة جدا ومحتاجة تركيز شديد واعصاب رايقة شديد وما بتتحمل ضياع نص فرصة واحدة لانها ممكن ما تتعوض .. ودا صعب يحصل
بالذات في وجود إعلامنا البلـيد البكتب بس عشان يبيع جريدته وما بيهمو اليحصل شنو واتوقع دا ح يزيد الشحن النفسي على اللعيبة اكتر!

فعلاً بعد شفنا الكورة الموضوع كان مختلف تماماً...

والهلال خسر باخطاء فادحة ..

ولكن التعويض يحتاج لشغل كتييييييييييير

خالد
فعلا المباراة ح نعيش تفاصيلها بما نحسه ..وانا كتبت الحاسيهو ما كتبت المنطق


طارق
القصر يا حكمة يا فتنة .. الزول ده شكلو بتاع نجيل صناعي وفنياته فنيات صالات ..في نجيلتنا وميادنا الموضوع مختلف ..


عمارنا..
ده لو سنكارا لعب .. مااا ظنيتو يدقها في الكورة الجاية لو المدرب بطل حركات ديل لعيبتي ..

حامد يا كترينا :)
القدحة شميتوها انتو وفلقتونا بيها ..ياها بيضة الديك ديك؟؟ :)


طيفورنا ياسر...
الواحد ده ضروري؟؟ خليها تلاتة صفر ساي ياخ :)

عبد العزيز عيسى

ده ما حلم ..وان شاء الله ح تشوف ..

الأمير ادريس :
وجهز خطاب تاني بوريك ليهو بعد الكورة تنتهي..

يا معاوية جمعة جينارو حماسي وبتشيلو الهاشمية في كتيير من الكوور ..حتى في لقطة كده كانت ساهلة الكورة جمعة طلع طلعة متهورة واستلم الكورة بي صورة كان ممكن تفلت منو وتقع للمهاجم في رجلو ..
الحارس السوداني عندو مشكلة تدريب في المقام الأول..ولسة بيتدرب بي التقليدية بتاعت يجدعو ليهو الكورة وينط يجيبا.. نادراً ما تلقى حارس سوداني فاهم كيف يقسم العراضة وخط الستة..نادرا ما تلقى حارس سوداني عارف ورا ضهرو خلى مساحة قدر شنو وابعاد المرمى بقت قدر كيف ..اضافة للسرحان وعدم التمرن اثناء سير المباراة ..
جمعة عندو مشكلة كبيييرة ح تخليهو ما يمشي لي قدام وح تضر بي الهلال كتييير جدا.. عافا شنو؟
جمعة ما بيكورك في المدافعين..جمعة لسسسة حاسي انو اقل قامة من سيف مساوي وانو ما صاح يكورك فيهو وانو الحمممد لله لعبوني اساسي كمان اكورك في الناس؟؟
جمعة لو كورك في سيف مساوي ده ونبهو صدقني اقوان كتيييرة بنتفاداها..

أمير عمر :
وفي كلامي ده ح اشمل معاك ملاحظة ود البشرى حول مهند..
عارف يا امير مهند ده بي تصريحو ده كبر في نظري شديد .. ما عشان القصة حماس والهاب الجمهور والدخول في تحدي ..لأ
مهند في الحتة دي اتعامل بي نظرية رحم الله امرئ عرف قدر نفسه ..وخليني قولا ليك بي كلام اولاد الحلة بتكون أسهل..
زمااان في الروابط كان بتكون في مباريات بين روابط المنطقة يعني رابطة ابو عنجة ضد ابروف او امبدة او او ..
أها بنمشي نلعب مع فريق من ابروف بيضربنا ستة صفر.. عارف بنجي راجعين في الحافلة زهجانييين لكن كلللنا متأكدين إنو ده مااا الفريق البيدينا ستة..وكلللنا بنكون على يقين انو الفريق ده لمن يجينا ابوعنجة بنديهو سبعة عاااادي..حتتتى لو الفريق التاني اترص كلللو في القون..
عارف انا كنت بلعب مع واحد اسمو عمر الصادق (لاحقا لعب في العباسية والمنتخب القومي ) وكان ود حريييف جداً أها زييي مهند ده ..نرجع مغلوبين بيقول ليك مااا مشكلة بنضربهم في الرد ..وبيجي يغلب براااهو..

quoteلا أضمن إن كنا سنحافظ على نظافة شباكناquote

لا أحسن تضمن :)

سلام جاكم, عمر و الأهلة

شاهدت المباراة:
- وسط الهلال غير متماسك, رغم (الأسماء)!
-الكرات المرتدة هي الأخطر على الهلال و احتمال تلبس كبير
أعتقد السبب في دا أنه كل الناس بتمش تنكب داخل صندوق
الخصم خاصة لما يكون في كورنر مثلا!
- تصويباتنا دائما خارج المرمى قليل و السبب في دا ميول
اللاعبين للتنظير في المرمى و إمتاع الذات بكيفية الهدف
لذلك لو بشوتو دزززز (بين الخشبات) بيكون أضمن!

ممكن نتخطى العاجي بأهداف مريحة مع المحافظة على شبكنا
نظيفة بس ياريت أشوف تشكيلتي دي يوم داك و هي بالمناسبة
3:4:3

معز
بوي , مساوي, كايا

عمر و نصر الشغيل

مهند و نزار

بشة تراوي كاريكا

يا معز نصر الدين الشغيل طالع من عملية وما لعب كورة من السنة الفاتت
يستحيل يلعب كورة زي دي

كيفك محمد البشرى,

الشغيل كان نجم مباراة الهلال و شباب ناصر أمس
و أحرز الهدف الجميل الإنتهت عليه المباراة و
غارزيتو أعلن سعادته بالمستوى القدمه و قال
لأنه محتاج ليهـبشدة في البطولة الإفريقية تحديدا
و أنا فهمت الفيلم كدا و حاااااسي بالفكرة و مؤمن
على قيمتها!

والله يا معز دي براها مصيبة و ما تتطمن كونو الشغيل بكون نجم المباراة معناها باقي التيم راقد سلطة اسود

Quote: كونو الشغيل بكون نجم المباراة معناها باقي التيم راقد سلطة اسود

ليه ؟ مافي خيارات تانية ؟؟
ممكن يكون نجم المباراة ومعاهو أربعة خمسة تاني وطبعا نجومية العدد دا كافية لترجيح
كفة الفريق حتي لو كان الباقين سلطة .
وممكن يكون نجم المباراة الأبرز بين الفريقين ودي لا تعني إن الباقين راقدين
سلطة بل ربما تعني كلهم نجوم لكن هو الأبرز.
أتوقع إذا كان الشغيل جاهز فنياوبدنيا ونفسيا ولعب المباراة أن يتألق ويسجل قون كمان ..
أها رأيك شنو ؟
احتفظ بالإجابة لنفسك عشان ما تقدنا بى جرجرتك وقوم لف كدا واللا كدا.

Quote: محمد البشري الخضر والله يا معز دي براها مصيبة و ما تتطمن كونو الشغيل بكون نجم المباراة معناها باقي التيم راقد سلطة اسود

اطمئن ساااااااااااااااااي يا حبيب
الزول ده جاب هدف في شباب ناصر
في وجود المهاجمين




ــــــــــــــــــــــــــ
الشغيل لو سداها في النص ... البيحرس الشبكة منو

يا تنظير شنو الحكاية عرفنا التنظير في الفارغة و المليانة جابت ليها غلاط كمان!!
زول واقف خمسة شهور و طالع من عملية كونو يكون نجم مباراة معناها لاعب مع جنايز
دا غير انو دا الشغيل كورتو الفي راسو ما بتبقيه نجم مباراة ولا حاجة

Quote: يا تنظير شنو الحكاية عرفنا التنظير في الفارغة و المليانة جابت ليها غلاط كمان!! زول واقف خمسة شهور و طالع من عملية كونو يكون نجم مباراة معناها لاعب مع جنايز دا غير انو دا الشغيل كورتو الفي راسو ما بتبقيه نجم مباراة ولا حاجة

أها ولو حصل وبقي نجم المباراة أو من نجوما وجاب قون زي ما قلتا ليك ؟
إحتفظ بالإجابة لنفسك وقوم لف تاني ..
المشكلة جلدك تخين ياخ .