Post: #1
Title: ماذا تفعلون بجيشنا يا أيها الإنقاذيين ؟؟؟ ..
Author: Emad Abdulla
Date: 03-20-2013, 01:17 PM
Parent: #0
|
Post: #2
Title: Re: ماذا تفعلون بجيشنا يا أيها الإنقاذيين ؟؟؟ ..
Author: دينا خالد
Date: 03-20-2013, 01:24 PM
Parent: #1
قوية يا عمدة ...
قووووويه ....
ـــــــــــــــــــــــ
هو جيشكم دا قايل القصة عرس جماعى ساااااااى بس
فالعرس له ما بعده ...
|
Post: #5
Title: Re: ماذا تفعلون بجيشنا يا أيها الإنقاذيين ؟؟؟ ..
Author: Emad Abdulla
Date: 03-20-2013, 01:36 PM
Parent: #2
و اله يا دينا واجعني جيشنا البقى ملطشة علي يد الصعاليق ديل ..
الشباب الاتحلق ليهم قويين .. و عاركين الممارسات البيض دي من قبل كل الأذرعة و الأجهزة الأمنية المهببة الحارسا جنازة الإنقاذ دي ..
باكر شعرهم بيقوم .. و روحهم تصبح اقوى ( قالوا السكين بيسنها حجر النار .. ما بيسنها الجراب حقها ) ..
لكن الجيش ؟؟ .. الح يقوم ليهو عزتو منو تاني ؟؟
خلينا من الضباط المغامرين و المهووسين و الأرزقية و الهمبلولات البيجوا كل كم سنة ناطين في الكراسي ديل ..
نتكلم عن جيشنا .. حقنا . حامي دستورنا و خريطتنا ( البقى شكلها زي الدلقانه اللايكاها الغنماية - علي زعم بوليس الحركة الفي مواقف المطار ) ..
ياخي بشتنوهو ياخ الناس الزفت ديل .
|
Post: #3
Title: Re: ماذا تفعلون بجيشنا يا أيها الإنقاذيين ؟؟؟ ..
Author: Emad Abdulla
Date: 03-20-2013, 01:26 PM
Parent: #1
مش كفاية ياخي وطيتو راس قواتنا المسلحة في الارض ؟؟
مش كفاية التفريط و المساخر و النكوص و رقاد الواطة يمين شمال ؟؟
من أول حلايب للفشقة .. مروراً باستباحة ارض البلد جواً .. ؟
مش كفاية مرمطة بتاريخ هذه القوات اللي كانت رافعه راسها فوق .. عزة و كرامة بتشبه البلد دي و تشبه ناسها ؟؟
خليتوها تحلق ريسين الناس ؟؟ .. عملتوها هنبوله خلاص ؟؟ .. شغلتوها شغل عمك عكاشة فقيري ؟؟ ..
قواتنا المسلحة ؟؟ ..
للدرجة دي ذليتوها و أهنتوها ؟؟
..........
طيب .. الحساب ولد ..
المؤسسة العسكرية حقتنا .. نحنا الشعب السوداني .. ابداً ما تفتكروها حقتكم .
لسه حوا السودانية رحمها ولاد ..
و ح نحاسبكم على كل ده يوم نحاسبكم ..
و تحاسبكم القوات دي زاها ..
قريب شديد اليوم ده ..
بلوا ريسينكم عشان تعرفوا الحلاقة الجد .
|
Post: #6
Title: Re: ماذا تفعلون بجيشنا يا أيها الإنقاذيين ؟؟؟ ..
Author: فايزودالقاضي
Date: 03-20-2013, 01:39 PM
Parent: #3
| Quote: ماذا تفعلون بجيشنا يا أيها الإنقاذيين ؟؟؟ .. |
ياعماد وكأنك بتفصل الجيش عن الانقاذ
كلامك ده يتقال زمااااان
لكن هسه الجيش هو الانقاذ
ومادام هو كده فلا تمييز حتى في الحساب
تحياتي ..
|
Post: #7
Title: Re: ماذا تفعلون بجيشنا يا أيها الإنقاذيين ؟؟؟ ..
Author: Emad Abdulla
Date: 03-20-2013, 01:59 PM
Parent: #6
الجيش ابداً ما الإنقاذ يا فايز ..
مهما طمسوا هويته و دجنوه ..
الجيش قوامه افراد مواطنين سودانيين زينا واحد في الهم ..
و زينا واطين الجمره .. و مغبونين .
الجيش السوداني هو أكبر متضرر من هذا النظام العولاق ..
الترويج لفكرة انه الجيش هو الانقاذ و انهم وجهان لعملة واحدة دي هي اللبانة المسمومة اللي بيروجها الإنقاذيين ..
ذر للرماد علي العيون .. و بعض من الحرب التخويفية و الترهيبية العبيطة بتاعتهم .
بعض القيادات العظيمة في الجيش هي المتورطة في هذا العبث .. و هي المستفيدة ..
الجيش القوامه مئات الآلاف من صغار الضباط و الجنود هو جيشنا نحنا .. مننا و فينا - رضينا أم أبينا -
و مننا و فينا دي براها كفاية عشان نغضب ليهو و نحزن ..
المقولات التي تنسب الجيش للإنقاذ لا تفعل شيئا سوي أنها تقصي الجيش عن الشعب .. لترمي به في أحضان الإنقاذ
قراء المنبر ده بس .. من عساكر و ضباط القوات المسلحة سيوجعهم كثيرا وصمهم بالإنقاذيين
الجيش السوداني ليس جيشاً للإنقاذيين ..
لأ .. جيشنا نحنا ديل .
|
Post: #4
Title: Re: ماذا تفعلون بجيشنا يا أيها الإنقاذيين ؟؟؟ ..
Author: دينا خالد
Date: 03-20-2013, 01:35 PM
Parent: #1
على ذمة المصدر ...
|
Post: #8
Title: Re: ماذا تفعلون بجيشنا يا أيها الإنقاذيين ؟؟؟ ..
Author: فايزودالقاضي
Date: 03-20-2013, 02:20 PM
Parent: #4
عماد ...سلامات ..
Quote: بعض القيادات العظيمة في الجيش هي المتورطة في هذا العبث .. و هي المستفيدة ..
الجيش القوامه مئات الآلاف من صغار الضباط و الجنود هو جيشنا نحنا .. مننا و فينا - رضينا أم أبينا -
و مننا و فينا دي براها كفاية عشان نغضب ليهو و نحزن .. |
جيش قوامه مئات الألاف كما تقول تحركه بعض القيادات العظيمة بالعبث به وبالشعب ؟!!
هذه المئات من الالوف تشارك هؤلاء البعض العظام من القيادات في ضرب الشعب السوداني
بإرادتهم هم في تبيعية دائمة واتساق تام طيلة الــ24 عاما مع القيادة الانقاذية
من تتحدث عنهم ياعزيزي عماد ركلتهم القيادة العظيمة باسم الصالح العام
كلنا نتمنى ان يعود الجيش ويكون كما تقول وتحلم(وحتى هذه بالمناسبة اكبر اكذوبة في تاريخنا )
تاريخ جيشنا البتتكلم عنه لم يقتل الا شعبه وكان شريكاً قبل الانقاذ في فصل جزء عزيز من وطننا
عظام وصغار هم وجه واحد في عملة الانقاذ..
مافي شي جابرهم يقتلوا شعبهم ويشاركوا القلة العظام في جرائهم
الصمت رضى والرضى جرم ...اذاً لا فرق ...
تحياتي
|
Post: #10
Title: Re: ماذا تفعلون بجيشنا يا أيها الإنقاذيين ؟؟؟ ..
Author: Emad Abdulla
Date: 03-20-2013, 02:35 PM
Parent: #8
في بلد حال اقتصادها زي حقتنا دي ؟؟
في بلد مأزومة و ما لاقية الناس فيها لقمة تسد حنك اطفالها ؟؟
نطالب العسكري النفر و الضابط السغير الشايل كوم مسؤوليات و عيال و أم و أب في ضهرو .. نقول ليهو : لا ياخ .. انت كده إنقاذي مجرم .
أحسن تقعد في البيت عواطلي .. يا كمان تمشي جنب الجامع او الصيدلية تشحت إنت و ناسك ؟؟
حقو نسحب المنطق ده علي كل عمل حكومي في الدولة دي .. مش ؟؟
مش الإنقاذ ياها الحكومة ؟؟ و هي الدولة .. و تييب !!
إنت جادي يا فايز ؟؟
|
Post: #12
Title: Re: ماذا تفعلون بجيشنا يا أيها الإنقاذيين ؟؟؟ ..
Author: فايزودالقاضي
Date: 03-20-2013, 03:11 PM
Parent: #10
| Quote: إنت جادي يا فايز ؟؟ |
ياعماد انا احترم وجهة نظرك
وبقدر قلقك الجميل فيما آل اليه حال الجيش والوطن
واكيد جادي ..
| Quote: نطالب العسكري النفر و الضابط السغير الشايل كوم مسؤوليات و عيال و أم و أب في ضهرو .. نقول ليهو : لا ياخ .. انت كده إنقاذي مجرم . أحسن تقعد في البيت عواطلي .. يا كمان تمشي جنب الجامع او الصيدلية تشحت إنت و ناسك ؟؟ |
ياعماد ده مايبرر انه يشارك في القتل والحرق والتدمير ..
مع احترامي ليك كلامك هو تخيير للموت في وجود فرصة للحياة ..
فمن غير المنطق اشيل كفني عشان اوفر عيشة كريمة لاسرتي
في وجود امكانية اني اوفر ليهم عيشة كريمة وانا حي
العسكري مادام عنده المقدرة على القتال فمعناها عنده المقدرة على العمل ..
ليه يكون الخيار بين اني اشحد او اشارك المجرمين في القتل ؟
معقولة انت جادي اخوى عماد ؟!!
تحياتي ،،
|
Post: #9
Title: Re: ماذا تفعلون بجيشنا يا أيها الإنقاذيين ؟؟؟ ..
Author: سيف النصر محي الدين
Date: 03-20-2013, 02:32 PM
Parent: #4
|
Post: #11
Title: Re: ماذا تفعلون بجيشنا يا أيها الإنقاذيين ؟؟؟ ..
Author: Emad Abdulla
Date: 03-20-2013, 02:42 PM
Parent: #9
Quote:
إلى الضباط والجنود الشرفاء - والشرفاء فقط - في قوات (الشعب) المسلحة السودانية:
1. حين وقع إنقلاب الإنقاذ على الحكم الديمقراطي في 1989، ادعى قائد الإنقلاب أن الجيش كان لا يحصل على أي دعم، في حين أنه وفي الفترة ذاتها كان يتلقى دورة متقدمة عسكرية في القاهرة !!
2. طوال 24 سنة زج بكم الإنقلابيون في مغامرات عسكرية لا تنتهي، كانت حصيلتها فصل الجنوب، وفتح 4 جبهات أخرى، لا تزال 3 منها مشتعلة في دارفور وجنوب كردفان والنيل الأزرق !!
3. كل الحروب التي خاضها الجيش السوداني، بإيعاز من القيادة السياسية، كانت حروباً داخلية، في حين صمت الإنقلابيون على (حلايب) و(الفشقة) و(مثلث اليمّي) !!
4. صبيانية القيادة السياسية، وعدم مراعاتها المعادلات الإقليمية المعقدة، أدخلت الجيش السوداني في لعبة خطرة مع إسرائيل التي قصفت الوطن مراراً دون أي رادع ودون أي رد !!
5. العشرات من زملائكم لقوا حتفهم في حروب اتضح في نهاية الأمر أنها لم تكن تعني شيئاً سوى الاستئثار بالسلطة وحماية الفساد الذي ترونه بأم أعينكم داخل مؤسستكم بواسطة وزيركم (الفضيحة) !!
6. الكثيرون من زملائكم تم رميهم في الشارع لا لشىء سوى مهنيتهم ورفضهم وانتقاداتهم التي لم تعجب الفاسدين !!
7. معلومٌ لديكم ولدينا أن الجيش السوداني ذو تقاليد عريقة في العسكرية والشرف العسكري، وتعلمون ونعلم أن مؤسستكم هذه، شأنها شأن أية مؤسسة أخرى، هي ملك لهذا الشعب العظيم، هو الذي ينفق عليها، ومهما بلغت من شأو، فهي دون هذا الشعب وطوع أمره !!
8. والآن..الآن..ما يحدث في طول الوطن وعرضه من انتهاكات وجرائم يقشعر لها البدن، لا تفوت على فطنتكم و..(شرفكم) !!
9. ولا تقبلون ولا نقبل أن يتحول هذا (الشرف) إلى مسخرة ومهزلة كاملة على يد عصابة الإنقاذ بإحالة دوركم من دور الدفاع عن تراب الوطن إلى ملاحقة الشبان في شوارع المدن السودانية لقص شعورهم المسدلة !!
10. ننتظر منكم بعد 24 سنة (لا) داوية ..لا أكثر ولا أقل !!
.....
خالد عويس
|
|
Post: #13
Title: Re: ماذا تفعلون بجيشنا يا أيها الإنقاذيين ؟؟؟ ..
Author: معاوية الزبير
Date: 03-20-2013, 03:40 PM
Parent: #11
سلام يا عمدة
أشارك أخي فايز وجهة نظره
فإذا رفض كل جندي وشرطي قتل أهلهم، فسيتبعهم المدنيون بالعصيان المدني
قبل أن تمتد يد أحد إلى الشحدة
انت قايل المشجّع الأنذال ديل على ذلتنا شنو، سوى خوف المدني والعسكري من الشحدة
هو هسع الحاصل دا بعدو ذل
دا يوم لا كان لا حصل يا صديق الكل
أقول هذا ولي أهل في الجيش والشرطة
وإذا لم يكن من سبيل إلى أكتوبر أو أبريل، فلتكن سوريا
سوريا حاصلة الآن يا عماد في دارفور وجنوب كردفان والنيل الأزرق
رصاص "جيشنا" و"أمننا" يحصد يوميا المئات من الشعب في المدن والقرى هناك،
وتتكفل المسغبة بسكان الشمال والشرق والوسط
عموما مشتاقين إلى حين ميسرة
|
Post: #14
Title: Re: ماذا تفعلون بجيشنا يا أيها الإنقاذيين ؟؟؟ ..
Author: Osman Musa
Date: 03-20-2013, 04:14 PM
Parent: #13
لك التحية
ماذا تفعلون بجيشنا يا أيها الانقاذيين ؟؟؟؟
والله يا عماد بكيت علي حال جيشنا
بعد ما عمك الرشيد فرجني في الصور القديمة حقت عساكر القيادة الشمالية
والقيادة الجنوبية .. والصور القديمة للمبتعثين الي الهند وبريطانيا وأمريكا .
تخيل يا عماد المبتعث يشيل شنطتو من مدرسة المشاة في جبيت وعلي مدرسة التدريب
في ولأية كلورادو بالولايات المتحدة الأمريكية . وكل شيء في طريقو مرتب .
..
بكيت يا عماد علي ضياع جيشنا بعد ما عمك فرجني في صورة الرئيس الأمريكي كارتر
وهو بيسلم في اللواء السوداني يوسف حسن الحاج وسام الاستحقاق الأمريكي .
المبتعثين من جيش السودان لكليات القيادة في الخارج يا عماد كانو من أشطر المبتعثين ..
عان الحصل
..
|
Post: #15
Title: Re: ماذا تفعلون بجيشنا يا أيها الإنقاذيين ؟؟؟ ..
Author: باسط المكي
Date: 03-20-2013, 06:27 PM
Parent: #14
Quote: سوريا حاصلة الآن يا عماد في دارفور وجنوب كردفان والنيل الأزرق
رصاص "جيشنا" و"أمننا" يحصد يوميا المئات من الشعب في المدن والقرى هناك،
وتتكفل المسغبة بسكان الشمال والشرق والوسط
عموما مشتاقين إلى حين ميسرة |
ياعماد سلامات
كل يوم مرارتنا بتتفقع من الانبطاح
والاستبااح لكل مرافق البلد
سك حديد
مشاريع
مؤسسات عريقة
راحت في ستين داهية
سودانير
النقل النهري
النقل المكانيكي
الوزارات
وزارة وزارة
كلهها سكنها هذا البوم
كل شي كانتهي
بلدرااااااااااااااااح
ياعمدة
|
|