Post: #1
Title: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-19-2013, 04:51 PM
Parent: #0
اوضاع العمالة الوافدة في السعودية كل يوم تضيق وتضيق وتضيق
من نطاقات الى زيادة رسوم تجديد الاقامة
واخيرا كل وافد شرعي يعمل لدى كفيله فقط بالاضافة الى منع العمل الخاص للوافد
بداية جادة ودراسة ممنهجة وبأحترافية في الحد والتقليص لحجم العمالة السائبة في السعودية بالاضافة لسياسة السعودة المشروطة في معاملات الحكومية للقطاع الخاص والذي اجبر على التوظيف الوطني
عشان كده ابقوا عشرة وما تفرطوا في ر يال ساي شمس المغترب على وشك الغروب حوشوا تنفعكم قدام
مودتي
الرحـــال
|
Post: #2
Title: Re: ناس السعودية ابقوا عشرة على ريالاتكم لا تفرطوا فيها !!!
Author: مزمل عوض الكريم
Date: 03-19-2013, 04:55 PM
Parent: #1
دا طرد بس نحن دمنا تقيل ربنا يصلح حال بلدنا
|
Post: #3
Title: Re: ناس السعودية ابقوا عشرة على ريالاتكم لا تفرطوا فيها !!!
Author: الامين موسى البشاري
Date: 03-19-2013, 04:56 PM
Parent: #1
| Quote: عشان كده ابقوا عشرة وما تفرطوا في ر يال ساي شمس المغترب على وشك الغروب حوشوا تنفعكم قدام |
ح نبقى عشرة وأربعة
اصلو الموضة الايامات اربعات سااااي 
بعد دا الا نمشـــي ساحل العاج محل الاربعات دي
ازيك يا باشا
|
Post: #4
Title: Re: ناس السعودية ابقوا عشرة على ريالاتكم لا تفرطوا فيها !!!
Author: مزمل عوض الكريم
Date: 03-19-2013, 04:57 PM
Parent: #3
اربعات ولا خمسات
|
Post: #5
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-19-2013, 05:00 PM
Parent: #4
| Quote: دا طرد بس نحن دمنا تقيل ربنا يصلح حال بلدنا |
هي كده يا مزمل
مودتي
الرحــال
|
Post: #6
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-19-2013, 05:04 PM
Parent: #5
مين الحضري
تحياتي يا مان
مودتي
الرحـــال
|
Post: #7
Title: Re: ناس السعودية ابقوا عشرة على ريالاتكم لا تفرطوا فيها !!!
Author: محمد بابكر محمد
Date: 03-19-2013, 05:14 PM
Parent: #6
| Quote: شمس المغترب على وشك الغروب |
طيب كان غابت (نحنا) ما ( دى يكتبوها كيف) اصبحت
سلامات ياحبيب
|
Post: #8
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-19-2013, 05:20 PM
Parent: #7
| Quote: طيب كان غابت (نحنا) ما ( دى يكتبوها كيف) اصبحت |
غروب هنا وشروق هناك مساسكةساي
تحياتي ياصفوة
مودتي
الرحـــال
|
Post: #9
Title: Re: ناس السعودية ابقوا عشرة على ريالاتكم لا تفرطوا فيها !!!
Author: Fayez Ahmed
Date: 03-19-2013, 05:22 PM
Parent: #7
| Quote: عشان كده ابقوا عشرة وما تفرطوا في ر يال ساي شمس المغترب على وشك الغروب حوشوا تنفعكم قدام |
الحبيب ... ما زمااااان غربت الشمس .. قاعدين ليه ما تقوموا تروحوا
|
Post: #10
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-19-2013, 05:29 PM
Parent: #9
| Quote: الحبيب ... ما زمااااان غربت الشمس .. قاعدين ليه ما تقوموا تروحوا |
يا دفعة في انتظار زوال شفق الر يال وبعدها الشتات
مودتي
الرحـــال
|
Post: #11
Title: Re: ناس السعودية ابقوا عشرة على ريالاتكم لا تفرطوا فيها !!!
Author: ولياب
Date: 03-19-2013, 05:35 PM
Parent: #10
| Quote: بعد دا الا نمشـــي ساحل العاج محل الاربعات دي |
ود موسى البشاري اللهو ( الأمين )
تحياتي
أقرب ليك وأحسن ليك السبعات الأردنية ( مش السبعات حقتنا اللي في البطانة )
لك ودي
|
Post: #12
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-19-2013, 05:43 PM
Parent: #11
| Quote: أقرب ليك وأحسن ليك السبعات الأردنية |
مالك عليهو 
مودتي
الرحـــال
|
Post: #13
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 07:05 AM
Parent: #12
كمان جماعة الـ 60 سنة من العمر عملوا ليهم بلوك في الشاشة تجديد اقامة ما في
قرضوا على الريالات ولا تبعثروها في الفارغة
مودتي
الرحـــال
|
Post: #27
Title: Re: ناس السعودية ابقوا عشرة على ريالاتكم لا تفرطوا فيها !!!
Author: بدر الدين مهدي
Date: 03-20-2013, 03:54 PM
Parent: #3
ليس الحريص بزائد في رزقه
|
Post: #14
Title: Re: ناس السعودية ابقوا عشرة على ريالاتكم لا تفرطوا فيها !!!
Author: فتح العليم محمد أبوالقاسم
Date: 03-20-2013, 07:31 AM
Parent: #1
من زمان النظام في السعودية يمنع الوافد من العمل لحسابه الخاص كما يلزم الوافد بالعمل مع كفيله .
و85% من السودانيين يعملون مع كفلائهم ، يعنى الاغلبية لن تتضرر من القرار .
وأظهر عليك انت تعمل خارج الاطار القانوني .
مع احترامي لك ولكن امل ان تكون البوستات مفيدة اكثر من الهرج
|
Post: #15
Title: Re: ناس السعودية ابقوا عشرة على ريالاتكم لا تفرطوا فيها !!!
Author: الطيب مصطفى
Date: 03-20-2013, 09:03 AM
Parent: #14
الأرزاق بيد مقسم الأرزاق
|
Post: #16
Title: Re: ناس السعودية ابقوا عشرة على ريالاتكم لا تفرطوا فيها !!!
Author: على عبدالله بشير
Date: 03-20-2013, 09:37 AM
Parent: #15
تحياتى أخى أشرف
اولاً هو ما عاد فى ريال يبقوا عليه عشرة
لأن المغترب المعاه أسرته الراتب قدر أيجار الشقة و المصاريف
و المدارس و قليل من المساعدة للأهل
و الما معاه أسرة 75% من الراتب لأسرته المقيمة فى السودان
و الما متزوج يمكن يكون شوى أحسن حالاً
أما حكاية الناس تقنع و تمشى لا أتفق معك فيها ...
كل شخص له نصيب بيأخذه و ربما يكون الجاء الآن يكون فى وضع
أفضل ممن سبقه بسنين ...
أذكر قبل أكثر من عقدين من الزمان جئنا متعاقدين من السودان وكنا 4
وصلنا ليلاً و بتنا ليلتنا تلك و مساء اليوم الثانى قابلنا ذو الكفل و رحب بنا
و أخبرنا بأنه على موعد لأستلام شاحنة فى ورشة يعمل بها سودانيون فلنذهب معه
للتعرف بهم و ذهبنا معه ... بعد السلام و السؤال المعتاد من وين فى الأهل .. و ... و ..
وجدناهم بلسان واحد يقولون لنا ( الجابكم شنو ..!!!!؟؟؟؟ )
البلد دى أنتهت خلاص و الغربة ضياع وقت بس فيها ...
يالطيف دا كلام شنو .....؟؟
لكن مرت الشهور و السنين و نحمد الله حققنا أكثر مما كنا نصبو أليه
فهذه القرارات ليست بالجديدة
و أستغرب جداً عندما اسمع من شخص مقيم لأكثر من 10 سنة و يقول فيزا حره
لا يوجد شئ أسمه فيزا حره
أى شخص دخل مقيم للسعودية هنالك جهة عمل أستقدمته للعمل لديها
سوى كان فرد أو مؤسسة أو شركة ...
فكون هذه الجهة تسمح لك بالعمل فى مكان آخر هذه مخالفة واضحة وصريحة
و يعاقب عليها القانون ..
|
Post: #17
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 09:45 AM
Parent: #16
| Quote: الأرزاق بيد مقسم الأرزاق |
الاخ طيب مصطفى ،،، تحياتي
تماما الارزاق بيد الله وتخيل معظم هذه القرارات صادرة منذ زمن بعيد ولم تفعل والان تم تفعيل 75% منها مما لزم بعض العمالة من المغادرة نتيجة لضغط الكفيل من الجهات الرسمية في المعاملات
مودتي
الرحـــال
|
Post: #18
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 09:57 AM
Parent: #17
الاخ / فتح العليم ،،، تحياتي
| Quote: من زمان النظام في السعودية يمنع الوافد من العمل لحسابه الخاص كما يلزم الوافد بالعمل مع كفيله . |
نعم كقانون موجود ولكن غير مفعل الان مع الاجراءات المشددة من وزارة العمل سوف يتم التفعيل والمتابعة بواسطة لجان تفتيش وايضا ضغط الكفيل من خلال هذه الاجراءات
| Quote: و85% من السودانيين يعملون مع كفلائهم ، يعنى الاغلبية لن تتضرر من القرار |
نعم هنالك من يعمل مع كفيله وهنالك من يعمل عمل خاص لحسابه وايضا باسم كفيله او باسم آخر وهنالك من يعمل مع صاحب عمل آخر كل الفئات دي موجودة وفوق ده هنالك من هو فوق الـ 60 سنة ...
شكرا لتقيمك للبوست ولكن بيني وبينك مش فيهو فائدة تعرفية واضافة معلومة بدل البوستات التانية المليان بها المنبر و التي تمس العضم الحي من سخف ومهاترات اها اضغط على الرابط ده يظهر مصدر الخبر
الخبر ده وصل واجاز من مجلس الشورى
مودتي
الرحـــال
|
Post: #19
Title: Re: ناس السعودية ابقوا عشرة على ريالاتكم لا تفرطوا فيها !!!
Author: ود الباوقة
Date: 03-20-2013, 10:10 AM
Parent: #18
حكي لي احد القادمين للعمل في السعودية في عام 1979
بانهم نزلوا ضيوفا على صديق لهم قد سبقهم الى المملكة بي 4 اعوام
وفور السلام والمطايبة
سالهم يا ناس الجابكم شنو ؟
السعودية دي حفلة وانتهت ولملموا كراسيها من زمان
تصور بالله
يا الرحال
الارزاق بيد الله
وبالعكس كل ما تنفق مما لديك
يبارك الله لك في مالك ويضاعفه
الرحال
اركز
|
Post: #20
Title: Re: ناس السعودية ابقوا عشرة على ريالاتكم لا تفرطوا فيها !!!
Author: طه داوود
Date: 03-20-2013, 10:24 AM
Parent: #18
Quote: واخيرا كل وافد شرعي يعمل لدى كفيله فقط بالاضافة الى منع العمل الخاص للوافد
بداية جادة ودراسة ممنهجة وبأحترافية في الحد والتقليص لحجم العمالة السائبة في السعودية بالاضافة لسياسة السعودة المشروطة في معاملات الحكومية للقطاع الخاص والذي اجبر على التوظيف الوطني
عشان كده ابقوا عشرة وما تفرطوا في ر يال ساي شمس المغترب على وشك الغروب حوشوا تنفعكم قدام
|
الأخ أشرف الرحـال،، دا كلام مهـم، وإشارة تنبيه (حمراء) لكافة المغتربين.
فالسلطات السعودية بدأت تفعيل القرارات المذكورة بحيث تصبح حياة المغترب النظامي أكثر كلفة
عليه وعلى الكفيل/صاحب العمل، وهذا الوضع سيجبر الطرفين على إعادة النظر في هذه العلاقة التعاقدية بينهما..
وبمناسبة القرارات،، آخر الأخبار أكدت على ربط تجديد الإقامة بالتأمين الصحي لجميع أفراد عائلة المقيـم..
يعني إذا كان صاحب العمل ملتزم ببوليصة تأمين للمكفول+زوجته+ طفلين حسب الوضع السائد، فإن القانون الجديد يلزمك بالتأمين على
كل العيـال المقيمين معاك. ومافي تجديد إقامة بدون تأمين صحي حتى للرضيع..
|
Post: #21
Title: Re: ناس السعودية ابقوا عشرة على ريالاتكم لا تفرطوا فيها !!!
Author: عماد قريش
Date: 03-20-2013, 10:24 AM
Parent: #18
Quote: المادة التاسعة والثلاثون (بعد التعديل):
1- لا يجوز -بغير اتّباع القواعد والإجراءات النظامية المقررة- أن يترك صاحب العمل عامله يعمل لدى الغير، ولا يجوز للعامل أن يعمل لدى صاحب عمل آخر، كما لا يجوز لصاحب العمل توظيف عامل غيره، وتتولّى وزارة العمل التفتيش على المنشآت، والتحقيق في المخالفات التي يتم ضبطها من قبل مفتشيها، ومن ثم إحالتها إلى وزارة الداخلية لتطبيق العقوبات المقررة بشأنها.
2- لا يجوز لصاحب العمل أن يترك عامله يعمل لحسابه الخاص، كما لا يجوز للعامل أن يعمل لحسابه الخاص، وتتولّى وزارة الداخلية ضبط وإيقاف وترحيل وإيقاع العقوبات على المخالفين من العاملين لحسابهم الخاص (العمالة السائبة) في الشوارع والميادين والمتغيبين عن العمل (الهاربين) وكذلك أصحاب العمل والمشغلين لهؤلاء والمتستّرين عليهم والناقلين لهم وكل من له دور في المخالفة وتطبيق العقوبات المقررة.
|
شكرا أخ أشرف على البوست
الإقتباس أعلاه من الرابط الذى أدرجته فى مشاركتك
فى النقطة الأولى وردت جملة (بغير اتّباع القواعد والإجراءات النظامية المقررة) وهى تدل على أن الشخص يمكنه العمل مع غير كفيله إذا تحصل على موافقة مكتوبة من الكفيل وعقد بين الكفيل وصاحب العمل.
فى النقطة الثانية المقصود بالعمل الخاص (العمالة السائبة) أى عمل من غير غطاء من الكفيل أو تحت إسمه
ونعرف كثيرين يعملون فى أعمال خاصة بأسماء كفلائهم وتقع المشكلة عندما يختلف الأثنان ويتبين للسلطات أن الكفيل ليس صاحب العمل الحقيقى
|
Post: #22
Title: Re: ناس السعودية ابقوا عشرة على ريالاتكم لا تفرطوا فيها !!!
Author: عماد قريش
Date: 03-20-2013, 10:34 AM
Parent: #16
Quote: و أستغرب جداً عندما اسمع من شخص مقيم لأكثر من 10 سنة و يقول فيزا حره
لا يوجد شئ أسمه فيزا حره |
الأخ على
لك التحية
نعم لاتوجد فيزا حرة والمقصود بها أن الكفبل لا يلزمك بالعمل معه ويقوم بكافة الإجراءات المتعلقة من إصدار خطابات تعريف وترتيب عقودات عمل مع جهة عملك وفتح حسابات فى البنوك والتصدى لكل العقبات التى تعترضك.
عكس ذلك الكفيل الذى لاتراه إلا عند تجديد إقامتك ( ده إذا كان أساسا لميت فيه)
|
Post: #23
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 11:27 AM
Parent: #22
Quote: Mohamed Jamal · الأكثر تعليقا · ENSA Oujda
الاخ رحال ذكرتني قصة حقيقية حصلت في مطلع عام 2000 في الهفوف بالاحساء كان بعض السودانيين يقومون بذبح الاضاحي للسعوديين وكان الراس ب 150 ريال احد السعوديين عندو 3 خرفان قال ليهم بى كم قالوا ليه بـ 450 ريال مافي تخفيض قالوا: لا. قال ليهم متى تنقلعوا من البلد دي يا سودانيين قالوا ليه لن ننقلع حتى نراكم واقفين في صف الرغيف . والله صحي |
الاخ / محمد جمال ،،، تحياتي
تعرف يا محمد مثل هذه الحالات موجودة بكثرة ونحن شعب حقيقة لا نحسب لبكرة كثيرا بالاضافة الى ان خطواتنا ورسم المستقبل ياتي على السليقة من غير دراسة وجدول زمني وحاجات زي دي كده ووقت يطلع قرار نقول على الله من غير اعقلها وتوكل
مودتي
الرحـــال
|
Post: #24
Title: Re: ناس السعودية ابقوا عشرة على ريالاتكم لا تفرطوا فيها !!!
Author: الطيب عبد الرحيم خلف الله
Date: 03-20-2013, 12:40 PM
Parent: #23
| Quote: كمان جماعة الـ 60 سنة من العمر عملوا ليهم بلوك في الشاشة تجديد اقامة ما في |
أشرف
يا إبني إنت الكلام ده بتجيبو من وين..
نحن يا دوبك ما توهطنا وقعدنا في الوطة
يعني وطاتنا اصبحت..
تحيات عمك..
|
Post: #25
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 02:21 PM
Parent: #24
الاخ على عبدالله بشير ،،، تحياتي
Quote: اولاً هو ما عاد فى ريال يبقوا عليه عشرة
لأن المغترب المعاه أسرته الراتب قدر أيجار الشقة و المصاريف
و المدارس و قليل من المساعدة للأهل |
علي بالايمان كلامك ده التقول مفصلو فيني أنا ده سبحان الله عشان كده الفضل من الالتزامات دي الواحد حقو يقرض عليهو ود البقصدو انا إلا الشديد القوي على مستوى الروابط والجمعيات اهه دي زاتها الحكومة وقفتها
| Quote: أما حكاية الناس تقنع و تمشى لا أتفق معك فيها ... |
يا علي نقنع شنو ومنو القال كده ان شاء الله قاعدين !!
| Quote: فهذه القرارات ليست بالجديدة |
لكن المرة دي جادين فيها وجديتهم اصبحت ملموسة في الشركات والمؤسسات
Quote: و أستغرب جداً عندما اسمع من شخص مقيم لأكثر من 10 سنة و يقول فيزا حره
لا يوجد شئ أسمه فيزا حره |
فيزا حرة دي مصطلح انو انتا حر ما شغال مع كفيلك وديل هم الان مستهدفين في المقام الاول
مودتي
الرحــــال
|
Post: #26
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 03:42 PM
Parent: #25
الاخ ودالباوقة ،،، تحياتي
Quote: وبالعكس كل ما تنفق مما لديك
يبارك الله لك في مالك ويضاعفه |
صاح بس مشروطة قنوات الانفاق دي
والقاصدو انا يا عمر اخوي الانفاق على الفارغة والمقدودة
راكز فيها وماني مدلي تب
مودتي
الرحـــال
|
Post: #28
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 04:13 PM
Parent: #26
Quote: الأخ أشرف الرحـال،، دا كلام مهـم، وإشارة تنبيه (حمراء) لكافة المغتربين.
فالسلطات السعودية بدأت تفعيل القرارات المذكورة بحيث تصبح حياة المغترب النظامي أكثر كلفة
عليه وعلى الكفيل/صاحب العمل، وهذا الوضع سيجبر الطرفين على إعادة النظر في هذه العلاقة التعاقدية بينهما..
وبمناسبة القرارات،، آخر الأخبار أكدت على ربط تجديد الإقامة بالتأمين الصحي لجميع أفراد عائلة المقيـم..
يعني إذا كان صاحب العمل ملتزم ببوليصة تأمين للمكفول+زوجته+ طفلين حسب الوضع السائد، فإن القانون الجديد يلزمك بالتأمين على
كل العيـال المقيمين معاك. ومافي تجديد إقامة بدون تأمين صحي حتى للرضيع.. |
الاخ / طه داوود ،،،، تحياتي
اوفيت وكفيت وده الحاصل الان ويجب عل الجميع عدم الاستكانة والتطنيش انو هذه القرارات والقوانين موجودة من الزمان وغير مفعلة الان ومنذ فترة اصبحت معمول بها وتجدها وتحسها وتلمسها عند الشركات والمؤسسات المنظمة اصلا وهنالك كثيرا من المؤسسات الوهمية اغلقت تماما كما ان مغادرة الوافدين المستهدفين من هذه القرارات اصبحت في زيادة ملحوظة انطلاقا من الحتة او الجزئية هذه ( وهذا الوضع سيجبر الطرفين على إعادة النظر في هذه العلاقة التعاقدية بينهما.)
شكرا طه
مودتي
الرحـــال
|
Post: #29
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 04:39 PM
Parent: #28
الاخ عماد قريش ،،، تحياتي
| Quote: فى النقطة الأولى وردت جملة (بغير اتّباع القواعد والإجراءات النظامية المقررة) وهى تدل على أن الشخص يمكنه العمل مع غير كفيله إذا تحصل على موافقة مكتوبة من الكفيل وعقد بين الكفيل وصاحب العمل |
.
نعم هذه الوضعية ما يعرف بفترة التجربة ونقل الكفالة بحيث توجد كافة المستندات والاوراق المصدقة من تنازل الكفيل عن خدمات المكفول للجهة التي يراد النقل اليها وهذه الفترة محددة المدة وبعدها تنتقل خدماته لها ان اجتاز فترة الاختبار او يرجع الي كفيله السابق في حالة عدم الموافقة منه او من الجهة التي اراد ان ينتقل اليها لاي اسباب يراها الطرفين ... وفي الانشطة والمجالات الصحية يعرف بنظام الاعارة وتتم عن طريق موافقة الشؤون الصحية وهذه لا يشترط فيها نقل الكفالة بين المؤسستين الطبيتين
| Quote: فى النقطة الثانية المقصود بالعمل الخاص (العمالة السائبة) أى عمل من غير غطاء من الكفيل أو تحت إسمه |
ايوه ودي ملاحظة في عمال اليومية والمقاولات الصغيرة
| Quote: ونعرف كثيرين يعملون فى أعمال خاصة بأسماء كفلائهم وتقع المشكلة عندما يختلف الأثنان ويتبين للسلطات أن الكفيل ليس صاحب العمل الحقيقى |
بالطريقة دي ليس هنالك مخالفة للنظام بأعتبار انه يعمل في عمل ونشاط كفيله حسب الاوراق الرسمية امام الجهات المسؤولة و لجان التفتيش ولكن لها جوانب سلبية تتمثل في ضياع الحقوق وعدم اثباتها كما ذكرت في حالة نشوب اي طمع او خلاف او موت الكفيل نفسه فكيف للوافد ان يثبت حقه في هذه الحالة امام الجهات القائية العدلية وحتى بين ورثته
شاكر لك مرور والاضافة الوافية
مودتي
الرحـــال
|
Post: #30
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 04:58 PM
Parent: #29
Quote: نحن يا دوبك ما توهطنا وقعدنا في الوطة
يعني وطاتنا اصبحت.. |
الاخ الطيب عبدالرحيم ،،، تحياتي
ناس 60 سنة ديل من زمان كقانون موجود برضو غير مفعل ولكن الان عندنا زميلنا في العمل تجاوز عمره الـ 60 لم يستطيع المعقب تسديد الرسوم وتخيل الشغل ده اونلاين ووقت راجع جا بالنجيضة انه تجاوز الـ60 سنة .. طبعا ده بالنسبة للشركات والمؤسسات المسجلة عمالتها لدى وزارة العمل ولها بطاقات عمل
شكلها كده غربت شمس الاغتراب تاني الا الواحد يجيهم مغترب مباشرة من حفلة التخرج
مودتي
الرحـــال
|
Post: #31
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-20-2013, 05:09 PM
| Quote: ليس الحريص بزائد في رزقه |
الاخ بدرالدين مهدي ،،، تحياتي
ليس حرصا بهذا الفهم ولكن انضباط في الانفاق ويقول المولى عز وجل ( وَلاَ تَجْعَلْ يَدَكَ مَغْلُولَةً إِلَى عُنُقِكَ وَلاَ تَبْسُطْهَا كُلَّ الْبَسْطِ فَتَقْعُدَ مَلُومًا مَّحْسُورًا)
مودتي
الرحـــال
|
Post: #32
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-21-2013, 05:41 AM
Parent: #31
نتيجة لسياسات النطاقات التي اتبعاتها وزارة العمل بخصوص الشركات والمؤسسات والتي تهدف لربط استحقاقات الفيز الجديدة بنسبة السعودة ونتيجة للجدية وتفعيل هذا القرار فقد خلق 600 الف وظيفة للسعوديين في القطاع الخاص وهذا فقط عن العام السابق ..
تنظيم اوضاع العمالة الوافدة في السعودية يمشي بخطط مدروسة ويغطي كافة الجوانب حتى العمالة المنزلية من خدم وسائقين وطباخين وتربية اطفال لهم ترتيبات وفقا لسياسة وزارة العمل .. وبكرة بنشوف في مجريات هذه القرارات حيث لن يبقى في البلد دي إلا العمالة التي فعلا محتاج اليها الكفيل سواء كان فردي او شركة وذلك بسبب تكلفة المكفول المادية حسب الرسوم الجديدة لتجديد الاقامة وما يلزمها من تأمين طيبي للسنة والواحدة فقط
عكســـة :- اهه هسي ناس الدروس الخصوصية بعد الدوام ديل يقدروا عليهم كيف !!!!
مودتي
الرحــــال
|
Post: #33
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أمير محمد ادريس
Date: 03-21-2013, 09:51 AM
Parent: #32
الحمد لله على كل شئ ،، هو فضل فيها ريالات يا أشرف أخوي
تحياتي
|
Post: #34
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-21-2013, 10:48 AM
Parent: #33
| Quote: الحمد لله على كل شئ ،، هو فضل فيها ريالات يا أشرف أخوي |
الصفوة / امير الناس ،،، تحياتي
على قدر البتوفر نعمل فيهو كنترول عشان القرش الابيض لليوم الاسود مش برضو المثل هو كده
مودتي
الرحـــال
|
Post: #35
Title: Re: ناس السعودية ابقوا عشرة على ريالاتكم لا تفرطوا فيها !!!
Author: طارق زروق
Date: 03-21-2013, 11:21 AM
Parent: #14
| Quote: من زمان النظام في السعودية يمنع الوافد من العمل لحسابه الخاص كما يلزم الوافد بالعمل مع كفيله |
قصدك مع سيدو ,العبودية بابشع صورها مطبقة على الاجانب حاملين الجنسيات العربية فى السعودية,اما الاجانب اصحاب الجنسيات الغربية لهم حقوق اكتر من المواطنين السعوديين انفسهم
لذك تجد السعودية في ذيل قائمة الدول التى تحترم حقوق الانسان
|
Post: #36
Title: Re: ناس السعودية ابقوا عشرة على ريالاتكم لا تفرطوا فيها !!!
Author: طه داوود
Date: 03-21-2013, 12:27 PM
Parent: #35
Quote: نعم هذه الوضعية ما يعرف بفترة التجربة ونقل الكفالة بحيث توجد كافة المستندات والاوراق المصدقة من تنازل الكفيل عن خدمات المكفول للجهة التي يراد النقل اليها وهذه الفترة محددة المدة وبعدها تنتقل خدماته لها ان اجتاز فترة الاختبار او يرجع الي كفيله السابق في حالة عدم الموافقة منه او من الجهة التي اراد ان ينتقل اليها
|
الأخ أشرف الرحــال، تحيـة طيبة..
يـا أخي تشـكر على هذا الطرح المفيــد، وخصوصـاً لأخـوانّـا الناوين الجيـة للسعـودية
بتأشيرات جـديدة (حـرة!)، تكلفهـم أكثر من عشـرين مليـون جنيـه، تدخل جيب الوسيط وجيب كفيل المستقبل،
والمسكين لا يـدري أنّ عليه تـدبير ما يـزيد عن الـ 4000 ريـال فـور وصوله إلى الأراضي السعودية
لـزوم رسوم مكتب العمـل (2500 ريال) + رسـوم الجوازات (600 ريال) + التأمين الطبي (حوالي 800 ريال) لاستخراج
كرت (الإقامـة)، وبعـدها تبدأ المعركة الحقيقية، وهي البحـث عن (عمل),
ولكن قـانون مكتب العمل الذي يمنـع الشخص من العمل مع غير كفيلـه،
يمنـع أيضاً نقل الكفالـة إلى أي كفيل آخـر قبـل مرور حولين كاملين مع الكفيل الحـالي (دا الشغـل!)،
وطبعـاً لا تنسـى أن الكفيل الحالي عبـارة عن (تاجر فيـز) وليس لديه عمـل ولا يحـزنــون!!
فنـأمل من الجميـع الانتبـاه لهذه المطبات والمزلقانات قبل فوات الأوان..
|
Post: #37
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-21-2013, 06:06 PM
Parent: #36
الاخ طه داوود ،،، تحياتي
| Quote: يمنـع أيضاً نقل الكفالـة إلى أي كفيل آخـر قبـل مرور حولين كاملين مع الكفيل الحـالي (دا الشغـل!) |
نعم دي سقطت مني وجديد ومستحدثة قريبا وهي نوع من التحكم في طلب العمالة المحتاج لها اصلا الكفيل ومحاربة ما يعرف بالفيز الحرة ... وشكرا على الارفاد المفيد بهذا المداخلة القيمة لتعكس مدى تضيق الامر على عمالة الوافدة وبالتالي ان هذه الحزمة من القرارات سوف تظهر نتائجها في القريب العاجل ولن يكون في السعودية عامل وافد مقيم بصورة شرعية إلا وهو على رأس عمل وفقا للوائح وقوانين العمل وشروطها(مع الكفيل )
بعض نتائج هذه القوانين اتت ثمارها فهنالك كثيرا من العمالة اصبحت تغادر المملكة نتيجة لهذه القرارات
مودتي
الرحـــال
|
Post: #38
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-22-2013, 10:13 AM
Parent: #37
الاخ / طارق مرزوق ،، جمعة مباركة
| Quote: قصدك مع سيدو ,العبودية بابشع صورها مطبقة على الاجانب حاملين الجنسيات العربية فى السعودية, |
لا يا اخ طارق ما في سيد وعب في البلد دي ما يربطك به عقد عمل والعقد شريعة المتعاقدين عن نفسي انا ومجموعة الاجانب بمختلف جنسياتهم عربية افريقة اسيوية غربية كانت سواسية كسنان المشط في الشركة التي نعمل بها بما فيهم السعوديين انفسهم تحكمنا لائحة وسياسة شركة حسب الدرجة الوظيفية التي انت فيها وكل درجة وظيفية مقرونة بمزايا وفقا للشهادات والخبرة والمؤهلات العلمية والعملية والمهارية وفوق ده مركزك الوظيفي هذه شهادة حق في الشركة التي اعمل بها كما تربطناصلات الاجتماعية ممتازة خارج العمل ليس فيها اي ايحاء وعلو وسمو من الجانب السعودي مع انو ده شي طبيعي ان يتميز عنك ابن البلدويشوف نفسه حبتين زي العندنا حاصل
| Quote: اما الاجانب اصحاب الجنسيات الغربية لهم حقوق اكتر من المواطنين السعوديين انفسهم |
والله اعرف كندي وفرنسي واسترالي شغالين معاي في النفس الشركة في سوداني راتبه ومميزاته اعلى منهموواحد منهم تحت ادارته
| Quote: لذك تجد السعودية في ذيل قائمة الدول التى تحترم حقوق الانسان |
يا طارق لو فتحنا الباب ده هسي السودان موقعه وين في هذه القائمة !!!
الموضوع يا اخ طارق ينصب في تنظيم شؤون العمالة الوافدة في السعودية ومن حق الدولة المضيفة ان تفعل من يجنبها من الفوضى و لا يهضم حقوق المواطنين والحاجات دي عادي عندنا في السودان الجديد شنو يعني !!
مودتي
الرحـــال
|
Post: #39
Title: Re: ناس السعودية ابقوا عشرة على ريالاتكم لا تفرطوا فيها !!!
Author: محمد احمد القاضي
Date: 03-22-2013, 12:43 PM
Parent: #1
الاخ اين دورة حكومة البشير فى الحفاظ على حقوق المخترب , الحكومة بس تعرف تاخذ ضرائب من المختربين و سرقتهم
لك و لكل عامل سودانى يعمل فى المهجر ..
|
Post: #40
Title: Re: ناس السعودية ابقوا عشرة على ريالاتكم لا تفرطوا فيها !!!
Author: أشرف الرحال
Date: 03-22-2013, 01:22 PM
Parent: #39
| Quote: الاخ اين دورة حكومة البشير فى الحفاظ على حقوق المخترب |
الحبيب ود القاضي نمرة 2 ،،، تحياتي وجمعة مباركة
يازول حقوقنا هنا الحمدلله ما محتاجين فيها لحكومة البشير عشان تحفظها لينا واله محفوظ والحمدلله ... بس ادعو انتا ان تحفظ حكومة البشير حقوق ناس الداخل الجوه البلد ديل المغتربين عوجة ما بجيهم تب
مودتي
الرحــال
|
|