سجك بجك كم في الخط؟

سجك بجك
كم في الخط

كم وعشرين
كضبا كاضب

نان لمتين؟
نقول تلاتين

ما عارفين
اتمكنوا فينا
تجار الدين

شليل وينو
خطفوا الدودو
شليل وين راح
أكلوا التمساح

وأحمد غائب
في الركائب
جونا كلاب سنونن صفر
حلبوا الخزنة
وجابوا المحنة

قسموا بلادنا
كتلوا ولادنا
جلدوا بناتنا
شردوا عقابنا
ساديين
بحبوا عذابنا
تجار دين

قالوا شريعة
وشريعة سريعة

بكم تهليله
وكام تكبيرة

المزيكا تضرب
والكشافا جات
حتوه حت
ساطوه سواط
وللشعب الفضل
ختوه قرض

قرضاً ربوي للخزان
وقرضاً حسناً للأخوان

باسم الدين ده فقه الحاجة
حاجة تكسف يا اخوان

تاكل تنهب دوام معذور
بفقه السترة دوام مستور

واخوان تانين بنوها فيلل وقصور
وعمك صابر مع سبعة عيال وبت النور
في فرد اودة دوام محشور

والثعلب فات وفات
وفي ديله سبعة حكايات
والهول ضرب الدولار
والعسكر واقف طابور
يا جماعة شوفوا الطرطور
يتلبد زي فاراً مزرور
والحيطة وقعت في شعب
وصاحبها واحد خنزير

شدت شدت يا اخوان
شعبنا اكيد كسبان

يا طالع الشجرة
جيب لي معاك ثورة

تحلب تعشيني
امرض تداويني
ابرد تدفيني
تخليني في ديني
وبنفس تلويني
أجهل تعلمني
تبني وتبنيني


يا طالع الشجرة
جيب لي معاك مصنع
وعلمني كيف اصنع
اديني حواشة
وأرشدني كيف أزرع

يا طالع الشجرة
جيب لي معاك وحدة

ناس الشرق يرتاحوا
وناس الغرب ينجموا
ناس الشمال يتلموا
وناس الجنوب ينضموا

ونعود من تاني
بلدا جميل بالحيل

يعود سودانا مترامي
زي ما كان قبيل
مساحه مليون ميل