Post: #1
Title: كل المشاريع جربتها الا الحضاري
Author: عمر الفاروق عبد الله الشيخ
Date: 03-14-2013, 11:05 AM
يا حاجة التومة جيبي الشاي ده برة في الحوش .. جلس محمد احمد بضم الحاء مع ضيفه ود اللغا في الحوش يتونسان:
محمد احمد: انت يا ود اللغا المشروع الحضاري ده شن نفره وبربح ولا دايرله قروشاً كتيرة
ود اللغا: والله يا حاج محمد اخوي ما خابره لكن بقولوا في ناس اتكسبوا منه كتير وكسبوا ناسهم المعاهم
محمد احمد: كدي فسر لي اكتر باقي فهمي في المواضيع دي قليل
ود اللغا: باقي لي هم ناس عملولهم شركة كبيرة لكن ما عارف جابوا قروشها من وين؟ والمشروع ده بدي الناس المشاركين فيه بيوت سمحة بالحيل بسموها فلل ولو فيهم واحد شعر بوجع حلق ولا نزلة حكومية يسافر السعودية
ولا الاردن في شان يتعالج والناس الما معاهم في المشروع ده العندهم حمي صفرا وتايفويد وفشل كلوي وسكري ليهم الله يتعالجوا هنا جوه والاعمار بيد الله.
محمد احمد: والله مشروع سمح لو كان شركوا كل الناس
ود اللغا: وكمان كله واحد يغرف من المشروع ده زي ماعاوز لا حسيب ولا رقيب وفي واحدين يقولولك ياخي نحن ناس نشيطين في المشروع ده كدي شوفوا لينا عربية نحن ما طماعين ان شاء الله دبل قبين
ولو قروش الواحد ده في المشروع كترت يحولها لدورارات وممكن يحفظها في بنوكة عالمية قالوا في سويسرا وماليزيا وحتي بلاد الانقليز.
محمد احمد: لينا الله وعيشة السوق .. ما في طريقة نشترك في المشروع ده .. الواحد بشارك بكم؟
ود اللغا: بقولوا الا تكون اسلامي ومؤتمر وطني حتي يشركوك معاهم في المشروع ده!
محمد احمد: اسلامي دي والله من ما قمنا اسلاميين ما فينا زولاً كافر لكن أبقي مؤتمر وطني دي كيف؟
ود اللغا: يا خوي الناس ديل ليهم 24 سنة مكونين مؤتمرهم ده ما اظن بعد ده يشركوك معاهم كدي انت حاول ليك زول معرفة بالوالي ولا المعتمد يشوفوا ليك طريقة علي الاقل يدوك ركشة واسكان شعبي!!
محمد احمد وانت مالك ما اشتركت في المشروع ده ؟ ما خليت ليك مشروع ما شاركت فيه او جربته .. مشروع ناس محيميد في الشمالية عندك فيه كامين سهم.. مشروع التاكسي التعاوني عندك فيه تاكسي تاكسيين ..
مشروع الموبايلات والمسنوح داك اللابطوب عندك ليه دكان .. مشروع دكاكين السمك المسكتها نسوانك الاربعة ده غير مشروع كشافات الدهب الجبتها من الصين .. مالك ما شاركت الجماعة ديل في مشروعهم الحضاري؟
ود اللغا: منو القاليك انا مشارك باسم ولدي .. قالولك انا كيشة امكن باكر المشروع ده يطرشق نشوف لينا مشروعا حضاريا آخر.
|
Post: #2
Title: Re: كل المشاريع جربتها الا الحضاري
Author: Gafar Bashir
Date: 03-14-2013, 11:50 AM
Parent: #1
| Quote: قالولك انا كيشة امكن باكر المشروع ده يطرشق نشوف لينا مشروعا حضاريا آخر |
عاااااااااااااقل محمد احمد
تحياتي وشكرا يا عمر
|
Post: #3
Title: Re: كل المشاريع جربتها الا الحضاري
Author: عمر الفاروق عبد الله الشيخ
Date: 03-14-2013, 12:02 PM
Parent: #2
| Quote: عاااااااااااااقل محمد احمد |
تحياتي جعفر بشير
انتوا رايكم شنو في محمد احمد؟
|
|