مجرد ملاحظة: في كل الحيوانات الذكر أجمل من الأنثي إلا الإنسان !!!

الديك أجمل من الجدادة (الدجاجة)









_________________

الترجمة دي لناس الشهادات الأجنبية (عربية وغير عربية)

الأسد أجمل من اللبوة











عايزين صور ولّا مصدقيني ؟

الخروف أجمل من النعجة

الثور أجمل من البقرة

Quote: في كل الحيوانات الذكر أجمل من الأنثي إلا الإنسان !!!

دا كلام زول ما شاف رشاد وتومى عمران ....

Quote: في كل الحيوانات الذكر أجمل من الأنثي إلا الإنسان

في دي أنا ما معاك أنت خلي بالك ما شفت (مازن )و (جهولة أم سكاسك )

Quote: دا كلام زول ما شاف رشاد وتومى عمران ....

شفتهم يا دندون ، يا ستهم (على قول بروفنا)
ممكن يكونوا أجملهم
لكن ما أجمل منهن

شكراً للمرور

Quote: في دي أنا ما معاك أنت خلي بالك ما شفت (مازن )و (جهولة أم سكاسك )

أمير يا طمبل
إلا تجيب صورهم

تحياتي

ماشي أنوم
لغاية الصباح ، الله يحفظ النظرية من النكسة
لكن أنا مطمئن ، الجوكر قاعد
ذكر الطاؤؤس
والله إنزل ليكم صورة الذكر جنب الأنثي ،، تآمنوا

مممممم !
.
.
.
.
أنت كذكر بشرى بتترأى ليك الانثى البشرية ....أجمل !
اتوقع الانثى البشرية بترى الرجل ... أجمل ! ،،، ما حيعترفن بالكلام ده
انا عملت مقارنات قبل كده
تخيلت نساء (بشكلهن الحالي كرجال - والعكس كذلك !
وصلت للرأي الفوق ده
اظنه صحيح
------
الذكر البشري لم يشذ عن القاعدة دي في جوانب معينة ،،،

تخيلوها (ايها الرجال) لو كان طلعت راجل
بدون تظبيط الحواجب
بدون (البيعملوه في الشفايف)
بدون تنعيم البشرة
---------
النسوان ديل خامينكم ساي

Quote: الخروف أجمل من النعجة

في دي انا ما معاك يا ابوحميد
ما بتفرزوا .. عن تجربة :)

سلام ياناس الحوش
و تحية لصاحب البوست
شوف مهند في دبي

http://www.sudaneseonline.com/news-action-show-id-90465.htm

يا ود ابكر بمقياسك انت ومقياس كل البشر وبنظرتنا كلنا الذكر في الحيوانات اجمل من الانثي لكن في اي زول سأل او شاور الحيوانات منو الاجمل المرأة ام الرجل فاحتمال عندهم يكون الرجل اجمل من المرأة لأن معايير الجمال وقياسه قد يختلف عند الحيوان

This what is called hasty generalization,a well known logical fallacy
I ,definitely,will come back with more and in Arabic

سلام للجميع
انا بافتكر جنس الرجال اقرب للحيوانات من جنس النساء يعنى ما اتطورتو فى سلم التطور بصور كبيره :)
عشان كده الواحده لمن تتزوج بتتبشتن معاكم ...... ومن عاشر قوم اربعين يوما .... :)

أنا أفتكر السبب فى أن ذكور الحيوانات أجمل .. شيئ مرتبط بالجنس .. فأنثى الحيونات تتعامل بالمظاهر أكثر من لغة الحب ..

مثلاً ذكر الحيزبون (الحربويه) حينما يقابل أنثى يقوم يبدل ألوان جلده .. يدبج ألوان وألوان حتى يجد ما يناسب مزاج الأنثى التى تراقب عرض أزياءه بأمتنان .. فإذا أعجبتها بعض الألوان ينشرح صدرها ويبدى ذلك فى تجاوبها مع الذكر .. فيثبت الذكر هندامه ثم يقدل وهو فرحاً بانه اقنع الأنثى بأن تحبه.

أنثانا نحن البشر متطلباتها أكثر من الزى والزينة .. ويدخل فى خياراتها حتى عمق الجيب (الجيب غريق ام ضحل) .. عشان كده الزول الشين وجيبو غريق برضو بنافس .. شفتوا البلاوى النحن فيها؟


بريمة

فى الشعوب البدائية مازلت زينة الرجل تجذب الأنثى .. كما فى الوادوبى .. (هم أصلا من الفلاته ) ..





فى جنوب شرق أسيا .. المرأة هى سنتر الأهتمام .. عليه أصبحت الزينة جزء من مهامها هى ..



بريمة

صاحب البوست و الضيوف
سلامات
هي بالطبع اكثر من ملاحظة لانها نظرية شديدة الوضوح
ولها اسانيدها المقنعة و ترتبط بالتطورية الدارونية منذ القرن 19
وتتلخص ببساطة ان سلوك جذب الشريك للتناسل يقوم به الجانب
الاضعف تناسلياً و هو الذكر مما يستدعي ان يقوم باستعراض
نفسه امام الطرف الآخر فيما يعرف بسلوك الغزل courtship
و يستدعي ذلك ان يظهر بمظهر اجمل.
في الانسان الحال هو نفسه كما في الحيوانات و لكن لظهور
اقتصاد متطور يسيطر عليه الرجال حدث تغير سلوكي
مرتبط بالتزين و ليس بالجمال الظاهري رغم شدة قرب الاثنثن
من بعضهما البعض، ولكن لا تزال معاير جمال انثى الانسان
ذات دلالات تناسلية -ما اظن دايره شرح- بينما مقاييس جمال الرجل
صورية اي مقاييس جمال مفردة

لو داير صور و فيديوهات عن الموضوع دا سنة ما بتكفي
و الله صحي

تحياتي لجميع الحضور
آي أنا عارف إنو الموضوع مشوق ومثير لدرجة يخلي الكثيرين يجو مسرعين ويدخلوا من غير إحم إحم
لكن برضو تبسمك في وجه أخيك صدقة
قصدي لا تنسوا التحية لبعضكم وإنتو داخلين
برضو بعرف إنو الموضوع مافيهو شيئ يؤدي إلى الدشمان ، فالساحة أمان، لأن ما فيهو سياسة ولا يحزنون
لكن برضو السلام يعزز الأمان ويفشي جو الوئام

ولّا .... أقول ليكم كلام ...
ممكن برضو تخلو التحية في نهاية المداخلة وإنتو مارقين ، لو خايفين منها تشتت ليكم الأفكار


بجيكم للكلام الجميل الإتقال منكم

أيمن محمود
ليك التحية

Quote: أنت كذكر بشرى بتترأى ليك الانثى البشرية ....أجمل !

ياخي ظلمتني ،
يعني إنت حكمت على بأنو انا إستندت على غريزتي وشهوتي بس في نظرتي لجمال المرأة؟
ما إعتقدت إنو أنا عندى معايير ، غض النظر عن معاييري غلط أو صاح ؟

طيب إيه رأيك أنا جادلت نفسي كتير في الأول
وحتى إتفقت معاك في جزء من كلامك دا

Quote: الذكر البشري لم يشذ عن القاعدة دي في جوانب معينة ،،،

اثناء التصحيح ، كنت بدي درجات للرجل في بعض المواد ، وللمراة في مواد اخرى
لكن لقيت النتيجة النهائية ال Average إنو المرأة متفوقة
قول لي كيف؟
قوام الرجل أجمل ، لكن ملمس المراة ألطف
بنية الرجل اقوى ، لكن قسمات المرأة أجمل
صوت الرجل أقوى ، لكن صوت المرأة أرق
وهكذا
لكن لأننا نتحدث عن الجمال وليس القوة ، المرأة فازت
إذ لم ترد كلمة اجمل أو ألطف او أرق في حق الرجل إلا فيما يخص القوام فقط

ود البشري
سلامات
كيف الخروف والنعجة ما بنفرزو من بعض
القرون دي مش ميزة جمالية إضافية عند الخروف ؟



لكن كلامك برضو صاح
ما كل الخرفان عندهم قرون

عبد العزيز نهار
تحياتي
صحيح ما سألنا إناث الحيوانات عن رأيهن في جمال ذكورهن
لكن سألت نفسي
ليه الحاجات الجميلة البنشوفها في ذكور الحيوانات
من تاج الديك إلى ريش الطاؤوس إلى شعر الأسد ، إلى صنام الثور .... إلخ
كلها عندما جئنا إلى البشر ، سُحبت ووُضِعت في المرأة بدلاً عن الرجل ؟

سلام ورحمة
الله يجازي استاذ (كدوده) اللغة العربية بمدرسة الخرطوم القديمة خير الجزاء
وانا اتذكره بموضوعك هذا , ففي يوم دخلنا علينا الصف , وكتب على السبورة ايهما اجمل الرجل ام المرأة
واجبناه جميعا بدون تردد المرأة
وبدء معنا الحوار بالمقدمة الاتية
عشان نعرف الاجمل يجب ان ننظر للرجل في كل مراحله العمرية و للمراة في كل مراحلها العمرية
كده جرب كده وحتغير رايك ,, وستجد الرجل في اغلب المراحل العمرية هو الاجمل من ناحية التناسق والبناء الجسماني

زينب محمد عبدالله
يا زنوبة ما قلتي إلا الحق
ياخي الترتيب والرواقة العند النساء مافي مقارنة بينها وبين الرجال


دكتور سيف شايفو زعلان وقلب الحديث بالتنقليزي بس
وقال دا تعميم متسرّع و(فالاسي) أوفهم خاطئ ومغلوط
أيوة دا الكلام الدايرنو
يبدو إننا موعودون بمداخلة علمية مدنكلة


برضو جو ناس التخصص ، بريمة يا بلل
بالجد يا بريمة معلومتك خطييييرة ومفييييدة دقييييييقة
ياخي لو تخلي السياسية وشغل القبائل وتشوف شغلك الإنت بتجيدو ، صدقني حتبدع
زمان في المتوسطة درسنا مقطوعة مقالية للكاتبة المصرية سهير القلماوي
بتقول فيها:
كل شيي في مكانه جميل
ليس في الوجود شي غير نافع
أو ضار ، أو حقير
حتى الدودة في الارض لها وظيفة تؤديها
بروعة منقطعة النظير .....

هوي أنا دخلت في سياسة ولا شنو ؟
إستغفر الله

تحياتي لكم جميعاً

Quote: : في كل الحيوانات الذكر أجمل من الأنثي إلا الإنسان !!!

ما كل ذكور الحيونات اجمل
فأنثى القط هي الأجمل
وأنثى الغزال هي الأجمل

خالد شمبول
وعمّار عبدالله
تحياتي لكما
بتفق معا الرايين ديل وهما في نفس الإتجاه
كتب خالد:

Quote: ولكن لا تزال معاير جمال انثى الانسان ذات دلالات تناسلية -ما اظن دايره شرح

وكتب عمار عن أستاذه كدودة:

Quote: وستجد الرجل في اغلب المراحل العمرية هو الاجمل من ناحية التناسق والبناء الجسماني

والتحية من هذا المقام أزجيها لأختي العزيزة مريم تكس
فلقد جادلتني وأقنعتني من هذه الزاوية وقالت لي مثل هذا الكلام قبل سنوات
إذ قالت إن تضاريس المرأة أغراضها وظيفية
وهي تؤيد نظرية إنو الرجل أجمل من المرأة

الاخ احمد ابكر ... ملاحظه قويه فعلا والسبب والله اعلم جمّل الله الذكران من الحويانات ليجذب الاثنى كما يتباهى بذلك كل الذكور مثل الديك والطاووس وكثير من الطيور لكن الله اودع في الذكر من بني آدم صفات وميزات كثيرة خصها من دون الحيوان ( وجعلنا بينكم مودة ورحمة) فاذا علم الانسان هذه الاسرار التي حباه الله بها واجاد استعمالها كانت كافية لجذب الزوجة ونيل الاعجاب دون النظر الي الشكل

الأخ أحمـد أبكر ،، تحيـة طيبة

أنا أعتقد أن المسألة محتاجة لمزيد من البسط والتحليل.. خصوصاً، من أهل الاختصاص.

والمداخلات العلمية كمداخلة الاخ بريمـة مثلاً أضافت أبعاد جديدة للموضـوع.

في رأي أن الجمـال (الظاهري) في كل المخلـوقات، وفي المقدمة الإنسان، يمـر

بمراحـل صعـود وانحـدار.

وكما في المثل الغربي: small is beautiful نجـد أن الصغيـر دائمـاً أجمـل.

أحمد ابكر
اول حاجة - وبكل صراحة انا شايف انو التعامل مع البوستات بصورة شخصية خالص مافي داعي ليهو !
يعني بالنسبة لي عادي جدا ممكن تخش ان بوست فاتحو بدون مقدان وسلامات وحاجات زي دي -
خش تووووش بى رأيك ،،،
لكن لو انت بتحب يسلمو عليك اول - بقول ليك : (أهلييين يا حمادة)

الحاجة التانية - لوسمحت جيب الجدول العملت فيهو المقارنة (يبدو انو مثير جدا) ،،، عشان نتناقش فيهو
أشكرك على البوست (لأنو طلعنا من مود البورد الممل)

أيمن محمود
حقك علي
مسألة التحية دي مجرد مناشدة وتفضيل ، طمعاً في المزيد من الأريحية ، لا أكثر
وبعدين ياخي أنا فاقد حنان وشبعان توتر في هذا البورد ، بخلانين على بكلمة Hi وإنت داخل
أو Bye وإنت خارج ؟
لكن خذ راحتك ياخي
القائمة وردت في بعض مداخلاتي وما بالضرورة نتناقش حولها ، فقط قصدت أن أنفي إنو أنا بنيت على الغريزة
الضروري هو أن أعرف الآخرين بقولوا شنو
وحكاية إنك ظلمتني دي ملاطفة مني ياخي ، ما قدر دا


تحياتي

الحبيبان
فايز أحمد
وطه داوود
كلامكم سمح بالحيل
وشكراً على المرور

Quote: لكن لو انت بتحب يسلمو عليك اول

آي والله يا أيمن بحب السلام
لكن فضلاً لا امراً
زي ما أيمن مرات بيحب يسلم

Quote: كيفك يا هندسة شكرا يا عاطف على البوست ده تحياتي يا ذو اليد سلام يا فتحي سلام يا بدر الدين

تحياتي

Quote: في كل الحيوانات الذكر أجمل من الأنثي إلا الإنسان

الرأي ده ، شخصياً، قلت بيهو كتير وفي الغالب الناس ما كانوا بيتفقوا معاي.

الفرق الوحيد، إني ما عملت زيك واستثنيت الإنسان.

يعني شوف في مملكة الحيوان زي ما إتفضلت الجمال - دائماً - لصالح الذكر في (الأسد واللبوة)، (الديك والجدادة)، (الطاؤوس والطاؤوسة)، (التيس والغنماية)، (ود ابرك وعشوشة)، (الببغاء ومرتو) ..... إلخ.

بالنسبة للطيور، الزينة بتكون في زيادة في الريش وألوانو، وبقية الحيوانات، يكون تمييز الذكر بشعر لا تملكه الأنثى مثل مثال الأسد واللبوة. ....... عند الإنسان نفس النظرية، يتزين وجه الراجل بلحية وشارب تفتقده النساء. .... حتى الجسد، يتميز الرجل (في الحالات القياسية)، بعضلات مفتولة أو، على الأقل، لا يميل جسده للترهّل.

أنسى التدخل الآدمي في مسألة الزينة وارجع للطبيعة وخلقة ربنا .... حتلقى النظرية تنطبق على الإنسان.

سلام صاحب البوست الاخ احمد ابكر
بوست لطيف
كتب الاخ محمد ابو العزايم ابو الريش:

( يتزين وجه الراجل بلحية وشارب تفتقده النساء. ...)

بالغتا فوكا... يعنى بى نفس منطقك دا ممكن انحنا نقول تتزين او تمتلك المرأة اثداء يفتقدها الرجال

المساله بى اختصار هى... ماهو الشىء الذى يجذب الطرف الاخر... وربنا وضع الاشياء فى اماكن معينه فى الانسان لى حكمه
يعنى هسى لو فى أمراة عندها لحيه شارب تقبل ويين ؟؟ والبرضى بيها منو ؟ وحتكون حاله شاذه يشار الها بى البنان
and vice - versa بالنسبه لى الرجل فى الاشياء الجماليه التى تخص المرأة

بعدينك يا جماعه.. شعر الاسد او لبه الاسد ترمز لى المهابه يعنى زى التاج .. ولوما مصدقنى أسالوا اللبوه :)

غايتو عايزين بالقوة تشاركونا فى اى حاجه :)

يا جماعه فى النهايه الفضيله للعقل ...الرجل الفاهم ما يخلصش ... كدى ركزوا لينا على زينه العقل دى

القرد عند عين امو غزالة


___________________
سلامات يا هبيب

محمد أبو العزائم
كلامك أغلبو عجبني ومنطقي
إلا في حكاية اللحية التي تفتقدها المرأة دي ، رد زينب كان قمة المنطق والروعة
لأننا عندما نحكم على شيئ بأنه ميزة جمالية يفتقدها الآخر ، معناه إذا أضيف ذلك الشيئ المفقود إلى الجهة التي تفتقده يزيدها جمالاً وتميزاً
وهذا لا ينطبق على الحية للمرأة
لكنه يصح بالنسبة للريش والتاج وشعر الرأس والرموش والقوام المقاوم للترهل

ويا زينب بالجد عندك ملاحظات تستوجب التوقف والتأمل
زي دي برضها

Quote: بعدينك يا جماعه.. شعر الاسد او لبه الاسد ترمز لى المهابه يعنى زى التاج

مسالة المهابة دي واردة
والسبب أعتقد علشان مهام الحماية المناط بها الذكر ، فالحماية والمصادمة تتطلب الهيبة
زي العساكر والمحاربون البيلبسوا الصولجان

تحياتي

إيهاب ومنير والهبيب محجوب
إزيكم

يا إيهاب
إنت برضك بقيت زي دينا ، من وسط الملايين تجيب وااااااحد بس وتقول شوفوا دا
قلنا ليك بنات حواء ، تجر اي واحدة من طرف وتنافس بيها

منير ،
الكديس والكديسة ، والغزال والغزالة دي غايتو كان جبت لينا صورهم تكون ما قصرت
لأن الفروقات ما واضحة لي


الهبيب محجوب
القرد في عين أمو غزال ، ما قلنا حاجة
لكن قردين (ذكر وأنثي) في عين أمهم كلهم غزلان وزي بعض بالضبط ؟ دا السؤال

تحياتي

وضاحة عايزة تحبط النظرية لكني لها بالمرصاد
الدليل:
1- من بين ملايين الرجال تجيبي واحد بس زي دا
بينما من كل خمس سيدات ممكن أجيب واحدة تجرس البورد
2- الرجال البتجيبوهم هنا وتقولوا عليهم جميلين (وهم جميلين بالفعل) كلهم بيشبهوا النساء
يعني النساء هن الاصل في الجمال ، والرجال إلا يشبهوهن حتى نقول عليهم جميلين

منطق ولّا لا ؟

احمد ما هى مقايسك لجمال الذكر ؟

حاقولهم ليك يا وضاحة
بس أسمحي لي اسألك في الأول: ما هي الحاجات الجميلة المتوفرة في الزول الإنت جبت لينا صورتو فوق؟
واللى أكيد إنت إعتبرتيه جميل
لو قلتيهم حتلقيهم هي نفسها المقاييس الأنا حأحدثك عنهم
وحتلقيهم هي الأكثر وفرة عند النساء
بإستثناء القوام والبنيه ( علماً بأن الراجل الإنت جبت صورتو ، جبتي وجهو بس)
يعني إنت حكمت بأنو جميل من غير عنصري القوام والبنية
إذاً ، ما الذي اعجبك فيه؟

Quote: ود البشري سلامات كيف الخروف والنعجة ما بنفرزو من بعض القرون دي مش ميزة جمالية إضافية عند الخروف ؟

يا معلم ود البشرى قاليك ما بنفرزو يبقى ما بنفرزو..

قال ليك اخدو خروف عديل مشى البيت لقى سمان مافي موجود
برضو تقول لي بنفرزو؟؟

النسوان بيتهمونا اننا بنتعامل زي انثى الحيوان، اى اننا لمن نختار شريكة حياتنا بنعتمد غالباً على الجمال المظهري فقط واحيانا بعد الزواج نكتشف ان هذه الزوجة جميلة فقط! والاتهام تااااني يرجع لينا لو حصل الطلاق ؛ اتوا ما اخترتها من الاول بناءا على الجمال بس هسي جايي تتطلقا عشان ماعجبتك في صفاتها الاخرى؟

Quote: مثلاً ذكر الحيزبون (الحربويه) حينما يقابل أنثى يقوم يبدل ألوان جلده .. يدبج ألوان وألوان حتى يجد ما يناسب مزاج الأنثى التى تراقب عرض أزياءه بأمتنان .. فإذا أعجبتها بعض الألوان ينشرح صدرها ويبدى ذلك فى تجاوبها مع الذكر .. فيثبت الذكر هندامه ثم يقدل وهو فرحاً بانه اقنع الأنثى بأن تحبه.

شكراً اخ بريمة وكلامك دا هسي بقت الانثى تسويو اى انهن يتجبطن بشتى انواع الكريمات لمن يجذبن فارس احلامهنَّ

في بداية التسعينات في صحفية خليجية أسمها عبلة النويس كتبت موضوع زي دا في مجلة زهرة الخليج وقالت الرجل السوداني مظلوم وهو أكتر جمال من المرأة السودانية

أتذكر لمت فيها بخيتة أمين سخت كويس في رد مشهور.

أسامة
سلامات .. ما دام تقرأ ل عبلة النويس .. هاك إحد مقالاتها القديمة .. وتعال شوف العجب ..

Quote: عبلة النويس: حراج لبيع الأزواج البيان الإماراتية منحدر جديد سقطت فيه الاسرة العربية.. فقد أقدمت سيدة ـ لا تهمنا جنسيتها وإنما انتماؤها العربي هو المهم ـ على بيع زوجها لزوجته الثانية بتسعمئة دولار فقط لا غير، قائلة: انه لا يساوي غير ذلك.. وانها ارتاحت من عذاب السنين. ربما تكونون قد سمعتم قصتها.. ولمن لم يسمعها أختصرها له: السيدة تزوجت وفقاً للتقاليد من قريبها المزارع بعد ان رفضت اسرتها طبيبا تقدم لها.. لان القريب أولى من الغريب.. عاشت مع القريب في مزرعة صغيرة يملكها راضية بقسمتها ونصيبها.. كافحت معه صعوبة الحياة وقسوة الايام.. كانت تمنع اللقمة عن فمها حتى تجمع النقود لتبني لها بيتا تشعر فيه بالدفء والسترة الكاملة.. وبعد سنوات عجاف تمكنا من بناء بيت لهما.. وبدت سعيدة حتى جاء ذلك اليوم (بعد سبع سنوات من الزواج) الذي أخبرها فيه ان زوجة جديدة ستأتي إلى البيت وعليها أن تدبر أمرها وتفسح للضيفة الجديدة مكانا.. استجارت بكل من حولها ولا فائدة.. استنجدت بأهلها ولكن لا حياة لمن تنادي.. وجاءت الزوجة الجديدة لينقلب البيت إلى جحيم.. عانت الأمرين من جحود الزوج ومنغصات زوجته الجديدة التي لم تقصر في الكيد لها وإذاقتها المرار ألوانا.. وفي النهاية لم تجد بدا من أن تبيع زوجها لضرتها (غريمتها) بتسعمئة دولار!! وترتاح من عذابها.. فأصبح زوجها لا يسأل عنها ولا عن أولاده منها الذين دفعوا ضريبة غيرهم.. وأصبح كل اهتمامه موجهاً لزوجته التي اشترته بحر مالها.. ورغم البيع الاجباري فقد اعلنت أم العيال على الملأ انها تعيش سعيدة الآن ومرتاحة البال.. رغم ان زوجها يرفض ان يمنحها ورقة الطلاق لترتاح نهائياً. هذه السيدة لم تكن الأولى عالميا.. لكن ربما الأولى عربياً التي تخلع نفسها بلغة البيع والشراء المباشر.. فمن قبل اضطرت سيدة فيتنامية فشلت في اقناع زوجها بالتخلي عن صديقته الشابة للموافقة على بيعه للأخيرة مقابل 7.5 ملايين دونغ 516 دولارا، وقالت صحيفة "ثان نيان" الحكومية: ان الصديقة الشابة دفعت المبلغ على الفور الى الزوجة الغاضبة وتوجهت إلى منزلها بصحبة الزوج.. واضافت الصحيفة: ان الزوجة التي باعت زوجها تعيش الان وحيدة في مقاطعة دونغ ناي الجنوبية. شكل جديد من أشكال التصدع ظهر على الأسرة العربية جراء العولمة التي ننجرف إليها بلا وعي وبلا أي محاولة للتوقف.. بل إن من يحاول أن يتوقف يجرفه التيار القوي فأصبح لا حيلة له ولا قوة سوى الانحدار مع التيار حتى تأتيه ساعته ويلقى قدره المحتوم. هذه هي العولمة ونتائجها الوخيمة على الاسرة العربية التي كانت مسالمة تعيش في أمان الله تنعم بالهدوء وتقتات البساطة وتشرب الراحة وترتوي من السعادة وتشد أزر نفسها بالتماسك والتكاتف والتعاطف والوئام. الأسرة العربية الان مسحت العولمة عقلها وجعلتها مسخا مشوها.. بعد أن نخر سوس الثقافة الغربية في عاداتها وتقاليدها ونمط تفكيرها.. والذي جعلته الفضائيات مثل "النمل الأبيض".. يصعب مقاومته إن تسلل إلى أي بيت.. فهو ينخر في الاساس.. وقد لا يدري أهل البيت به حتى يفاجأوا بانهيار البيت.. ويعتقدوا ان الانهيار حدث فجأة.. لكنه في حقيقة الامر حدث منذ تسلل ذلك السوس إلى أساس البيت.. الذي هو الاسرة في مجتمعنا العربي. الأم.. وهي الزوجة.. والتي يضرب بها المثل في الحنان والرقة والشفقة والضعف.. اصبحت في عالمنا العربي تقتل الزوج وتمزقه وتضعه في أكياس تلقي بها في عرض الطريق دون ان يهتز لها جفن.. واصبحت تبيع أبناءها.. وها هي تبيع زوجها.. وغداً... لا ندري ماذا سيحدث؟ .. انها مأساة زرعتها في الاسرة العربية الفضائيات التي تقدم كل يوم جرعات هائلة من الثقافة الغربية المتمثلة في العنف والجنس.. فأصبح العري وما حوله مشهدا عاديا.. وتبعاته مشهداً لا يخجل اي رب اسرة أو ربة بيت أن يحدقا فيه حتى أمام الاولاد الصغار.. واصبحت مناظر الدماء والقتل والاشلاء عادية بعد ان كانت تقشعر لها الأبدان.. واصبح الشك ينتاب كل أسرة عندما يبتسم الزوج لذكرى بريئة مرت بخياله.. وكلمة عابرة قالتها زوجته.. اجتماع الاسرة حول مائدة الطعام اصبح مستحيلاً نظراً لظروف الحياة وتقلبات العصر ووجود التلفزيون الذي يمنع التواصل بين افراد الاسرة .. وان حدث واجتمعوا فإن وجودهم يخيم عليه الصمت الذي يعني عدم الرضا، فالبنت تريد قناة الاغاني.. والولد يريد مشاهدة القنوات الرياضية.. والأم تريد أن تشاهد برامج الطبخ وعروض الازياء. والاب يريد ان يشاهد الاخبار.. فإذا التقوا تحسبهم جميعاً وقلوبهم شتى.. فلابد أن يعتري الاسرة الضعف والتشتت.. ثم التمزق.. ثم البيع الفوري.. لان التمزق والتشتت إنما هما في حقيقتيهما بيع آجل! زوجة تبيع زوجها "برخص التراب" كما يقولون.. لماذا؟ .. لماذا تزوجت رغم انفها من البداية؟ .. ولماذا لم يتحرك لنجدتها احد مع انها تدفع ثمن خطأ غيرها؟ لماذا تتحمل الزوجة دائما اوزار الزوج وتدفع الثمن غاليا بينما هو يستمتع بنزواته .. وهي تكتوي بنار تحرق قلبها وكبدها وسعادتها؟ .. لماذا تكون المرأة دائماً هي "الحيطة المايلة" كما يقولون.. أو الغسالة "الفول اتوماتيك" التي عليها ان تغسل غسيل الزوج الـ (....) وعليها ان تجعله رغم انفها اكثر بياضا؟.. دون ان تشكو أو تئن!.. أسئلة كثيرة لا أجد لها إجابة.. وبعدها نتعجب من زوجة اشترت حريتها وكرامتها وسعادتها وراحتها بالبيع المباشر وامتناع الوسطاء!!.. ومادامت المأساة قد بدأت فعلينا ان نتوقع تواليها وتوابعها.. وعلينا ان ننتظر المزيد.. ولا استبعد أن نجد غدا صندقة (كشك) على قارعة الطريق لبيع الازواج الذين يخونون زوجاتهم كما يحدث مع البطيخ والبارد.. وأقول صندقة وليس محلاً محترماً لأن هؤلاء الأزواج لا يستحقون ـ في رأيي ـ أفضل من صندقة.. وقد يستبعد البعض أن يحدث هذا وأسألهم: وهل كنتم تتوقعون يوماً أن تبيع امرأة زوجها بهذه الطريقة؟! وإلى أن يتم انشاء الصندقة أو افتتاح محل "سوبر ماركت" أو مكتب وساطة قانونية أو "حراج" لبيع الازواج.. اتمنى أن أجد إجابة للسؤال الذي يؤرقني دوما: لماذا وإلى متى تستمر الزوجة في دفع فاتورة أخطاء وأوزار ورزايا زوجها؟!!! أفيدوني أفادكم الله. *البيان الإماراتية

بريمة

سلامات يا احمد
مولانا داروين اشار لهذه المسألة في كتابه (في أصل الأنواع) حيث قال أن في الحيوانات و في الطيور تحديدا يقع عبء اختيار الشريك على الاناث و تكون مسؤولية
الذكور هي استعراض المزايا التي ترغب فيها الاناث مثل طول الذيل و الوان الريش الزاهية -كما في حالة الطاؤوس- و يكون الحظ الاكبر في القبول للذكور التي
تتمتع باكبر قدر من هذه المزايا و التي تنجح في تمرير صفاتها الوراثية للأجيال الجديدة بينما لا تجد الذكور الضعيفة و التي لا تتمتع بالوان زاهية اناث تقبل بهم
فينتهي بهم الأمر للانقراض. و قد اسمى داروين هذه العملية بــالــsexual selection . في المقابل في الكائنات التي يكون عبء اختيار الشريك على الذكور و التنافس
يحدث بين الاناث على الذكور تكون الاناث ذات الوان براقة و تمتلك الواحدة منهن الكثير من "الحليات" ornaments ، اما في حالة ما كانت الحياة تكافلية و ليس هنالك تنافس على الحصول
على شريك و الفرص متكافئة بين جميع افراد النوع في التكاثر و الانجاب و رعاية الصغار عملية مشتركة بين الجنسين ففي هذه الحالة لا يتميز جنس على الآخر
فتكون الاناث و الذكور في الغالب يحملون نفس الصفات الجسمانية.
في الانسان و كما هو واضح يختار الرجال عادة نساء بمواصفات جمالية معينة تتكرس عبر القرون عن طريق الاختيار الجنسي sexual selection لذا فنسبة الجمال في
تصاعد حيث أن النساء اللواتي يمتلكن هذه الصفات ينجحن في نقل جيناتهن للاجيال الجديدة بينما تنقرض الاخريات و تقل اعدادهن تدريجيا.*
_____________________________________________________________________________
*النظرية الأخيرة دي فيما يختص بالبقاء للأجمل وسط النساء من اختراعي شخصيا و ليس لي فيها مرجع معتمد. قد يكون هنالك اخرين توصلوا لنفس النتيجة :)

الناس الهنا جت
عليكم سلام
و مطايبة شديدة خلاس
و احمد ود بابكر بالخسوس
قلدة وطقيش عمم وحرامات
بعد داك:
الشغلة دي يا جماعة دارونية صر.. اي و الله ..قول لي كيف؟
اي بهيمة دايرة بي شغلت المهر دي شنو؟
دايرة منها الجنا....بس
اها الجنا الكويس بجب من وين؟؟؟
من الابو العديل و الزين
اها دا يعرفو كيف؟؟؟
بي سماحتو اها وشنو السمح فوقو؟؟؟
السمح فوفقو الشئ البتدورو البهيمة دي في جناها- كان عنز كان غيرو-
يكون قوي ، عينو شداد، ليهو قرينات، شعرو بدفيهو ما يموت في المطر
ولا السقط ريحتو قوية ما بتلخبط مع باقي التيوس..
ولامن يبقى على الشغلة دي بنجضها زين و كلامات زي دي
في اي بهيمة براها... خلاص؟؟؟
لا ما خلاس.... الكلام دا في الضكر بجوز و في الانتاية كمان بجوز. اها الفرق شنو؟؟؟
المعنى دا برضو وليدات عمك داروين الله يطراهم بالخير جابو فوقو نضم..
قالوا شنو: قالو الرسمة الاساسية لازم تكون واااااااحدة عشان
بعداك الفرقة كان بقت كبيرة بتشتت المشهاد -تصرف الانتباه يعني-
اها و الخواجات من اصل خوجاتي كان بقو
دايرين الكلام دا بالاعوج حباااااااااااااااب التنقليزي اللوج مصارين ..........

بعد التحية للجميع ...


بالله المثلين ديل يحسبوهم كيف نساء اجمل من الرجال ولارجال بس احلى من الرجال ...

ولا الاثنين معا ...

مساء الخير

مسالة " الجمال" دي نسبية وفيها نظر...ولكن التساول المهم هو ايهما أقرب " للكمال" perfection..جسد المراة ام جسد الرجل؟
او بشكل مطلق في الثديات...mammals

تحياتي

اولا... تحيانى ...

Quote: ...ولكن التساول المهم هو ايهما أقرب " للكمال" perfection..جسد المراة ام جسد الرجل؟

بدون ادنى شك ان الاقرب للبيرفيكشن ...هو جسد المراة ...الاوربية الغربية .. البيضاء ...(بدون تحسس وكدة) .. او الحبشية ....وليس السودانية ...او المصرية ..مثلا ...
ودة السبب الخلى الاغريق يعملو ا الالهة بتاعتهم كلها .. نساء ..لانهم ينشدو الكمال ..والكمال فى جسد المراءة وليس وجهها ...

البوست دا طريف خفيف و مسلي
لكن اذا دخلنا في جدل لن ننتهي اذ سنبدأ من تعريف الجمال و انتهاء بمعضلة تحديد الاجمل و طرق المفاضلة ودي سكة طويلة قد تتنافى مع هدف البوست
طيب احتمال يكون الوضع كالاتي:
التيس شايف الغنماية اجمل
التور شايف البقرة اجمل
ذكر الشمبانزي شايف انثى الشمبانزي اجمل
ذكر الغوريلا شايف انثى الغوريلا اجمل
فرس النهر الذكر شايف انثى فرس النهر اجمل (مع انو كلمة فرس تطلق على الاناث من الخيل)
ذكر الفيل شايف انثى الفيل اجمل
ذكر الحمام شايف انثى الحمام اجمل
............الخ
...........الخ
و احتمال كل الذكور من الحيوانات اعلاه شايفين ذكر الانسان اجمل من انثاه ويمكن بيناقشو انو ذكر الانسان له شعر كثيف في الوجه(كالاسد) وهو من علامات الجمال عندهم

حد يصحي ابن المقفع