أهل الطمبور .. يوم تقع يا عابرة نخلة

(عابرة) يا ست الحروف الخمسة
شن فايدة بياض البشرة لو كان حتي لونى خواجة
اهـ لو شفتي كانت (عابرة) مابتاخد الامور بسزاجا
ياخالق الليالي العشره وليله الإسرا بي معراجا
لويشمل رضاك زحوله بعدها ماني داير حاجه
راجيك ياكريم ترعاها راعي الكعبه بي معراجا
حشاك مابتهمل فيها رغم العولمه وإزعاجا


(لحظة في حضرة عيونـك)
الزمان يا(عابرة) شالـــك من دنايا بلا قتــــال
سابني ماقادر أقــــارن بين حقايقك والخيـــال
قلبي في قلب المدايـــن وإيدي في إيد الشمــال
(عابرة) يا عطش القوافــي لما شديت الرحــــال
لي ديارك وإنتي جافــي شاردة زي بحر الغـزال

عبد الرحمن الحبيب

من هى هذه الـ(عابرة) ؟

سبحان الوضع يا(عابرة) في صدر الكنار مزمارو
كم يشجيني لما يغني يجلي الماضي بي اسرارو
شايفك بي وضوح ياأماني والكل في السنين إنضارو
في موكب هوانا أبحرنا في زمـن القدر اختارو
راقدين في أمان وغفلنا من ريح الفراق وإعصارو
يوم نزل العزول ساحتنا ما اتنبهنا لي اخطارو
ماقايلين ودادنا الصافي ما ح نجني غيـر تذكارو