الرقم القومي مركز قنصلية دبي : السيستم جهجهنا

ذهبت اليوم لاستخراج الرقم من مركز قنصلية دبي وفي عقل بالي حديث الزميل عبدالدين (السالب) فدلفت الي المبني الانيق و ظبطت الساعة و خرجت من المبني الانيق بعد 26 دقيقة و في يدي الرقم القومي ( ملح).
المهم ما حدث من اشكالية لا دخل للعاملين به و لا القنصلية او العاملين و عموما علي خلفية انني اصلا جئت مشبعا بالبوست السالب الا ان الشباب هنالك قمة في الروعة في اساسيات التعامل ( بإعتباري زبون حسب مفاهيم الادارة و الجودة الحديثة) و المكان مرتب و نظيف و هادي و الاثاث انيق ومناسب للمساحة المتاحة

اما الاشكالية التي حدثت فتتعلق بالسيستم و قوائمه المنسدلة ............ فلقد كتبت في معلومات الميلاد انني من مواليد تنقاسي السوق محلية مروي الولاية الشمالية ........ الشاب الخلوق الذي يدخل البيانات افادني بأن تنقاسي ليست تبع مروي بل هي تبع ريفي الدبة !!!!!!!!
المهم شيلك ختك ...ختك شيلك ما في طريقة السيستم مصر المهم وعلي راي عادل امام ( وانا يهمني) مهرت البرنت اوت بتوقيعي الجعيص مؤكدا علي صحة البيانات و مقرا بأنني قد قمت بتدقيقها .
المهم وانا حامل رقمي القومي والذي يفيد بانني من مواليد ريفي الدبة اتصل بي اخي من السودان فقبل اي كلام منه سألته ان كان قد استخرج الرقم القومي فقال نعم من مروي فسالته ان كان قد طلعت معاه تنقاسي تبع الدبة فأكد ان تنقاسي تبع مروي وانه مروي ذات نفسها جزء من عمودية تنقاسي وان الرقم القوم بتاعه يؤكد انه من مواليد تنقاسي محلية مروي.... المهم حاولت احتج فقال لي يا راجل انسي الموضوع كويس الما طلعا ليك من .................... لا مواخذة
المهم انا نسيت................ الدبة الدبة وانا يهمني يعني ادق السيستم .

بس الهدف من البوست ..... يتبع

المهم انه الدبة سوف تكون المركز اللوجيستي لبترول بيوضة
وكدا حيكون عندنا مسمار جحا في قسمة الثروة

الخال / عثمان رغيم
تحية وتقدير
* حسب التسلسل الجيني فأنت خال بالمفهوم السوداني للخؤولة حتى لا يأتينا الهوا من حيث لا ندري هههههه ...
* السفير محمد الحسن إبراهيم صاحب السبق في هذا العمل وصاحب بادرة التواصل بينه وأعضاء الجالية في أفراحهم وأتراحهم والشي بالشي يذكر ...
*وأما تنقسي ريفي مروي أو تنقاسي ريفي الدبة ..نرجو توضيح الفرق بين الاثنين تنقسي وتنقاسي ..وما بقي متروك لحصافة القاري الكريم
* الوقفة البوردابية للتجويد والتقويم هناك قضايا لا زالت عوالق تنتظر تدقيق النظر ..لقاء البوردابي مجاهد في قهوة الفنانين لسانحة أو في نادينا يحلو تلاقينا.
تحياتنا

لأننا عطالة :) طبيعي أن يكون سيستمهم طاشي :)

Quote: لأننا عطالة :) طبيعي أن يكون سيستمهم طاشي :)

سلام يا هاني

لا لا السيستم ما طاشي لكن يبدو ان الداتا الفي الابلكيشن ما مظبطه
أو لم يتم تدقيقها بطريقة احترافية ......لكن فيما عدا ذلك وكزبون
اقولك مستوي جيد جدا

Quote: الخال / عثمان رغيم تحية وتقدير * حسب التسلسل الجيني فأنت خال بالمفهوم السوداني للخؤولة حتى لا يأتينا الهوا من حيث لا ندري هههههه ... * السفير محمد الحسن إبراهيم صاحب السبق في هذا العمل وصاحب بادرة التواصل بينه وأعضاء الجالية في أفراحهم وأتراحهم والشي بالشي يذكر ... *وأما تنقسي ريفي مروي أو تنقاسي ريفي الدبة ..نرجو توضيح الفرق بين الاثنين تنقسي وتنقاسي ..وما بقي متروك لحصافة القاري الكريم * الوقفة البوردابية للتجويد والتقويم هناك قضايا لا زالت عوالق تنتظر تدقيق النظر ..لقاء البوردابي مجاهد في قهوة الفنانين لسانحة أو في نادينا يحلو تلاقينا. تحياتنا

استاذ عبده يخليلي اياك
والخال شريك الوالد

شوف نحن نقول الحق علينا وعلي غيرنا
الشغلة منظمة و مرتبة و سريعة
و مافي صوت مرتفع ز بيردو السلام بأحسن منه
اما الحصل ففي جازم اعتقادي انه خطأ تقني لا يد لاحد فيه
الفرق بين تنقسي و تنقاسي خليهو لحصافة القاري
لانه لو انا كنت شاعر انه في فرق كان خليتلهم رقمهم علي الطاولة و مشيت
لكن امل ان نخرج من دائرة العنونة بالجهات والقبائل الي دائرة الوطن
انا سوداني و سوداني انا خال عبدالرحمن الحلاوي و تسفاي ود القاضي سودان عجيب

الدبة قال
طيب يا حلاوي عشان ماترجع ايدك فاضي
في تنقاسي يجري نهر النيل من الشمال الي الجنوب
وفي تنقسي يجري من الجنوب الي الشمال

أولاً أين موقع القنصلية في دبي
ثانياً ما هو المطلوب لاستخراج الرقم الوطني للأسرة
ثالثا هل هذه الخدمة مستمرة في دبي أم لفترة محدودة وهل ممكن الحصل على هذه الخدمة في أبوظبي في وقت تالي؟
رابعا إذا كانت هذه الخدمة لمدة محدودة هل يفقد المتخلف عنها أية حقوق في الحصول على الرقم أو تترتب عليه أية مخالفات أو ضرائب

** ابو رغيم..
** سلام وصباحك خير..
## والله كلامك دا قلناهو إنو الموضوع لايستغرق أكثر من نص ساعه ,, مافضل إلا يطلعونا غواصات ##
(ودام الود بيننا)

Quote: أولاً أين موقع القنصلية في دبي ثانياً ما هو المطلوب لاستخراج الرقم الوطني للأسرة ثالثا هل هذه الخدمة مستمرة في دبي أم لفترة محدودة وهل ممكن الحصل على هذه الخدمة في أبوظبي في وقت تالي؟ رابعا إذا كانت هذه الخدمة لمدة محدودة هل يفقد المتخلف عنها أية حقوق في الحصول على الرقم أو تترتب عليه أية مخالفات أو ضرائب

** الأخ محمد ود حمد (المُسافر)..
** سلام وصباحك خير..
## أها شلاقه منى قبل مايجيك أبو رغيم ,, أصلو الحاله بينا واحده ..
1\ القنصليه السودانيه بشارع خالد ين الوليد مُجمع القُنصليات مواجهه لمكاتب وزارة الخارجيه الإمارتيه بدبى - بر دبى ..
2\ المطلوب الجواز الأصلى وحضور أفراد الأُسره.
3\ الخدمه متوفره فى دبى فقط حتى الآن ..
4\ هذه الخدمه متوفره بدبى ولم يُعلن أنها لفتره محدوده ( وهى خدمه مجانيه) - على حسب علمى البسيط أن إستخراج الرقم الوطنى يُسهل الكثير من الإجراءات فى السودان إذ أنه مُرتبط بكافة المُعاملات الحكوميه _ اما فيما يتعلق بترتيب مُخالفات أو ضرائب على ذلك فلا توجد - ولكن لابد من إستخراج الرقم الوطنى وذلك لإرتباطه الوثيق بإى مُعامله تخصك أو أسرتك ..
## اتمنى أن أكون قد أجبتك على تساؤلاتك..
(ودام الود بين الجميع)
(ابو محمد فؤاد) - الماكيكى..
(التعديل لطباعة حرف خطأ)

المسافر............سافر ففي الاسفار تسع فوائد

شكرا للماكيكي

Quote: بس الهدف من البوست ..... يتبع

بداية الدخول الي عالم التخطيط العلمي ( تخطيط استراتيجي / موازنة الدولة / برامج التنمية الاجتماعية .........الخ)
يجب ان تقوم علي معلومات صحيحة وحقيقية وليست تقديرية واول اداة من ادوات تصحيح المعلومات هو الرقم القومي ولذلك هذا شئ مهم
يجب ان يشارك فيه الجميع
ولذلك يجب ان تكون المعلومات الخاصة بصاحب الرقم صحيحة 100% وعشمي انه تكون هنالك طريقة لتصحيح معلومة الدبة/ مروي هذه
طبعا ارجو ان ان كان هنالك من تعرض لعذا الموقف ان نطالب الجهات المسئولة عن اصدار الرقم القومي ان تفيدنا ان كان هنالك امكانية
لتعديل مثل هكذا بيانات

مع خالص الشكر

اتو مسعلوين من الخير

الرقم الوطني دا فقط للسودانيون الفي دبي وما جاورها؟

يعني نحن ناس أبوظبي ما مطلوب مننا؟


غايتو عندي حجه قوية لمن امشي إجازة إن شاء الله السودان بقول ليهم نحن من سكان أبوظبي بما انكم ما عملتوه لينا في السفارة في أبوظبي يعني نحن خارج التشكيلة (لقيت لي موضوع اقضي بيو الاجازة) شبكه جاهزة

سلام عثمان وكل الأحباب

ات عارف يا أبورغيم
جراب الدقيق الزول لو دخل يدو فيهو ما بتجي فاضية
نفهم أن تنقسي بالضفة الشرقيه للنيل عند المنحني...وتبعد من كريمة حوالي 140 كلم.... وحوالي 16كلم من الدبة ... بينما تقع تنقاسي على الضفة الغربية للنيل جنوب مروي 9 كلم ....
................
أتفق معك أن الرقم الوطني حصر للمواطنين ومدخل للتنمية وحفظ امن البلد أيضاً من الاختراق .
...................
تحياتي

سلامات يا حاج,,

Quote: الدبة الدبة وانا يهمني يعني ادق السيستم .

إنت شكلك قايل السيستم ما بدقو!!!!والله دق العيش,,وممكن صور لو القصة محتاجة.

تحياتى..

يا رغيم..

مرة في الشروق وفي مسرح على الهواء ..
وفي مسرحية ترويجية لاهيمة الرقم الوطني ..
اها الفادني كان بحاول يقنع حمد النيل بجدوى الرقم..
حمد النيل قام مشى مكتب الرقم الوطني وجا راجع قال لي الفادني :ياخ اظن الشغلة فيها قروش باين عليها
الفادني قال ليهو: ولا قرش مافيها..
حمد النيل مكشى تاني وجا راجل قال لي الفادني: ياخ دي اظن فيها طلب بيانات وقصص طويلة وصفوف.
القادني تاني قال ليهو ياخ ارجع المسالة مافيها صفوف وابسط مما تتصور..
اها بعد كم مشية وجية كده وتلتلة ونقسة من حمد النيل، حمد النيل جا لي الفادني وقال ليهو:
اهو ده الرقم الوطني..بس اين الوطن؟

بعين يارغيم هسي الدبة بقارنوبا تنقسي؟؟

ياخ الدبة في رقبتا ريف الريف..

اطناشر مزيرة وموقف بص وزرايب بهايم فيها كم بديري وكمين شايقي وبضع دناقلة ومدرسة ثانوية وحامية فيها مجروس وحلان وعملو ليها ريف؟