Post: #1 Title: ناقصين يعنى نحن يا ناس الشرق ؟ Author: أبوذر بابكر Date: 03-10-2013, 08:21 AM Parent: #0
تانى برضو تفكو لينا زول سمح ؟
هو نحن لى هسه ما انتهينا ولا خلصنا من آدم شاش وبعده محمد البدرى تجيبو لينا
أحمد سعيد أبو آمنة ؟
القصة بدت بدرى بدرى جدا كمان من ما بدت بذور الطرب تسكن فى تراب السمع ومباراة الحاجات الملفتة والبتشد عصب الزول بدون ما يعرف اتجاه "الأضان" الماشه عليه
الراديو والضل والنغم والصوت المارق واتكاءات منصتة ومنتبهة وربوع السودان تجيب ليك جهات السودان لحد عندك وانت تحت النيمة
الزول البغنى ده منو يا ربى؟
اسمه آدم شاش هدندوى من الشرق
تانى بقينا نلبد ليهو فى جية الأسبوع الجاى
بالله زول بقول فى شنو انت ما عارف والغنية دى عن شنو برضو ما عارف
لكين بمد ليك حزمة عجيبة من العذوبة والنغم والصوت البتحس بيه طالع من اعمق حتة فى صدق الروح مافى اى موسيقى مصاحبة غير ربابة آدم شاش، باسنكوف مدوزن على تقاسيم مقدسة جدا، او شكله كده تقريبا
ومن ديك وعيك
ولسه ما عرفنا ولا فهمنا ولا وصلنا حد الطرب مع آدم شاش البقى مافى
قام جانا مخلوق عجيب تانى اسمه محمد البدرى
ده كمان اخير داك
صوت بس تقول عزله براهو وعلى ايده
وتانى جهجهنا جهجهة لا يعلم بيها الا الخالق لما الزول يسمعه اول شى يقفل عيونه ويفتح شبابيك روحه كلها المطلة على السعادة والطرب الجد جد
المصيبة انه والللللله ما بنكون عرفين بقول فى شنو
لكين الواحد يقرب يدردق بالواطا زى مجاذيب الحولية اللابسين اخدر ديلك
وغالبا الزول دمه فى اللحظات ديك بكون بقى اخدر
وفجأة تانى
قالو شنو
قالو آحمد سعيد أبو آمنة
وده حكاية تانى كمان
الله يستر
Post: #2 Title: Re: ناقصين يعنى نحن يا ناس الشرق ؟ Author: أبوذر بابكر Date: 03-11-2013, 04:59 AM Parent: #1
يقينا هو الوجدان الواحد الأحد الحس المشترك والقاسم الأشد عظمة البربط بين كل الأقوام القاعدة فى البلد الحدادى مدادى الإسمه السودان
يغنى الفى الشمال ويطرب الفى الغرب يغنى الفى الجنوب ويطرب الفى الوسط يغنى الفى الشرق يطرب الفى كل مكان
نفس الشى عندى لما اسمع أغنية نوبية ربما تكون الجينات الكامنة من ازل الخلق شعرت بالانتماء واتفاعلت مع المعنى والنغم والصوت وبرضو بدون ما تفقه ولا تعلم معنى الكلام
نرجع للشرق البديع
وأحمد سعيد أبو آمنة
داخل وفى يده اليمين مشروع كامل من الفنون البجاوية العتيقة الأنيقة وفى يده الشمال تطريب وحضور آسر ومؤثر
الفرق بينه وبين من سبقوه هو وضوح الرؤية والفهم العديل عارف هو عايز شنو وبعمل فى شنو وكيف يعمل العايزه
أبو آمنة مستصحب معاه ثقافة البجا بكل تكويناتها اجتماعيا وفنيا وتاريخيا
والأهم من ده كله الموهبة الحقيقية فى فعل الغناء والمزيكا والملكات القوية
والأهم من الأهم ده
ثقة مكينة وعالية وكبيرة فى نفسه وفى شغله
وفى الفن البجاوى
تحية وإجلال وتقدير ل
أحمد سعيد أبو آمنة
Post: #3 Title: Re: ناقصين يعنى نحن يا ناس الشرق ؟ Author: محمد البحر Date: 03-11-2013, 06:36 AM Parent: #2
الامبراطور كما نحب ان نناديه
Post: #4 Title: Re: ناقصين يعنى نحن يا ناس الشرق ؟ Author: محمد البحر Date: 03-11-2013, 06:41 AM Parent: #3
العبقرى كما احب ان اناديه
Post: #6 Title: Re: ناقصين يعنى نحن يا ناس الشرق ؟ Author: أبوذر بابكر Date: 03-11-2013, 09:27 AM Parent: #4
فعلا عبقرى
لأنه زول خلاق بالجد
نتمنى يواصل فى نفس النهج الجميل وما يقيف ويواصل المشروع الضخم العنده
أحمد ده بيمتلك كل المقومات المطلوبة للفنان الحقيقى
Post: #5 Title: Re: ناقصين يعنى نحن يا ناس الشرق ؟ Author: أبوذر بابكر Date: 03-11-2013, 09:25 AM Parent: #3
شكرا يا محمد
وكأنك يا محمد زى ما قال حافظ إبراهيم
البحر فى احشائه الدر كامن
محمد البدرى فعلا كبير اباطرة الطرب
من أجمل الأصوات فى بلدنا
اتذكر أنا برضو كتبت عنه كلام كتير هنا فى المنبر قبل فترة يمكن فى اول ايام ظهوره
Post: #7 Title: Re: ناقصين يعنى نحن يا ناس الشرق ؟ Author: degna Date: 03-11-2013, 03:39 PM Parent: #5
تحياتي لك اخي الفاضل ابوذر العنوان يثير الانتباه وتصورت ان هنالك مشكلة سياسية حاصلة في شرق السودان ولكني قلت لا استعجل أتاني وثم ادخل في النقاش ولكن موضوعك فني ثقافي ولكنه معبر ومقدر لأنك إنسان مثقف وصاحب حس فني عالي ومع انك لا تفهم معاني الكلمات التي تسمعها من الغناء البجاوي إلا أنك تطرب من سماع الأصوات البجاوية العملاقة أمثال الفنان الكبير وعميد الفن البجاوي محمد البدري والمغني القامة التاريخية الشامخة ادم شاش مرورا بالفنان الموهوب صاحب الملكات الفنية الباهرة سفير الأغنية البجاوية احمد سعيد ابوامنة فلك التحية ولي عودة
Post: #8 Title: Re: ناقصين يعنى نحن يا ناس الشرق ؟ Author: وضاحة Date: 03-11-2013, 03:50 PM Parent: #7
ياا بوذرود البحر
دوشــكا دا تبعكم
غايتوا مكسرنى ومدشدشنى حتة حتة ههههههههههههههههه
بس المشكلة ما بفهم اللغة بتاعتوا
Post: #9 Title: Re: ناقصين يعنى نحن يا ناس الشرق ؟ Author: اسامه سعيد Date: 03-11-2013, 05:51 PM Parent: #8
Quote: ولسه ما عرفنا ولا فهمنا ولا وصلنا حد الطرب مع آدم شاش البقى مافى
قام جانا مخلوق عجيب تانى اسمه محمد البدرى
ده كمان اخير داك
صوت بس تقول عزله براهو وعلى ايده
وتانى جهجهنا جهجهة لا يعلم بيها الا الخالق لما الزول يسمعه اول شى يقفل عيونه ويفتح شبابيك روحه كلها المطلة على السعادة والطرب الجد جد
المصيبة انه والللللله ما بنكون عرفين بقول فى شنو
لكين الواحد يقرب يدردق بالواطا زى مجاذيب الحولية اللابسين اخدر ديلك
وغالبا الزول دمه فى اللحظات ديك بكون بقى اخدر
وفجأة تانى
قالو شنو
قالو آحمد سعيد أبو آمنة
ابوذر يافنان اول حاجه زول بسمع جنس الغنا ده زول سميع جد وانت فعلا من المجازيب امثالنا تصدق ياابوذر انا صوت محمد البدري يتلاعب بي كما يشاء واصل معه وبه الي عوالم عجيبه يصعب وصفها انه وبدون تحيز من ملوك التطريب في السودان شكرا علي هذا الجمال
Post: #14 Title: Re: ناقصين يعنى نحن يا ناس الشرق ؟ Author: أبوذر بابكر Date: 03-12-2013, 12:10 PM Parent: #9
تحياتى يا اسامة
وكل الود ليك
صوت محمد البدرى غير عادى ابدا ما عادى والله
فريد فى نبراته وتقاسيمه وانسيابه
ومن غير حتى ما تستوعب وتعرف هو بقول فى شنو تلقى روحك منطرب لدرجة التلاشى
والصوت البشرى لما يكون متميز كده بكون فى أعلى ذرى العذوبة الموسيقية وبكون أجمل آلة صنعها الخالق بمزاج جميل
مش الموسيقى هى موية الروح ؟
شكرا ليك انت ياخى
على جيتك المفرحة
Post: #11 Title: Re: ناقصين يعنى نحن يا ناس الشرق ؟ Author: أبوذر بابكر Date: 03-12-2013, 04:50 AM Parent: #8
ازيك يا وضاحة وكيف الحال
سيدى دوشكا برضو فرع فى نفس الدوحة الطربية الظليلة
ما سمعته كتير زى باقى الجماعة لكن قطع شك هو زول مطرب وفنان
حكاية انك تفهمى اللغة دى ما ضرورية
ركزى على السمع بالروح
وانسى الاضنين
هههههه
Post: #10 Title: Re: ناقصين يعنى نحن يا ناس الشرق ؟ Author: أبوذر بابكر Date: 03-11-2013, 06:31 PM Parent: #7
دقنة العتيق
كيف الحال ياخى واريت حالك زين
ناس زمان الزينين طولنا ما شفناك
تعرف العنوان مقصود فعلا يكون كده زى ما تقول يعنى القصد منه المشاغلة
على طريقة احبابنا زمان هنا خالد الحاج عليه الرحمة والمغفرة والرحمة وليه المحبة ومراويد وتمبس وناس رجاء العباسية الخ ده لما النضمى يكون عن الطرب الحقيقى والناس الفنانين البجملو حياة الناس الباقين
لكن عموما برضو معليش لو العنوان طلع فيه شوية كعوبية ما مقصودة اكيد طبعا
مع ملاحظة انه اهلنا العزاز البجا هم من اكتر البشر جدية وصرامة زى ما معروف وعلى الرغم من كده تلقاهم ناس خلاقين ومبدعين وفنانين
لغة او لغات البجا من اللغات الساحرة جدا لما نجى لى حتات الموسقة او الأداء المنغم لأنه فى لغات لما تكون ملحنة ومدوزنة وموقعة بتظهر فيها الجمالية اكتر من غيرها زى ما فى اللغة الاسبانية والأمهرية مثلا واللغة النوبية عندنا فى الشمال وفى البجاوية بكل فروعها
والعكس ممكن الزول يحسه فى اللغة الفرنسية مثلا
مشكور يا دقنة ياخى على تشريفنا واسعادنا بى شوفتك السمحة
Post: #12 Title: Re: ناقصين يعنى نحن يا ناس الشرق ؟ Author: degna Date: 03-12-2013, 08:11 AM Parent: #10
up this topic is need to be here
Post: #13 Title: Re: ناقصين يعنى نحن يا ناس الشرق ؟ Author: Artiga Gilani Date: 03-12-2013, 09:30 AM Parent: #12
بسم الله الرحمن الرحيم ابوذر تسلم كتير على هذه البادرة والاستاذ / احمد سعيد مع موهبته الطاغية اتخذ التراث البجاوى ونشره قضية تطغى على طموحاته الفنية .. فغدا نشر التراث الفنى البجاوى رسالة بالنسبة له .. ومع هذا وذاك يستند على علم ومعرفة واجادة تامة لاكثر من لغة يطربك حينما يتغنى .. ويدهشك عندما يحاضر عن التراث البجاوى بالعربية والانجليزية ...
قطعت قلبنا بالعنوان
اضف لهذا العقد الفريد من المبدعين كابلى الشرق كما يحلو لنا ان نسميه الاستاذ/ يحي ادروب