ارحمو النساء ولا تتطلقوا عليهن الاوصاف فهن القوارير

تقعد مع نفسك اشان تشوف انت وين وعملت شنو؟
كتير الاتعمل خصوصا في هذه الاعوام صعبة المراس حكومه ماشغاله بالناس والشباب غالبيتهم عاوز يهاجر اشان البلد بقت طارده وحتي نحن كتار مننا عاوزات يهاجرن اشان البلد طارده بس نخليها لمنو وكيف نفوت وطنا بنستحمل ونقعد
ونمسك جمر الصبر بيد واليد التانيه نقود بيها اسرنا اشان تمرق لبر الامان او نحاول
تمر الاعوام بطئيه والمراه عامله وام واخت يقع عليها العب الاكبر في البيت
العيال عاوزين يقرو
البيت عاوز اكل
عاوز لبس عاوز كل شي
ورغم كل التضحيات البتعمله وهي راضيه وفرحانه مازالت تلاحقها الاوصاف
كان ماعرست بايره رغم انها عامله والبتعملو في البيت الشاب مابعملو بس مش في البيت معناه بايره انا من النساء اللائي تقال لهن هذه المفرده البائسه وكانا بضاعه تباع في سوق الزواج ...المامعروف يجي والا مايجي ...في واقع الحال ماكانت بتفرق معاي كتير لو ماشفت البنات بتاذن منها قدر شنو
كان ماولدت معناه عاقر عرسو فيها رغم الاذيه الكبيره للمفرده عليها
كمان المراه تخرج للعمل في السوق تتبعها اوصاف بائعة شاي او ست شاي او بياعة خضار او ماشات لها ان تبيع البعض ينظر لها نظره تتسم بالدونيه او قل الاستعلاء وكان امر البيع وقفا علي الرجال وكان الخروج للعمل عيبا تحاسب به المراه
اذا تتطلقت المراه توصف بانها مطلقه والعين عليها ريال مش مطلقه
واذا خرجت وعادت ليلا يتبعها سوال اتهامي من وين جات ؟
في يوم المراه العالمي هذه تحيه خاصه جدا
لامي ربنا يديها الصحه والعافيه
ولكل النساء في بلدي واللائي يقبضن جمر الصبر متلفحات توب العطاء يسبقهن غيم من الاحسان

التحية لكل النساء في يومهن و تحياتي يا مها
المراة في السودان الله يكون في عونها تتحمّل اللوم على كل شيئ
حتى أحيانا اخطاء وخيانة زوجها بتلقى البقول عليها لو ما اهملته ما كان عاين برة
و الغريب أن اللوم و الظلم يقع على المراة من المراة نفسها, لوم من لم تتزوّج و التوّجس من الأرملة و المطلّقة و النظرة الغريبة للمراة العاملة بتلقى انو المرأة نفسها بتلعب دور كبير فيه
لكن اعتقد بمرور الزمن وارتفاع درجة الوعي نسبيا الوضع صار افضل نسبيا و اتمنى ان يتحسّن في المستقبل

كل ذرة من تراب هذا الوطن العزيز مطالبة بالوقوف اجلالاً للمرأة السودانية في يوم المرأة العالمي،كل التراجعات المصنوعة في بلادنا
تحملها بحب،وجمال،كل الصعوبات تخترقها،هي وزيرة المالية في البيت السوداني الذي ليس فيه مالية،تعرف كل جلال التدبير وكل ضياء التدبر،
لولاها لضاعت كل المرتبات (شمار في مرقة)،مع أول دخول للسوق المشتعل،وتشتعل هي ضياءاً وأشواقاً لدنيا تحلم بها لبيتها وأسرتها،في هذا الزمان
(عندها نصيب أوفى في صناعة الحياة للأسرة السودانية) من مقومات (اللاحياة)،
لاتستحق وسام الصبر النبيل والجميل وحده،بل وأيضاً وسام الخدمة الطويلة الممتازة،نلتقيها كـ(وطن)في يوم عيدها لقاء الأوفياء
الرائعه مها
كل التحايا لجميع نساء بلادي قاطبة و تحية لك

تسلم امير وكل التحايا للمراه في عيدها

شكرا
والتحيه ليك في يوم المراه العالمي واشاطرك الامنيات بغد افضل
تحيه خاصه لكل نساء الارض ونساء بلادي

المرأة لم تخلق من رأس الرجل حتى لا تتعالى عليه و لم تخلق من قدمه حتى لا يحتقرها بل خلقت من ضلعه لتكون تحت جناحه ليحميها والمرأة أم لذلك علينا أن نفهم أحاسيسكم ومشاعركم وإحترام حقوقكم .
التحية لكل النساء العالم في يومهن
وتسلمي

تسلم والتحيه ليك في يوم المراه العالمي