شبح العنوسة و البورة(بائرة)...34% من بنات السودان بائرات(فيديو)

غايتو يا هندسة...أقرب شماعة معقولة جداً وما عندنا فيها أي كلام هي :

القسمة والنصيب...

ولا شنو؟؟؟


لكن بيني وبينك كدا...الموضوع متشعب شديد.. وفيه كم فاكترز لا يمكن أن يحصرها لا التقرير لا البوست..

الله كريم بس..

..

تحياتنا يا هميم..

Quote: 34% من بنات السودان بائرات(فيديو)

لم اشاهـد الفيديو بسبب الحجب فى المكان الذى فيه.. لكن العبارة أعلاه لا تقل عن عبارة (ود الغلفـاء).. فهى عبارة متخلفـة جداً.. وتصور المرأة كأنها سلعـة معروضـة فى سـوق الزواج.
أتمنى النسـاء بيرفضن هـذه العبارة بشـدة ويحاربنها، لأنها تقلل من إنسانيتهن.. ولو فرضنا جدلا أن هـذه النسبـة صحيحـة، اليس ما يقابلها 34% من الشباب؟ هل يقال عنهم بايرين؟

أتمنى الاخ بكرى حذف هـذا البوست.

ابدا يا ابو الريش ما يحزفو

لكن يغير عنوانه

والمهم هو طالما انه حسب اخر تعداد سكاني نسبة النساء تقريبا مساوية لنسبة الذكور .. وطالما انه يمكن للذكر حسب الوضع في السودان ان يتزوج مثنى وثلاث ورباع .. فالبديهي ان تكون وحسب عنوان البوست ان :

شبح الهنوسة والبورة ( بائر) .. اكثر من 34% من اولاد السودان بايرين ( بدون فديو )

ممكن نتجاوز الكلمة، والعنوان، مؤقتاً ونناقش المشكلة؟

انا غايتو ما شاهدتا الفديو لكن ...ليه الناس بتشغل نفسها بى اشياء
ما من اختصاصها مش نحنا بنقول انو الزواج قسمه ونصيب
القسمه دى مش من الخلقهم ؟!!!
فى ناس بتزوجو وبنجبو..وفى ناس بتزوجو وما بنجبو... وفى ناس ما بتزوجو خالص لى عدة اسباب بتخصهم لى وحدهم
شنو يعنى لو البوره 34% ولا البوره الف
كدى اول حاجه يساعدو النسوان المطلاقات يلقوا حقوقهم من المحاكم
فى مشاكل اسريه لا حصر لها
الحكايه كلها ونسه

زواج المتعة على الطريقة أو( الضوابط) الشيعية يمكن أن يساهم في تخفيف حدة الظاهرة
شفتو الشجاعة دي ؟
أعتقد أنا أول سوداني يقولها علني
حتي الشيعة ما قدروا يقولوها
وقد ناقشت ذلك في البوست التالي:
فتوى مرشد الجهورية الايرانية علي خامنئي بتحريم الإساءة لصحابة النبي‎‏
وأقتطف منه الآتي:

Quote: منذ فترة كنت أكتب أن اكثر شيئ محير في الشيعة هو تأسيس عقيدتهم المذهبية على كراهية شريحة من الناس (الصحابة) وسألت شيعياً عن مناداتهم بالثأر للحسين (رضي الله عنه) فقلت : من من ستثأرون ؟ فلم يجبني ، فزدت : من قتلوا الحسين أصبحوا الآن بترول في الخليج والشام ، أما أرواحهم فهي عند مليك مقتدر ولن تطالوها. في المقابل: أرى أن الشيعة متفوقون فقهياً على السنة في التعاطي مع بعض تعقيدات العصر مثل أكبر معضلتين تواجه المسلمين الآن : الإقتصاد والإجتماع فماكينة الإقتصاد (العام والخاص) تدور بوقود إسمه الإقتراض ، ومفهوم الربا عند السنة يضعف مفعول هذا الشريان (الإقتراض ) وأما في الإجتماع (فالعنوسة ) أو ندرة الأزواج كارثة تفتك بالنساء المسلمات ، وعند الشيعة حل أراه معقول (زواج المتعة) لم أفهم ما العيب الذي يراه السنيون في زواج المتعة ما دام فيه أهم ضابطين (الإشهار والعدة) ؟ ما الذي يضمن الزواج السني من أن يتحول إلى زواج متعة في ضمير طرفي الزواج؟ ما الفرق بين الإثنين سوى الإعلان الظاهري عن النية من الزواج؟ بشيئ من المراجعات يقيني أن السنيين سيجدون أنفسهم يتبنون هذين الطرحين الشيعيين في التعامل مع أهم قضيتين من قضايا العصر وأن الشيعة سوف يجدون (في موقفهم من الصحابة) أنهم يتعصبون للتاريخ ويصيرون أسرى له في موقف ليسوا طرفاً فيه ويوم يحدث ذلك يكون التقارب قد نزل على أرض الواقع ويومها سوف يهتف الفريقان : وداعاً يا عصبية ، تباً لك ، كم سرقت منا طاقاتٍ وسنينا

الفكرة أو المنطق:
الحسرة الحقيقة من عدم الزواج ليست في فقدان الجنس
ولكن في فقدان فرصة المحافظة على الذات من الإنقراض
وهذه فطرة يعرفها حتى المخلوق الأصم (النبات)
المزارعون يلاحظون أن النبات إذا كثر لديه الماء (سقاية أو عبر المطر)
فإنه يتمادي في النمو ويفضل أن يستمر يزهو بشبابه
لكن إذا أحس أن الماء قد شح
فإنه يبادر إلى الإثمار
والسبب هو : من أجل( الخِلفة) قبل الموت

طيب بنفس المنطق ، واحدة عند محطة الثلاثينات أو الاربعينات من العمر
وأوشكت أن تفقد فرصة الإنجاب
ووجدت من يتزوجها لفترة قصيرة
قد تُرزق منه (ببذرة) تخلفها في الحياة
لم لا؟

Quote: ممكن نتجاوز الكلمة، والعنوان، مؤقتاً ونناقش المشكلة؟

عين العقل ياالأخ هاني عربي محمد
لأن بلنقاش ممكن نساعد في وجود حلول لهذة المشكلة التي أصبحت خطر يهدد المجتمع السوداني.
وشكرآ باشمهندس بكري

مية مية يا أحمد...

Quote: طيب بنفس المنطق ، واحدة عند محطة الثلاثينات أو الاربعينات من العمر وأوشكت أن تفقد فرصة الإنجاب ووجدت من يتزوجها لفترة قصيرة قد تُرزق منها (ببذرة) تخلفها في الحياة لم لا؟

وبعدين يمكن يطيب ليهم المقام...

..

الله يجيب الخير غايتو..

..

.

بس نسيت ياسيدي انه من اهداف الزواج الاستقرار وتكوين اسره مش يجيبو ولد ماعنده ذنب انه ينشا وابيه بعيد الا ان سبب الزواج كان زواج متعه بقصد الحفاظ علي النوع من الانقراض
وعلي فكره في مجتمعات سودانيه اذا البت وصلت 17 سنه اصبحت كما تقول انت شنو كدا
غايتو يااهل السودان في العهد دا بقي عندكم العجب العجاب
ربنا يدينا خيركم

سلام .. يا ريس

البورة عرفنا سببها .. لكن عدم الولادة من شنو؟!

عارف قبل كم يوم قريت انو نسبة الاناث في التعليم العالي
بلغت حوالي 80% مقابل 20 % للرجال
يبقى لو عدد الاناث وصل لهذا العدد من الطبيعي جداً
أن تكون هناك مشكلة ..
وعلى المجتمع والدولة البحث عن حلول لها
وعلى البنات واهلهن تقديم المزيد من التنازلات في مسائل
تقليل تكاليف الزواج والبدء في المساهمة في تأسيس بيت الزوجية
السودان من الدول القليلة جدا والتي يتكفل فيها العريس بكل شــئ

تحياتي

يا اللمين أخوي يا صفوة..

من هسي عاد النكلمك...

أنا بناتي أي واحدة فيهن حا أدفع للزول البيعرسا قروش عديل كدا..

علماً بإنها حا تكون عندها شقة وعربية إن شاء الله..

..

.

وبعد كدا ...الله يستر من البورة..

..

.

محمود يا صفوة ...

تحياتي يا ملك ..

Quote: من هسي عاد النكلمك... أنا بناتي أي واحدة فيهن حا أدفع للزول البيعرسا قروش عديل كدا.. علماً بإنها حا تكون عندها شقة وعربية إن شاء الله..

عارف يا حبيب أنت بناتك المغتربات ديل مشكلتهن مشكلة كبيرة جدا
لكن عرضك دا ممكن يحل المشكلة .. والله صحي

عارف يا محمود عندنا أخونا مغترب لأكثر من 30 سنة
ولديه 4 بنات فجأة كده قال لي: أنا خلاص قررته أمشي السودان نهائي
انا: ليه الحاصل شنو؟
هو : يا اللمين ياخ انا لازم أمشي هناك وأبني لي عمارة وكل بت اديها شقة
ولازم البنات ديل يقعدن وسط أهلهم واولاد عمهم يشوفوهم ويعرفوهم
عشان يتزوجن ...
ثم أردف مواصلاً حديثه: يا اللمين ياخ في السودان في بنات اشنا من بناتي ديل واتزوجن
وعشان كدا تاني قعّاد هنا لي ماف
..
..

ربنا يستر عليهن وعلى كل بنات السودان يا رب
لكن للضمان عرضك دا اتوثق تب

الأخت العزيزة مها عبد المنعم
تحياتي
شنو ياخي الغضب البيطرشق النافوخ دا؟
توجهي لي كلام وماك قادرة حتى تذكري إسمي خليك من السلام !!
المهم
مسألة الإستقرار دي نعم أحد الأهداف ،
رغم إنو العزابي والعزابية ممكن يكونوا مستقرين لكن فاقدين حاجة تنقصهم في حياتهم
بالتالي ليس هو الهدف الأول من الزواج
ومنو القال ليك إنو اي ولد أو بنت سوف يعاني أو تعاني بالضرورة إذا لم ينشأ في حضن والد؟
ثم إنو إنت حلولك شنو ، ولا بس الفلاحة في الكلام الطيب؟ والاسرة والإستقرار ... إلخ !!
يعني الحل عندك هو الإنتظار إلى ما لا نهاية ؟
ورأيك شنو في مثلنا البلدي : المال تلتو ولا كتلتو؟

بعدين ياخي ما في داعي لكلام ترميزي ، دا موضوع في غاية الحساسية
فما ترمي كلام عائم وتنسبيه لي
هسه أنا افهم شنو من كلامك دا؟

Quote: وعلي فكره في مجتمعات سودانيه اذا البت وصلت 17 سنه اصبحت كما تقول انت شنو كدا

أنا قلت شنو كدا ؟



حاشسة: ___________________

المقارنة الإحصائية للعنوسة بين الرجال والنساء غير سليمة
لأن الناس ينسون عامل مهم وهو أن الرجل ليس له عمر إنجابي محدد
أما عن المرأة ، فكلكم تعرفون . والمرأة غير المتزوجة كوتتها من البويضات تخلص قبل المتزوجة التي تنجب
بسبب الإستهلاك الشهري (الدورة) التي يوقفها الحمل وأحياناً الرضاعة
وبالتالي إذا إعتبرتو المرأة (عانسة) في سن الثلاثين مثلاً ، فلا نستطيع أن نقول عن الرجل انه (عانس) إلا إذا بلغ الخمسين
وإذا رفعنا السقف عند المرأة إلى سن الأربعين ، فلا مفر من أن نرفعه عند الرجال إلى سن الستين
ولذلك فمسألة مناقشة العنوسة بأنها كارثة تواجه النساء أكثر من الرجال مسألة في محلها

زواج المتعة على الطريقة أو( الضوابط) الشيعية يمكن أن يساهم في تخفيف حدة الظاهرة

مشكور ابوحميد

فلزواج المتعة شروط
يعنى ما زى ما بنسمع من الوهابية فى المنابر
ودليله موجود فى القرآن الكريم والسنه النبوية الصحيحه
وكان موجود فى زمن الرسول صل الله عليه واله وزمن الخليفة الأول ابوبكر بن ابى قحافة
حتى جاء عمر بن الخطاب الخليفة الثانى وحرمه لاسباب تجدونها فى موضعها
كما حرم متعة الحج وقول على على خير العمل فى الآذان
هى سنه الخلفاء الراشدين التى ظل المسلمون السنه يعملون بها الى يومنا هذا

من المؤسف ان يثير لفظ ( متعة ) حفيظة البعض
فقط لانهم لا يفهمون يعنى شنو زواج متعة
اتمنى ان يقرأ الناس ومن مصادر اهل البيت شروط واحكام زواج المتعة
ثم تعالوا واكتبو

-------------

مشكور ع النصيحه

سلامات استاذ احمد اسف في البدء طبعا لعدم احترام قواعد اللباقه
واسلم عليك وعلي صاحب البوست فتقبلا اعتذاري
فعلا زواج متعه رغم الشروط الممكن تتوضع كما قلتو لجعله زواجا طيب اذا اتوضعت ليه شروط حيكون زواج رسمي مازواج متعه
صح مابعرف كتير في تفاصيل المذاهب حول القصه بس مجرد ذكرها للتخفيف من نسب العنوسه او (البوره كمايقولون ) هو امتهان للمراه طيب بدل زواج المتعه دا مش تعدد الزوجات يكون حل افضل ؟
قصدت الفقره بتاعة ال 17 ؟ انا ذكرتها كمثال لعمر العنوسه في المجتمع السوداني والذي تزوج في بعض اجزائه الفتاة من عمر تسعة اعوام وبت ال 17 عانس ياسيدي ونحن نقول عليها طفوله او قل مراهقه المهم انها لسه مابلغت ال 18
مجرد معرفة الشريكين ان الزواج زواج مؤقت ينتهي بنهاية القصد منه يدخل في باب الزواج اظن غير السليم
مازلت اعتقد ان زواج المتعه وان عدلت شروطه وان كان هدفه نبيلا هو امتهان للمراه اولا واخيرا
وبالضروره بالتاكيد ان ينشا الاطفال وسط ابوين يجمعها الود والاحترام علي الاقل ليس كل الاطفال كما قلت بل بعض الاطفال

بس مجرد ذكرها للتخفيف من نسب العنوسه او (البوره كمايقولون ) هو امتهان للمراه

مها ايتها الأديبة

كيف يكون زواج المتعة امتهان للمرأة والزواج فيهو عقد واعلان واشهار ومهر وحضور ولى أمر الفتاة خصوصاً لذوات السن الصغيرة
فقط الاشكال هنا وسط اهل السنه هو تحديد الفترة الزمنيه للانفصال بالطلاق وبعد القاء يمين الطلاق تدخل المرأة فى العدة حيضتين ولو حصل
حمل اثناء الزواج هذا يلحق الولد بابيه وعلى ابيه ان يقوم بكافة مسئولياته تجاهه .

طيب ما رائك فى انواع الزواج فى الطرف السنى :
زواج المسيار : هو الزواج الذي يتم بين رجل وامرأة بكامل شروطه ويتم تسجيله غير أن المرأة تتنازل فيه عن حق النفقة.
فلا يلزم الرجل بنفقة المرأة وقد لا يدوام المبيت عندها , وغالبا ما يقع من رجل لا يسكن في نفس البلد او المدينة وغنما يسافر لتلك البلد ويسكن فيها ايام فتكون له زوجة في ذلك المكان وهو منتشر في دول الخليج.
وعند سائقى الشاحنات بين الولايات هنا فى السودان .
قولى واحد
وهاكى الثانى : الزواج العرفي فهو الذي يقع بين رجل وامرأة مع شهود غير أنه لايتم تسجيله لدى الدوائر المختصة ..
وإنما يقع على ورقة خارجية بينهما .. ولا يتم فيه دوام السكن معا ...
بزواج التجنس أو الجنسية : وهو ما يقوم به بعض الطلاب او المغتربين بالزواج من أهل بلد بهدف الحصول على الجنسية وقد يستكمل كل الشروط وإظهار عدم التأقيت وإبطان التأقيت ..


اهه فى فكرك ديل برضو ما امتهان لكرامة المرأة ؟؟؟؟

بالمناسبة .. فى المناطق الشيعية دائما يكون السائد هو الزواج الدائم وزواج المتعة معمول به فى نطاق صغير وفقا لظروف معينة بين الرجل والمرأة ..
لمزيد من المعلومات عن زواج المتعة
هاكم الرابطين ادناه
الطرف الشيعى ورائه فى هذا الزواج :
http://shiaweb.org/shia/feqhiat_sunnah_shia/pa11.html
رأى الطرف السنى
http://www.yabeyrouth.com/pages/index3131.htm

وليد فتح الرحمن مع حفظ الالقاب طبعا
ياسيدي الفاضل انا اعرف فقط الزواج العادي الصحيح الذي يقوم علي شروط معلومه بموافقة وحضور ولي الامر وسط اشهاد وشهود
ماتتحدث عنه سوا العرفي والذي ينتقص بطبيعة الحال لاهم اركانه وهو الولي والذي ترتضيه بعض البنات لاسباب مختلفه يسمي عرفيا وان كان نتاجه ابنا لا ينسبون لابيهم اذ ان شرط نسبه لابيه منتف اذ يخرج هذا الزواج من دائرة الزواج الصحيح المنصوص عليه في الكتاب والسنه بالنسبه لي انا هو امتهان للمراه
اما المسيار فهو في المقام الاول قائم علي رضا المراه الا ان شروطه كما اعتقد صحيحه بالنسبه لي شخصيا مامقبول بس قد يكون له دوافه عند اخرين
اما زواج التجنيس دا معروف هدفه من الاول فلا راي لي فيه


في اعتقادي ان اي زواج يخالف شروط الزواج المعلومه او يكون به شبهة توقيت هو امتهان للمراه عني لااقبل انصاف الحلول اما زواج او اخير العنوسه

المشكلة مافي مرأة إلا من أندر النوادر أن تقبل شريكة لها في زوجها ...................... يبقى النتيجة بوران
ولا أعتقد أن تكاليف الزواج هي مشكلة عزوف الشباب الرجال عن الزواج.
ولكن تكاليف ومسئوليات ما بعد الزواج هي التي يفكر فيها بعض الشباب والتي تكون سببا في عزوفهم عن الزواج.
أعتقد لست جازما أن عدد البنات فاق عدد الرجال وبالتالي في حالة عدم النعدد بالتأكيد حا يكون في بوران.
السودان أفضل حالا في حالات الزواج السهل والبسيط

Quote: شنو يعنى لو البوره 34% ولا البوره الف

والفورة مليون :)

شكراً يا أختنا مها على التعقيب الرزين

Quote: زواج متعه مجرد ذكرها للتخفيف من نسب العنوسه او (البوره كمايقولون )هو امتهان للمراه

Quote: طيب بدل زواج المتعه دا مش تعدد الزوجات يكون حل افضل

تعدد الزوجات هو حل آخر إضافة إلى الزواج المؤقت ، وأيضاً دافعنا عنه بقوة ، فجاء البعض ووصفه بأنه إمتهان للمرأة
وأنا رأيي إنو الإتنين ما فيهم إمتهان للمرأة ولا حاجة ، لكن المتزوجين والمتزوجات (أياديهم في الموية الباردة)
ويقعدوا ينظروا ، وما عندهم حلول ، ولا يحسون بمعاناة أخواتهن العانسات
تجيب أي حل ، يجوا يشنعوه ، ولا بديل لديهم أو لديهن،
وبعضهم عنده بديل (شين كدا ، وهو إباحة الزنا بالقانون) لكنهم خجلانين منهو وما بيقدروا يقولوه دخري
هنا مقتطفات من مناقشة كتبتها في بوست آخر قبل أسابيع

Quote: إذا تم منع التعدد ، لابد من توفير بديل ، والبديل الوحيد هو منع تجريم الزنا أو إباحة الزنا (بالواضح الفاضح) في كل الدول التي تمنع التعدد بالقانون ،فإن القانون الآخر المرداف له ( المعالج لنتائجه) هو قانون إباحة الزنا بالمناسبة : الزنا في الدول الغربية معاد تعريفه بأنه الخيانة الزوجية بس أما إثنين كبار وغير متزوجين بيمارسوا الجنس ، فدا لا بيعتبروه زنا لا حاجة ودا من الجوانب السلبية في هذه المجتمعات ،، مافي مجتمع كامل حيجي واحد (أو واحدة طبعاً) ويقول لي : لا الإقتصاد ولا القانون ... التوعية وبس ،، الوعي الوعي يا سلام !!!! الوعي بي شنو ؟ توعية المرأة بحقها في البحث عن الحنان (بأي شكل) أم بتوعيتها على الصبر؟ اللف والدوران لزومو شنو ؟ قولوها عديل الخلاصة : منع التعدد غير ممكن في مجتمعنا

ثم

Quote: مشكلة تعدد الزيجات من منظور إشتراكي: من وجهة نظري أنا طبعاً وكحالة معملية لإختبار معادلة التوازن بين حقوق الفرد وبين الإختيار الجمعي للمجتمع ( ضمير الأمة) ربنا نفسه لم يخلقنا ليمتحن مدي صبر عقولنا عن التململ والتفكير في حلول ما يقابلنا من مشاكل. فإن مثل هذا الإفتراض معناه أن العقل الخامل هو من سيحظى برضى الرحمن ،،، وهذا هراء. إنما ما يُرضي ربنا هو صبر ضميرنا على مشقة أن يشاركك الآخر فيما تحب ، "شفتو يا بنات حواء؟" كالصبر على مشقة مساعدة الآخر والتنازل عن إحتكار الشريك لحل مشكلة العنوسة (التعدد) ، والصبر على مشقة التنازل عن شيئ من مالك للآخر (حل مشكلة الفقر) ... وهكذا

هذا الكلام كان في البوست دا
Re: ....وهكذا تنحدر الحركة النسائية السودانية الى حركة أنثوية!!

هدية صاحب البورد
لنساء البورد
بمناسبة يوم المرأة العالمي ...:)

لحل مشكلة (البورة ) .

مشكلة كبيرة يابكري العنوسة والبؤرة

الحل في التعدد
حا نتكلم كتير .. ونتناقش كتير .. ونتلفسف كتير .. ونزعل كتير
لكن غير الحل دا ما في ...
والسلام عليكم ورحمة الله

جيت من الآخر وهي الحقيقة
أثني على ذلك
الحل في التعدد ويجب أن تتعلم المرأة ثقافة التعدد حتى تساهم في حل مشكلة العنوسة التي ترمي بشبحها على المجتمع.

تحيات طيبات زاكيات..

Quote: مثل أكبر معضلتين تواجه المسلمين الآن : الإقتصاد والإجتماع فماكينة الإقتصاد (العام والخاص) تدور بوقود إسمه الإقتراض ، ومفهوم الربا عند السنة يضعف مفعول هذا الشريان (الإقتراض ) وأما في الإجتماع (فالعنوسة ) أو ندرة الأزواج كارثة تفتك بالنساء المسلمات ، وعند الشيعة حل أراه معقول (زواج المتعة)

Quote: طيب بنفس المنطق ، واحدة عند محطة الثلاثينات أو الاربعينات من العمر وأوشكت أن تفقد فرصة الإنجاب ووجدت من يتزوجها لفترة قصيرة قد تُرزق منه (ببذرة) تخلفها في الحياة لم لا؟

شكرا لكم جميع المشاركين وخاص لاحمد ابكر ومها عبد المنعم ووليد فتح الرحمن على هذا الكلام المنطقي السلس والجميل ..
وطالما كانت اساس المشكلة يا استاذ احمد ابكر في الاقتصاد والاجتماع فاظن هذين النقطتين ايضاً لهم اثار اقتصادية واجتماعية قد يعاني منها المجتمع مستقبلاً :
وجود الابناء والصرف عليهم..

Quote: ومنو القال ليك إنو اي ولد أو بنت سوف يعاني أو تعاني بالضرورة إذا لم ينشأ في حضن والد؟

Quote: كيف يكون زواج المتعة امتهان للمرأة والزواج فيهو عقد واعلان واشهار ومهر وحضور ولى أمر الفتاة خصوصاً لذوات السن الصغيرة فقط الاشكال هنا وسط اهل السنه هو تحديد الفترة الزمنيه للانفصال بالطلاق وبعد القاء يمين الطلاق تدخل المرأة فى العدة حيضتين ولو حصل حمل اثناء الزواج هذا يلحق الولد بابيه وعلى ابيه ان يقوم بكافة مسئولياته تجاهه .

الرجل ممكن يتزوج كل شهر ويجيب ابناء عكس المراة ..
طبعا استحالة انه يستقر ويتابع شئون كل ابنائه كما ان الصرف عليهم كلهم مكلف اقتصاديا له لطول فترة حضانة الانسان منذ الولادة وحتى التعليم وخاصة التعليم العالي..
فيمكن انه الحل انه تلتزم المرأة بالقيام بشئون ابنائه اذا حصل الانجاب ..
وهنا بيقود ذلك للاستطاعة - استطاعة المراة المادية - بخلق فرصة متساوية في العمل والدخل مع الرجل ..
او تكون الموافقة على تمتعها بالزواج بوجود ابراء ذمة مالية وإقرار بالدخل انها تقدر تستطيع الصرف عليهم.. خاصة اذا كثر تمتعها ..
والخوف من تحول الزواج في عضمه لمسالة طبقية لمن يستطيع الصرف والنفقة.. فطالما الهدف هو اقتصادي اجتماعي فلابد من مراقبة كل الاثار..
وقد يكون الافضل لمجتمعاتنا البائسة هذه تحديد الاسرة بثلاثة افراد..

والاصلح من كل ذلك لمن بلغن المحطات التوقف عند بنوك البذور المعلبة فهن على الاقل يستطعن الاختيار وفق المواصفات الخاصة التي يردنها في البذرة المنتقاة مع التحسينات المدخلة في البذرة ..وتكون خطوتهن مدروسة وفق امكانياتهن..
لذا بدلاً عن الدخول في جدل الفقه والمذاهب ادعموا الحق في هذه البنوكـ ..

سلامات أحمد ابكر
يا ابو حميد هدف الزواج ليس الإنجاب فقط عند الإنسان ودا فرقه من الكائنات غير العاقلة التي تسعى لحفظ النوع فقط
بعدين بزواج المتعة حليت مشكلة المراة من ناحية أن يلحق بها لقب العانس لكن حوّلتها لمشكلة تانية وهي صارت مطلّقة الآن وزاد تعقيد مشكلتها بان في يدها طفل أو أطفال ترعاهم - بديهي أن من تزوّج للمتعة لن ينشد غيرها
المشكلة جذورها الحقيقية اقتصادية غلاء المعيشة و السكن و انتشار العطالة وسط الشباب و المغلالة في المهور و تكاليف الزواج دي الأسباب الحقيقية
وهي نفس الأسباب التي لن تجعل من زواج المتعة أو التعدد حلا كاملا للمشكلة فالإتنين سواء المتعة أو التعدد عايز قدرة مادية برضو
يعني الاتنين يحلو مشكلة بعض النساء بواسطة بعض القادرين من الرجال
ولا يبقى لبقية النساء وغير القادرين من الرجال سوى الصوم و انتظار الفرج

Quote: سلامات أحمد ابكر يا ابو حميد هدف الزواج ليس الإنجاب فقط

المشكلة يا ود البشرى

يقولوا ليك متعة ويقولوا ليك نجاب

لوهو متعة المفروض ما يكون فيهو أومعاهو إنجاب

لمن يبقى لفيهو إنجاب المفروض يكون مستمر عشان الأسرة ومعناها

بصراحة التقرير السخيف الفي البداية بديهو صفر من 10 والعجب المقدمة وهي بتقول "نبحس" ..


البداية ما محفزة ..

وتقرير لمشكلة سودانية جايبين نساء بعبايات ياخ كفاية كسل ..


طريقة الطرح ما محفزة على النقاش ..


والعجب تعريف الزواج في التقرير ..

زهجت ياخ ..وماحأكون موضوعية ..

Quote: بصراحة التقرير السخيف الفي البداية بديهو صفر من 10 والعجب المقدمة وهي بتقول "نبحس" .. البداية ما محفزة .. وتقرير لمشكلة سودانية جايبين نساء بعبايات ياخ كفاية كسل .. طريقة الطرح ما محفزة على النقاش .. والعجب تعريف الزواج في التقرير .. زهجت ياخ ..وماحأكون موضوعية .

معاك حق يا داليا ...

و الاخترع الزواج زاتو بالغ ...

اشمعنا البني آدم ؟... ما كل مخاليق ربنا عايشين في حرية تامة ...

و ما عمرنا سمعنا لينا في ( قرد ) ود حرام ... ولا ( زرافة ) بايرة ...!!!

ولا شفنا ( حيوانات ) خانو ( غابتهم ) ... وباعوها ...

حيدر الزين
التحيات النواضر
وشكراً على المداخلة المليانة
وخاصةً المقتطف التالي

Quote: والاصلح من كل ذلك لمن بلغن المحطات التوقف عند بنوك البذور المعلبة فهن على الاقل يستطعن الاختيار وفق المواصفات الخاصة التي يردنها في البذرة المنتقاة مع التحسينات المدخلة في البذرة ..وتكون خطوتهن مدروسة وفق امكانياتهن.. لذا بدلاً عن الدخول في جدل الفقه والمذاهب ادعموا الحق في هذه البنوكـ ..

فكرة رائعة يا حيدر
لكنها طبقية بإمتياز
لأننا بذلك يادوبنا نكون دخلنا في معضلة إقتصادية إجتماعية أخرى
خدمة بنوك البذور الآدمية دي تكلفتها بالشيئ الفلاني طبعاً ولا يمكن توفيرها لمن أرادت إلا في مناطق حضرية صرفة
مش حضرية بس ، بل غنية ورايقة رواقة أصحاب العقال عديل كدا
أما الحلول الأخرى مثل الزواج المؤقت فلا تحتاج إلا إلى تنازل أصحاب المذاهب عن التشدد وتواضعهم على حلول توافقية
ونشرها ليكون شيئاً مقبولاً ومسموحاً به دونما حرج وسط المجتمع
وحينها سوف تكون في متناول أي مواطنة في فريق أو قرية أو مدينة ، دونما تدخل من بنوك أو مستشفيات
عكس خدمات بنوك البذور الآدمية وما يستلزمها من تعقيدات تكنولوجية ومعالجين إختصاصيين
تحياتي

ود البشري
تسلم يا حبيب

Quote: يا ابو حميد هدف الزواج ليس الإنجاب فقط عند الإنسان ودا فرقه من الكائنات غير العاقلة التي تسعى لحفظ النوع فقط

صحيح ، لكنه أحد الأسباب الرئيسة ، بل أهمها على الإطلاق
وما لا يُدرك كله لا يُترك جله ، ولا شنو؟

Quote: بعدين بزواج المتعة حليت مشكلة المراة من ناحية أن يلحق بها لقب العانس لكن حوّلتها لمشكلة تانية وهي صارت مطلّقة الآن وزاد تعقيد مشكلتها بان في يدها طفل أو أطفال ترعاهم

لا ، أنا ما قصدي حل مشكة اللقب ، إنما الحرمان ، بعدين وين المشكلة أن تكون لدىها طفل ترعاها؟
لكن ، اوووه ، أنت بتقول كدا لأنك في بالك الجانب المعيشي ، زي ما بينت في كلامك التحت دا

Quote: المشكلة جذورها الحقيقية اقتصادية غلاء المعيشة و السكن و انتشار العطالة وسط الشباب و المغلالة في المهور و تكاليف الزواج دي الأسباب الحقيقية

ليس تماماً ، ما كل العانسات عندهن مشكلة إقتصادية
بعضهن عاملات ، وبعضهن مستثمرات ، ومع ذلك ظللن عانسات
السعودية مثالاً ، هناك صرخة عالية من معدلات العنوسة . شفت كيف؟

تحياتي

Quote: يقولوا ليك متعة ويقولوا ليك إنجاب

عاصم فقيري
تحياتي
المتعة دي خدها كمصطلح مقصود به الزواج المؤقت
ولا تقف كثيراً عند معناها اللغوي ،


السؤال يا عاصم
الحل شنو؟ الصبر ، المصاحبة ، الزنا ، أطفال المايقوما ....... شنو ؟

ألأخ وليد فتح الرحمن
لك التحية
بس ياخي مش قلنا لا للعصبية
أصلو ما نقدر نفتش حلول للمسلمين إلا بفش غبائن في بعضنا يعني ولا كيف؟
أنت في ردك على الأخت مها ، قلت الآتي:

Quote: طيب ما رائك فى انواع الزواج فى الطرف السنى : الزواج العرفي فهو الذي يقع بين رجل وامرأة مع شهود غير أنه لايتم تسجيله لدى الدوائر المختصة .. وإنما يقع على ورقة خارجية بينهما .. ولا يتم فيه دوام السكن معا ... بزواج التجنس أو الجنسية : وهو ما يقوم به بعض الطلاب او المغتربين بالزواج من أهل بلد بهدف الحصول على الجنسية وقد يستكمل كل الشروط وإظهار عدم التأقيت وإبطان التأقيت . اهه فى فكرك ديل برضو ما امتهان لكرامة المرأة ؟؟؟؟

قلنا فقهكم كشيعة في المسألة موضوع النقاش دا متقدم وبيساهم في الحل
مفروض تكتفي فقط بالشرح والتوضيح لمن يتساءل عما يراه غير سليم في طرحكم هذا
مش تجي تبحث عن غريمكم السنة من غير مناسبة وتقعد تشاغل فيهم
وكمان كلامك فوقهم دا عندك ليه دليل ولا تلفيق وتشويه لهم وبس؟
وين لقيت أن الزواج العرفي يدعمه السنة
الشرح الإنت جبتو عن الزواج العرفي دا ، هل فيهو الإشهار؟
طيب ناس السنة مش بيقولو إنو االإشهار أو الإعلان من شروط صحة الزواج؟

صاحب البوست وضيوفه الكرام
تحياتي
السؤال المهم هل هناك سن محدد للزواج يجب ان لا تتجاوزه البنت واذا تجاوزته احترقت .. ؟ وماهي معايير هذه السن ... والجهات البتحدد المعايير دي ..
وهل المعايير دي قائمة على اسس سليمة . ؟
والبنت هل هي السبب في تاخير زواجه طبعا الاكيد في الغالب لا .... اذاً لماذا يحملها المجتمع هذا اللقب الذي الهدف منه الانتقاص منها وسط رفيقاتها المتزوجات ..
وخطورة هذا الامر يجعل الهم الاول للبنت واهلها هو الزواج دون ان يكون للبنت رغبة في تحقيق الذات ويجعلها تخضع خضوع كامل للرجل وتعمل على ارضائه حتى وان كان على خطأ ويجعل الاهل يصرون على اجبار بناتهم على الزواج وعدم اعطائهن فرصة للاختيار وتزويجهن في سن صغيرة ..
وكل هذه الاشياء ذات نتائج سلبية على نفسية المرأة وبالتالي على تربيتها للصغار