Post: #1
Title: ديك حبوبه ام زين
Author: الصادق سيكا
Date: 03-07-2013, 03:32 PM
هذا الصباح صحوت باكرا كالعادة .. عملت لى كباية شاى حليب
بى لبن البدرة ماركة نيدو .. للعلم هذا الحليب مخصص للاطفال
لكنى أحبه وماعارف السر فى كده شنو؟ ....
بينما أنا أشرب فى الشاى بى مزاج وفجعتن اذا بطائر أشبه بالقمريه
يرك فى شباك المطبخ من الخارج ,, نظر الىّ هذاالطائر ثم بدأ ينظف
منقاره بطريقة أوحت الىّ بأنه أكل أكلة دسمة.
ظل الطائر ينظف منقاره وأنا أتأمله فهو ما شاء الله سمين حاجة زى
كيلو الا شوية وممكن عادى يعمل حلة تقلية كاربه .
نظرت الى رفوف المطبخ والحمدلله كل أدوات ومستلزمات الحلة متوفرة
البهارات بى أنواعها حتى الشمار مع أننى لا أحب الشمار ,كذلك دقيق القمح
قد كنت أنوى عمل مديده هذا الصباح . هذا الطائر مازال ينظر الىّ وهو
ينظف منقاره ولا أدرى سر النظافة الكتيرة دى..؟الاتنين اجتمعن فى هذا
الطائر..النضافة والقيافة ..لكن كيف لى به ؟ فى هذا البلد اذا شافونى ناس
الرفق بالحيوان ولّه شنو كده ما عارف .. الله قال بى قولى...
من حسن حظى أنّ شباك المطبخ لايطل على الشارع بل يطل على الباك
يارد..اذن مافى مشكلة ومافى زول حيشوفك يا نقر (nigger ) وعوس عوسك.
تذكرت وانا صغير كنا فى البلد نشرك للطير بالشرك . كان ابن عمى فتحى
تاج السر محظوظا فى مسك القمارى لانه كان حريفاً أما العبد لله كان كيشه
فشركى لا يقبض الا الزرزور الذى كنا نسميه طير الجنه ولست اعلم لماذا
يسمونه طير الجنه . نعم كنت كيشه ( للطيش ) وأذكر مرةً من ذات المرارات
أن شركى قبض ديكاً عوعاياً لحبوبه ( ام زين ) . فغضبت منى و شكتنى
لجدى الذى جلدنى وربطنى بحبل حماره وتركنى تحت هجير الشمس حتى (
بلت فى لباسى ) اى والله .. لكن الغريب فى الامر أن الديك لم يمت مع أن
الشرك كان جديدا و من غرائب الصدف أننى أشتريت الشرك من العم
(عوض اسمين زوج أم زين ) كلفنى الشرك بالتمام و الكمال قرشين و نصف
و قد سرقت ذاك المبلغ من محفضة ( امى ) يديها الصحة و العافية . نعم
سرقت القرشين و نص وذهبت لعمى عوض اسمين وهو يعلم اننى قد سرقت
ذاك المبلغ من مكان ما .. وقد كان مبلغ محترما حتى اولاد شيخ حلتنا عباس
فقيرى كانوا لا يحملون اكثر من قرش كمصاريف يومية لهم وكان لا يزيدها
الا حينما يأتى زوجته الحاجة علوية بشير ليلا ’ ربما زاد قرشا اخر ,
اعطانى عوض اسمين شركا قوياً ( الياى بتاعو قوى ) بتلكم القرشين ونص
كان الديك محظوظا لانه لم يمت ولكنه صار لا يؤذن بانتظام ربما لان رقبته
كانت ( عسمانة من هبرة الشرك ) حتى اذانه صار غريباً وصوته صارت فيه
بحه مزعجة وقالوا أنه بعد ذلك صار ( ألْجِنْ ) ذا لجنه ..
نعم ديك حبوبة أم زين صار ألجناً وقد تم ذبحه بعد ذلك عندما عاد ابنها
(على عوض اسمين ) من الخرتوم .
لا زال الطائر يقف على شباك المطبخ من الخارج وأنا أجتر شريط ذكريات
طفولتى التى لم تدخل فيها العولمة الى عالمى الصغير .. لا انترنت ولا بلى
استيشن ولكن برغم ذاك الزمان كانت أفكارنا تسابق العولمة والدليل أننا لم
نر تلفونا فى حياتنا و كنا نتخيله فنحضر علب الصلصة الفارغة ونقوم بعمل
خرم صغير فى اسفل العلبة كى يسمح بدخول خيط رفيع نربطه فى العلبة
وطرف الخيط الثانى فى العلبة الاخرى و نجرى مكالمات تلفونية بيننا حتى
عالم الميكانيكا دخلناه ونحن لم نتجاوز الخامسة حيث كنا نصنع من قطع
الحديد لوارى وبصات وبنطونات كنا أذكياءاًونحن صغار ولبثنا ثوب البلادة
عندما كبرنا والدليل على بلادتنا كان من المفترض أن نصنع طائرات عندما كبرنا
لكننا للاسف انذوينا فى داخلنا وماتت فينا الفكرة فدفناها فى مقابر الطفولة
ولم نقم لها مأتماً مع أننا لا نؤمن ب ( وينتهى العزاء بعد الدفن )
|
Post: #2
Title: Re: ديك حبوبه ام زين
Author: محمد حامد
Date: 03-07-2013, 03:46 PM
Parent: #1
Quote: فغضبت منى و شكتنى
لجدى الذى جلدنى وربطنى بحبل حماره وتركنى تحت هجير الشمس حتى (
بلت فى لباسى ) اى والله .. لكن الغريب فى الامر أن الديك لم يمت مع أن
الشرك كان جديدا |
أها وبعدين واصل
عندي سؤال فني في الحتة دي لكن لمن تخلص
|
Post: #3
Title: Re: ديك حبوبه ام زين
Author: Balla Musa
Date: 03-07-2013, 03:59 PM
Parent: #2
Quote: ولبثنا ثوب البلادة
عندما كبرنا |
ياسيكا
السبب فى الحكاية دى التعليم(مدرسة ومجتمع)..
عشان كدا بتلقى أطفال العالم الطيش أذكى من أطفال العالم الأول قبل سن المدرسة.
|
Post: #4
Title: Re: ديك حبوبه ام زين
Author: طلحة عبدالله
Date: 03-07-2013, 04:55 PM
Parent: #3
Quote:
كنا فى البلد نشرك للطير بالشرك
. |
يارااااااااااج
بالله بتشركوا للطير بالشرك ..؟؟؟؟؟؟؟
أول مرة أسمع بى ناس بشركوا للطير بالشرك .
|
Post: #5
Title: Re: ديك حبوبه ام زين
Author: فضل الصادق
Date: 03-07-2013, 05:22 PM
Parent: #4
حكي جميل ، ربط ماضي طفولي ثر بواقع ربما كان مر ، ويقفز السؤال ملحاحاً :
لماذا يشدنا دوماً للماضي حنين جارف وهو في حينه ربما كان صعيب ؟؟ هل هو هروب إلي الخلف لإجترار الذكريات كي تعينا علي الحاضر أم ماذا هناك ؟؟
كل التحايا يا سيكا .
|
Post: #6
Title: Re: ديك حبوبه ام زين
Author: الصادق سيكا
Date: 03-07-2013, 05:50 PM
Parent: #5
Quote:
أها وبعدين واصل
عندي سؤال فني في الحتة دي لكن لمن تخلص |
الحبيب قواسيب من الود ..
خش يا ابو سؤال فنى .. بصراحة كده انا كنت عايز اضيف ..بس خلاص مش حضيف
|
Post: #7
Title: Re: ديك حبوبه ام زين
Author: الصادق سيكا
Date: 03-07-2013, 06:08 PM
Parent: #6
Quote:
ياسيكا
السبب فى الحكاية دى التعليم(مدرسة ومجتمع)..
عشان كدا بتلقى أطفال العالم الطيش أذكى من أطفال العالم الأول قبل سن المدرسة.
|
الحبيب د. بله موسى. قواسيب من الود
نعم يا دكتور كل الحكاية انت لخصتها فى السطر الاول
شكرا يا دوك
|
Post: #8
Title: Re: ديك حبوبه ام زين
Author: الصادق سيكا
Date: 03-07-2013, 06:41 PM
Parent: #7
Quote: يارااااااااااج
بالله بتشركوا للطير بالشرك ..؟؟؟؟؟؟؟
أول مرة أسمع بى ناس بشركوا للطير بالشرك |
حبيب ألبى طلحة .. قواسيب من الود
نعم يا طلحة ...
من أدوات التشريك للطير
1- الشرك .. كما هو موضّح أدناه
2-الطشت .. ويوضع على شكل زاوية ويضع امامها العيش .. وتسمى كوبان
وعملية الكوبان تكون بالطبق او الطشت
3- النبلة وهذه مشهور حتى للبندراويين من اهل الخرتوم
قد تكون هنالك أدوات أخرى و غير معروفه لدينا ..
فيا طلحة نعم نشرك للطير بالشرك او بالعمرة او بالطبق او النبلة .. شفت كيف
|
Post: #9
Title: Re: ديك حبوبه ام زين
Author: طلحة عبدالله
Date: 03-07-2013, 10:10 PM
Parent: #8
والله لكن بالغت يا سيكا .. 
نشرك بالشرك دي زي نلعب الكورة بالكورة .
|
Post: #10
Title: Re: ديك حبوبه ام زين
Author: الصادق سيكا
Date: 03-09-2013, 03:06 AM
Parent: #9
الحبيب فضل قواسيب من الود..
| Quote: حكي جميل ، ربط ماضي طفولي ثر بواقع ربما كان مر ، |
وما أجمل الطفولة يا عزيزى
Quote:
لماذا يشدنا دوماً للماضي حنين جارف وهو في حينه ربما كان صعيب ؟؟ هل هو هروب إلي الخلف لإجترار الذكريات كي تعينا علي الحاضر أم ماذا هناك ؟؟
|
ربما .. وربما كان ذلك راجعا لثقل وعظم الامانة التى يحملها من تخطى مرحلة الطفولة
وشارف مرحلة الرجولة .. او ربما كان مرد ذلك الى العالم الطفولى البريئ
| Quote: كل التحايا يا سيكا . |
ولك قناطر مقنطرة مثلها
|
Post: #11
Title: Re: ديك حبوبه ام زين
Author: الصادق سيكا
Date: 03-09-2013, 03:32 AM
Parent: #10
لحبيب طلحة قواسيب من الود ..
| Quote: كنا فى البلد نشرك للطير بالشرك |
حاولت جاهد أن أبين لك بأننا كانت لدينا عدة طرق ( للتشريك ) ومن ضمنها الشرك
وانزلت لك بعض أدوات التشريك التى نستعملها .. دعنى أعلن فشلى فى توصيل
المعلومة لك .
اما هذه الجزئية
لا أذكر أننى ذكرتها هنا بل قلت
Quote: كنا فى البلد نشرك للطير بالشرك
|
مع أننى من الذين يتحدثون العربية كلغة ثانية او قل أنا من غير الناطقين بها
الا أنه يوجد فرق بين الجملتين الموجودتين فى الكيوتيشن ..
عموما اشكرك كثيرا لعلنى كنت مخطئاً .. فانا لا أدعى الكمال ولا أدعى المعرفة
فرأسى أفرغ من فؤاد أم موسى وقد أستفيد منك وأرحب بكل نقد بناء ..
شكرا لانك كنت هنا .. فدادين مودتى
|
Post: #12
Title: Re: ديك حبوبه ام زين
Author: الصادق سيكا
Date: 03-09-2013, 02:01 PM
Parent: #11
Quote: بابكر دفع الله · الأكثر تعليقا · Makkah Al Mukarramah, Makkah, Saudi Arabia
وقفتو للزول في حلقو كرهتوه الحكي الجميل
اما اتفرجوا او اسكتو
الزول لطيف وسردوا لطيف |
بابكر دفع الله من الشباك التحتانى شكرا لانك كنت هنا
|
Post: #13
Title: Re: ديك حبوبه ام زين
Author: طلحة عبدالله
Date: 03-09-2013, 04:41 PM
Parent: #12
يا سيكا شكرا لقواسيبك الودودة وأية حاجة..
لكن ما في زول قال ليك رأسك فارغ ولا حتي لمح بالكلام دا مجرد تلميح ..
قصدي أقول : أي تشريك لازم يكون بالشرك سواء كان للطير أو للأسد ..
لا يمكن أن تشرك لأية حاجة بدون شرك ..
حتي لما تتلبد لى زول في زقاق واللا حتة ضلمة فالتلبد دا إسمو الشرك.
ممكن تقول كنا بنشرك للطير بالقلوبية أو بالنبلة مثلا أو للسمك بالصنارة
وهكذا .. لكن نشرك للطير بالشرك د تفسير الموية بالموية والحكاية دي ما عايزا ليها
زول بعرف عربي أصلا عشان يكون عارفا ..
عموما قصتك جميلة وأنا حاولت أشارك بالمداخلة الفوق دي لكن ما عايز أوريك
لأنو أصلا أنا ما مسؤول منك .. وكان إتضايقت هاك طرفي دا ختو ضمان لو جيتك تاني
أديهو النار .
|
Post: #14
Title: Re: ديك حبوبه ام زين
Author: الصادق سيكا
Date: 03-09-2013, 06:38 PM
Parent: #13
الحبيب طلحة .. قواسيب من الود
يا حبيبى طلحة ما هذا ..؟؟
ومن قال أنك قلت أن رأسى فارغ أو تم تلميح منك .
انا الذى أعرف قدر نفسى وحينما قلتها والله لم اكن أصد الا معناها و زدت عليها أنىى لا أدعى الكمال
Quote: لكن نشرك للطير بالشرك د تفسير الموية بالموية والحكاية
|
عشان كلامك ده أنا قلت
| Quote: عموما اشكرك كثيرا لعلنى كنت مخطئاً |
وأكررها يا حببى طلحة أنا راسى أفرغ من فؤاد ام موسى ولا أدعى المعرفة والكمال لله ..
عشان كده انا قلت
| Quote: وقد أستفيد منك وأرحب بكل نقد بناء |
| Quote: وأنا حاولت أشارك بالمداخلة الفوق دي |
عشان كده انا كنت سيعد جدا كون الطف زول من السناير يتداخل معاى
ولا ازيعك سرا اننى كنت ولازلت من المعجبين باسلوبك فىى الكتابة انت وكثيرين
لذلك تجدنى كثير التداخلفى بوستاتك وباريحية وكانى انا كاتبها لذلك قلت لك
| Quote: شكرا لانك كنت هنا .. فدادين مودتى |
فيا طلحة وحات سيدى الحسن انت مو نصيح او شاربلك شيتاً مطمم قلبك والدليل
Quote: وكان إتضايقت هاك طرفي دا ختو ضمان لو جيتك تاني
أديهو النار .
|
فيا حبيبى طلحة من صفات العبد لله لا يغضب ولا يتضايق بى شيتاً هين
يعنى كالطوبه لايشتعل ولا يساعد على الاشتعال ..
اما انت يا حبيبى طلحة فيبدو لى انك حساس محمد حساس .. او ربما اكون محطئاً ..
انى وى .. تظل فدادينى من الاحترام تجاهك واعلم ان سيكا يحبك ويقرءك السلام
|
Post: #15
Title: Re: ديك حبوبه ام زين
Author: طلحة عبدالله
Date: 03-09-2013, 06:53 PM
Parent: #14
يا زول هووي شنو شابكني حبيبي طلحة .. القطر دا فيهو ناس عندهم تفسيرات بعرفوها هم
ثم أنا ما سنير أو كما قالت الأخت نجاة .. انا بكره السناير وبحب أم فتفت ومتضايق من
الزول الجمبي دا .
...................
يا سيكا والله حصل خير وخلاص أنا فمهت غلط أو إتا فهمت غلط .. كلو واحد المهم حبل
الود ما ينقطع .
|
Post: #16
Title: Re: ديك حبوبه ام زين
Author: عمر عبد الخالق سعيد
Date: 03-10-2013, 03:58 AM
Parent: #15
جميل ومنسق
سرد مريح للنفس
|
Post: #17
Title: Re: ديك حبوبه ام زين
Author: الصادق سيكا
Date: 03-10-2013, 03:32 PM
Parent: #16
| Quote: يا زول هووي شنو شابكني حبيبي طلحة .. القطر دا فيهو ناس عندهم تفسيرات بعرفوها هم |
طلحة يا مسخوت يا فقر ... خلى بالك الكلام ده عشان الناس بتاعين التفسير
|
Post: #18
Title: Re: ديك حبوبه ام زين
Author: الصادق سيكا
Date: 03-10-2013, 04:05 PM
Parent: #17
الحبيب عمر .. قواسيب من الود..
الجميل هو مرورك من هنا .. شكرا
|
|