Post: #1
Title: حجيتِك ما بجيتِك
Author: أبوذر بابكر
Date: 03-04-2013, 03:59 PM
حجيتِك ما بجيتِك
ريدا جانى وجاكى
طريت اللقيا طريتك
سادِر كايسك
وبترجاكى
حجيتك ما بجيتك
وكان يا ما كان
فى وليد من ناس الحله
بالريده مستفه روحو
وقلبو رهيف
بالحب مليان
واقف يضارى
يغطى جروحو
يعاند الشوق
يضحك حزنان
جارى ورا الفرح الممحوق
يزعل فرحان
شوقو مدفق غامر سوحو
مشتت فى بطن الأزمان
حجيتك ما بجيتك
فرحا جانى وجاكى
وتانى كمان
كان ياما كان
قالو فى زول
تاوق وشافك
شال عينيهو اداهن ليكى
دخل الفجة
الفيها سماحك
فجّ المعنى الفيهو عفافك
وخت حمالته على عينيكى
خلا عميرو ينور منك
نسى آلامو وجا مباريكى
قفل الروح الشالك فيها
وخلا الباب تالاك متاكى
حجيتك ما بجيتك
ريدا جانى وجاكى
تتذكرى يوم خسمتك
يوم قُت ليكى
عليك الريد الهد الحيل
تبقى المطره
وتروي نشافنا
ابقى القمرا التفتح لينا
دروب الليل
بلى ترابنا
وابقى النيل
وساعة نضهب وسط احزانا
ابقى النمه
وكونى دليل
وسعدا مارق منك
وعم رباكى
حجيتك ما بجيتك
ريدا جانى وجاكى
|
Post: #2
Title: Re: حجيتِك ما بجيتِك
Author: أبوذر بابكر
Date: 03-05-2013, 07:12 AM
Parent: #1
|
Post: #3
Title: Re: حجيتِك ما بجيتِك
Author: عبد العزيز محمد عمر
Date: 03-05-2013, 12:36 PM
Parent: #2
دا غير نقول عليهو إبداع ... مش ح نقول تاني حاجة
شكرا حبيبا على النفس الجميل
|
Post: #4
Title: Re: حجيتِك ما بجيتِك
Author: أبوذر بابكر
Date: 03-06-2013, 05:05 AM
Parent: #3
العزيز عبد العزيز
كتر نداك وسماحك زيادة
وكتر خيرك وفرحك ازيد
على وسم تهاويم الحٌجا دى
بوسم الإبداع
|
|
