فتح التقديم للمنح التركية(ماجستير ودكتوراة ) للعام 2013(رابط مباشر)

درجت تركيا كل عام على منح فرص للدكتوراة والماجستير والبكلاريوس
لقبول الطلاب من كل دول العالم
وانا واحدة منهم
حيث حصلت على منحة دفعة 2012م
ضمن 45 ألف طالب قدمو لتلك المنح بمختلف مستوياتها دكتوراة ماجستير بكلاريوس

والان ونحن في العام 2013م
اعلنت فتح الفرص للعام الجديد
وان اخر يوم للتقديم 31 مارس
واليكم الرابط مباشرة
http://turkiyeburslari.gov.tr/index.php/en/

وساحكي لكم عن المنحة ومواصفاتها ومميزاتها

أرجو واتمنى انو اكبر عدد من السودانيين يحظو بهذه المنح
فاذكر مثلا السنة بتاعنا 2012
شالو من السودان 23 طالب فقط
في تقدير لانو المنحة غير معروفة لدى السودانيين

في نفس الوقت بلد زي الصومال
شايلين منها 1000 وزيادة طالب

المنحة التقديم لها مباشر عبر الانترنت
ومن ثم كل الخطوات تاتيك عبر ايميلك
ثم لاحقا لما يشيلو الزول في معاينة ومقابلة بتتم لدى لجنة في سفارة تركيا في البلد الانت فيها

المنحة مميزاتها ممتازة جدا جدا

المنحة بتغطي تذكرة دخولك للبلد لاول مرة ومغادرتك ليها بعد التخرج(يعني نزولك للبلد في الاجازات ما عندهم دخل بيه ههههههههه)
ايضا المنحة بتغطي رسوم دراسة اللغة التركية لمدة عام كامل(ودا شرطا تقرأ وتتعلم اللغة التركية حتى لو الدراسة بتاعتك في الجامعة بالانجليزية)
وايضا المنحة بتغطي نفقات الاقامة في الداخلية
ورسوم الجامعة كاملة على المنحة
وبطاقة التامين الصحي
ويتم استخراج بطاقة مواصلات مخفضة بنصف القيمة

وما ننسى انهم حتى في المطار استقبلونا

في بعض الاحيان يتم القبول مجانا حتى في الجامعات الخاصة
فيا شباب ما تضيعو الفرص
وارجو ان يتم التقديم بعناية وحرص
وعلى حسب التخصص
يعني مثلا في زملاني ما شالوهم لانهم قدموا في مجال ما في تخصصهم
وهذه نقطة مهمة
يجب ان لا تضيعو الفرصة عليكم بسببها

شكراً ميادة
أول مرة في التاريخ كوز تلقى منو فائدة

Quote: شكراً ميادة أول مرة في التاريخ كوز تلقى منو فائدة

عشان ما بتعرفو الكيزان وقدرهم بس
يازول نحن ما دايرين منكم شئ
غير التوفيق
بس عشان انتو سودانيين وبس
احزنني جدا لما جيت تبع المنحة الماضية العدد المهول من الصوماليين وكازخستان والكنغو ووووو
ونحن السودانيين فقط 23 طالب
منهم 2 رجعو السودان بعد ما قبلوهم في المنحة وجو تركيا وحتى قدموا للجامعة وكورسات اللغة

ياوغدددددددددة ...سلاماااااات

Quote: شالو من السودان 23 طالب فقط في تقدير لانو المنحة غير معروفة لدى السودانيين في نفس الوقت بلد زي الصومال شايلين منها 1000 وزيادة طالب

استعلاء عجيب يادكتورة ..
الفرق شنو بين السودان والصومال ؟


ــــــــــ
ثم مشتاقين (هسه يجينا الشفيع وراق الحاسد ) ..

كتر خيرك ياميادة ..
ربنا يجزيك خير

شكراً ..

والله هى فرصة ، و لكن ..

لأصحاب الهمم العالية

مدة الدراسة للدكتوراة ( 5) سنوات بما فيه سنة دراسة لغة تركية
والماجستير (3) سنوات بما فيهم برضو سنة لغة تركية

Quote: كتر خيرك ياميادة .. ربنا يجزيك خير

شكرا اخ دغيس
وبالتوفيق للشباب القدمو والعايزين يقدموا
وياريت المنحة تجد انتشارها وسط الشباب السودانيين
لانها دي فرص ما سهلة وما بتتكرر بسهولة
المنحة هذه دقيقين في توقيت نتائجها
يعني مثلا انا اذكر السنة الماضية
قدمنا اواخر شهر مايو
وبحلول شهر سبتمبر كانت كل النتائجة والمراحل انتهت
وفي الاسبوع الاول من شهر اكتوبر دخلنا لاراضي التركية
وعلى طول بدانا الدراسة

Quote: استعلاء عجيب يادكتورة .. الفرق شنو بين السودان والصومال ؟

أهلييييييييييييين يا وغد
يشتاقو ليك شنو انت عليك الله**
غير اللبعي ما لاقين منك شئ

الفرق بين السودان والصومال
انو الصوماليين شابكننا ما عندنا دولة وحكومة ووووو
وعايشين حرب الان
ورغم ذلك العدد الكبير دا اتحصل على المنحة
رغم انو المنحة التقديم ليها فقط بالويب سايت
يعني الحكومات ما عندها دخل بيها
فكيف الصوماليين قدروا يقدموا العدد الكبير هذا
ونحن السودانيين اللي عاملين فيها الانترت مستقر عندنا وعدد السودانيين البستخدموا الانترنت ليس بالقليل
ووووو

يازول الموضوع عندي حسد بس
وكمان مغيوظة من البت الصومالية المعاي في الغرفة(صومالية وثلاث تركيات وكازخستانية)
عشان كده يمكن تقييمي للصوماليين جاء متاثر بما اراه من هذه الصومالية



ـــــــــــــــــــــــــــــــــــــــــــــــــــــــــــ
** وطبعا نحنو بالاكتر
و........ كان كيف

سلامات يا حلفوكية.
لكين انت ما قاعدة تعرفي انجليزي كويس
غير عربيك المكسر بي شوية رطانة داك
الحكاية باعة الانجليزي دي عملتي فيها شنو؟
بعدين الدراسة الدرسناها في جامعة الازهري ديييك ما بتشغل ولا اي حاجة
اشتغلنا في مِهن ما عندها اي علاقة بما درسناهو
إلا اللهم يكون عندنا واسطة من المؤتمر الوطني زيييك كده
وشكرا على الرابط و الخدمة .. اها ابقي واسطة للناس في تركيا , ولّ هناك مافي واسطة؟

Quote: لكين انت ما قاعدة تعرفي انجليزي كويس غير عربيك المكسر بي شوية رطانة داك الحكاية باعة الانجليزي دي عملتي فيها شنو؟

يا احمد لا يعقل انو لحدي الان اكون قاعدة عشان انتظر اتوظف فقط بي شهادة الجامعة
الحمد لله ولله المنا
الانجليزي بتاعي اكيد الان ما زي ما تخرجت
ودا لاني مشيت لحدي ماليزيا وقريت كورسات لغة انجليزية
وكمان حاصلة على دبلوم المخاطبة من معهد السودان القومي لللغات سلتي
وغير اني بعتمد على نفسي في تعلم اللغة سواء كان انجليزي او تركي
انت يا احد الانترنت دا قاعد يعمل في شنو !!!!!!!!!!!!!
ولا اااااااااااااه هو النت عندكم انتم المتنوضلين خرزة للحكي والنيل من الحكومة وانصار الحكومة
عشااااااااااان كده عمرك ما حتتقدم

Quote: إلا اللهم يكون عندنا واسطة من المؤتمر الوطني زيييك كده

إنت يا أحمد شهادتك زيي بي إمتياز وجايبة الدرجة الكاملة في الماجستير!!!!!!!!!!!
وفي حالتي صحي كوسته الواسطات بس بي عين قوية وثقة عالية في النفس
لاني شهادة بي امتياز

Quote: ولا اااااااااااااه هو النت عندكم انتم المتنوضلين خرزة للحكي والنيل من الحكومة وانصار الحكومة عشااااااااااان كده عمرك ما حتتقدم

حرزة شنو ونيل شنو, وبعدين منو القال ليك انو انا بحسب نفسي مناضل!
بجي البورد ده عشان اقل للغالطان انت غلطان وقداموا , ورأيي يكون خطأ حتى ياتي رأيي أصوب منه
ويتفق عليه الجميع... مش زيكم ككيزان ملاعين الناس يقولوا ليكم انتو غلطانين في كذا ويرشدوكم
ومع ذلك انتو مستمرين في أخطائكم و نهبكم للبلد لحدي ما ضيعتوها !!


ياخي انا قولتا ليك شنو حسع عشان انال مِنِك؟!
سألت و استفسرت مِنِك وقولتا ليك انتِ انجليزيك ما كان تمام (ودي حقيقة)
اهو انتِ اعترفتي في ردِك وقولتي فعلا انه ما كان تمام
وسعيتي وحسنتيهو ....... وربنا يزيديك

ردِك ده شكلوا زعل ساكت ولّ تكبر (ما عارف) لأنك حتى ما رديتي السلام.

Quote: غير عربيك المكسر بي شوية رطانة داك

يازول انت موووش رطاني
كلنا عربينا مكسر
لاننا من غير الناطقين بها
فايز ود القاضي زاااااااااااتو معانا

Quote: فايز ود القاضي زاااااااااااتو معانا

منو المعاكم ؟!!

انا فايتكم مسافة في العربي يااعجميه انت والاعجمي المعاك ..حتى بقول خيط للخيط ..

تحياتي لبنتنا النوبية ولفايز ود القاضي المعانا كمان ..

Mayada kardesim

çok tesekkür ederim

çok yardimci siniz


الجهاز عندي .. ما داعم التركي هههه

معلومات جميلة وافية

شكر وتحية كبيرة حدوت الشمش ليك .. لتركيا وأهلها الجميلين

هناك نفس الموقع على الفيس وصلت له من نفس الموقع :

https://www.facebook.com/pages/T%C3%BCrkiye-Burslar%C4%B1/277493639008449

أولا حاجة .. شكرا يا ميادة .. ودا خبر جميل .. أنو التقديم مفتوح ويمكن للجميع المحاولة

ثانياً... يا ود البصير .. هسع الواحد يضحك ولا يفتل فوق حبلك دا .. ولا شنو الحكي..؟؟

نمرة ثلاثة .. أها إنتي يا ميادة كدي شوفي لينا حكاية البكالوريوس في تخصص والماجستير في تخصص

نقدم بالجديد ولا القديم

وينالك ثواب ...





عبد العزيز

شكرا الأخت ميادة على نشر هذه المعلومة المفيدة وتعتبر هذه فرصة الممتازة لنا كسوادنيين. طبعا أنا من ضمن الذين إستفادوا من المنح التركية لنيل درجة البكالوريوس. بدأنا دراسة اللغة في العام 1990 بأنقرة وواصلت دراسة البكالوريوس في جامعة إستابول في العام 1991 وبحمد لله خلصت الجامعة في العام 1995 وبعدها عملت في عدة شركات تركية خاصة في مجال البرمجة وكانت تجربة مفيدة بحق وحقيقة وغيرت وأضافة لي الكثير في حياتي ومنها تعلمت اللغة التركية بإجادة تامة وتعرفت على الثقافة التركية عن قرب وبعمق ونلت تعليما ممتازا. والتعليم في تركيا قوي جدا وعندهم نظام تعليمي ممتاز جدا, وفي مرة من المرات جمعتنا الصدف بأحد مستشاري وزير التعليم العالي السعودي والذي كان له إبن يدرس في تركيا, وأثناء حديثي معه عن نظام التعليم في تركيا تمنى إن كان نظام التعليم العام التركي مطبق عندهم في السعودية

Quote: شكرا الأخت ميادة على نشر هذه المعلومة المفيدة وتعتبر هذه فرصة الممتازة لنا كسوادنيين.

اهلا بيك اخ عثمان
اتمنى من كل قلبي انو الموقع بتاع المنحة يصل لاي فرد سوداني محتاج ليها
ويستفيد ويفيد اهله
ويخدم بلده من اي حتة او موقع هو فيه بعد داك

Quote: طبعا أنا من ضمن الذين إستفادوا من المنح التركية لنيل درجة البكالوريوس. بدأنا دراسة اللغة في العام 1990 بأنقرة وواصلت دراسة البكالوريوس في جامعة إستابول في العام 1991 وبحمد لله خلصت الجامعة في العام 1995 وبعدها عملت في عدة شركات تركية خاصة في مجال البرمجة وكانت تجربة مفيدة بحق وحقيقة وغيرت وأضافة لي الكثير في حياتي ومنها تعلمت اللغة التركية بإجادة تامة وتعرفت على الثقافة التركية عن قرب وبعمق ونلت تعليما ممتازا.

ماشاء الله
والحمد لله على التوفيق هذا
ومثل هذه النجاحات اللي عايزين نشوفها بعد 5 نسين او عشر سنين ووووووووو

Quote: والتعليم في تركيا قوي جدا وعندهم نظام تعليمي ممتاز جدا,

كلامك سليم مائة بالمائة من خلال الخمس شهور القعدتهم هنا ومن خلال الجامعة والمعهد اللي بدرس فيه
ياخي اي شئ عندهم بالنظام

هوووش قالدن (على قول الاتراك) يا اخي عبد العزيز

Quote: ودا خبر جميل .. أنو التقديم مفتوح ويمكن للجميع المحاول

التقديم فاتح ولمدة شهر
وبعدين شهر 5 ان شاء الله بيفتحو فرص البكلاريوس (على حد قول الاعلان اللي في صفحة الموقع الرئيسية)

Quote: أها إنتي يا ميادة كدي شوفي لينا حكاية البكالوريوس في تخصص والماجستير في تخصص نقدم بالجديد ولا القديم

عندنا واحدة زميلتنا قدمت معاي السنة القبلوني فيها
وهي رغم انها مولودة في بريطانيا وعاشت في امريكا(يعني ما عندها مشكلة في اللغة الانجليزية)
ولكن لما قدمت قدمت ماجستير علوم سياسية وهي عندها بكلاريوس لغة فرنسية من جامعة الخرطوم
لذلك للاسف ما شالوها... ########ت عليها الفرصة
التقديم في نفس مجال تخصصك او لي شئ عنده علاقك بتخصصك مهم جدا وعنصر مهم

الاخ مجاهد
Hoand#351; geldin

Quote: çok tesekkür ederim çok yardimci siniz

Ricand#257; ederim



الاخ من وين في تركيا
درست فيها؟؟؟
ولا لحدي الان ما زالت طالب

ميادة .. مسكاقنا

ما بفهم شعر ولا بحبه

باااالغتِ طبعا .. في زول ما بحب الشعر .. أورين كبوروسكو ههههههه

Quote: الاخ من وين في تركيا درست فيها؟؟؟ ولا لحدي الان ما زالت طالب

بسم الله الرحمن الرحيم

تعودُ بي الذكرى للعام 1989م / 21 مايو - أشكر أولاد العطايا لا أذكر أين د. نادر عباس أو د. العبيد .. كان يحدوني الأمل أن أدرس الطب وكان أمامي خياران .. أولهما سوريا والثانِ تركيا - وأشكر أخي عزالدين محمد (دجُّور هذا لقبه) الذي كان يدرس آنذاك – 1989م - علوم إدارية في جامعة الخرطوم .. فقد عرفني بالشباب في حلة كوكو .. وهم بحقّ أولاد قبايل وما قصرو ورتبوا لي لحين وصلت لهم في ظروف استغربوا لها هههه فقد كان موقعهم بعيداً في تركيا وفي حتة زي جبل أولياء من الخرطوم فكانت حيرتهم بالغة خاصة وأني لم أكن أفهم التكتِّح في اللغة التركية "هسي برضو ما كدة طبعا" مع طولة المدة وقلة ال Pratik (الممارسة)- فأرسل لي د. نادر عباس قبول لغة تركية كنا آنذاك نسافر به - قمت بترجمته وتوثيقه بمعرفتي بما أني أفهم فحواه وذهبت به لشؤون الطلاب جوار القيادة العامة وأعطوني به تأشيرة خروج (ولا أنس حيرة الضابط في بيت الطلاب من ترجمتي لشي بالتركي) - حيث طلبوا مني فقط ترجمة فحواه بدعوى أنه قد يكون شي تاني ما ليهو علاقة بالدراسة (أعتقد أن نادر قد انتهى من زمن من دراساته العليا في الطب) شأنه شأن كثر منهم د. نادر الأخضر - يعمل جرّاح قلب في المستشفى الدولي بجدة - ومنهم عبدالله سعيد المتزوج من تركيّة من قونيا (بلد المولانات) وهو طبيب يعمل بإزمير حالياً بعد أن حصل على الجنسية التركية شهر يولية من العام المنصرم 2012م.

درست ال Tomer (سنة اللغة التركية أو ال Hazirlik) في إزمير بجامعة إيجة .. لا أنسَ ما حييْت نفراً جميلاً كريماً كنت معهم آنذاك من CESITLI ULKELER (أمم مختلفة) - لا أنس من التممت بشملهم لاحقاً ولله الحمد والشكر – ومن هؤلاء نادر الأخضر وعبدالله سعيد ومحمد مبارك (هؤلاء من قدامى لاعبي تركيا) إن لم تخني الذاكرة فقد ولجوا تركيا من العام 1984م – 1986م - لا أنس وليد نصار وسمير حمد "لم ألتقيهم منذ العام 1990م" - ولا أنس نفر كثير - أمير عبدالرسول - وممن لاقيت منهم بعد عقدين ونيف د. نادر وصحبه الكرام والبركة في مكة التي قابلت فيها د. محمد مبارك (وهو جاري هنا) وهو أقدمهم في اختراق الديار التركية .. لا أنس إيهاب محمد خوجلي صالحين - لم ألتق بإيهاب إلا في الفيس بوك ووالده الأستاذ محمد خوجلي صالحين (رحمه الله رحمة واسعة) غنيٌّ عن التعريف ..

لتركيا ذكرى خاصة هنا في القلب ولكل من صادفت عميم محبة - لأستاذي في التركية - بروف فكرت تُركمان وزوجته النبيلة فيدان هانم التي كانت تدرسني القرامر على أصوله - لأستاذ حياتي حق ال Dinlema Anlama (القراية الصامتة) خالص إعزاز والذي كان يصاحبني ويتركني أرافقه في مشياته وزياراته ل جشما Cesma وهي مصيف ترى منه الجزر المتنازع عليها بين تركيا واليونان (هسي يمكن وقفوا الشكل عليها لا أدري) - حيث كان يراقب فيللا لأساتذة الجامعات مقدمة من حكومة البلاد لهم بالتقسيط .. لأستاذ صدقي (حق الديكتا dikte من dictation (الإملاء) جميل عرفان .. كنت ثالث دفعتي ضمن 80 فرداً من جنسيات مختلفة وكنت أول العرب في التركية حيث لم يكن أمامي غير انجليزي من جنوب أفريقيا و تركية متربية في بلغاريا - أذكر أن فرانسيس (الجنوب الأفريقي) كانت درجته 80 وبلجين Belgin درجتها 78 (وكانت تركية الأب والأم مقبولة صيدلة لكنها لم تكن تجيد التركية لنشأتها ودراستها في بلغاريا التي كانت عائدة منها هي والأسرة) وكانت درجتي 77 وذلك في الكورس المركزي (التالت) وهو ال Orta Türkçe.. لا لا لم أنس التركية والحمدلله وقد يكون للغة أهلي ومحسيتي ودنقلاويتي القدح المعلّى في ذلك فأنا أعجمي وعربي مولود في شندي.. لكني أرجع كل الأمر أولاً و آخراً إلى ظروف نشأة وتوفيق من رب العالمين..

لا أنس ما حييت إيجة جامعةً وبحراً في (إزمير) - فقد علمتني كيف أكتب ما يمكن تسميته شعراً - عانيت بعد أن فارقتها - فقد عبرت من خلالها إلى بلاد أجمل .. لكن لتركيا عبق وأي عبق وذكرى دونها كل جنان الدنيا..

أرجو من المولى تيسير زيارتها لي في القريب إن شاء الله..

ميادة تحياتى

رسالة من ابن اختى

Quote: انا خريج هندسة ميكانيكية بتقدير جيد معدل تراكمي 6.10/10 فتحت الموقع لكن في مشكلة في كلمة السر لما اكترها ما بتتفعل و ما بنتقل للخطوة البعدها ...

هل فى رابط تانى

مع الشكر

Quote: هل فى رابط تانى

مرحب بيك اختي مواهب ادريس

الصفحة ما بتمشي ليه لي قدام لانو قد ما يكون فاتحها بي واحدة من البرامج التحت هذه
فهي تحتاج يا موزيلا فيرفوكس او اكسبلور 8 او قوقل كرومي
كما في الاقتباس ادنها

Quote: Türkiye Scholarships Online Application System is compatible with Mozilla Firefox, Internet Explorer 8 or above, Google Chrome 6 or above, and Safari 5 or above.

بالتوفيق
وتحياتي

شكرا ليك يا ميادة موضوع مفيد جدا


وبالتوفيق للجميع



هل توجد منح للتخصصات الطبية

Quote: هل توجد منح للتخصصات الطبية

المنحة تحتوى على كل التخصصات وفي اعرق الجامعات والبعض حتى في الجامعات الخاصة يتم قبولهم
وستجدها على شمال الصفحة تختار السهم كاتبين ليك اسماء المنح منحة شنو كده للعلوم الاجتماعية ومنحة شنو كده ................
وبعضها في شكل اعلان بالفلاش في وسط الصفحة اخي وليد
وبالتوفيق للجميع

ميادة مذيد من التوفيق فى الدراسة :

على حسب تجربتى للدراسة فى تركيا اعتقد الجامعتين التحت ديل هو رقم 1 فى تركيا دى كان فى 2007 هسى التصنيف نفسوا ولا تغير


metu
Hacettepe

------------------

الاتراك خلوا العنصرية وللا لسع

Quote: الاتراك خلوا العنصرية وللا لسع

لكن بالعكس خدومين جدا جدا
في المترو او الاتوبيس تسألهم عن اسم اي حتة ماشين ليها نحن مثلا / طوالي يخدموك
اول يوم مشيت الجامعة/ مساحتها كبيرة جدا جدا
ما عرفت ابدأ بي وين- وانا عايزة امشي الدراسات العليا عشان اطلع بطاقة الجامعة
سألت بتاع الحرس
بالله خلى موقعه ومشى وصلني للحتة الانا ماشاها- والمسافة ما شوية تصدق.
قلت في نفسي ديل شنو اللايوقين ديل
كمان ما قدر دا بيخدموا الزول
هههههههههه


لحدي الان ما لاقتني عنصريتهم دي
لكن شابكني محل ما امشي انتي أفغانية ؟ يقولوها ليك بي لغتهم ( أفغانلي سن ؟ )
برد ليهم (هيير بن سودانليم)
يقولو لي أووو (أومر البشير)
بقول ليهم أفيييييييييييييت



إنت في اي جامعة قريت يا امير جابر ؟

شكرا يامياده

مجهود جميل ربنا يجعلوا في ميزان حسناتك

سؤالي
النتيجه بتطلع شهر كم
ولو الزول اخدوه بيسافر بعد كم من التقديم




ودمتي بخير

في ميزان حسناتك الاخت مياده
ونسأل الله لك وللجميع التوفيق

Quote: النتيجه بتطلع شهر كم

اخ عبد الله نتيجتنا نحن السنة الفاتت اول قبول جانا خلال شهرين من التقديم
يعني مثلنا قدمنا شهر 5 النتيجة ظهرت اول شهر 7
وبعد ما يصلك الرد بالقبول في الجامعة الفلانية
تبدا مرحلة توثيق الشهادات الجامعية والقمسوين الطبي وترجمتها للغة التركية
واجراءات التقديم للفيزا في السفارة
وفي لجنة من تركيا بتقابلها في سفارة تركيا في البلد الانت فيها(يعني زي معاينة كده)
ودي ممكن هم يحددو يشيلوك ولا ما يشيلوك
فلو شالوك بتنتظر لحدي ما يرسلو ليك التذكرة بتاعة الطيارة
وفي الاسبوع الاول من شهر 10 نحن كنا سافرنا تركيا
وفي اليوم التالي على طول بدأنا دراسة اللغة
يعني العملية كلها تقريبا بتاخد 4 شهور

ومشكلة الترجم دي حاجة تانية براها
عندهم شخص واااااااااااااااحد في السودان دا كله معتمد في الترجمة الشهادات
وهو دكتور في جامعة الخرطوم
الطلاب المقبولين كلهم بيترجمو عنده- ولك ان تتخيل حكاية امشي وتعال امشي وتعال دي

ارجو التنبيه انو اخر يوم للتقديم يوم 31 مارس الجاري