Post: #1 Title: خاف الله يا على قاقرين ..... Author: وليد عبد اللطيف Date: 03-01-2013, 10:44 AM Parent: #0
الناس ليها حق تشكك بان ليس لتا كان عصر دهبي في كرة القدم زمان من اعجابي بعلي قاقرين كنت بقول مفروض كان يكون وزير شباب ورياضة ودا حسب مؤهلاته الكروية و التعليمية ولكن يظهر اني كنت غلطان واليوم اعترف بذلك ... ماقادر اعرف ليه الناس دائما تتخلى عن القيم والمثل عشان شنو يعني او تجامل من اجل مصلحه معينة ليه امس في تحليل مباراه الهلال والنيل قال على قاقرين بان تراوري افضل من سادمبا على الاقل يلعب برجلية الاثنان يمين ويسار وهذه ميزه تفضله عن سادمبا وعايز اقدم له هدية بسيطه توضح بان سادمبا قناص ويضرب ويقتل ويقهر برجليه اليمين واليسار اذا عايز يكسر تلج لادارة الهلال او عايز يكسر تلج او يترجم للمدرب دا شيء تاني دي مشكلة كورتنا ياجماعة كلها مجاملة واشياء اخرى لذلك دائما الناس توصف هذا الوسط الرياضي باشياء تقشعر لها الابدان اي مدرب عايز ينتقد المدرب الاخر من اجل النقد فقط واي واحد بجي يقول كلام في التلفزيون من اجل المائة الف جنية اليومية لكن هو بقول في شنو وماعارف كلامه دا ممكن يوثر قدر شنو .في منظومة وخارطة كرة القدم بالسودان .. ... http://www.youtube.com/watch?feature=player_d...andv=V2v1UvuGseg#t=29s وهذه هدية لكل انسان معجب بعلي قاقرين مثلي وممكن يصدق كلامه دا هدف به كل قوانين الفيزيا ء والرجل اليسرى يا ساااااااااااااااده . . تعريجة ... ترررررررررررررراوري كماااااااان ما ساهل بس للان لم تظهر الرؤية مكتمله طبعا الحكم الاخير عندما يدخل المحكات والاختبارات الكبيره مثل لقاء هلال مريخ او البطولات الخارجية
Post: #2 Title: Re: خاف الله يا على قاقرين ..... Author: طارق حرسي Date: 03-01-2013, 02:09 PM Parent: #1
الحبيب وليد
لو قاقرين بتكلم عن الهدفين ( الساهلااااااااااات ) الاحرزهم تراوري في مرمي النيل الحصاحيصا بالجد يكون بالغ ..( باعتباره لاعب كورة كبير )
اذا تحدثنا عن الهدفين الهدف الاول .. كورة مررها تراوري بين المدافعين ودفرها دفر وكانت (بطيئة ) في طريقها للحارس (محمد كمال) الذي لم يحسن في استلامها وولجت شباكه خطأ كبير من الحارس ( الضعيف ) محمد كمال الهدف الثاني اللاعب في وضع مريح جداً ( وفي خط مافي ) واي شخص لو كان في مكانه ولا علاقة له بكرة القدم في امكانه ان يحرز هدف ..حتي ولو كان عميان ..
لماذا لم يعلق قاقرين عن الانفراد والمرمي فاااااااااااااضي وتراوري ده وضع الكورة وين
الهدفين اكثر من عادية ...ولا تحتاج لكل هذه الضجة
Post: #3 Title: Re: خاف الله يا على قاقرين ..... Author: وليد عبد اللطيف Date: 03-02-2013, 08:02 AM Parent: #2
طارق .. ياحبيب ماعارف ليه الناس بقت ما صادقة في اي حاجه
Quote: لماذا لم يعلق قاقرين عن الانفراد والمرمي فاااااااااااااضي وتراوري ده وضع الكورة وين
الهدفين اكثر من عادية ...ولا تحتاج لكل هذه الضجة
و الله دي ياطتارق بتحصل مع اعظم لاعبي كرة القدم حتى من ضمنهم الكابتن الرمح الملتهب ( على قاقرين ) بس انا ما عارف السبب شنو عايز يطلع تراوري افضل من سادمبا وقال شنو بشوت برجوله الاثنان يمين يسار هسه تراوري دا للان لم يواجه اختبارات بحق وحقيقة وان شاء الله ينجح ...
Post: #4 Title: Re: خاف الله يا على قاقرين ..... Author: عمر الفاروق Date: 03-02-2013, 08:14 AM
وليد يا حبوب..
على قاقرين ده قبل يومين انا والصديق الناقد الفني الرياضي الاخر حميدة كنا بنتكلم عنو .. انا طبعاً من زمااان عندي فيهو رأي ..وعلى حسب الشوفتو ليهو من مباريات في التلفزيون فهو لاعب عااادي مهارياً ولا يدخل في باب اساطير كرة القدم السودانية .. على قاقرين ورّط نفسو ومسح الصورة الجميلة الكانت مطبوعة في أذهان الناس ايام كان سفير ودبلوماسي بظهوره الكثيييير في الفترة الاخيرة بي سبب وبدون سبب.. بقا ناقد رياضي..ومحلل..وإداري رياضي و.. وو .. وووو.. وياااريتو لو بيتكلم كلام علمي وعقلاني!!!! طلع زول للاسف كييسو فاضي فيما يتعلق بتحليل كرة القدم وكل نظرياته فاشلة وما بيعرف يتكلم !! على قاقرين واحد من الاسماء اللي حاربت هيثم مصطفى وتسببت في ابعاده من النادي .. على قاقرين كل حديثه وتحليله في مباراة النيل كان من شاكلة كنت بتكلم مع المدرب الصباح..المدربقال لي العصر..ضربت تلفون للمدرب واتناقشنا في مستوى فلان وطريقة اللعب الفلانية ..
بالنسبة لي سادومبا وتراوري..فيكفي هذا القاقرين ان يشاهد هدف سادومبا في الفريق النيجيري انييمبا لما المطرة صابة والارض مبلولة وبعد داك يجي يفتي.. تراوري لاعب واضح إنو اناي جداً ومخو بيقفل لمن يكون منفرد وما بيعرف يتصرف..وبي لغة كرة القدم البسيييطة ما عندو توافق ذهني عضلي..ودي حاجة كانت عند سادومبا ..والدليل قون سادومبا في المريخ..
Post: #5 Title: Re: خاف الله يا على قاقرين ..... Author: وليد محمد المبارك Date: 03-02-2013, 08:22 AM Parent: #4
وبصراح ان كان هنالك فقد للهلال فهو سادومبا .. لا هيثم ولا علاء الدين وذلك قياسا على المشاركات في العام الماضي
لكن يظل تراوري لاعب جديد لا يمكن الحكم عليه من خلال مباراتين .. سلبا ولا ايجابا
Post: #6 Title: Re: خاف الله يا على قاقرين ..... Author: Abureesh Date: 03-02-2013, 08:59 AM Parent: #5
أتارى الدكتاتوريـة وتكميم الأفواه وكبت الاراء ليست حكـرا على السياسيين..
أختلفت معـه فى تقييمـه للاعب معين، فهل، جزاك الله خيـرا، تحصـر الموضوع فى طرح رأيك أنت فى ذلك اللاعب؟ وتكونا أنت وقاقرين متساويان فى الحقوق فيما يخص إبداء الاراء، وتعطيا الفرصـة للشعب (المغلوب على أمره) ليأخذ راى أحدكما ؟!!
الى متى يضيق الســـودانيون بالرأى المخالف لهم؟
Post: #7 Title: Re: خاف الله يا على قاقرين ..... Author: Yassir Tayfour Date: 03-02-2013, 09:45 AM Parent: #6
أبو الريش دي كورة بالله شوف السياسة وين! ___ أنت بتعرف سادومبا وتراوري؟
Post: #8 Title: Re: خاف الله يا على قاقرين ..... Author: وليد عبد اللطيف Date: 03-02-2013, 10:13 AM Parent: #7
Quote: أتارى الدكتاتوريـة وتكميم الأفواه وكبت الاراء ليست حكـرا على السياسيين..
أختلفت معـه فى تقييمـه للاعب معين، فهل، جزاك الله خيـرا، تحصـر الموضوع فى طرح رأيك أنت فى ذلك اللاعب؟ وتكونا أنت وقاقرين متساويان فى الحقوق فيما يخص إبداء الاراء، وتعطيا الفرصـة للشعب (المغلوب على أمره) ليأخذ راى أحدكما ؟!!
الى متى يضيق الســـودانيون بالرأى المخالف لهم؟
بسسسسسسسسسسم الله الرحمن الرحيم يظهر انت دخلت غلط في المكان الغلط يا ابو الريش اكيد قاصد بمداخلتك دي مكان تاني ثم ثانيا انا بتكلم في مضوع ممكن تقيم شخص له يومين في مكان بشخص له كثير من السنوات وعشان اقربها ليك سياسيا ما ممكن تقيم انسان في وزارة له يوم بانسان له عشرات السنوات في وزارة وحقق انجازات يا ريت يكون وقع ليك كلامي اها انت رايك شنو في كلام قاقرين وفي هضم مجهود شخص قدم ما قدم للهلال ... ماعايز اقول ليك نفس كلام ياسر طيفور ولكن برضو سعدنا بمروك هنا في النهاية لو متابع الرياضة هنا قبل كم يوم انا كتبت لي الشرف باللعب في يوم من الايام مع الدحيش وقاقرين ... اها عشان مخك مايمشي بعيد قاقرين يعتبر استاذنا ومعلمنا وعلامة كبيره في خارطة الرياضة في السودان وكمان ياحبيبي الرياضة لاتخلو من السياسة اذا ماعارف اعرف بدليل عاملين ليها وزارة عديييييييل كدا .. ابو الريش خليك قريب ياطيب
Post: #9 Title: Re: خاف الله يا على قاقرين ..... Author: جمال ود القوز Date: 03-02-2013, 10:20 AM Parent: #8
مافي مقارنة أصلاً .. فاب راسين مهاجم متفرد .....
Post: #10 Title: Re: خاف الله يا على قاقرين ..... Author: Elhadi Date: 03-02-2013, 10:28 AM Parent: #9
سادومبا انتهى، وأصلاً ما كنت شايفو عندو حاجة زول بتاع جري ساي
اللعاب هو " إبراهيما سانيه" ده وأفضل من سادومبا بألف ألف مرة..
وأخشى ما أخشاه أن يسجل المريخ سادومبا ويتكوك بيهو
Post: #11 Title: Re: خاف الله يا على قاقرين ..... Author: الحاج حمد الحاج Date: 03-02-2013, 11:13 AM Parent: #10
Quote: وبصراح ان كان هنالك فقد للهلال فهو سادومبا .. لا هيثم ولا علاء الدين وذلك قياسا على المشاركات في العام الماضي
لكن يظل تراوري لاعب جديد لا يمكن الحكم عليه من خلال مباراتين .. سلبا ولا ايجابا
اخدوا كلام كابتن وليد محمد المبارك دا و قرطوا علي كده.
Post: #12 Title: Re: خاف الله يا على قاقرين ..... Author: طارق حرسي Date: 03-02-2013, 12:03 PM Parent: #11
( لو كان فيهو خير ما كان رماه الطير )
قاقرين ده ما يعمل للاعب ده قومه وقعده ساي لاعب امكانياته المهارية عادية ولا يوجد ما يميزه عن غيره من المهاجمين الذين سبقوه ( فليكس سونزو وافياني واخيراً اوتوبنج )
اللاعب تراروري ..انضم لفريق الافريقي التونسي في عام 2008م قادماً من نادي باماكو المالي وتمت اعارته الي فريق النصر الليبي في يناير 2011م ثم انتقل الي الاسماعيلي المصري وتم فسخ عقده .. واخيرا ...جاء الي الهلال ...
ومن خلال مسيرته الكروية من عام 2008م مع الافريقي التونسي والي هذه اللحظة .. يمتلك هذا التراوري في رصيده
عدد 15 هدف فقط لا غير .. يعني من 2008م والي 2013/3/2م عدد ( 15) هدف فقط . من افريقية ومحلية وودية واول اهدافه كانت مع ناديه الافريقي التونسي في 2009/9/26 م تفاصيلها كلاتي : ـ 6 اهداف في الدوري التونسي ( دوري الرابطة التونسية المحترفة ) .. 2 هدفين في بطولة الكاس بتونس 2 هدفين في دوري ابطال افريقيا مع الافريقي التونسي 1 هدف واحد في مبارة ودية مع الوحدة الاماراتي .. 2 هدفين في مرمي فريق مريخ الفاشر 2 هدفين في مرمي فريق النيل الحصاحيصا ..
اول هدف احرزه مع الافريقي التونسي في 2009/9/26 وآخر هدف احرزه مع الهلال السوداني في 2013/2/28
ياخي قاقرين ده ما يخمنا ساااااااااي كده
قال تراوري قال
قاقرين ده ما شاف الكلام ده وللا شنو
Post: #13 Title: Re: خاف الله يا على قاقرين ..... Author: وليد عبد اللطيف Date: 03-03-2013, 07:23 AM Parent: #4
Quote: على قاقرين ورّط نفسو ومسح الصورة الجميلة الكانت مطبوعة في أذهان الناس ايام كان سفير ودبلوماسي بظهوره الكثيييير في الفترة الاخيرة بي سبب وبدون سبب.. بقا ناقد رياضي..ومحلل..وإداري رياضي و.. وو .. وووو.. وياااريتو لو بيتكلم كلام علمي وعقلاني!!!!
والله شيء يحير ما عارف بقدم تنازلات بطريقة غريبة عشان يجامل وما عارف دي بتخصم من اسهمه ومن معجبيه سمعت قالوا عملوهو مترجم للمدرب غاريزتو ..
Quote: على قاقرين واحد من الاسماء اللي حاربت هيثم مصطفى وتسببت في ابعاده من النادي ..
والله ماليهو حق اذا حارب لو لم يحارب اهو هيثم مشى وهل يوجد انسان يقدر يستطيع ان يمسح تاريخ هيثم ويقول انه ليس اكثر لاعب لعب لفريق الهلال
Post: #14 Title: Re: خاف الله يا على قاقرين ..... Author: Ammar Makki Date: 03-03-2013, 07:52 AM Parent: #13
Quote: طبعاً من زمااان عندي فيهو رأي ..وعلى حسب الشوفتو ليهو من مباريات في التلفزيون فهو لاعب عااادي مهارياً ولا يدخل في باب اساطير كرة القدم السودانية ..
سبحان الله
Post: #15 Title: Re: خاف الله يا على قاقرين ..... Author: نافع الكوماوي Date: 03-03-2013, 10:42 AM Parent: #14
Quote: سادومبا انتهى، وأصلاً ما كنت شايفو عندو حاجة زول بتاع جري ساي
الزول دا لحدّ مامشى كان هداف الهلال داخلياً وخارجياً
Post: #16 Title: Re: خاف الله يا على قاقرين ..... Author: الحاج حمد الحاج Date: 03-03-2013, 01:23 PM Parent: #15
Quote: سمعت قالوا عملوهو مترجم للمدرب غاريزتو ..
يا ولي ما اظن علي قاقارين يقبل بالعمل كمترجم فهو وصل درجة سفير في وزارة الخارجية و العمل كمترجم وظيفة غير مناسبة معه و علي قاقارين يمكن الاستفادة منه اداريا في مجلس الهلال أو كمستشار للمجلس فهو صاحب خبرة ادارية و له علاقات واسعة يمكن الاستفادة منها.
Post: #17 Title: Re: خاف الله يا على قاقرين ..... Author: وليد عبد اللطيف Date: 03-03-2013, 02:44 PM Parent: #16
كابتن وليد الشفت ...
Quote: وبصراح ان كان هنالك فقد للهلال فهو سادومبا .. لا هيثم ولا علاء الدين وذلك قياسا على المشاركات في العام الماضي
لكن يظل تراوري لاعب جديد لا يمكن الحكم عليه من خلال مباراتين .. سلبا ولا ايجابا
لقد اصبت القول ياصديق سادمبا راجل قناص وسريع ولكن برضو ممكن نقول هذا اللاعب اخد فرصتة بالكامل ولا بد من البديل عشان الجديد شديد ول هدافعية اكبر وان شاء الله تراوري دا ينجح ويستفيد منه الهلال وكله يصب في مصلحة الرياضة السودانية
