Post: #1
Title: الوأدي الأخضر لا لا يا أبوي لا
Author: Osman Musa
Date: 02-25-2013, 02:43 PM
Parent: #0
يا أبوي !
أنا تعبان أناهد الليل كلو في تاكسي ما نهاتن . عشان
تقوم تقول لي أحفظ مالك في الوأدي الأخضر .
الوأدي الأقشر لا .
ويوم الجمعة يا أبوي بديك مكالمة طويلة التيلة . وعليك الله رجع الكنجالات من السمسار .
...
يا جماعة جد دي مكالمة زول مهاجر مسجلة
تعالوا شوفوا عمر المهاجر وقروشو بتروح كيف .
|
Post: #2
Title: Re: الوأدي الأخضر لا لا يا أبوي لا
Author: فرحات عباس
Date: 02-25-2013, 03:35 PM
Parent: #1
إن شاء الله داير تحفظ مالك وين في السودان .. في بنك الخرطوم
ولا عندك 400 مليون عشان تشتري في الفيحاء .. عندك 250 مليون بتلقى في الحلفايا عندك 200 بنلقى ليك في سوبا ، عندك 17 حبة بتلقى قطعة حيازة في حطاب ، عد بابكر بقت ما فيها طريقة ... الوادي الأخضر احسن ليك درجة أولى بـ 45 حبة وثانية 35 .
ملحوظة : الاسعار دي قبل شهر بالتمام .. الرجاء مراعاة فروق الأيام ...
|
Post: #3
Title: Re: الوأدي الأخضر لا لا يا أبوي لا
Author: Osman Musa
Date: 02-26-2013, 04:53 AM
Parent: #2
عزيزنا فرحات
سلامات
حبة وحطاب ؟
هو ما ده الجنن زولنا زاتو .
الزول يا فرحات أتنشل نشلة عجيبة .
..
تعال شوف الحصلو
|
Post: #4
Title: Re: الوأدي الأخضر لا لا يا أبوي لا
Author: فرحات عباس
Date: 02-26-2013, 06:59 AM
Parent: #3
عثمان أخوي كيفنك ... هو ما بجنن في البلد دي شنو
أنا نزلت السودان أجازة [ لسة جاي لي شهر ] وصلت كاس الزبادة كان بأربعة جنيه .. وأنا مسافر بقى بـسبعة جنيه ... وأنا ماري في حلة كوكو جنب القضائية في جماعة عاملين ليهم دلالة عربات كيري كدة .. واحد موقف ليهو عربية كوريلا موديل 81 تخيل قال عاير فيها50 مليون لما ضحكت قال لي : أحسن من تشتري ليك ركشة بـ 29 مليون ، البنزين مدعوم [ لاحظ كلمة مدعوم ] بـ 13 جنيه للجالون
المواصلات [ جر الشريط لي ورا 20 سنة ] لوفاكر أزمة الثمانينات .. أكعب منها ... الأمن متردي .. عصابات أشكال وألوان ، حتى في الأقاليم الثورات المسلحة البتفاوضو معاها ليل نهار ما قتلت ليها في يومين 600 نفس .. لكن قبايل متشاكلة في الذهب في دارفور قرضت أكثر من العدد دا كتير في يومين ... المواطن بسب للحكومة وللمعارضة ، المعارضة بتلعن الحكومة والشعب.
وفي المساءات الرايقة تطلع عربات في السعودية ما شفناها، ويتواصل بناءالعمارات السوامق أم كاميرات بره ، ويتواصل شراء الأراضي باهظة الثمن .. أنا ما عارف الناس دي لما هي استثماراتا برة السودان ، وبيوتا برة السودان ، وأولادها في جامعات برة السودان وحساباتا البنكية برة السودان دايرين من السودان شنو..
هو فساد القرى يا ابو عفان .. [ وما من قرية إلا نحن مهلكوها قبل يوم القيامة أو معذبوها
|
Post: #5
Title: Re: الوأدي الأخضر لا لا يا أبوي لا
Author: د. ياسر عبد القادر
Date: 02-26-2013, 07:33 AM
Parent: #4
سلامات
مانهاتن دي كان إشتغلت فيها 48 ساعة في اليوم...قطعة أرض في المكابراب شرق ما بتلقاها
يا زول شوف ليك جروف في فرجينيا دي ...إن شاء الله تزرعها لوبا عفن
|
Post: #17
Title: Re: الوأدي الأخضر لا لا يا أبوي لا
Author: Osman Musa
Date: 02-27-2013, 01:34 AM
Parent: #5
ياسر سلامات
يا ياسر ياخ الحاجة المحزنة زولنا المهاجر المسكين
قروشو أتلطشت بين سمسار الأراضي والمحامي والوسيط .
في المكالمة قالوليهو :
القطعة طلعت مبيوعة ثم مبيوعة ثم مبيوعة !
قام قاليهم : ثم من ؟؟؟؟؟؟؟
...
يا ياسر ده لبع علي الطريقة الوليفية .. شايف ؟
|
Post: #29
Title: Re: الوأدي الأخضر لا لا يا أبوي لا
Author: رانيه محمد الشيخ
Date: 02-28-2013, 10:57 AM
Parent: #5
دكتور ياسر
غايتو قتلتنى بالضحك من ردك
هههههههههههههههههههههههههههههههههههه
انا مستغربه فى التسميه حقت الوادى الاخضر وهو صفقه سااااااااااااااى بالغلط مافيه
كان اشتريت كيتكات بقريشاتك دى تفيد بيها بطنك اخير من الخضار القاحط داك
|
Post: #10
Title: Re: الوأدي الأخضر لا لا يا أبوي لا
Author: عبد الله فقير
Date: 02-26-2013, 12:20 PM
Parent: #4
Quote: فرحات عباس
عثمان أخوي كيفنك ... هو ما بجنن في البلد دي شنو
أنا نزلت السودان أجازة [ لسة جاي لي شهر ] وصلت كاس الزبادة كان بأربعة جنيه .. وأنا مسافر بقى بـسبعة جنيه ... وأنا ماري في حلة كوكو جنب القضائية في جماعة عاملين ليهم دلالة عربات كيري كدة .. واحد موقف ليهو عربية كوريلا موديل 81 تخيل قال عاير فيها50 مليون لما ضحكت قال لي : أحسن من تشتري ليك ركشة بـ 29 مليون ، البنزين مدعوم [ لاحظ كلمة مدعوم ] بـ 13 جنيه للجالون
المواصلات [ جر الشريط لي ورا 20 سنة ] لوفاكر أزمة الثمانينات .. أكعب منها ... الأمن متردي .. عصابات أشكال وألوان ، حتى في الأقاليم الثورات المسلحة البتفاوضو معاها ليل نهار ما قتلت ليها في يومين 600 نفس .. لكن قبايل متشاكلة في الذهب في دارفور قرضت أكثر من العدد دا كتير في يومين ... المواطن بسب للحكومة وللمعارضة ، المعارضة بتلعن الحكومة والشعب.
وفي المساءات الرايقة تطلع عربات في السعودية ما شفناها، ويتواصل بناءالعمارات السوامق أم كاميرات بره ، ويتواصل شراء الأراضي باهظة الثمن .. أنا ما عارف الناس دي لما هي استثماراتا برة السودان ، وبيوتا برة السودان ، وأولادها في جامعات برة السودان وحساباتا البنكية برة السودان دايرين من السودان شنو..
هو فساد القرى يا ابو عفان .. [ وما من قرية إلا نحن مهلكوها قبل يوم القيامة أو معذبوها |
انا لله
والله الواحد نفسو اتقفلت مرة واحدة
عباس وعثمان سلامات
|
Post: #6
Title: Re: الوأدي الأخضر لا لا يا أبوي لا
Author: walid taha
Date: 02-26-2013, 09:13 AM
Parent: #1
كيف الكلام ده!!!!!!!!!!!!!!!!!!!!!!
|
Post: #7
Title: Re: الوأدي الأخضر لا لا يا أبوي لا
Author: Mohamed E. Seliaman
Date: 02-26-2013, 09:42 AM
Parent: #6
والله دا بوست عجيب جدا
|
Post: #8
Title: Re: الوأدي الأخضر لا لا يا أبوي لا
Author: المسافر
Date: 02-26-2013, 09:50 AM
Parent: #7
Quote:
.. أنا ما عارف الناس دي لما هي استثماراتا برة السودان ، وبيوتا برة السودان ، وأولادها في جامعات برة السودان وحساباتا البنكية برة السودان دايرين من السودان شنو..
|
قالوا سمعوا بوبي يغني
قال : دا الجنني
|
Post: #9
Title: Re: الوأدي الأخضر لا لا يا أبوي لا
Author: أيمن محمود
Date: 02-26-2013, 10:01 AM
Parent: #8
سلام يا عثمان
الاستثمار في الاراضي الرخيصة - ادى من الاستثمار في الاراضي الغالية ،،،
واحد مجرب اراضي رخيصة ومتوسطة !!
|
Post: #11
Title: Re: الوأدي الأخضر لا لا يا أبوي لا
Author: ياسر السر
Date: 02-26-2013, 12:38 PM
Parent: #9
اخونا عثمان ياخ تعال العيلفون وبتلقى في حدود 75 او 80 حبة ذي ما قال اخونا فرحات ومضمونة ومقننه وما فيها اي قولان ..
بس يا عباس ممكن توريني حطاب دي وين ؟؟ ولو بنلقى فيها حاجة جاهوة هسسسسة نحول القروش ..
تحياتي : ياسر العيلفون ...........
|
Post: #12
Title: Re: الوأدي الأخضر لا لا يا أبوي لا
Author: محمد عبد الله الامين
Date: 02-26-2013, 12:58 PM
Parent: #11
يا جماعة في مكان اسمو البادوقة 15 -25 حبه ... أم درمان بعد كبري الحلفاية
والسماسرة بمدحو فيهو
بس من اسي " حيازة " مافي شهادة بحث
المعلومات دي 1/2012
|
Post: #13
Title: Re: الوأدي الأخضر لا لا يا أبوي لا
Author: الحاج حمد الحاج
Date: 02-26-2013, 01:23 PM
Parent: #12
Quote: يا جماعة في مكان اسمو البادوقة 15 -25 حبه ... أم درمان بعد كبري الحلفاية
والسماسرة بمدحو فيهو
|
ناس الخرطوم ماشين جنوب و وصلوا الجزيرة و ناس ام درمان ماشين شمال وصلوا البادوقة و بعد شوية اذا استمر الاتجاه شمالا ح تتشال الدال دي و تبقى الباوقة.
| Quote: بس من اسي " حيازة " مافي شهادة بحث |
ما دي الجهجهة من اسي !!
|
Post: #14
Title: Re: الوأدي الأخضر لا لا يا أبوي لا
Author: محمد حيدر المشرف
Date: 02-26-2013, 02:31 PM
Parent: #13
| Quote: أنا نزلت السودان أجازة [ لسة جاي لي شهر ] وصلت كاس الزبادة كان بأربعة جنيه .. وأنا مسافر بقى بـسبعة جنيه .. |
فرحات يا صاحبى ..
الف حمد لله على السلامة ..
أهم حاجة فى اجازة السودان العودة من اجازتك سالما ..
صاحبى نزل اجازة جاتو ملاريا .. ادوهو كينين جاهو فشل كلوى حاد .. غسل كلاهو تلاتة مرات بى 450 الف (1/2 حبة تقريبا) .. ما استحمل قطع اجازتو وجانا فى الرمق الاخير ..
الزبادى يطير يا صديقى ..
حمدلا على سلامتك انت ..
|
Post: #15
Title: Re: الوأدي الأخضر لا لا يا أبوي لا
Author: Osman Musa
Date: 02-26-2013, 03:05 PM
Parent: #14
يا فرحات ياخ الزول المسكين ده هسع
لا عايز أخضر لا أحمر .
الزول عايز بس يرجع قروشو .
القروش التعب عليها تعب السنين . يافرحات ياخ زولنا 18 سنة تعبان كاشح بين جخانين المدينة الكبيرة
ليل نهار . أها تقوم القريشات دي تروح بين السمسار والحفار كدي ساكت ؟
|
Post: #16
Title: Re: الوأدي الأخضر لا لا يا أبوي لا
Author: جمال ود القوز
Date: 02-26-2013, 03:35 PM
Parent: #15
Quote: مانهاتن دي كان إشتغلت فيها 48 ساعة في اليوم...قطعة أرض في المكابراب شرق ما بتلقاها
يا زول شوف ليك جروف في فرجينيا دي ...إن شاء الله تزرعها لوبا عفن |
أسمعوا كلام الدكتور ده ياعثمان ....
بعدين أضعف الايمان ..
ممكن تزرع قطعة فرجينيا دي مارلبورو أو حتى كنت .. 
كامل تعاطفنا يازول ..
عارف الناس بقت عندنا ..
كان قبضت الكنجالات مابتفكها كلو كلو ..
بتفرتكـ وبس ..
القريشات يضربن الشقوق في خمسة دقايق ..
فالافضل ترضى بي قطعة الوادي الأخضر ..
لأنه الآن أصبح الاقبال عليهو ممتاز ..
وفيهو اماكن جابت أسعار جيدة ..
فالعاصمة اتملت ومافضل فيها حتة فاضية ..
إلا الأطراف البعيدة شديد ..
والحتات الفاضية وقريبة بقت ناااار عديل كده ..
ناس 300 مليون ..
وبالميت 250 مليون ..
أو حتى 200 مليون ..
ربنا يديكـ الفي مرادكـ وتسكن أحسن مكان يارب .....
|
Post: #18
Title: Re: الوأدي الأخضر لا لا يا أبوي لا
Author: خالد عبدالوهاب
Date: 02-27-2013, 04:43 AM
Parent: #14
Quote: فرحات يا صاحبى ..
الف حمد لله على السلامة ..
أهم حاجة فى اجازة السودان العودة من اجازتك سالما ..
صاحبى نزل اجازة جاتو ملاريا .. ادوهو كينين جاهو فشل كلوى حاد .. غسل كلاهو تلاتة مرات بى 450 الف (1/2 حبة تقريبا) .. ما استحمل قطع اجازتو وجانا فى الرمق الاخير ..
الزبادى يطير يا صديقى ..
حمدلا على سلامتك انت .. |
هههههه ضحكت والله ياود المشرف
ضحكت كثيرا رغم ان المقام مامقام ضحك فعذرا
يازول حمدالله على سلامة صاحبك بعد ده ... وياخي انعل ابوها دي اجازة ذاتو !!
سلامات ياعثمان موسى وضيوفه
بالله اوووعكم زول ينبز لينا الوادي الاخضر ...
آمالنا كلها انحصرت هناك ... فبالله عليكم نحن ماناقصين احباطات :)
|
Post: #19
Title: Re: الوأدي الأخضر لا لا يا أبوي لا
Author: Elhadi
Date: 02-27-2013, 05:43 AM
Parent: #18
سلام يا عثمان..
أنا ما عاوز أسبب احباط للبعض وخصوصا الناس الاشترت..
وأنا متأسف يا خالد عبد الوهاب.. لكن بقول ليكم الشفتو بعيوني ..
مشيت مع واحد صاحبي للوادي الأخضر ده .. والله صدقوا كلام محمد عبد المطلب القالوا وكتبوا ليكم زمان في هذا المنبر..
في الأول في حاجة كده اسمها مدينة الصحفيين.. بيوت مفرقة من بعض .. بيت هنا والتاني هنااااااااااااااااااك ..
وبعد ما تخلص ما يسمى بمدينة الصحفيين، بيلاقيك حاجز ترابي.. أها بعد الحاجز الترابي ده يتمدد ما يسمى بالوادي الأخضر..
واطة خلاء مد البصر، الصحراء الكبرى بس، تصعد الحاجز الترابي ده وتعاين يمينك شمالك ـ شرقك غربك ـ فوقك تحتك ، ما بتشوف أي حاجة، اللهم إلا أب فانوس..
الوقت كان زي مغربية كده، أنوار اضاءة تبدو وكأنها لعربات لكن من مسافة بعيدة جداً..
سألتا الزول المعاي انت الأنوار البعيدة ديك ممكن تكون شنو يعني ؟ قال والله ما عارف احتمال دوريات حرس الحدود الليبي 
وما في زاتو زول عارف محل واطاتو وين، ولا قطعتو بي وين على أرض الواقع، لأنو الواطة كلها هي عبارة عن خلاء فقط ..
صاحبي ده زاتو قاعد في السودان وعندو قطعة هناك.. قلتا ليهو أها أسي قطعتك دي يعني وين في الخلاء ده ؟؟ قال لي والله ما عارفها بي وين ، أنا عارفا في الورق بس..
الحاجة الفهمتها انهم مقسمين الخلاء ده على " الورق" لمربعات وباعوا للناس على الأساس ده..
وحركة البيع والشراء والسمسرة في الأراضي الهناك دي كلها قائمة على الورق بس.. ما في زول شايف ولا عارف قطعتو على أرض الواقع..
تشتري على الورق، وتبيع على الورق.. والسمسرة برضو بتحصل على الورق ده..
دي الحاجة الأنا شفتها، ما شفتا لي غنماية ساي حايمة بهناك في الوادي الأخضر ده، ولا حركة انس ولا جان، مع اني متأكد انو الخلاء داك بيكون مليان فل بالشياطين :)
|
Post: #21
Title: Re: الوأدي الأخضر لا لا يا أبوي لا
Author: خالد عبدالوهاب
Date: 02-27-2013, 06:01 AM
Parent: #19
الله يطمّنك آآآ لهادي :)
|
Post: #20
Title: Re: الوأدي الأخضر لا لا يا أبوي لا
Author: فرحات عباس
Date: 02-27-2013, 06:01 AM
Parent: #18
صاحب البيت سلام ..
أخونا حيدر .. والله جزاك الله خير .. وزي ما قلت الحمد لله على السلامة .. والله أنا طول أجازتي هناك كنت خايف من الملاريا .. والحمد لله طوال ستة أشهر أو تزيد رغم كثافة البعوض الواحد مرق سليم .. كنت يتناول كميات كبيرة من اللالوب .. صباحاً ومساء . .. لا أدرى ربماهنا يكمن السر ، لدرجة أني أنصح وبصوت عالي كل مغترب في أجازتو يتناول ما استطاع من اللالوب .. فهي شجرة مسبحة ثمارها رافلة بين أيدي الصالحين ..... وليذهب الزبادي إلى الجحيم ..
من يسأل عن حطاب .. هي قريبة من دردوق .. وعليها إقبال شديد .. أنا شخصياً بعت 500 متر بـ 10 مليون قبل أربعة شهور وكل يوم زيادة .. أنا بعتها لأنها حيازة ودايرا ليها زول قاعد في السودان .. وعندي 500 باقية تستحق المجازفة.
ولأنو عندي قطعة في الوادي الأخضر درجةثانية ناصية .. أدوني فيها 37 حبة وما بعتها ... قررت القيام بزيارة للوادي الأخضر .. باستثناء مربع Fعشرين وواحد وعشرين والمسكونة شعبياً .. فلا تكاد ترى شيئاً سوى الأفق .. الواطة خلا .. قاعاً صفصفا ... ولا شجرة مافي .. مشى معاي واحد بقول لي شايف الوادي دا .. شايف الصهريج داك .. قلتا ليهو يازول صهريج شنو ..
أظرف حاجة المرا قبل ما أمشي الرحلة العجيبة أدتني كاميرا ديجتال ماركة كانون قالت وهي تشيعنى لحدي الباب مفعمةبالأمل : صور ليناواطاتنا .. قلت ليها واطتك أصبحت
|
Post: #22
Title: Re: الوأدي الأخضر لا لا يا أبوي لا
Author: Osman Musa
Date: 02-27-2013, 02:22 PM
Parent: #20
عزيزنا عبدالله فقير
سلامات
غايتو يا عبدالله أعمل حسابك من السمسار الأسمو ( أبوضرعين )
السمسار ده ياهو هو الزول الضرب قريشات المهاجر المسكين .
يا عبدالله الزول ده ببيع ليك القطعة المبيوعة وبخليك شايل حبوب الجن في جيبك .
لو جبت ليك تسجيل مكالمة المهاجر البطالب بي ترجيع قروشو حيجيك دبريشن 36 يوم .
|
Post: #23
Title: Re: الوأدي الأخضر لا لا يا أبوي لا
Author: عبد الله فقير
Date: 02-27-2013, 08:17 PM
Parent: #22
Quote: uthor: Osman Musa
عزيزنا عبدالله فقير
سلامات
غايتو يا عبدالله أعمل حسابك من السمسار الأسمو ( أبوضرعين )
السمسار ده ياهو هو الزول الضرب قريشات المهاجر المسكين .
يا عبدالله الزول ده ببيع ليك القطعة المبيوعة وبخليك شايل حبوب الجن في جيبك .
لو جبت ليك تسجيل مكالمة المهاجر البطالب بي ترجيع قروشو حيجيك دبريشن 36 يوم . |
ياخ النبي فوقك كان تجيبا ياعثمان
ياخ انحنا ناقصين سماسرة الجن ديل
في الوادي اللخدر دة الحكومة ظااااااتا ماقصرت سمسرت فينا
كمان تاني جايب لينا سماسرة
يفتح الله يايوي
اسمع النكتة دى
واحد بلدياتنا لما فيهو سمسار ساقو عشان يبيع ليهو قطعة
وداهو ليك اااااخر الدنيا
في خلا لا فيهو انس ولا جان
وقف قال ليهو اهي القطعة هنا
زولنا اتخلع قال ليهو يازول قول كلام غير دة
قال ليهو لا لا القطعة هنا
السمسار حب يعدد لى زولنا ميزات القطعة
ما لقي ليهو ميزة كلو كلو
لا موية لا كهربا لا مواصلات لاجار
اداها صنة كدة وقال ليهو
بالله شوف الحتة دى هواها سمح كيف
زولنا عاين لي كدة وقال ليهو
يازول قوم لف هوا شنو انا عايز بيت ولا عايز اسوق مركب تقول لي هوا سمح
|
Post: #24
Title: Re: الوأدي الأخضر لا لا يا أبوي لا
Author: Osman Musa
Date: 02-28-2013, 01:03 AM
Parent: #6
يا وليد طه ياخ الحكاية صعبة .
قطعة وأحدة بي 3 شهادات بحث مختلفات .
قالوا : الوادي الأخضر تاني لا لا يا أبوي بس قريشاتي .
|
Post: #25
Title: Re: الوأدي الأخضر لا لا يا أبوي لا
Author: النعمة عبدالرحمن
Date: 02-28-2013, 07:06 AM
Parent: #24
والله أنا شخصيا كنت اشد الناس تشاؤما حيال الوادي الأخضر ومستقبلها وذلك بعد زيارة المنطقة قبل شهور خلت، وكان لي مداخلة في بوست يخص الوادي الأخضر. بعدها علمت أنه في قروب في الفيس بوك خاص بالوادي الأخضر وبالمتابعة حصلت علي معلومات وافية عن الوادي الأخضر وتفاصيل عن المخططات وغيره. والمخطط الشامل فعلا ليس لحي محدود بل لمدينة بحالها وحسب حسابات بسيطة هذه المدينة حتسع اكثر من 350 ألف نسمة في المستقبل. هذه المعلومة هامة جدا وفيها دلالة ان هذه المنطقة عاجلا أم آجلا ستزود بالخدمات ويبدأ تعميره رغم أنها الآن هي فعلا كما جاء وصفها من الأخوان في هذا البوست. الشيء الثاني لا توجد أي مناطق أخرى الآن في العاصمة معروضة رسميا للتملك من قبل الحكومة وعليه أرى ان المستقبل هنا وفي القرى المتاخمة لحدود العاصمة ولكن في الأخيرة المشكلة في الأوراق لأنها أصلا حيازات وما عندها ورق.
بالنسبة للشراء، متاح للمغتربين مباشرة من أراضي المغتربين وباسعار ممتازة وأظنها قابلة للتقصيد كمان.أحذرو السماسرة، إنهم قوم أذكياء في اصطياد المغتربين ويعلمون أنهم سيعودون فورا بعد إجازاتهم ويلعبون على عامل الزمن. لا تشتري ارض إلا في حالة وجود شهادة بحث حديثة للبيع وممكن أن تتفق مع الشخص وتطالبه بشهادة بحث للبيع بتاريخ يوم المخالصة النهائية. يمكن التأكد من صحة الشهادة من التسجيلات قبل الدفع وتأكد أيضا إنك تتعامل مع صاحب الأرض حتى في وجود سمسار.
|
Post: #26
Title: Re: الوأدي الأخضر لا لا يا أبوي لا
Author: أبوبكر محمد عثمان
Date: 02-28-2013, 09:48 AM
Parent: #25
Quote:
والسماسرة بمدحو فيهو
|
ياخي السماسره ديل كان شكرو ليك الموت تقول ان شاء الله اضوقو
اعمل حسابك
|
Post: #27
Title: Re: الوأدي الأخضر لا لا يا أبوي لا
Author: أبوبكر محمد عثمان
Date: 02-28-2013, 10:14 AM
Parent: #26
كان عرضو علينا نشتري في الوادي الاخضر وكان العرض عن طريق السفاره
بعد ما ( عملوا لينا البحر طحينه ) زي ما بقولوا المصريين ووصفوها انها جنة الله في الارض
كتير من الناس اشترت انا قلت ما استعجل وكنت نازل قريب المهم ما اشتريت
عندي قريبي اشتري فيها طبعا علي الورق بس
نزلت اول حاجه قلت امشي اشوف الوادي الاخضر وكانت الاقول متضاربه بين مؤيد ورافض
المهم طلعت من البيت وقلت اصل الوادي الاخضر اشوفو بي عيني
من الحاج يوسف اخر محطه عاينت للعداد بتاع السياره لما وصلت الوادي ( الما ) اخضر
35 كيلو والله صحي ( لا يخلو الطريق من حواشات وترع وكباري )
المهم وقفت في الوادي الما اخضر دا صفحه بيضاء عدمانه طفاي النار واتخيل لي الطير ما بجي بي هناك
وطبعاً انا من الطريق شلت الفكره من راسي بس قلت اصل وكنت بفكر في قريبي الاشتري من السفاره
المهم قالوا لي دا الطريق بتاع المزارع في طريق تاني بجي فيهو الظلط
رجعنا من الطريق التاني وبعد مسافه ليست بالقصيره ( لمينا في باقي الجمع )
لقيت في بيوت اسكان شعبي وقفنا وسألنا وقالوا دي برضو الوادي الاخضر
مشينا مسافه لقينا مدينة الصحفيين وبرضو قالوا دي الوادي الاخضر
المهم حمدت الله ورجعت اهلي وانا صارف نظر عن اي وادي مهما كان لونو
مشيت اشتريت في داردوق 400 متر بي 14 حبه ( حيازه ) بعد سنه جابت لي 40 حبه
ودي السنه التانيه ليها سعرها 85 حبه والحمد لله بنيت وسكنت والتخطيط قريب ان شاء الله
قريبي الاشتري في الوادي الما اخضر داك بقي في الطريقه الترجع ليهو قريشاتو
بعد تحانيس وجرجره رجعو ليهو جزء من المبلغ واستعوض الله في الباقي
بس نصيحه للناس البره لو ما وقفت في القطعه ما تشتري
|
Post: #28
Title: Re: الوأدي الأخضر لا لا يا أبوي لا
Author: محمد عبد الله الامين
Date: 02-28-2013, 10:16 AM
Parent: #26
يا جماعه الوادي الاخضر ده للطويلة
يعني لي اولاد اولادك ....
اما اذا مستعجل عيها تقل الكاش وبتلقي في نص كرش الفيل دي
|
|