هل بكاء النساء في المآتم حقيقي ام مصطنع؟

عزا النسوان لبعضهن فيهو اصطناع وتكلّف.....
لو ما مات ليك زول عزيز الدموع بتجيك من وين؟
يعني مثلا جارتك مات اخوها مات ف السودان وانتو في المهجر وانتي ما بتعرفي المرحوم ومشيتي تعزي كيف يعني حتبكي الزول قبل كدا ما شفتيهو كيف حتبكيهو؟
وبعدين مرات بكون شلة نسوان جايات يعزن وفي الطريق كلو يتونسن ويقرقرن لمن يصلو بيت البكا يفكو الكوراك

* مرات كمان بتحصل حاجة تحير وتجنن عديل
كون المراة تلاقي واحده من اهل الميت بالصدفة في الشارع بعد انتهاء العزاء بشهور مثلا لانها كانت مسافرة ويدوب حتمشي ليهم تعزيهم
اها تقوم تلاقي واحدة من اخوات المرحوم في الشارع بدون اي ترتيبات مسبقة برضو تلقاها بكت....مافي وقت لتجهيزات ولا لاجترار زاتو
دي موش حاجة تحير بالله

السلام عليكم ورحمت الله تعالي وبركاته

والله يا احمد انا محتار في القصه دي من زمان بس كويس انك فتحت لينا البوست دا عشان نعرف
راي النساء في المنبر شنو في القصه دي
انا شايف انو البكي بكون فيه تمثليات واضحه من بعض النساء لكين طبعا اقراباء الميت بكاءهم حقيقي طبعا

وعليكم السلام اخونا عبد العزيز

اي ننتظرهم معاك يجو يوضحوا لينا الحكاية دي بتتم كيف....ونزيد نقاط البوست بالنقطة دي

* وست البكا الموجوعه بتكون مع حزنها دا متابعه كل التفاصيل البكت جد جد منو والبكت مجامله منو والجات متحننه منو والجات لابسه دهب منو....واحد اخونا حكى لي عن اختو وقال لمن مات ابوهم وبعد العزا بكم يوم سال اختو...وقاليها انتي فلانه ديك جات؟اختو
قالتليهو جات جيه اخير عدمها...قاليها كيف ؟ قالت ليهو جات لابسه دهب داماس....قاليها وانتي عرفتي كيف انو دهب داماس ...قالتليهو ما ظااااااهر......قال لف الزمن ودار وصاحبنا دا لاقى اخو البت الجات لابسه الدهب...صاحبنا قاليهو داير اسالك سوال غريب..اختك دهبها داك جابتو من وين؟

قاليهو من داماس ومشيت معاها لمن جابتو من هناك

صاحبنا قال اتحير عديل من الملاحظة القوية في لحظات الحزن العميق

Quote: راي النساء في المنبر شنو في القصه دي

ما ظنيت نساء المنبر من الطراز القديم البكوركن في البكيات ، ديل نساء حديثات العزاء من سكابي مروراً بأدناه (مسج) .

سلام أحمد

بعهن يبكين بكاء حقيقيا ( صاحبات وجعة ) وعلى حسب درجة الميت

وأخريات يبكين مجاملة وحسب العادة . وأول الواحدة ما تخلص البكاء

طوالي تخش ليك في الونسة زي الماحصل حاجة .

مرة كانت عندنا وفاة ، وفي كوم نسوان جايي يعزي بعد يومين

أها في الطريق كانت حفيدة المتوفي ماشة وراهن ، سمعتن يتكلمن

قالن لمان نصل ونبكي وكان سألونا فطرنا ول لا نقول ليهم ما فاطرين ، الحفيدة دي من النوع الغتيت

خلت النسوان دخلن وبكنت مع أمها وعماتها اتلحتن ليك موية وشاي بس .

Quote: اها تقوم تلاقي واحدة من اخوات المرحوم في الشارع بدون اي ترتيبات مسبقة برضو تلقاها بكت

ههههههههه والله يا ابوحميد صدقت
حاجه تحير
سلامات ياخى

Quote: وأخريات يبكين مجاملة وحسب العادة . وأول الواحدة ما تخلص البكاء طوالي تخش ليك في الونسة زي الماحصل حاجة .

اها مرة إمرأة جارتنا في البادية وجابو ليها خبر موت إبن عمها
كالعادة جيتهم معي بعض الإخوة لواجب العزاء
سمعت واحدة بتعزي وبتبكي وبتقول الشوق عليهو
وفي أثناء بكاها وهمت قالت الشوق عليّا
وطوالي في بكاها قالت (هي لا الشوق عليهو)
والله ضحكت ام كليوات وعرفت مقطوعات الطاري ديل محن

عندنا ايضا المرأة اذا زوجها نقلها من فرقان اهلها والدها (بالهودج) الي
فرقانه تلقاها تبكي ودماعها سرف ينقنق اها باكر كان جي طليتهن ولقيتها في بيتها
تلقاها تضحك لي ضروسها اي والله بنات أدم ديل محنهن كثيرة بلحيل

محبتي

مشابه لموضوعك يبقى زيادة خير من منتديات ابناء الهدى كتبتو بي هناك
معروف السودان بلد تكافلي بالفطرة وقت الحارة تلقاهم قدامك اهل جد او اكتر من اهل لانهم جيران واحباب
عشان كدة اخترعوا المثل جارك القريب ولا ود امك البعيد لانو اول زول ح يجيك جاري للوقوف بجانبك وقت الحوجة
نخلي الافراح شوية
تعال شوف وقت المصائب كفانا واياكم الله وهي ماضية فينا طالما دامت الحياة وهي التي تظهر معادن الناس
اذا كانوا فعلا اتوا ليخففوا عنك ويواسونك من قلبهم ام بس جايين خايفين من اللوم وفي الاتراح بكاهم ودموعهم دموع تماسيح
وعيونهم زايغة تبحث عن اللاشئ في اركان المنزل
عندنا عينة زي دي
البكاء حار بس في منطقة تانية الراجل ابو المرة مات والناس اتلملوا من كل حدب وصوب وحتى القرى المجاورة
منهم من اتى على اربع عجلات او حوافر وفيهم من اتى على اتين كارو صغيرة ومنهم من اتى مشيا كل حسب موقعه الجغرافي
المهم واحدة ماهاميها الموضوع شديد ولم تفكر في الذهاب مخصوص
وانتظرت الى ان جاء يوم السوق وموضوع اخر يوديها منطقة البكاء والكلام ده بعد شهر تقريبا
هنا ناس الفراش كل ذهب الى حال سبيله حال الدنيا
طيب صاحبة القصة جات السوق ومشت الدكتور ومشت المجلس وانتهت من كل اغراضها الدنيوية وبعد ان انهت مهمتها الاصلية
احست بالجوع هي يابنات امي اكل هنا في السوق بي 15 ريال
بري ها الخمستاشر ريال يجيب لي دستة كبابي وفناجين والله آبخسرن لبتاع المطعم
انا اصلي ماشة لبت المرحوم اعزيها في ابوها واكل معاها بالمرة واديها فد طرادة
توووووش على البيت لقت ليك بت المرحوم في المطبخ ياداب نزلت حلتها من النار وخلتها كاشفة عشان الملاح يبرد

الايد في الراس وهييي هييييي ومخير الله ياحليل ابوكي الكان وكان وياحليلو الشنو كدة ماعارف والعين تدور في ارجاء المطبخ والوصف
يزداد كلما لم تجد شئ يشد الانتباه
وفجأة تعالي يالجدادة الصغيرة الحمراء بي سواسيوها داخلة المطبخ وطلعت في نشافة العدة وحاول السوسيو الشقي محاكاة امه الا انه لم يوفق
وجاء على اعقابه جوة الحلة لقربها من نشافة العدة
وفي غمرة الوصف وحليل وحليل تشوف المنظر كور عليك وياحليل ابوكي وآآآآآآآآآي انا والسوسيو وقع في الملاح
ياجماعه اصلا البكاء قالو بعذب الميت
وطالما البكاء ماواجعك شديد مافي داعي تعذبو وتنافق ساكت
احسن ترفع الفاتحة وتدعوا للمتوفي بالرحمة والمغفرة
وخلي السوسسيو يلحق امو

السلام على كل الشباب الشاركونا بحكايات وتجارب او المروا وعلقوا....شكرا ليكم اها منتظرين المزيد لغاية ما يجو اخواتنا يورينا سر الشغلة

Quote: زميله عمل توفت والدتها مشينا للعزاء ما عارفين البيت في الطريق كان نقاش مع زميله اخري عن فسخ خطوبتها والاسباب والحسره باديه علي وجهها في الطريق وقفنا في بقالة طلبت مناديل ورقيه بعد وصلنا الحي نسأل عن بيت البكاء الفريق ملان شفع ايام اجازات المدرسة لعب كوره وبلي. بعد التعب من السؤال لقينا واحد وصف لينا بيت بكاء صيوان في الشارع بس ما معروف بتاع منو مشينا علي الصيوان النسوان اردحن وب علي وب علي والرجال معمعمين اطنطنو فيهم البقول الفاتحه وفيهم السارح اطنطن بي مشاكلو... نزلنا البنات علي اساس هو بيت البكاء المقصود دخلو جوه بعد شلنا الفاتحه اتضح أن الوفأة لود شاب وليس لمرأة . رسلنا بت صغيره تنادي لينا البنات. فضلنا منتظرين قريب الساعه !! تبعناها بكم مرسال وراء مرسال . بعد فترة جات واحده من الزميلات طالعه قلنا ليها ده مابيت البكاء المقصود قولي لي الزميله الاخري يلا نمشي. جاتنا بعد نص ساعه والسخانه فوق راسنا والغبار .. يا فلانه ليه اتاخرتو كده ؟؟؟ والله ما مني انا من الزوله دي !!! المقصوده الزميله الاشترت المناديل وفسخت خطوبتا. يا بت الحلال مالك مؤخرانا البكاء جيناهو غلط !!! قالت : والله قلت الا افش مغصتي وابكي بكاي واكمل مناديلي يمكن البيت التاني ما نلقاهو!!! ____________ نقلا عن بوست اخونا عباس الدسيس

النسوان عندهن غتاتة شديدة مرات وبعرف يسدن كويس ( يسدن لناس الشهادة العربية ) يأخذن حقهن

وكما تدين تدان ، مرة حصلت وفاة عندنا في الحلة ، ونحن الرجال في البيت استعدينا وماشين على

بيت البكاء ، جيت داخل على الوالدة رحمها الله لقيتها قاعدة زي الما حصل حاجة ، قلت ليها يمة

مالك ما ماشة على الجماعة ديل هسع ، قالت لي ما بمشي هسع بمشي على مهلتي ، دا كلو عشان مرة

حصلت لينا وفاة وما جو عزونا سريع، زي الحالة أكيد لمان تمشي بتبكي بماء أداء واجب.

شكرا عادل على المشاركة والزوله دي والله انتهازية جدا بالله ما جابها للبكا الا الجوع ...هههههههههه

طبعا المغارز بتاعة النسوان مع بعض لذيذة خلاص مرة جماعة اصحابنا حكوا لينا الحكاية دي :

في تعامل بالمثل عجيب بين النساء في موضوع العزاءات دا ...قالوا واحده ماتت امها في نهار حار فجارتها جات عزتها وكانت تحمل شمسيه...اها صحبتنا دي ختتها ليها ولمن ماتت امها في ليله شتويه بارده شالت شمسيتها ومشت عزتها


وبرضو في نساء بجوا العزاء يكشفوا لاثاث البيت ومدى نظافة الغرف والمراتب والملايات وكدا اها مرة قالوا :

واحده من بنات المرحومه خشت غرفه من غرف البيت لغرض ما...ولقت بعض المعزيات برفعن في الملايات عشان يشوفو المراتب نضيفه ولا لا.