الحملةالوطنيةلتجميع الجنادب وأبوالدقيق للردعلى العدوان الصهيوني الغاشم

السلام عليكم ورحمة الله وبركاته

محن حكومتنا الرشيدة ما بتنتهي، فبعد استراتيجية الدفاع بالنظر، والطائرات الصهيونية التي تأتي مطفأة الأنوار، وبسبب انشغال الناس بصلاة العشاء تارة، وبيوم التروية والحجيج القطع، واحتراق مصانع السلاح بسبب مكنة اللحام الشغالة نص الليل، إلى اتهام العدو الصهيوني بإرسال أسراب من الجراد لالتهام مزروعاتنا في الشمالية.

لم نعرف هذه التقنية الماكرة التي أصبح بسببها العدو الصهيوني، بدل أن يرسل الطائرات يقوم بإرسال أسراب الجراد - ربما توفيرا للنفقات وبرنامج التقشف الذي تقوم بتطبيقه حكومة الليكود - فكنا نود التعرف على الكيفية التي بسببها تمكن العدو الصهيوني الماكر من إرسال هذه الأسراب وتوجيهها، فكيف يا ترى قطعت هذه الأسراب من الجراد صحراء النقب وقطاع غزة والشقيقة مصر بكاملها، بوجهيها البحري والقبلي، وكيف يا ترى مرت من عند الدلتا الغنية بالزرع والخضرة، وحقول الفلاحين على النيل، ونجع حمادي حيث قصب السكر والمحلة الكبرى حيث القطن والغزل والنسيج، وكيف يا ترى مرت على صعيد مصر وكل المزارع والغيطان والصعايدة الجدعان وأهلنا النوبة ومزروعاتهم، لتصل بدقة كاملة إلى شمال السودان؟!

الأسئلة البتطرح نفسها:

1- هل يا ترى كان هذا الجراد صائما طول هذه الفترة ولم يفطر إلا على زراعة أهلنا في الشمالية؟ ممكن برضو ما جراد يهودي يمكن كان عندهم صيام الفصح وللا كيبور وللا حاجة ^____^

2- هل يا ترى هذا الجراد نزيه ويعرف المواثيق الدولية حتى يترك زراعة مصر - وهي دولة صديقة ترتبط بمعاهدة سلام مع إسرائيل - ليصل إلى زراعة دولة عدو كدولتنا ويقوم بإتلافها؟

3- كيف وصل هذا الجراد بهذه الدقة ولم يطش يمينا ولا شمالا؟ ولم يذهب للجارة ليبيا، أو السعودية مثلا، أو تشاد؟ وجاء راسه عديييييل على حدود السودان وعلى زروع أهلنا في الشمالية؟

4- هل يمكن أن يكون هذا الجراد مثلا من نوع الجراد الزاجل؟ أصلا تم أخذه من شمال السودان وتهريبه لإسرائيل التي قامت بدورها باستنساخه وتربيته في مزارع خاصة، وبعد أن تكاثر بهذه الأعداد قاموا بإطلاقه مرة أخرى ليعود لموطنه الأصلي؟

5- هل فعلا في إتفاقية دولية لمكافحة الجراد بحيث إنو لو مصر ما قامت بدورها في الرش يقوم الجراد يصلنا نحنا بسبب إنو المصريين ما رشوا بلدهم؟ طيب ياخواننا لو أصلو كدي ما كان الجراد ده يفتك بالمزروعات المصرية؟ ليه إتعنى وقطع المسافة دي كلها وخلى زراعة مصر عشان يجي يأكل زراعتنا؟

غايتو ما عارف .. زمان كانوا بقولوا الرد الرد كباري وسد .. وهسي حكومتنا بقت ( يا مولاي كما خلقتني ) الفلسكاب حاصل ولا في كباري ولا سد .. فأقترح إنشاء الحملة الوطنية لتجميع الجنادب وأبو الدقيق لرد هذا العدوان الغاشم .. أصلو أكتر حشرات متكاثرة في السودان هما الصنفين ديل .. نجمع أبو الدقيق ونختو في غربال ونستفيد من الدقيق بتاعو نعمل منه عيش للشعب السوداني، ونمسك أبو الدقيق وأبو الجندب نلمهم في باخرة وعلى إيلات طوالي، وأول ما الباخرة تصل إيلات نفتح البراميل ونفك الحشرات في اليهود أولاد اللذينا ديل، عشان تاني يبطلوا يرسلوا لينا جراد وطيارات.

غايتو للضمانة ممكن نعمل لينا علم ونخت فيهو صورة ود الصايم كنوع من التمويه يعني :)

أتمنى أن يقوم محي الدين تيتاوي بصفته نقيب الصحفيين بتبني هذا المشروع الوطني، كونه مسؤول السلطة الرابعة في السودان، ومقتنع بنظرية إنو ده عدوان صهيوني وغاشم، ويمكن للمغتربين المشاركة أيضا وإرسال مساهماتهم من الصراصير، لأنو الخليج ده برضو فيهو صراصير كتيرة، بس تسمى هناك بـ: ( الزهيوي ) ^___^

شيخنا محمد ..السلام عليكم ورحمة الله وبركاته ..

Quote: ونمسك أبو الدقيق وأبو الجندب نلمهم في باخرة وعلى إيلات طوالي

لو باخرة نيلية ندعمها ببعض الذباب من سواكن والكثير من الباعوض الكسلاوي المتخم وبعض حشرات السمسم من القضارف ولكن ان كان مسار الباخرة بالبحر الاحمر فعلى جثث البجا لو مرت هذه الحشرات بشرقنا الحبيب ...



تحياتي ..

حبيبنا العزيز ود القاضي

Quote: فعلى جثث البجا لو مرت هذه الحشرات بشرقنا الحبيب ...

ياخي سلامة أهلنا البجا وسلامة شرقنا الحبيب كلو
تشكر على المرور .. مع تحياتي الطيبة

الاخ محمد
تحية طيبة وبعد
بعيداً عن الواقع السوداني، ارجو ابداء رايك في مرسي بعد انفصال السلفيين عنه وقولهم فيه ما لم يقله مالك في الخمر
تحياتي

حبيبنا الفاضل ود ود الفكي
هم قالوا شنو السلفيين والحصل شنو؟
والله لي مدة ما متابع أخبار مصر
خاشي لي في كم فلم كده وبرنامج
راسي ما قادر أحكو
لاكين ما دام حاجة خلتك تشمت أكيد بكون قالوا فيهو كلام شديد ^__^

شكرا على مرورك مع تحياتي الطيبة

Quote: لاكين ما دام حاجة خلتك تشمت أكيد بكون قالوا فيهو كلام شديد

معقولة؟ ما شفت بكاء خالد علم الدين ولا سمعت كلام نادر بكار؟
من البداية قلنا كفى تجربتهم في السودان لكن كلام القصير ما بنسمع
غايتو جهز مدفعيتك الثقيلة