يا ريس... عملتها ظاهرة

سير سير ودتنا الاخره يا ريسنا حكومتك خاســـــــــره
طلب الفول بي خمسة جنية يا ريسنا عملتها ظاهــــره
مؤسف جدا ابقي مصيرنا بين التاجر وبين حاكمـــــــــو
وابقي الواحد كلو طموحو القي قروش تكفيهو طعامـــــو
وتبقي اللحمه وكل اخواتي مره ومره تزور احلامـــــــــو
اجري اساسق ليلو ونهارو ومن الجوع الشفـــــــــــــــع
واقوي مصيبة نبيع اخلاقنا يوم تتمد الإيد الطاهــــــــــرة
ويا ريسنا عملتها ظاهره
عشانك باعو الناس مضايهم وقفو معاك في الصفو الاوحد
ورفعوا معاك اشعار الثوره ناكل فته خفافا نرقد وبيك يا ريس
بعنا قيمنا وناس من وطن العزة بتشرد ناس من وين اتباعك جنوو
وناس من كتر الحاجة بتشحد وناسا كان بتفك الحيره
جايه الليله تكوس الجابره يا ريسنا عملتها ظاهره
في جبروتك ضاع الشايب ضاعو شبابنا وضاع الشافع
والمفطوم يا داب تلقاهو قاصد السوق يا ريس طالع
امكن اساعد ابوهو العاجز ابقي الشافع راجل نافع
وشوف اولاد السادة القدوة اسال طه واسال نافع
امكن بينة تلقا اجابة واصلو البينكم دايما عامره
ويا رسينا عملتها ظاهره
شعبنا طيب طيب جدا هدمت صبرو قلوب عميانه
البترول الطالع بدري كان تدونا ولو جركانه
امكن كان يا ريس نسكت واصلو طموحنا بيسط بامانه
ناكل نقرا نلقي علاجنا لو اجسامنا بقت عيانه
جبيبو قروشنا الي في ماليزيا من اموالنا بقيتو دكاتره
ويا ريسنا عملتها ظاهره
كم من اسره قويه وامنا معاكم غرفت معني الفاقا
رب الاسره عشان ما موالد جوه السوق اتشاقا ولاقا
ولدو الواحد في سنه تالته وبنت المؤمنه راقده معاقا
خفف ولدو عليهو همومو ساب المدرسه ساق درداقا
عرف الواجب من سنه تالته ساعد امو راضيه وصابرا
ويا ريسنا عملتها ظاهره
قال يس لو فاطمة سرقت في معناهو بيقطع ايدا
صلي الله علية وسلم في اقوالو معاني شديده ود النائب
ليهو حصانه ولي زول تاني عقوبة شديده والقانون
في حقنا بمشي وفي حضرتكم حاجه بعيده
بس من اين بنيتو طوابق ومن ماهية بقيتو جبابره
يا ريسنا عملتها ظاهره
كنا بنحلم بيك نتلملم وابقي وطنا دا عالم تاني
صحه ومويه تجينا نقيه والتعليم اصبح مجاني
التعليم بقي كلو قبانه حق الحصة جير ومباني
تقرو اولادكم في امريكا وبرضو تقولو شعب اناني عشانكم
هاجر عمي محمد خالتي عواطف بكره مسافره
ويا ريسنا عملتها ظاهره
ساكن في الحي الوراني جاري جنوبي و جار قرعاني
و الدكان حق الفوراوي وكان ادروب في الشارع التاني
ناكل في صينية كبيره نعيش نتقاسم احلي معاني
وفي الافراح نتكاتف نحنا وعند الباب تتلاقي صواني
قمنا ربينا علي عاداتنا وماها غريبه علي السوداني
وايدكم جات للوحده بتبتر هيا الناهيه وهيا الامراه
يا ريسنا عملتها ظاهره
بس للاسف الحال اتبدل في ايامكم يا للحسره
الصينيه خلاص اتكسرت نسينا دقيق العيش والكسره اصلو سيادتك مافي طريقة
نقوم النجمه ونرجع بكره وهم الجار بقي كلو العيشه وهمنا نحنا مواجع تبرا
ومن الضيف اصحبنا بنخجل جوه البيت ما فيش تمره
ود الوالي فلان في لندن ومن اموال الشعب بيقرا
وكم من شاطر ساب مدرستو وكيف بالجوع يا ريس يقرا
وكم عيان ما لاقي علاجو
ومن الهم عينيهو مساهره
يا ريسنا عملتها ظاهره
نحنا الخوف والله ما هيلنا نحنا حماة سودانا ونفرو
ونحنا العزة الفينا قبيله وما بنخاف سلطانا وخفرو
نحنا اخترنا نعيش حيره نكفي الناس الظلم وخطرو
نحنا اعز نبينا نعبد الله
ونرضي بقدرو التهديد ما بهد اصرارنا والتعزيب ما بنفع اسرو
واصلو الموت حقو شهاده وكل الناس ح تركب قطرو
اسرع قبلي المد ما يشيلك وليك تتمد الموجه الهادرة
يا ريسنا عملتها ظاهره
خلي الناس في حالا وارحل اوعا تزيد الطين في البله
شوف قذافي الفات الدنيا وما شال غير احقادو مزلة
وحسني الفارق مجدو القابر وكل تاريخو رماهو في سلة
وصالح صالح نفسو وقادر وتونس ربحت فيها القله
بكره اكيد بشار ح يرحل سوريا تكون في اعظم حلة
ارحل قبلي الفرصة تفوتك شيل اتباعك وكل الملة
خلي الجوع والمرض الفقري بنقدر نحنا نداوي العله
ما الانسان من ربو مكرم كيف ترضاه معاك اتزلا
ومهما يطول العمر قصير يا ريسنا سريع اتحلحل
ارحل سيب سودانا بخير و واوعه تفرق ناس الحله
بكره نموت وتموت ياريس وسيبنا في حالنا وخاف من الله
مهما يطول العمر قيصر يا ريسنا سريع اتخلا
ما الانسان من ربو مكرم كيف ترضاه معاك اتزلا
ارحل سيب سودانا بخيرو و اوعه تفرق ناس الحله
بكره نموت وتموت ياريس سيبنا في حالنا وخاف من الله
بكره نموت وتموت ياريس سيبنا في حالنا وخاف من الله

مخرج.... ملقوطة من الفيس