التشكيك والطعن في جنسية وانتماء الاخر وفق منظورالقانون يا اهل القانون

نعم من ابتلاءات الله على هذا السودان آفة التعالي والسمو العرقي دون السمو بسودانيتنا وقوميتنا وحدثنا عنها المصطفى عليه افضل الصلوات والتسليم حيث قال فيها دعوها فانها نتنة .. ما دعاني لفتح هذا البوست تداعيات لبوستات قراتها حديثا وان كان المنبر يعج بها منذ اعوام وليست بجديدة لا على المنبر هذا ولا على الثقافة والسلوك الجمعي للسودانيين وهي سمووعنصريةو قبلية وقومية وجهوية ... الطرح ليس بجديد لمناقشة هذه الافة ولكن الجديد فيها الان ما يعرف بالمحاكم والقضايا الالكترونية فمثلا هنالك بوست يطعن ويشكك في جنسية وزير الداخلية انه اجنبي وليس سوداني ولم يأتي بصيغة ترجع اصوله الى اريتريا مثلا وهنا الاختلاف في القضية فلا ضرر لو قلت مثلا ان فلان من اصل مغربي او اريتري او قحطاني من جنوب الجزيرة العربية وان هؤلاء القوم اصولهم ترجع للعراق وهؤلاء ماليين واولئك احباش وهؤلاء لمصر وارمن واقباط ولكن لا تنفي عنهم جنسيته السودانية بأعتبار ان السودان دولة اصلا تكونت معظم قبائلها من مهاجرين ومازالت تتشكل حتى الان ..

موضوع البوست محوره الاساسي هذا السؤال وموجه لاهل الاختصاص في البورد ومن خارج المنبر ايضا ويتمثل الاستفسار في :-

هل يمكن لوزير الداخلية رفع قضية ضد من شكك وطعن في جنسيته السودانية بأعتباره انه اجنبي وهل تندرج من ضمن اشانة السممعة والتشهير ؟؟؟

ماهي العقوبات التي تترتب في مثل هذه الحالة ؟؟؟

افيدونا يا اهل القانون والمختصين والمتابعين للقضايا التي ترفع من خلال وقائع واحداث في المنتديات والمواقع الاكترونية ؟؟؟


مودتي


الرحــــال

الأخ أشرف،
سلام

قضيـة شنو يا زول، ات بصحك؟
ابراهيم محمود يرفع قضيـة ضـد واحـد عشان قال ليه انت ما سودانى..

التعبيـر زاتو راح..

لكن اقول ليك حاجـة.. الشهيـد جون قرنق غلط فى التوقيـع على نيفاشـا، والطيب مصطفى ليه الف حق يذبـح التيران عشـان لقى أرض ما حقتـه، وباردة..

هـذا السـودان ملك للبجـة والنوبـة والدينكا والفور والزغاوة، وبقيـة القبائل التى خلقها الله فيـه.. العرب لم يستعمروا أرضـا إلا كانت نهايتهم بالعنصرية والتعالى والفســاد.. كما حدث فى الأندلس
وكما حدث فى زنجبار.. ويبدو ان التعالى العرقى والعنصريـة + الفسـاد والتخمـة، هى المؤشـرات لقرب زوال حكم العرب فى الســــودان.

Quote: قضيـة شنو يا زول، ات بصحك؟ ابراهيم محمود يرفع قضيـة ضـد واحـد عشان قال ليه انت ما سودانى..

الاخ ابوريش ،،، تحياتي


والله العظيم انا جادي جدا في هذا الطرح من منطلقين

ليس تحديدا في شخص الوزير فهو واصل ولا يحتاج لذلك ولكن هذه الحالات متكرره مع الضعاف الغلابة في هذا السودان والقصد الاول والاخير فيها البعد القانوني لمثل اطلاق اللسان تهما وتصغيرا واستخفافا بالاخرين فهل السودان والمواطنه فيه مبنية بالقانون ام بمقامات القبائل واحدة تلو الاخرى في سلم السمو والتسامي والعلو بالنسب


عكســـة :- وين القانونيين ينورونا ؟؟؟؟


مودتي


الرحـــال

نعم يحق له ذلك ... لكن لن يمنع تكرار الامر لان الجهل وضيق الافق سيكون سيد الموقف .... مورثات هذا عربى وهذا اعجمى ............... ونقاء العرق مورثات عقيمة تنم عن فراغ وجهل ونفس مشوهة ومشبعة بان شعب الله المختار كان نحن فقط وكل من عمر الارض سوانا اجنبيا حتى لوكانت جزوره ضاربة فى عمق الارض ..............................
يارحال حايشتكى منو ولا منو

Quote: يارحال حايشتكى منو ولا منو

المشكلة والخطورة من هذه الاجيال المتعلمة والمثقفة ونحن في زمن الامية اصبحت تقاس فيها ليس بالقراءة والكتابة ... الامية اصبحت بمعايير اخرى وفقا للتقدم التكنلوجي الذي اصبح يقود الحياة اليومية ... هذه الاجيال من المفترض ان تكون معاول تغيير للخروج بالسودان من هذا المستنقع ولكن ان نجد هذه النعرات والافات تستشرى بصورة مخيفة في زمن تثقف الجميع وتسلح بالدين ايا كان هذا الدين وكل الاديان تدعو للانسانية وتكريم الانسان والفهم الديمقراطي والعلماني وحصلت نهضة علمية واكاديمية ولكن يصبح الحنين الى جيل الجدود الذي لم يجاهر بها وان كانت مكتومة في الدواخل ودي سرها عند الله تصبح كارثة

انصاف التعالي موجود والنعرة موروثة حتى عندما تكون في نطاق القومية نتفاخر بالسمح والطيب انو ده ماركة سودانية مسجلة للسودان فقط وننفي المساوي ونتبرأ منها على انها دخيلة ومستوردة وغريبة عن السودان

وزير داخلية نموذج لكل من يغتصب في انتمائه لهذا السودان فهل ينصفه القانون ؟؟؟



مودتي


الرحـــال

Quote: هـذا السـودان ملك للبجـة والنوبـة والدينكا والفور والزغاوة، وبقيـة القبائل التى خلقها الله فيـه.. العرب لم يستعمروا أرضـا إلا كانت نهايتهم بالعنصرية والتعالى والفســاد.. كما حدث فى الأندلس

الزميل اشرف ،
لست قانونيا ولن افيدك بشيء سوى رفضي الدائم للتشكيك في اصل اي شخص من منطلق عرقي بل ابعد من ذلك عدم اثارة المواضيع العرقية من الاساس ، لكن لفتت نظري مداخلة الزميل ابو الريش .. اعلاه وهو يمثل نفس النموذج الذي تتحدث عنه ..
تحياتي

الاخ / عبدالله ادريس ،،، تحياتي

في ردي للاخت انصاف كتبت لها هذه العبارة ( وزير الداخلية نموذج لكل من يغتصب في انتمائه لهذا السودان فهل ينصفه القانون ؟؟؟)

وبالتالي انا معك تماما في رفضي وللتشكيك في اي شخص طالما انه يحمل الجنسية السودانية بغض النظر عن اصوله شنو وهجرته الي السودان سواء كان عربيا او عجميا لايماني التام ان السودان ما زال يتشكل زيادة او نقصان وضد اي اقصاء للاخر


مودتي


الرحـــال

Quote: وزير داخلية نموذج لكل من يغتصب في انتمائه لهذا السودان فهل ينصفه القانون ؟؟؟

أشرف ياخوى اسألك تانى.. هل انت جادى؟

مرة اخرى يا اخى، وخت الرحمن فى قلبك، إبراهيم محمود ما محتاج يمشى محاكم واللا بتاع.. رجل معروف فى الشرق، وكسلا حقتوا وحق أجداد جدوده وجدود أجداده..
فى كل مجتمع هناك العقلاء ومن هم دونهم.. فلو تحدث من هم دونهم فلا وزن لحديثهم، ولو كان هـذا رأى عقلائهم، فلينسـوا مكانا اسمه الشرق..

بلا محاكم بلا بتاع..

الاخ ابوالريش ،،، تحياتي

بدءا انا جادي جدا وثانيالا تنقصني المعلومة المعرفية سواء كانت عامة او خاصة تماما بالمهندس ابراهيم محمود ولست في موضع اسنفسار عن اصله وفصله شنو انما اتساءل ما هو الموقف القانوني لمن يطعن ويشكك في الاخر وبالتالي موضوعي كما وضحت لك ليس حول من هو المهندس وزير الداخلية اصله وفصله انما اتخذته كنموذج ومثال لكل من يتعرض ويساء ويشكك في انتمائه لهذا السودان من واقع حصل هنا في المنبر بالاضافة الى ان وزير الداخلية اكثر الوزراء عرضة لهذا كما انني اتناول الموضوع ببعد آخر بعد قانوني لمن يشكك الاخر وايا كان هذا الاخر وزير ام عامل عادي زول شمس ساي حول انتمائه لهذه الارض ده موضوعي وانا جادي فيه اخي ابوريش من منظور قانوني وليس من حتة بتاعت ابن شرق او غرب او جنوب او ابن بلد او عربي او عب او غيرها من صفات تطلق على ابن هذا البلد السودان


مودتي


الرحـــال

الأخ العزيز اشرف،

تحضرنى قصـة من زمن الإنجليز..
المفتش الإنجليزى يتحدث مع أحد موظفيـه الســـودانيين، قال له: أمس قلت لزميلك المصرى فى المكتب اننى أكـره المصريين، فكان رده: ولكن يا سيـدى المصريين ليسـوا نوعا واحـدا
ففيهـم الصالح والطالح..
ثم واصل و قال للســـودانى:.. لو سألتك نفس الســؤال فكيف تجيب؟ الســودانى طوالى قال ليه: لو قلت لى أكره الســـودانيين فسأقول لك أننى أكره الإنجليــز وكل جيرانهـم.
العنصـرية الكريهـة تتجلى فى بعض عرب الســودان حين لا يرون غضاضـة حين رؤساؤهم كانوا فى الجيش حاربوا مع مصـر فى قناة السويس دفاعـا عن مصـر والعرب.. حين
يعيبون على ابراهيم انه أيـد القضيـة الإرتريـة، إرتريـا التى هى أقرب الينا كسودانيين بصرف النظر عن القبيلة والجهـة هى أقرب الينا من العرب.

وبرضو يا اشرف، السؤال يمكن يوجـه لأى شخص.. هل لو كل من هب ودب قال ليك انت ما سودانى تمشى تشتكيـه؟... لا أعتقـد انها جريمـة قانونية، ولا إشانـة سمعـة.. كيف يعنى
إشانـة سمعـة أن تتهـم بأنك إرترى؟!! هل إرتريـا شئ رديئ.. هـذه ايضـا يا اشرف فيها عنصريـة ضـد الشعب الإرترى زمرفوضـة..

كل ما هناك أن الحديث عن ارتريا وابراهيم محمود موجـه ضـد مجموعـة إثنيـة ســودانيـة، ومثل هـذه العنصريات هى التى ستتسبب فى فركشـة ما تبقى من السودان إن لم تلجـم.

.

الأخ اشرف
تحية وسلام

تحضرني قصة عن المحاكم الشعبية والمحاكم الشعبية في السودان كما تعلمها تتكون من كبار القوم واهل الحل والعقد ومعظم المتهمين فيها كانوا من اهل الخمور البلدية والتعديات الصغيرة في الاحياء الشعبية المهم عقدت احدي الجلسات لمحاكمة المخالفين وكان من بينهم إمراءة كثيره التكرار على المحكمة وهي من صانعي الخمور البلدية لدرجة انها اصبحت شخصية مألوفه لدي القضاة من كثرة التكرار وقد جلست هذا اليوم على الأرض بجوار كراسي القضاة وبدأت المحكمة بعرض المتهمين والفصل في القضايا والتي طالت فيها فترة المحاكمة ويبدوا ان خالتنا دخلت في قفوة نوم والمحكمة انتهت جلساتها بعد مداولات طويله واخذت وقتها وعندما هم القضاة بالمغادرة انتبه القاضي التي كانت تجلس بجوار كرسيه هذه الحجة قال هوي يا جماعة نحن نسينا الخادم النائمة تحتي دي أكيد لم يستنكر تهكم هذا القاضي والشيخ الكبير في السن وهو من اهل الحل والعقد الذي لم يقول مواطنة بل قال خادم اصبحت طرفه يتداولها الناس هذه هي ثقافة هذا المجتمع وعقله الجمعي والفردي ومع ذلك يجب ان تكون هناك قوانين رادعة لكل من يقلل من انسانية الانسان اولاً ومن ينتقص من حق المواطن الوطني منها والثقافي وحتى نصل لهذه المرحلة من ثقافة احترام الاخر على اهل الحكم والقانون أن يقتنعوا ان هناك حق تاهي للناس يجب ان يحترم وتوضع له كل القوانين التي تحفظ الحقوق لأهلها ويجب ان يكون فيها الردع بما يوازي الجرائم الكبري وهي فعلاً افعال يجب ان تجرم لأنها في النهاية تفتت هذا الوطن ..

مودتي

الاخ ادم شحوتاي ،،، تحياتي

Quote: وعندما هم القضاة بالمغادرة انتبه القاضي التي كانت تجلس بجوار كرسيه هذه الحجة قال هوي يا جماعة نحن نسينا الخادم النائمة تحتي دي أكيد لم يستنكر تهكم هذا القاضي والشيخ الكبير في السن وهو من اهل الحل والعقد الذي لم يقول مواطنة بل قال خادم اصبحت طرفه

مصيبتنا في اهل العلم معاول التغيير وفي قادتنا على كافة الاصعدة السياسية والتنفيذية حتى ان هذه العنصرية البغيضة في هذه الحادثة وقت يتم تناولها من باب المزحة ونكتة دون الوقوف على انها تعد واجرام ودي لو حصلت في بلد لا يدين بالاسلام كان القاضي راح في خبر كان عشان كده كارثة السودان فمثل هؤلاء من المتعلمين والمثقفين والمستنيرين

Quote: ومع ذلك يجب ان تكون هناك قوانين رادعة لكل من يقلل من انسانية الانسان اولاً ومن ينتقص من حق المواطن

نعم كونك تجرد او تشكك في انتماء وجنسية احد يعتبر تعد على حق وطني ويجب ان يجابه بالقانون لانه يعتبر هدر للحق المواطنة


عكســـة :- انتو المنبر ده ما فيهو قانونيين ينورونا ان شاء الله يقولوا لي كلامك ده فارغ


مودتي

الرحـــال

الاخ العزيز ابوالريش ،،، تحياتي

Quote: وبرضو يا اشرف، السؤال يمكن يوجـه لأى شخص.. هل لو كل من هب ودب قال ليك انت ما سودانى تمشى تشتكيـه؟... لا أعتقـد انها جريمـة قانونية، ولا إشانـة سمعـة

تماما لهذا الغرض فتحت هذا البوست لكي استنير واقف على ارضية معرفية ملمة من ناحية قانونية هل يعتبر الطعن والتشكيك في النسب والانتماء جريمة يحاكم عليها القانون لذلك وددت من اهل القانون افادتنا ان كانت هنالك مادة تقاضي وتجرم من يتلفظ وينكر على الاخرين شراكتهم في هذا الوطن نسبا وانتماءا .. لماذا لا يكون الوطن بمقام الاب وهنالك من يطعن في نسبك لهذا الاب ؟

Quote: كيف يعنى إشانـة سمعـة أن تتهـم بأنك إرترى؟!! هل إرتريـا شئ رديئ.. هـذه ايضـا يا اشرف فيها عنصريـة ضـد الشعب الإرترى زمرفوضـة..

إشانة سمعة للشخص نفسه وليس لارتريا لانها غير معنيةانما المعني هو الشخص المجرد من حقوقه الوطنية والتي من ضمنها ان له حق ان يكون وزيرا وله كافة الحقوق في هذا الوطن وبالتالي اشانة سمعة جاءت من باب التقريب لمن يقذف بشئ او تهمة اجنبي ينتمي لدولة ما ويتقلد منصبا سياديا في بلد آخر وبالتالي كان المحور هذا ومربط المعرفة القانونية لمن رمي بهذا وراي القانون شنو ؟؟ اما عن اريتريا وشعبهايزيدهم فخرا ان اريتريا كانت ملهمة لكافة حركات التحرر حيث ذابت فيها كافة الانتماءات الدينية والعرقية وعلى الرغم من ديكتاتورية اسياس وقبضته الحديدية ولكن لم يسقط في مستنقع العرقية والقبلية وثقافة اهل المرتفعات ... اريتريا حكومة ومعارضة نموذج حي للتعايش بين الاديان والثقافات والاعراق ويحلو الحديث عن اريتريا على لسان الاستاذ المحامي غازي سليمان او الباحث محمد أبو القاسم حاج حمد السوداني الذي اصبح مستشار للرئيس الاريتري اسياس افورقي
اخي ابوريش ارتريا لا يعرف قيمتها من السودانيين إلا من تعايش معها ارضا او انسانا لذلك لا تحمل الكلمات بعدا غير ما هو مقصود به فحتى وان كان الوزير حادثة منسوب لمصر التي هي اخت بلادي يا شقيقة برضو اضعها في خانة اشانة السمعة وتجريد نسب فارتيريا لم تكن موضع للنقاش في البوست او نسب منبوذ انما ذكرها جاء بسبب لن الوزير منسوب اليها كأجنبي وليس سودانتي من اصول ارترية وبالتالي ينطبق على وزير الداخلية ما ينطبق على اي احد يطعن ويشكك في جنسيته حتى ولو كان من الاصول التي يعتد ويعتز ويتمناهااصحاب الاقصاء ووتجريد الاخرين من المواطنة والحقوق

مودتي

الرحـــال

Quote: Salih Ibrahim بلدنا دا فيها ناس عنصريين واقصائيين بالفطرة...

تعليق فيسبوكي من الاخ صالح ولك التحية ... وحقيقة مشاكل السودان كلها بسبب الاقصاء ايا كان نوعه سلطة... ثروة .. عرق ... دين


مودتي


الرحـــال

هل هنالك مضابط تمنع مثل التفلتات التي يتبادلها السودانيين حول اصول ومواطنة بعضهم البعض وماهو القانون ومادته التي تحكم في مثل هذا المشكل ؟؟

اليس من بينكم من يفتي بخلفية ومصدرية قانونية؟



مودتي


الرحـــال

منتظرين راي القانونيين في الحتة بتاعت واحد يقول للتاني انتا اجنبي ويجرده من سودانيته وبالتالي ليس له ما على السودانيين من حقوق مثل التوظيف وغيرها من حقوق المواطنة ... هل يحق لوزير الداخلية ان يرفع دعوة قضائية على الشيخ الترابي ومن لف لفه

عكســة :- مامون حميده فعلها فهل يفعلها وزير الداخلية



مودتي

الرحـــال

اشرف ..سلامات ..

ونشكرك على البوست المهم ..

حقيقة لا اعرف الموقف القانوني من هذا التشكيك والطعن في الجنسية ..
وعلى قول ااختنا انصاف تحاسب منو وتخلي منو ..

ولكن العنصرية لم تبدأ مع الانقاذ كما يحاول البعض تبرأت ماضي الأخرين فالاقصاء واتهام الاخرين بانهم اجانب هي ثقافة متجذرة في الوعي السوداني منذ خليقة هذه الدولة تختفى وتظهر حسب الحاجة في الاستئصال المعنوى لهذه المجتمعات .

تحضرني قصة حدثت في العهد الماضي عندما سُئل احد المسئولين في جسلة خاصة عن اهمال منطقة طوكر من قبل الدولة . فقال إن الدولة لاتملك في طوكر الا العلم السوداني - في إشارة الى ان من فيها هم اجانب وليسوا بسودانيين - وقيل أن احد زعماء المنطقة عندما بلغه حديث المسئول قال في لقاء عام مخاطباً اياه (( إلا من قبئ كمنديرتك طايم وإت انقبكا آتيا ) الترجمة (( كان كده تعال طبق علمك ده ودخله في ........ك * )).


ـــــــــــــــــــــــــــ
* حسب ترجمة MBC فرع طوكر ( مؤخرتك )

فايز ،،، تحياتي

Quote: ولكن العنصرية لم تبدأ مع الانقاذ كما يحاول البعض تبرأت ماضي الأخرين فالاقصاء واتهام الاخرين بانهم اجانب هي ثقافة متجذرة في الوعي السوداني منذ خليقة هذه الدولة تختفى وتظهر حسب الحاجة في الاستئصال المعنوى لهذه المجتمعات .

اكيد لم تأتي مع الانقاذ واستوحيت عنوان البوست من حادثة شهيرة داخل الجمعية التاسيسية حدثت في 1986 م او 1987م بين نائب برلماني يمثل حزب الامة ونائب برلماني من شرق السودان ممثلا للجبهة الاسلامية (مؤتمر وطني وشعبي حينها ) ترجع القصة والحكاية اثناء مداولات ونقاشات داخل قبة البرلمان واحتد النقاش وخرج نائب حزب الامة من طوره وقال لنائب الشرق انتا ذاتك اجنبي وبما ان نائب الشرق مشهود له بالجراءة والشجاعة ترك اي حاجة مطروحة في المداولة ومسك ليك في الحتة بتاعت اجنبي دي وبالقانون وطرش ليك الراجل كلمته وساطات وترضيات عشان يتنازل عن القضية دي على مستوى الحزب والافراد

والله بالجد كده البلد دي ماجاتها البلاوي والمصائب والفتن إلا من هذا المدخل القمئ النتن مفاخرة واقصاء على الفاضي والله العظيم ونقة ومجادلات في مواضيع تا فــة جدا يعني شنو المك نمر جرى ولا ما جرى ، ويعني شنو وزير الداخلية اصلي ولا تقليد ويعني شنو نظافة الخرطوم من ضهب الضهاري ... ده هو السودان كده


مودتي


الرحـــال