Post: #1 Title: د.خضر جبريل ..مدير وقاية النباتات .. لا اضرار من الجراد لانه وصل فتران Author: بخاري عثمان الامين Date: 02-21-2013, 03:35 PM Parent: #0
فتران الواحدة دي
Post: #2 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 03:38 PM Parent: #1
كلمة وغطايتها .. مافي أضرار عشان الجراد كان ( فتران )
Quote:
رميّة أولى .. قولوا لي ( البوديك ) تسمع إذاعة أمدرمان أثناء القيادة شنو ؟ في أمان ربي وجدت مؤشر الراديو على إذاعة امدرمان وأنا أقود سيارتي في طريقي من العمل ، واللقاء كان مع مدير إدارة وقاية النباتات بوزارة الزراعة الإتحادية ، والله في الأول ( إنبسطته ) قلت الراجل عايز يملكنا معلومات جديدة ، خلونا نسمع من ( خشمو ) وياريت كان ماسمعت !! رمية تانية .. عشان نرجع بذاكرتكم شويه للوراء ، ولغير المتابعين ( الأحداث ) نعرفكم بمدير إدارة وقاية النباتات دا شنو ؟ دا ياجماعة الرجل القامت فيهو ( العكة ) .. الزول دا ياجماعة د . خضر جبريل دا ياهو ( الشالو ) وزير الدولة بالزراعة من منصبه واحالته للمعاش لبلوغه السن المعاشية ، ووزير الدولة ( شالوا ) أيام د . المتعافي كان ( حردان ) قاعد في بيته !! وكلكم طالعتم في الصحف ، المتعافي ( فك ) حردتو وجاء من ( بيتو ) ورجع الزول دا ، على الرغم من اصدار مجلس الوزراء لقرار بإنهاء عقودات الخبراء الوطنيين وتجاوزهم للسن المعاشية، مما دفع رئيس الجمهورية لإصدار قرار بإحالة د . جبريل للتقاعد. المهم ابطل المتعافي قرار وزير الدولة بالزراعة بتعيين مدير جديد لوقاية النباتات. واحد قال ( بغم ) مافي !! وقعت ليكم ( الرمية ) دي ؟ ندخل في الموضوع ، هذا المدير لادارة وقاية النباتات صاحب ( العكة ) دي كان في لقاء إذاعي عصر أمس ، سأله المذيع عن الخسائر التي تحدث عنها المزارعين المتضررين بمشاريعهم الزراعية بالشمالية ، قال لالالا مافي أي خسائر لانو أصلاً الجراد كان مسافر مرهق و ( فتران ) ماقدر يأكل أي حاجه ، فقط بيّت بهذه المزارع ، أي والله العظيم ( المغالطني ) يرجع لتسجيلات الإذاعة ، يعني الجراد وصل الشمالية و ( بيّت ) معاهم وسقوه الشاي باللقيمات ومشى .. عليكم الله دا ( تبرير ) مسؤول !! رميّة أخيرة .. ممنوع الاستماع لإذاعة أمدرمان أثناء القيادة !!
نقطة سطر جديد : أتاري الناس دي كانت حارسه قوات خليل مفتكرينهم بجوا تعبانين يبيتوا معانا ويمشوا !
بقلم : محمد الطاهر العيسابي
Post: #3 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: حمد عبد الغفار عمر Date: 02-21-2013, 03:41 PM Parent: #1
سلام يا بخاري وحمد الله على السلامة
والله فتران دي مبالغة
هو الجراد دا جاي يلعب كورة ولا يأكل
بعدين كان أخد ليهو دش كارب كدا الفتر بروح
دا أسمو الجراد الصحراوي Locust عابر القارات يمين ينزل في الشجرة بعد ربع ساعة تلقاها عيدان
الناس ديل بتكلموا بعقلية 1920 م مفتكرين السودان دا كلو أميين
Post: #4 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: جمال ود القوز Date: 02-21-2013, 03:46 PM Parent: #3
Quote: فتران الواحدة دي
السمعتو انو الجراد مانزل كلو .. عشان شاف شغلة النزول في السودان .. ماجايبة حقها .. فكبر اللفة وخدها من قاصرها .. وشتت ..
Post: #5 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: مزمل خيرى Date: 02-21-2013, 03:47 PM Parent: #3
يا بخارى وبعد ما ينجما بيحصل شنو ؟ اعتقد ان دكتور جبريل هو شقيق الزميل طارق .. اعتقد كدة فدحين ما تعصرو على الراجل شدييييد كدة
Post: #6 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 03:53 PM Parent: #3
يا حمد يا أخوي الله يكون في عون البلد وناسها ...
Quote: حيكومات تجى وحيكومات تغور تحكم بالحجى بالدجل الكجور ومرة العسكرى كسار الجبور يوم باسم النبى تحكمك القبور
Post: #7 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: Mohamed Foto7li Date: 02-21-2013, 04:00 PM Parent: #6
ههههههههههههههههه شر البلية ما يضحك
سلام بخاري
Post: #8 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: فايزودالقاضي Date: 02-21-2013, 04:06 PM Parent: #7
Quote: لا اضرار من الجراد لانه وصل فتران
هو جاى ياكل ولا جاى يجامع ..
يابخارى كيف بالله مع فتر الحادث ؟
الف سلامة ..
Post: #9 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 04:39 PM Parent: #7
Quote: السمعتو انو الجراد مانزل كلو .. عشان شاف شغلة النزول في السودان .. ماجايبة حقها .. فكبر اللفة وخدها من قاصرها .. وشتت ..
جمال ود القوز ... قلت لي كبر اللفة ، والله بالغ معانا
__________________________________
القوز دي حقتنا ( الديم ) ولا كوستي ؟
Post: #10 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: Haju Muktar Date: 02-21-2013, 04:46 PM Parent: #9
السودان تحفة الجراد فتران ومالابس واقي من الفتر ليه يكون ده جراد ابيض
ياجراد الوادي يا رااااااحل
مساءك سعيد اوع البودا الدوده خرابت المسور
Post: #11 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: معروف حمدين Date: 02-21-2013, 05:03 PM Parent: #10
يازول الجراد شتت حردان عشان صاحبنا بتاع ( الوقاية ) ما كان فى الأستقبال وسمعت الجراد يطنطن ( والله ما ناكل إى حاجة ) أصلوا الناس ديل ما كريمين .. يلا نشتت وهب قاموا شتتو .. ــــــــــــــــــــــــــــــــــــــــــــــــــــــــــــــ بس دى كل القصة !!!
Post: #12 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 05:04 PM Parent: #9
Quote: يا بخارى وبعد ما ينجما بيحصل شنو ؟
والله يا مزمل الجراد دا ما مضمون فشنو الناس تعمل ساتر ..
Quote: اعتقد ان دكتور جبريل هو شقيق الزميل طارق .. اعتقد كدة فدحين ما تعصرو على الراجل شدييييد كدة
والله كان كدي يا داب العصر بدأ ...
Post: #13 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: Hani Arabi Mohamed Date: 02-21-2013, 05:06 PM Parent: #12
الحيحصل على موسم الفول والقمح شنو ؟
Post: #14 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: محمد البشرى الخضر Date: 02-21-2013, 05:13 PM Parent: #13
احيانا الصمت أو الإمتناع عن التعليق أو حتى قولة ما عارف أفضل من الكلام الما راكب عدله دا
تحياتي بخاري و حمدا لله ع السلامة
Post: #15 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: طاهر قرشي Date: 02-21-2013, 05:13 PM Parent: #13
و الله كان فتران ما عارف !!
Post: #16 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 05:32 PM Parent: #15
Post: #17 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 05:35 PM Parent: #16
Quote: شر البلية ما يضحك
فعلا والله يا محمد
Post: #18 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 05:44 PM Parent: #17
Quote: يابخارى كيف بالله مع فتر الحادث ؟
ود القاضي اكوبام
والله من فتر الحادث راقد ( جــــــــرادة ) بس
Post: #19 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 06:08 PM Parent: #18
Quote: السودان تحفة الجراد فتران ومالابس واقي من الفتر ليه يكون ده جراد ابيض
ياجراد الوادي يا رااااااحل
مساءك سعيد اوع البودا الدوده خرابت المسور
يا هجو ربنا يكفينا شر الجرادة الفترانة
Post: #20 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 06:10 PM Parent: #19
تقرير اسامة في قناة الجزيرة اتكلم عن اضرار بالغة
Post: #21 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: EL fahal Abdelatif Date: 02-21-2013, 06:44 PM Parent: #18
دفاعا عن هذا الوزير الغبيان..الغلبان.. لا يستطيع ايتها منكم اثبات ان الجراد ما كان فتران.. تانيا..الجراد نام بايت القوا ومغبون فى مزارع مهجورة قش ما فيها.. تالتا..الجراد جماعة غزو زيهم وزى اى مجاهدين مع اختلاف الغرض.. ..ولربما كان الجراد فى طريقه لمالى لنصرة المجاهدين ..او لم تشارك القرود مجاهدى السودان فى حرب الجنوب ..او لا تعقلون? رابعا..المرة الجاية الجراد ما بيمر بشمال السودان لانعدام الزوادة فى الطريق الى ليبيا او السعودية. خامسا..ادارة وقاية النباتات..ستعلق لا فتات باسهم توجه الجراد جنوبا نحو الجزيرة وما شابه ذلك.. حتى لا يصيبه ضرر او ضرار فى رحلته. سادسا.. ادارة وقاية النباتات ستقوم باقناع الجراد باكل النيم لانه متوفر كل العام.. وسوف لن نسخر من الجراد بانو اكل نيم.. بمناسبة النيم ..اقترح على هذا الوزير الغلبان تبنى فكرة خداع الجراد باكل النيم .وسيكون هذا انجاز سيادته فى هذا العهد الغيهوب..
Post: #22 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 07:19 PM Parent: #21
Quote: لا يستطيع ايتها منكم اثبات ان الجراد ما كان فتران..
والله يا الفحل صحي صعبة علينا ... لكن شن قولك لو جبنا شهادة المتضررين ؟
Post: #23 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بدر الدين احمد موسى Date: 02-21-2013, 08:09 PM Parent: #22
بخاري
سلام و سلام و سلام
و انت النشاط عليك شنو بعد الحادث ما ترقد لك يوم يومين نقاهة و تجي لقرف الحكومة ههههههههههه
الجراد فتران? الجراد الصحراوي ميزتو انه بسافر مسافات طويلة, و لما ينزل بنزل جيعان, و بعد داك عينك ما تشوف الا النور.
--- يا حمد انت مدير الوقاية دي دفعة سنة كم دا? اكيد ما اندرش في الكلية!
--
Post: #24 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-21-2013, 08:31 PM Parent: #23
يا زميل *
ياخي دي محن وأنا ممنوع من الحركة أها لميت ليك في متابعة أخبار البلد
كل مرة تقول دا اغرب تصريح يطلع لك واحد تاني وخد عندك :-
والي سنار القال الكهرباء قطعت بسبب ضب كبير دخل في المفتاح .
Post: #27 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-22-2013, 10:07 AM Parent: #26
Post: #28 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-22-2013, 12:35 PM Parent: #27
بالمناسبة والي سنار دا قبل كده معلقاً علي اشتباكات حصلت في الاستاد عندهم بين الجيش والبوليس ووقعت فيه حيطة الاستاد قال :
دي عين وأصابتنا
Post: #29 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: osman righeem Date: 02-22-2013, 01:57 PM Parent: #28
اها كده كويس الراجل قفل تلفونو
كنا عايزين نستفسر من خضر بس فتران جيعان او شبعان مع انو زمان بتاع الزراعة قال الجراد ده زي الانقاذ اصلا ماب بشبع يأكل و يخره في نفس الوقت
Post: #30 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-23-2013, 05:16 PM Parent: #29
Quote: اها كده كويس الراجل قفل تلفونو
يا ابو عفان .. ديل ما نحن دا الجراد والبباري الجراد بقفل تلفونو
Post: #31 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-24-2013, 08:06 AM Parent: #30
Quote: اعتقد ان دكتور جبريل هو شقيق الزميل طارق
طلعوا أخوان ما أشقاء
Post: #35 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: مزمل خيرى Date: 02-25-2013, 12:32 PM Parent: #31
Quote: طلعوا أخوان ما أشقاء
كان كدى رشو رشاهو البلا
Post: #32 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: ادم شحوتاي Date: 02-24-2013, 08:27 AM Parent: #30
بخاري سلامتك يا اخي ما تشوف شر
Post: #33 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-24-2013, 09:13 AM Parent: #32
Quote: د. محيي الدين تيتاوي
فجأة وبلا مقدمات أو إنذارات أو حتى إشارات هبَّت على ولايتي نهر النيل والشمالية أسراب من الجراد الصحراوي وكادت تفتك بالموسم الشتوي لولا لطف الله وحسن تدبير القائمين بالأمر وسرعة استخدام آليات المكافحة والإبادة بالوسائل المختلفة من رش بالمبيدات على الأرض أو استخدام الطائرات.. ولولا السرعة في التحرك ومداركة الأمر لكانت تلك الأسراب قد قضت على الأخضر واليابس من المنتجات التي كادت تؤتي أكلها وتلك التي في طور البروز مثل النخيل.. ورغم ذلك لم تنجح بعض المحاصيل من الأذى ولكن نحمد الله كثيراً أن وقف الأمر عند هذا الحد ولم يتطور كثيراً، وأن الجراد نفسه كان منهكاً ومتعباً من طول مشوار الطيران من مصادر تحركه حتى بلوغ النيل واصطياد المزروعات.
ومعلوم أن حركة الجراد هذه ترصد دائماً من على مسافات بعيدة، وهناك إنذارات مبكرة بين الدول والمناطق ليتم الإعداد لمواجهته في الصحراء وإبادته ولا ندري من أين جاءت هذه الأسراب ولماذا لم تخطرنا الدول التي مرت بها هذه الأسراب حتى وصلت النيل والنخيل والمزروعات.. أم أن التكتم على حركة هذه الأسراب أيضاً جزء من المؤامرة علينا مثلما جرى التكتم على الغارة الإسرائيلية على مجمع اليرموك؟! ومن المفترض أن تقوم وزارة الزراعة ووقاية النباتات بالتحقيق في هذا الأمر الخطير الذي كان يستهدف إبادة محاصيل العروة الشتوية بأكملها من قمح وفول وخضروات، بل محصول التمر وهو في بدايات إثماره.
هجوم غادر آخر.. قد لا يدرك البعض أبعاد هذه القضية ولا الآثار الضارة التي تعود على البلاد من فقدان ثروات عظيمة وإنتاج وفير لا يقل في قيمته من مستخرجات البترول أو الذهب أو الثروة الحيوانية.. وهنا تكمن الخطورة، فلا بد للمعنيين الكشف المبكر عن احتمالات وجود أسراب أخرى قادمة.
ولا استبعد كثيراً أن تكون للعدو الأول والأخير لبلادنا وشعبنا ومنتجاتنا إسرائيل وأعوانها في إطلاق هذه الآفة على بلادنا بهدف إفقارنا وضرب إنتاجنا من الغذاء خاصة القمح والفول والبقوليات والتمر.. بل أن آثار الرش قد تصيب الإنسان نفسه.. ولهذا فإن هذا السرب اللعين الذي هاجم الشمالية هو بمثابة إنذار مبكر ينبغي أن نضع أصابعنا على زناد البنادق.. ونتحسب لأسراب أخرى وبلاش نقوم بعد كده.. ونسأل المولى عز وجل أن يكفينا شرور البلايا جميعها.. آمين
قوم لف يا تيتاوي
Post: #34 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-24-2013, 09:15 AM Parent: #33
Quote: بخاري سلامتك يا اخي ما تشوف شر
تسلم عمدتنا .. ظروف وتعدي والحمد لله جات خفيفة
Post: #36 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-25-2013, 01:41 PM Parent: #34
Quote: كان كدى رشو رشاهو البلا
يا مزمل كان الرشه حلاتها في الاشقاء بالذات لطارق
ياخي عنده شقيقه أسمه لطفي كلما ما العب معاه ويست
بديه السيك ويقوم يشتت .
Post: #37 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-25-2013, 01:45 PM Parent: #36
يا أخوانا دكتور بشري قمر قال لي كلام غريب
قال في دارفور في ناس أسمهم الدمبارة ومفرده دمباري
وله قدرة في توجيه الجراد ... زول من الناس العندهم تجربة
يجئ يورينا يا شباب
Post: #38 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-25-2013, 02:07 PM Parent: #37
Quote: ظاهرة الدمباري :- الدمباري صفة لشخص معين من عائلة معينة من بيوت الفور ، يولد وفي يدة علامة ووشم برسم الجرادة ، وياتي دوره حينما يهحم الجراد البلاد فينادي في الناس فيجتمع عليه الاهالي ويدعوهم لاستخراج محصول الدمباري وهو جعل فرضه النظام العرفي الشائع في دارفور النابع من قانون دالي الذي ينظم كل مجالات الحياة ويماثل شهرته شهرة قانون حامورابي الا ان قانون ( دالي ) له قدسية خاصة يطلق عليها في المجتمع المحلي كلمة ( عادينقا ) وربما تعود اصل الكلمة الي عاد الذين جاء ذكره في القرآن ، و قيل عنهم انهم اصحاب ارم ذات العماد التي لم يخلق مثلها في البلاد ولقد قال : بعض العلماء ان ارم ذات العماد قد وصلت شاوا و بعدا في الحضارة والتقدم لم تبلغة امة من الامم حتي يومنا هذا ، ويعتقد بعض الباحثين ان ارم ربما دفنت الصحراء الواقعة شمال دارفور بكنوزها واثارها وحضارتها .
ونرجع لقصة الدمباري الذي يقوم بجمع محصوله ، حينما يظهر الجراد في السماء فيقوم برفع عصاه التي ظل يتوارثها اجداده ابا عن اب الي السماء ويتلوا بعض التعاويز ويشير بالعصاية الي جهة من الجهات فيتبع الجراد اشارته حتي يخرج باسرابه الي خارج المملكة فيشير اليها اشارة فتنزل في الصحراء في موقع محدد ويقوم الاهالي بدفنها في الصحراء .
وفصة الدمباري لها بعد تاريخي ديني وهي قريبة الصلة بقصة سيدنا موسي عليه السلام وعصاه التي تحدي بها فرعون مصر وكان من دلالة نبوئته في بنئ اسرائيل عدة معجزات من ضمنها اخراج الجراد من مصر ( بواسطة معجزة العصاء ) وشق البحر وتحول العصاء الي ثعبان ومن المعروف ان عبادة الافعي وسحرها قد انتشر في مصر الفرعونية التي كانت رمز تاجها الافعي الكوبرا ذات الرأسين ؟؟ وهي علامة التاج الملكي الفرعوني .
يتبع 00 قصص من التراث الشفاهي بدارفور بقلم / الاستاذ / ابراهيم محمد اسحق كاتب صحفي و باحث
Post: #39 Title: Re: د.خضر جبريل ..مدير وقاية النباتات .. لا اضرار من الجراد لانه وصل ف Author: بخاري عثمان الامين Date: 02-26-2013, 02:50 PM Parent: #38
Quote: ولا استبعد كثيراً أن تكون للعدو الأول والأخير لبلادنا وشعبنا ومنتجاتنا إسرائيل وأعوانها في إطلاق هذه الآفة على بلادنا بهدف إفقارنا وضرب إنتاجنا من الغذاء خاصة القمح والفول والبقوليات والتمر.. بل أن آثار الرش قد تصيب الإنسان نفسه
والله يا تيتاوي لو صحي اسرائيل قاصده تجوعنا نبدأ نفكر انها هي من ارسلتكم للسلطة فقد نجحتم في المهمة ايما نجاح .
