السودان الآن في قلب معادلة صفرية **

الحاكمون يعلمون أن ليس بيدهم حلول يمكن أن تنتج استقرارا في البلاد ..
فطفقوا يعملون بمقولة عليّ وعلى أعدائي (عنو ما فضل فيها نفاخ نار) ..
.
.

والمعارضة المدنية مدركة بالمخاطر التي تحيق بالوطن جراء سياسات الحكومة ..
مع ذلك تقف عاجزة عن استنفار الشعب إلى صفوفها ليتولى بنفسه تقرير مصير وطنه ..
.
.

أما المعارضة المسلحة ..
فهي من جهة تلتحف بثوب حق مشروع ..
غير أن وسيلتها في الطريق إلية تسند ظهر نظام الحكم ..
وتقضم في كل يوم جديد من أمل بقاء الوطن ..
فالضرب الذي لا يميت خصمك يقويه ..
المعادلة صفرية بالوجهين وخاسرة على الصعيد الشعبي ..
.
.

والشعب بعمومه مدرك لما يجري حوله ..
ويعلم أن صراع الثيران على مائدته يحطم أوانيه ..
مع ذلك يتلفت وينظر ذات اليمين وذات اليسار دون أن ينظر لنفسه .
كل ذلك والوطن يغرق..
يغرق ..
مقتربا من قاع النهاية..
.
.

نادوا معاي ..

يا أهل الجفرة
اكشفو الشفرة
يمكن كشفها يغطي الحفرة.

والهي يا أستاذ محمد علي المعادلة بتاعتك دي أصلو ما صفرية
المعادلة بتاعتك قاده وبي المايناص كمان

الطرف الاول من المعادلة
حكومة "ما ببتوصف" فاشلة و سجم رماد
معارضه وهم
الحركات بتاعين حركات

الطرف الثاني من المعادلة
السودان كلو يوم ماشي بالناقص

غايتو من المستحيل الناتج من المعادلة دي يكون صفر اكيد بقى بالماينص
مايناص إلا ما نهاية كمان

غايتو ربنا يعين السودان

أستاذي محمد على

شكرا على وضع اليد على الجرح

النظام فشل في تحمل مسؤولية الحكم بما يرضي العباد ويصون البلاد

المعارضة فشلت في الإرتقاء بما يكفي لإستقطاب الشعب ، ثم إزالة النظام

الشعب حاله كحال المكتولة ....ما بتسمع الصايحة ... قاعد يلولح في رجليهو ..وترانا معاهو نلولح .

الله هونيني ....حقت أدروب ديك


شكرا ليك يا ملك ...وعذرا على الكلام المتشائم ...

أخي الأستاذ إبراهيم ..
تحياتي ..

Quote: النظام فشل في تحمل مسؤولية الحكم بما يرضي العباد ويصون البلاد المعارضة فشلت في الإرتقاء بما يكفي لإستقطاب الشعب ، ثم إزالة النظام الشعب حاله كحال المكتولة ....ما بتسمع الصايحة ... قاعد يلولح في رجليهو ..وترانا معاهو نلولح .

أحيانا كثيرة ينتابني أحساس بأن من وضعوا مناهجنا الدراسية على زماننا ..
كانوا يقرؤون لنا المستقبل ..
ترى هل نسي أهل الإنقاذ أم أنساهم الله ..
دعاء شاعر نشيد منقو زمبيري ..
منقو قل لا عاش من يفصلنا ؟
ثم تأمل قصيدة برز الثعلب يوما لترى شخوصها من حولك ..
والعجب العجاب مغزى تمثيلية عابد الذهب عندما تشاهد أبطالها يتنافسون فوق مسرح حياتك اليومية !

Quote: عذرا على الكلام المتشائم

التشاؤم ياسيدي مرحلة نتمنى بلوغها ..
فلو بلغناها لانحصرت خياراتنا بين أن نفض ايدينا ..
أو نغرزها بقوة لنقتلع الطين ..
نحن لازلنا في دائرة اللا مبالاة و أنا مالي ..
مشكور على المداخلة.

الأستاذ محمد علي الملك تحية و تقدير.
قريبا من مداخلتك هذه، قريبا من موضوع البوست.
تراهم أيضا حذفوا "زارع الحقل في البكور"
و حذفوا "هيهات هيهات لا جن و لا سحرة"
و حذفوا "في القولد ألتقيت بالصديق"

فأفشلوا الزراعة و السكة حديد و النسيج الإجتماعي.

الحال اصعب من ان يوصف ولعل وصفها بالمعادلة الصفرية لهو أكثر وصف جائز!

وخايفة بكرة الصفرية تبقي وهمية وكل السلبيات بعد ماكانت في الماضي بعض من نجاح نجدها كانت بعض من أوهامنا!
في كل يوم تزداد قناعتي بسخف وغباء كل الموقف..
سخف يعنينا ولذلك يؤلمنا..
معقولة بس..مافي حتي قيادة تنظم صفوفنا المبعثرة؟؟
معقولة مافي "تجمع" حتي ولو صغير..متجانس ومنطقي قادر علي أن يجمعنا من حولنا؟؟
وكل يوم بيمر يصبح معه الوضع أسخف..
تنظيمات سياسية جديدة وأخري منشقة..ليس بينهم إتفاق..ثم شتائم ولا شيء آخر..
حركات مسلحة في فترة قريبة كانت تقرر أمر تصير مسلحة بحلول الصباح ظانة بأنها الأقدر علي حل المشاكل ببضع بنادق..
الا انها لا تكون الا عددا آخر في صعوبة التوفيق المرحلية..
عدو الأمس يهدد من كان معه ويأتي للمعارضة وليس في يده ما يزيد البلاء فقط زيادة للعدد دون النوعية..



وخلاص هي الدنيا ذاتها قربت تنتهي خليك من السودان الانتهي!

صورة سوداء شديد يا مولانا!

الاخ محمد ،،، تحياتي

انا متشائم جدا جدا والسيناريو المتوقع للسودان نهاية مأساوية بفعل بنيه ... انعدام الثقة والمصداقية في كافة التعاملات .. بروز العنصرية والقبلية بصورة صارخة جدا ... انهيار عميق في الاخلاق والقيم ومتمثل في الكم الهائل من جرائم الاغتصاب للاطفال وجرائم الزنا وتداعياتها من مواليد حديثي الولادة في قوارع الطرق ومراكز الايواء تفسخ الشارع الكاسي العاري وظاهرة التكفير والخروج عن الملة.. جريمة منظمة لاختطاف الاطفال وتجارة البشر والاعضاء .. انعدام الامن ليلا في شوارع العاصمة كل هذا مع الحرب الاهلية ما بين الحكومة والمعارضة المسلحة ولغة التعالي وعدم الاعتراف بالاخر .. الحاصل ده سوف يقود الى فوضى عارمة اكبر من الفوضى الحالية القوي فيها يأكل الضعيف ونشهد بلدا يغيب عنها القانون


مودتي

الرحـــال

المؤسف أن كل السناريوهات سوف تؤدي الى نهر من الدم ...في وجود هذا النظام أو غيابه.

ولدنا محمد يوسف ..
إن شاء تكون المقاصرابي حفيد العمدة الكبير ..

Quote: المؤسف أن كل السناريوهات سوف تؤدي الى نهر من الدم ...في وجود هذا النظام أو غيابه.

لو تحرك الشعب وتخلى عن لا مبالاته ..
وتحركت القوي السياسية بروح وطنية متجردة ..
وتولت جموعهم زمام المبادرة ..
سوف نخسر بعض الأرواح ولكن سنبقي على الوطن.
مشكور على المداخلة.

Quote: ولدنا محمد يوسف .. إن شاء تكون المقاصرابي حفيد العمدة الكبير ..

لا والله يا استاذ نحن اولاد عمومتكم من المحس الشقيق
ههههههههههه

مشكور إبني محمد يوسف على التوضيح ..
برضو أقدر أقول فراستي لا غبار عليها ما دام طلعت من أشقائنا المحس.
مرحبابك.

أشرف يا رحل هموم الوطن..

Quote: انا متشائم جدا جدا والسيناريو المتوقع للسودان نهاية مأساوية بفعل بنيه ... انعدام الثقة والمصداقية في كافة التعاملات .. بروز العنصرية والقبلية بصورة صارخة جدا ... انهيار عميق في الاخلاق والقيم ومتمثل في الكم الهائل من جرائم الاغتصاب للاطفال وجرائم الزنا وتداعياتها من مواليد حديثي الولادة في قوارع الطرق ومراكز الايواء تفسخ الشارع الكاسي العاري وظاهرة التكفير والخروج عن الملة.. جريمة منظمة لاختطاف الاطفال وتجارة البشر والاعضاء .. انعدام الامن ليلا في شوارع العاصمة كل هذا مع الحرب الاهلية ما بين الحكومة والمعارضة المسلحة ولغة التعالي وعدم الاعتراف بالاخر .. الحاصل ده سوف يقود الى فوضى عارمة اكبر من الفوضى الحالية القوي فيها يأكل الضعيف ونشهد بلدا يغيب عنها القانون

إذاً هي الفوضى التي تقود حتما لإعادة صياغات تاريخية وجغرافية ..
وتلك استراتيجية رشحت بها تحليلات عديدة تدور في فلك الدعوة لصياغات إقليمية جديدة..
بكل من أفريقيا والشرق الأوسط ..
المحير أن الشعب السوداني يعي تماما ما يساق إليه ..
مع ذلك يبدو مستسلما لمصيره..
مشكور على المشاركة القيمة.

سلام اخي الملك

Quote: كل ذلك والوطن يغرق.. يغرق .. مقتربا من قاع النهاية..

هذا هو الحال من غير زيادة ولا نقصان
والنتيجة صفر كبير لا احد يكسب

أخي الشامي ..
تحياتي..

Quote: هذا هو الحال من غير زيادة ولا نقصان والنتيجة صفر كبير لا احد يكسب

كما قلت الصفرية مرحلة انعدام رؤيا وتخبط في ظلمات لا يعرف وجهتها ..
والشعب مصر يطفي النور ..
ربك يهونا.

تحياتي أستاذة منى ..

Quote: الحال اصعب من ان يوصف ولعل وصفها بالمعادلة الصفرية لهو أكثر وصف جائز! وخايفة بكرة الصفرية تبقي وهمية وكل السلبيات بعد ماكانت في الماضي بعض من نجاح نجدها كانت بعض من أوهامنا! في كل يوم تزداد قناعتي بسخف وغباء كل الموقف.. سخف يعنينا ولذلك يؤلمنا.. معقولة بس..مافي حتي قيادة تنظم صفوفنا المبعثرة؟؟ معقولة مافي "تجمع" حتي ولو صغير..متجانس ومنطقي قادر علي أن يجمعنا من حولنا؟؟ وكل يوم بيمر يصبح معه الوضع أسخف.. تنظيمات سياسية جديدة وأخري منشقة..ليس بينهم إتفاق..ثم شتائم ولا شيء آخر.. حركات مسلحة في فترة قريبة كانت تقرر أمر تصير مسلحة بحلول الصباح ظانة بأنها الأقدر علي حل المشاكل ببضع بنادق.. الا انها لا تكون الا عددا آخر في صعوبة التوفيق المرحلية.. عدو الأمس يهدد من كان معه ويأتي للمعارضة وليس في يده ما يزيد البلاء فقط زيادة للعدد دون النوعية.. وخلاص هي الدنيا ذاتها قربت تنتهي خليك من السودان الانتهي! صورة سوداء شديد

قربت اضيف لختام مداخلتك كلمة ( شديدة القتامة ) ونتم الناقصة..
لولا فسحة من رجاء فرج الله ..
هي السكة ذاتا لوما وصل الزول نهايتها ما برجع منها..
مشكورة ياستي على المشاركة المعبرة.

Quote: والهي يا أستاذ محمد علي المعادلة بتاعتك دي أصلو ما صفرية المعادلة بتاعتك قاده وبي المايناص كمان الطرف الاول من المعادلة حكومة "ما ببتوصف" فاشلة و سجم رماد معارضه وهم الحركات بتاعين حركات الطرف الثاني من المعادلة السودان كلو يوم ماشي بالناقص غايتو من المستحيل الناتج من المعادلة دي يكون صفر اكيد بقى بالماينص مايناص إلا ما نهاية كمان غايتو ربنا يعين السودان

الأخ عمار ..
تحياتي ..

يبدو أن نتيجة تشريحك لجسد الوطن كانت جاهزة في انتظار من يحضر للاستلام ..
مشكور على المداخلة ..
ربنا يلطف .

الأخ جعفر محي الدين ..
تحياتي ..

Quote: الأخ الفاضل محمد علي طه السلام عليكم ورحمة الله وبركاته ... نعم المعادلة صفرية وتكاد تكون النتيجة النهائية صفر متناهي في الصغر ... الحكومة لم يبقى في جعبتها سوى إدارة البلد بنظام الإدارة بالأزمات فلحل كل أزمة لابد من إيجاد أزمة جديدة وفي هذه الحالة سيكون الحل وبالاً وستزداد الأزمات عددا. والشعب كما قلت هو المخنوق الأخير ولكنه يتلفت لمن ؟ لا أحد يدري .

صدقت ..
مع أن الشعب السوداني خلافا لكل الشعوب من حوله ..
صنع مبادرات تاريخية رائعة ..
وضعته في مصاف الشعوب ذات النظرة المتقدمة للحياة السياسية ..
بس الله يجازي الكانوا سبب فيما بلغة الآن من (محقة ) ..
مشكور على المشاركة من الفيس.

أستاذنا محمد علي طه الملك....تحياتي وتقديري..

وهاك الحل...


السودان + الجنوب = 1 صحيح

بطرح (1) من الطرفين

1-السودان + الجنوب = 1 – 1 (صاح كدا)؟؟

طيب معناتا:

- السودان + الجنوب = صفر (صاح كدا)؟؟

معناتا:

- السودان = - الجنوب (والله صحي)...

عشان كدا شوفوا لينا طريقة للوحدة بأي طريقة..


جبر دا ولا موش جبر

يا متعلمين يا بتوع المدارس..

وفالكم خير إن شاء الله..

..

Quote: المعادلة صفرية بالوجهين وخاسرة على الصعيد الشعبي ..

سلآمات يا ود الملك.

الحكاية والله بقت زي الرماي المشربك في بعضو ومكرّن
في السار، أكان قلعتو من السار ما بتقدر تفكو من الشربكة.


يظل العشم في رب العباد أكبر من
التعقيد الحاصل.


مودتي...

ود المدير يا بتاع البدع ^ - ^

Quote: الحكاية والله بقت زي الرماي المشربك في بعضو ومكرّن في السار، أكان قلعتو من السار ما بتقدر تفكو من الشربكة.

كلامك جبتو بى مركب ماهو طوف ..
آ لمكضب تعال أقرا شوف .
كل الود على المرور.

Quote: السودان + الجنوب = 1 صحيح بطرح (1) من الطرفين 1-السودان + الجنوب = 1 – 1 (صاح كدا)؟؟ طيب معناتا: - السودان + الجنوب = صفر (صاح كدا)؟؟ معناتا: - السودان = - الجنوب (والله صحي)... عشان كدا شوفوا لينا طريقة للوحدة بأي طريقة.. جبر دا ولا موش جبر يا متعلمين يا بتوع المدارس..

الأخ محمد مصطفي ..
تحياتي ..

جبرونا الناس ديل ياخي ..
جبرونا ؤفرقو دمنا..
عمليتك دي الخوارزمي ما فكر فيها
دمت مسرورا.

الاخ العزيز محمد على طه الملك
سلام
الشعب سجل 18 مليون في انتخابات 2010 اداة اتغيير التي عرفها الشعب من 1955 وطلعت الانجليز
وخزلتهم النخب
وانفصل الجنوب
وتحلجت الانقاذ
والمعارضة القديمة(اعادة التدوير) اصلا محلوجة
والربيع الحولنا ده كل رجع للانتخابات الفارقناها من 1955 تحت الاستلاب الوافد من الخارج وحتى الان ناسنا لافين ورا الناس الديل ودولتهم المركزية الشمولية والزعيم ولا صوت يعلو فوق صوت المعركة
والسودان لا ناقص رؤي ولا ناقص برنامج من 1955
فقط شعب عملاق يتقدمه الاقذام
واتحداهم يخطو الصندوق في انتخابات مبكرة باشراف دولي ويعيدو انتخابات 2010
عشان نشوف منو البمثل الشعب فعلا
وزمان جون قرنق العبقري قال انا بمثل الاغلبية
ولحدي هسه ناس ما فهمو دي
يا عزيزي
من 2005 في خارطة طريق واضحة اوضح من الشمس-دستور وضح كل شيء
ناس الدغمسة المتعودين على الارتجال وانعدم المؤسسية سايطين البلد ساكت على الفاضي
والحديث ذو شجون
لكن سنن الكون ماضية
والانقاذ دي انتهت
وحتنهار من الداخل براهاا

الحكومة التي تحكمنا بذات الفكرة ،
وذات الفريق ؛
وصلت لطريق مسدود ...
والان كل من في الفريق ، بقى في طقوقو دا ،
ماتت الفكرة ،
وتصدع الفريق ؛
واصبح كل واحدا فيهم فريقا ،
بلا مدرب اذن
ولا قائد ملهم ،
ولا كاريزما
ويحزنون .....
المعارضة المسلحة تعتقد واهمة ان النيران تسقط هذا النظام المتهالك
ولكنها من حيث لا تحتسب ، تطيل امده
استراتيجية الحرب المفتوحة وحرب المدن ، بلا سند شعبي ،
لن تصمد في مدينة ، ولن تصل الخرطوم ....
السوداني بطبعه لا يحب الدم ولا النار ،
ولا قتل الاخر وان اختلف معه ...
ممكن ان يهتف السوداني مطالبا بالتغيير ، وقد يموت وهو يعلم ذلك
وممكن ان يخرج الشارع ويهتف ،
ولكنه لا يحمل سلاحا ليقتل اخاه المهمش الاخر ،
يعرف ان هذا ليس عدوه ، عدوهو الحقيقي محصن ، وبعيد ، ومرفه ...
لا مناص امامنا اذن من الثورة الشعبية السلمية ،
قوامها كل الشعب ، لتغيير النظام ...
الظروف الموضوعية الان مواتية اكثر من اي وقت مضى للتغيير
خروج الشعب كله للشارع ، والتغيير باقل دم
وهذا الذاتي في الامر .....
هذا هو التحدي امام الطلائع ، والقادة ، والمستنيرين
واصحاب الفكرة والابداع والخيال
................................
الاستاذ محمد طه الملك
هذه هي افكارك ، بصيغة اخرى
وتسلم يا ملك

الأخ عبد المنعم الطيب ..
تحياتي ..

Quote: الحكومة التي تحكمنا بذات الفكرة ، وذات الفريق ؛ وصلت لطريق مسدود ... والان كل من في الفريق ، بقى في طقوقو دا ، ماتت الفكرة ، وتصدع الفريق ؛ واصبح كل واحدا فيهم فريقا ، بلا مدرب اذن ولا قائد ملهم ، ولا كاريزما ويحزنون ..... المعارضة المسلحة تعتقد واهمة ان النيران تسقط هذا النظام المتهالك ولكنها من حيث لا تحتسب ، تطيل امده استراتيجية الحرب المفتوحة وحرب المدن ، بلا سند شعبي ، لن تصمد في مدينة ، ولن تصل الخرطوم .... السوداني بطبعه لا يحب الدم ولا النار ، ولا قتل الاخر وان اختلف معه ... ممكن ان يهتف السوداني مطالبا بالتغيير ، وقد يموت وهو يعلم ذلك وممكن ان يخرج الشارع ويهتف ، ولكنه لا يحمل سلاحا ليقتل اخاه المهمش الاخر ، يعرف ان هذا ليس عدوه ، عدوهو الحقيقي محصن ، وبعيد ، ومرفه ... لا مناص امامنا اذن من الثورة الشعبية السلمية ، قوامها كل الشعب ، لتغيير النظام ... الظروف الموضوعية الان مواتية اكثر من اي وقت مضى للتغيير خروج الشعب كله للشارع ، والتغيير باقل دم وهذا الذاتي في الامر ..... هذا هو التحدي امام الطلائع ، والقادة ، والمستنيرين واصحاب الفكرة والابداع والخيال

مشكور لهذه الإضافة ..
ما دار بذهني وعبرت عنه أنت وأنا بالقلم ..
تحمله أذهان أخرى عديدة ..
أقعدتها مشغوليات الحياة أو ضيق الفرص عن عرضها ..
مودتي يا صديق.

Quote: من 2005 في خارطة طريق واضحة اوضح من الشمس-دستور وضح كل شيء ناس الدغمسة المتعودين على الارتجال وانعدم المؤسسية سايطين البلد ساكت على الفاضي والحديث ذو شجون لكن سنن الكون ماضية والانقاذ دي انتهت وحتنهار من الداخل براهاا

عزيزي عادل أمين ..
تحيات وشوق ..
لو ناس الإنقاذ التزموا بـ 50% فقط من دستور 2005 لا كان انفصل الجنوب ولا كان دا حالنا ..
عايز أقول ليك يا عادل الشعب السوداني كلو اتغش في الإنقاذ ..
يمين ويسار جنوب وشمال ..
دا نبت شيطاني استطاع أن يخدع الشعب السوداني ونخبه السياسية لعقدين وأزيد ولا زال يراوغ ..
حتى الأنظمة الإقليمية والدولية لم تنجو من حبائله..
دا ما شغل الثلاثة أو الأربعة عساكر ومعاهم كم مدني مصنقرين على رأس الدولة من89م ..
دي مؤامرة كبرى حصان طروادتها هم هؤلاء ..
لو الناس ما وصلت للقناعة دي مافي خلاص من الكابوس دا ..
أي انتخابات تأتي مافي جهة غيرهم ح يكسبها ..
نعم النظام ح ينهار من الداخل وبدأت ارهاساتو ..
بس للأسف الانهيار ما بكون لرموز النظام وحدهم بل سوف تنهار معهم الدولة ..
لذا يجب أن يتحرك الشعب قبل أن ينهدّم المعبد..
فهؤلاء يستثمرون بمقولة عليّ وعلى أعدائي كما أسلفت ..
شكرا على المداخلة المحفزة.

بسم الله الرحمن الرحيم
الاخ / محمد على
الخاسر الاوحد الذى يتفرج الان ( الشعب )
يدرك ان التغيير فى هذا التوقيت
بالذات له من المخاطر ماله ..
فالبلاد تعيش الان جاهلية قبلية
لم تمر عليها بمثل هذا السوء
فى كل عهودها .. انفلات امنى
غير مسبوق .. وحركات مسلحة
تفوق فى اعدادها ولايات السودان
واحزاب تقليدية متهالكة يمكن لهذه
الحركات المسلحة ان تلتهما أو ان
تضعها بجيبها فى افضل السيناريوهات

Quote: الظروف الموضوعية الان مواتية اكثر من اي وقت مضى للتغيير خروج الشعب كله للشارع ، والتغيير باقل دم وهذا الذاتي في الامر .....

لذلك يدلدل هذا الخاسر الاوحد رجليه ولا يحرك
ساكناً خوفاً من عواقب قد تكون اسوء من هذا
الوضع الذى نعيشه ...
ولو كان الشارع السودان يثق تمام الثقة بالاحزاب
المتهالكة هذه .. ويؤمن بثورية الحركات المسلحة
ونبل مقاصدها لما ظل متفرجاً طوال هذا الوقت
وسياسات الانقاذ تهدد بقاءه يوماً بعد يوم .. لما
ظل متفرجاً طوال هذا الوقت وفساد الانقاذ اضحى
الان يتبختر علناً بعد ان كان يقضى حاجاته سراً
وعلى استحياء ...

صدقونى الشارع السودانى لن يخرج لتغيير السودان
ما بقيت هذه المعادلة

Quote: من 2005 في خارطة طريق واضحة اوضح من الشمس-دستور وضح كل شيء ناس الدغمسة المتعودين على الارتجال وانعدم المؤسسية سايطين البلد ساكت على الفاضي والحديث ذو شجون لكن سنن الكون ماضية والانقاذ دي انتهت وحتنهار من الداخل براهاا

عزيزي عادل أمين ..
تحيات وشوق ..
لو ناس الإنقاذ التزموا بـ 50% فقط من دستور 2005 لا كان انفصل الجنوب ولا كان دا حالنا ..
عايز أقول ليك يا عادل الشعب السوداني كلو اتغش في الإنقاذ ..
يمين ويسار جنوب وشمال ..
دا نبت شيطاني استطاع أن يخدع الشعب السوداني ونخبه السياسية لعقدين وأزيد ولا زال يراوغ ..
حتى الأنظمة الإقليمية والدولية لم تنجو من حبائله..
دا ما شغل الثلاثة أو الأربعة عساكر ومعاهم كم مدني مصنقرين على رأس الدولة من89م ..
دي مؤامرة كبرى حصان طروادتها هم هؤلاء ..
لو الناس ما وصلت للقناعة دي مافي خلاص من الكابوس دا ..
أي انتخابات تأتي مافي جهة غيرهم ح يكسبها ..
نعم النظام ح ينهار من الداخل وبدأت ارهاصاتو ..
بس للأسف الانهيار ما بكون لرموز النظام وحدهم بل سوف تنهار معهم الدولة ..
لذا يجب أن يتحرك الشعب قبل أن ينهدّم المعبد..
فهؤلاء يستثمرون بمقولة عليّ وعلى أعدائي كما أسلفت ..
شكرا على المداخلة المحفزة.

Quote: أي انتخابات تأتي مافي جهة غيرهم ح يكسبها ..

الاخ محمد على طه
سلام
اذا كا ن رهان الناس من الاول على انتخابات 2010 صحيح ودخلو جميعهم فيها وبعد اداك اتزورت كان المجتمع الدولي دعمهم ذى ما حدث في ساحل العاج وفرض اعادتها باشراف دولي وغيرت معادلة المستقبل وما حاق بعد ذلك من تدهور
مقطاعة الانتخابات هو جهل بالعملية السياسية نفسها من قل نخب مزمنة ضللت قطاع الشمال ووصلتنا هنا..
العالم تجاهل السودان اهذا السبب اعتقد النظام اخذ شرعية انتخابية
لانه ترك لينا جذرة نيفاشا للتغيير فشلنا في استثمارها
والتاريخ حتما سيقول كلمته يوم

Quote: والتاريخ حتما سيقول كلمته يوم

بلا شك ..
فقط نأمل أن تأتي دورة التاريخ وقد اكتمل وعي الشعب بدرا..
شكراً على الإهتمام والتعقيب ..
مودتي.

Quote: تراهم أيضا حذفوا "زارع الحقل في البكور" و حذفوا "هيهات هيهات لا جن و لا سحرة" و حذفوا "في القولد ألتقيت بالصديق" فأفشلوا الزراعة و السكة حديد و النسيج الإجتماعي.

الأخ فيصل المفتاح ..
تحياتي ..
إذن هي منظومة استراتيجية ممنهجة سقط الشعب في حبائلها ..
كل هذه المحذوفات قابلوها باحلالات رمت في اتجاه تخذيل إرادة الشعب ..
فأصبح حاله كما قال الحلاج :
القاه في اليم مكتوفا وقال له أياك أياك أنت تبتل بالماء..
مشكور على المشاركة.

Quote: الخاسر الاوحد الذى يتفرج الان ( الشعب ) يدرك ان التغيير فى هذا التوقيت بالذات له من المخاطر ماله .. فالبلاد تعيش الان جاهلية قبلية لم تمر عليها بمثل هذا السوء فى كل عهودها .. انفلات امنى غير مسبوق .. وحركات مسلحة تفوق فى اعدادها ولايات السودان واحزاب تقليدية متهالكة يمكن لهذه الحركات المسلحة ان تلتهما أو ان تضعها بجيبها فى افضل السيناريوهات Quote: الظروف الموضوعية الان مواتية اكثر من اي وقت مضى للتغيير خروج الشعب كله للشارع ، والتغيير باقل دم وهذا الذاتي في الامر ..... لذلك يدلدل هذا الخاسر الاوحد رجليه ولا يحرك ساكناً خوفاً من عواقب قد تكون اسوء من هذا الوضع الذى نعيشه ... ولو كان الشارع السودان يثق تمام الثقة بالاحزاب المتهالكة هذه .. ويؤمن بثورية الحركات المسلحة ونبل مقاصدها لما ظل متفرجاً طوال هذا الوقت وسياسات الانقاذ تهدد بقاءه يوماً بعد يوم .. لما ظل متفرجاً طوال هذا الوقت وفساد الانقاذ اضحى الان يتبختر علناً بعد ان كان يقضى حاجاته سراً وعلى استحياء ... صدقونى الشارع السودانى لن يخرج لتغيير السودان ما بقيت هذه المعادلة

الأخ Artiga ..
تحياتي ..
إذن هي المرحلة الصفرية التي أرادتها الاستراتيجية الممنهجة ..
بلوغا لإعادة التشكيل الجيوسياسي في الشرق الأدنى وأفريقيا ..
ولا استبعد أن يبدأ تطبيقها من السودان ..
لأننا تقبلنا بعفوية أن نصير قربانا في معمل تجربة الإسلام السياسي ..
وخير عنوان لتشوهات تطبيقاتها..
شكرا على المرور لتبادل الرأي.