لو كنت مكان هيثم مصطفى..!!!

وقبل توقيع العقد مع المريخ كنت ح أشترط عليهم إني ما ح العب ضد الهلال ..
تصرف أتوقع لو هيثم عملو ربما يعيد إحترام كتيير من جمهور الهلال القلبو مكسور من تصرف هيثم لما كانوا واقفين معاهو في أزمته مع رئيس النادي..
أتمنى ومن كل قلبي إنو هيثم يعتذر عن المشاركة في مباراة الهلال القادمة من أجل جمهور الهلال ومن أجل هيثم نفسو ..

اخونا عمر
لك التحية و الاحترام

كلام عقل بس الناس فى السودان ما عندهم التفكير دا و هيثم ذات نفسه بيكون منتظر كورة الهلال دى بالذات
عشان يثبت للبرير و غارزيتو انه لاعب موهوب بالرغم من انه موهبته ما دايرها ليها شهادة بى مبارأة مع الهلال

شفت حاجة زى دى فى الامارات حينما اعار العين لاعبآ للظفرة على ما اظن و اشترط عدم لعبه ضد العين

با حيدرا..
في الظروف العادية وفي الفرق الكبيرة وعند إنتقال لاعب من فريق لي فريق تاني كبير بيتم تضمين شرط زي ده في العقد ..
بالنسبة لي هيثم ولأنو الموضوع مختلف والقصة شائكة إلا إنو البتمناهو انا تكون دي حاجة نابعة من جوووة هيثم مصطفى ويترجم الدموع ونبرات الحزن اللي ودع بيها جماهير الهلال في اخر لقاء تلفزيوني ..
هيثم محتاج لترجمة حبه لجمهور الهلال لتصرفات بيان بالعمل في ظل الأزمة الحاصلة ..مجرد دخول هيثم للميدان ومحاولة التلويح للجمهور غير كافية ..
اتمنى أن يجنب هيثم نفسه وجمهور الهلال وضع نفسهم في مأزق وإنقسام وصدمات ما بين مؤيد وما بين رافض..ما بين من ينبز ويسئ لي هيثم وما بين يهلل ويكبر لهيثم ..
الفرصة جات لي هيثم عشان يعيد ويكسب إحترام كتيير من الأهلة ..
هي مبادرة ورسالة أتمنى يتم إيصالها لهيثم مصطفى بعيداً عن مكايدات البرير ...هيثم ردّ على البرير بالتسجيل للمريخ وقادر على إنو يبرهن إنو لسة قادر يلعب ..

عمر الفاروق لك التحية

بالنسبة لي انا كهلالابي, لم يزل حب هيثم القائد موجود في قلبي بل وأتمنى له النجاح مع البطيخاب المفلساب
هيثم لديه كاريزما قليلة التواجد في انسان هذا اليوم وتأكدي من أن المريخ سيستفيد كتأكدي من كتابتي لهذه السطور

لن ينسى جمهور الهلال هذا الهيثم بسهولة ووقوفه ولعبه ضدهم نكسة كبيرة وكسرة كبيرة لقلوبنا خصوصاً بشعار المريخ
تمنيت لو كانت لنا كجمهور هلالابي في قلب هيثم مثل ما له في قلوبنا......

دا في حال انتهى تسجلو في الهلال فسجل للمريخ؛ أما وقد
شطب .. فالسخط في حال لعب المباراة - وتألق - سيتجه للبرير.

السلام عليكم

من ناحية تانية أخطر يا أبو عمير سيد الهلال السابق دا لو أخفق في المباراة و(دا متوقع)
ستتدمر البقية الباقية من نفسياتو وسينسحب ذلك بالطبع على بقية أيامو المعدودة كلاعب كرة
قدم وبذلك يكون قد كتب أسوأ نهاية لمشواره الكروي.
وزي ماقال ليك حيدر بشير فوق عقلية الهواة والمكاواة تطغي دائما على اللاعب السوداني عشان كدا فشل
وسيفشل في أية محاولة لاحتراف كرة القدم داخليا او خارجيا.
شخصيا أتوقع لهيثم مصطفي كلاعب كر نهاية تراجيدية موغلة في البؤس .

ياود الفاروق



لو كنت مكان هيثم مصطفى لاحرزت هاتريك في أول مباراة قمة قادمة حتى اثبت له انني بخير وأن الكوره في الراس والدهن في العتاقى



وجمهور الهلال عليه ان يفهم ان ما فعله هيثم له مبرراته


هو الزول دا موقع لشنــو عشان مباريات القمة دي بالذات ومن قبله سبقه علاء الدين وحموده

مع تحياتي


أبومصطفى

عمر إزيك
معقول لكن يا عمر؟!
ياخى صورة هيثم بشعار المريخ زلزال هزّ حتى مشاعر مشجعين (هلال الباقير الوراني)
حتى أسأل عمك رختر :)
خلاص كملت

عمر إزيك
معقول لكن يا عمر؟!
ياخى صورة هيثم بشعار المريخ زلزال هزّ حتى مشاعر مشجعين (هلال الباقير الوراني)
حتى أسأل عمك رختر :)
خلاص كملت

رغماَ عن استيائي الشديد لرؤية هيثم ..
بشعار المريخ الند التقليدي لنا ..
إلا إن صورته ولم تهتز في دواخلي ..
لعلمي التام بحيثيات انتقال هيثم للمريخ ..

Quote: إلا إن صورته ولم تهتز في دواخلي .. لعلمي التام بحيثيات انتقال هيثم للمريخ ..

100%
بالظبط هو دا الحاصل للكثيرين
وتوقعات ملاسي بنتائج لعب هيثم في تصعيد الأمر ضد البرير صحيحة 100%
وقال طلحة المريخابي

Quote: شخصيا أتوقع لهيثم مصطفي كلاعب كر نهاية تراجيدية موغلة في البؤس .

وعليه
ارشح طلحة لكتابة عمود في جريدة عالم السموم (النجوم سابقا)
تعرف يا عمر لو في حكاية حتاثر في رغبتك لعدم لعب البرنس مباراة المريخ
تبقى كتابات صبية البرير في جريدة عالم السوم
غير كده البرنس ممكن يفكر
واتمنى الا يفعلها فهو لاعب محترف
مش برضه رونالدو لعب ضد المان واحرزهدف كمان (طبعا لم يفرح بالهدف بطريقته المعتداه ) ولكنه لعهب الماتش كاملا

علي العموم يا عمر

هيثم مصطفي لا يجيد اللعب في مباراة القمة منذ ايام الهلال وكان يستسلم لمراقبة الشغيل


نادر ما يتالق هيثم في مباراة اللهم الا في مباراة لعب الباصين لخالد بخيت ومرة باص لسادومبا


خلاف ذلك ليس له سجل حافل

فلو لعب القمة لن يكون له تاثير

الصادق يا سليمان :

Quote: تمنيت لو كانت لنا كجمهور هلالابي في قلب هيثم مثل ما له في قلوبنا......

في نظري الفرصة أتيحت لهيثم عشان يرد لجمهور الهلال هذا الحب ..والكورة أسة في ملعب هيثم ..

Quote: دا في حال انتهى تسجلو في الهلال فسجل للمريخ؛ أما وقد شطب .. فالسخط في حال لعب المباراة - وتألق - سيتجه للبرير.

الكلام ده ح يحصل قبل مباراة الهلال ..في مباراة المريخ الأولى ضد الإتحاد ح يصب جمهور الهلال غضبه على البرير التعيس..
بالمناسبة يا حسين مباراة المريخ الأولى ح يدخلها الهلالاب أكتر من المريخاب وربما حققت دخل خرافي..
لكن لو شارك هيثم ضد الهلال فسيتحول الغضب مرة تانية على هيثم وإن تألق ..

طلحة يا حبوب :
إخفاق هيثم في مباراة القمة ساااهل جداً ..وصدقني بي عقلية البرير الجال ده ممكن وبكل بسااطة يجتمع بي اللاعبين قبل الكورة ويقول ليهم خلو كلام المدرب ده على جمب..إن شاء الله نتغلب خمسة بس المهم هيثم ده ما يهبش كورة لحددي ما الكورة تنتهي..
وممكن عااادي يتبرع بي كرتونتين شامبيون مع كرتونة بسكويت لنجم المباراة اللي ح يكلف بمراقبة هيثم ..
انا يهمني جبر الخواطر بين هيثم والهلالاب ..ابداً ما هاماني في المرحلة دي مستوى هيثم من سلوك هيثم ..
والفرصة متاحة لي هيثم يجبر بالخواطر..فالأمل كبيير في أن يعود هيثم يوما ما للبيت الكبير عبر أي بوابة من بوابات نادي الهلال الإدارية والفنية ..

وليد يا طه ..

Quote: ياخى صورة هيثم بشعار المريخ زلزال هزّ حتى مشاعر مشجعين (هلال الباقير الوراني)

إتنين بطلت أشوفهم نهااائي ..اي لقطة لي المرحوم نادر خضر في التلفزيون بعد وفاته ..وكل ما يتعلق ب هيثم مصطفى من صور وأخبار..

هيثم كان ضحية لسياسات لم تراعي تاريخه كلاعب ..
وعايزين يجوا يأدبوه بعد مابقى لاعب مخضرم ..
وزول كبير في السن ...
في أي منطق يمكن قبول ذلكـ ...
غايتوا لو انا كنت مكان هيثم ..
ورغماً عن هلاليتي التي صحبتني ..
منذ الصغر لاعباً ومشجعاً ..
كنت ساسلكـ نفس مسلكـ هيثم ..

Quote: وهيثم ذات نفسه بيكون منتظر كورة الهلال دى بالذات عشان يثبت للبرير و غارزيتو انه لاعب موهوب بالرغم من انه موهبته ما دايرها ليها شهادة بى مبارأة مع الهلال

والله لو قالوا ليهو إختار مباراة واحدة تلعبها في الدوري
حيختار مباراة الهلال

Quote: بالنسبة لي انا كهلالابي, لم يزل حب هيثم القائد موجود في قلبي بل وأتمنى له النجاح

أنا برضو زيك كدا
وبتمنى ليهو النجاح
حتى لو مشى بلوتو

Quote: دا في حال انتهى تسجلو في الهلال فسجل للمريخ؛ أما وقد شطب .. فالسخط في حال لعب المباراة - وتألق - سيتجه للبرير

شطب دي بالذات تحتها خطين
لو كان مستواه انتهى
هو شخصيا كان حيرضى بالشطب

Quote: وصدقني بي عقلية البرير الجال ده ممكن وبكل بسااطة يجتمع بي اللاعبين قبل الكورة ويقول ليهم خلو كلام المدرب ده على جمب..إن شاء الله نتغلب خمسة بس المهم هيثم ده ما يهبش كورة لحددي ما الكورة تنتهي..

ههههههه
يا أبوعمير غير عقلية البرير هناك أيضا صراخ الجماهير الح يخلوا المريخ والكورة ويكونوا ضدو هو بس
سواء كان الناقمين عليهو أو أنصار البرير ..
صدقني هيثم سيواجه تعقديات وحرب نفسية شرسة قبل وأثناء وبعد أية مباراة له مع المريخ ضد الهلال أو غيرو
إلى جانب طبعا انو أصبح كبير السن وبالتالي سيكون محدود الحركة والطاقة .. ودا الخلاني أتوقع فشلو المقبل.
............
أخوي السوندا السلام عليك
إتا عامل إيه يا ملك ؟

يكون دمر نفسو شمال وجنوب ..

Quote: إلا إن صورته ولم تهتز في دواخلي .. لعلمي التام بحيثيات انتقال هيثم للمريخ ..

دا الكلام ياود القوز




ابومصطفى

الاستاذ عمر الفاروق هيثم الان لاعب المريخ ومن حقه الاستفاده منه بعيداً عن الحسابات العاطفيه
بماذا سيبرر هيثم عدم مشاركته فى اهم مباراه فى الدورى ، هيثم لم يسجل فى المريخ الا من اجل هذه اللحظه
واتوقع له تألقاً غير عادى فى هذه المباراه ، وسنرى انهر الدموع التى ستفيض من تلك العيون التى عشقته حد الوله

Quote: تصرف أتوقع لو هيثم عملو ربما يعيد إحترام كتيير من جمهور الهلال

ومن الذي قال أن هيثم يبحث عن استعادة احترام جمهور الهلال..

إلا يكون انت بتخيل ليك ساي يا عمر :)

سلام
لويس فيجو

Quote: الذين يلقبونه بالخائن

....

Quote: في الظروف العادية وفي الفرق الكبيرة وعند إنتقال لاعب من فريق لي فريق تاني كبير بيتم تضمين شرط زي ده في العقد

سـلام يا عمـر، زي ما قال الشباب ظروف إنتقال هيثم للمريخ ما عادية، لكن وبالإضافة لتعليق الأخ يوسف من الفيس بوك عن فان تستلروي؛ أفتكر هيثم وزي ما قلت إنت عشان يحافظ على إحترام جماهير الهلال أو يبدي إحترامو ليها ممكن يعمل الحركة العملا ولدنا* فان بيرسي وأنا بسميها حركة الكيشة دقوا وتعضّر ليه، لأنو عمل حركة علامة الإعتذار لجماهير ناديه السابق آرسنال بعد ما جاب فيهم قون في أول مباراة له ضده مع المان يو.. تذكرت برضو الضجة hgpwgj بهولندا في نهائيات الأمم الأوربية بألمانيا لامن المدرب الهولندي الشهير هيدينك وكان يقود منتخب روسيا لكن طقطق ليك الهولنديين زي الترتيب!

ـــــــ
* أنا بقول فان بيرسي والشهير في إنجلترا بي RVP بقول ولدنا باعتباري (عميل مزدوج) هولندي في بريطانيا وبشجع المان يو..

يا عمر لو عمل كدا ح يخسر جماهير المريخ برضو
احسن شي يلعب عادي - لو قدر - بدون ما ياخذها ثأر شخصي أو يتخاذل

وانا لو كنت رئيس الجهاز الفني للمريخ او رئيس النادي لاخرجت هيثم من هذا الحرج ولما اشركته في مباراة هلال مريخ - على الاقل الاولى

وعشان البرير الطائش ده ممكن يدفع 50 مليون للبكسرو

جمال يا قوز وحبيبنا السوندا:
لشئ في نفسي ممتنع تماااماً عن الخوض في حيثيات تسجيل هيثم للمريخ وهل انا مع ولا ضد أو حتى مجرد التدخل في شرح نفسيات جمهور الهلال تجاه هيثم لأنو القصة شاااائكة جداً..


خلّي العيش خرام :
عارف انا ما مركز مع مستوى هيثم الفني في المباراة ..وعموماً انا واحد من المقتنعين بي مستوى هيثم وإنو لسة قادر يؤدي بي نفس المستوى لي مدة سنتين تاني لي قدام سواء مع الهلال أو المريخ أو أي نادي تاني..

نافع يا كوماوي..
هيثم من الشخصيات البتفكر وتحسب حساب الحاجات قبل إتخاذ اخطوات ..وعندو ميزة جميييلة ..عندو مرجعيات وكبار شخصيات بيحترما وبيسمع ليها وبيفكر معاها ..لأنو في الفترة الأخيرة هيثم مسك في درب الصوفية وانا اعلم تماما تأثير الشيخ الصوفي في شخصية حوارو ..إضافة لي إنو هيثم عااادي ممكن يستخير لي المشاركة دي وبعدها بيحدد ..ده هيثمنا الانا بعرفو ..

اخوي عمر الفاروق
مسكاقمي
وينك يا زول يا ابوالنسب
يعجبني في بعض الاخوة الهلالاب وانت منهم بانهم مازالو يقدرون ويتمسكون بالكابتن هيثم مصطفى
واعتقد شخصياً بان طلبك بعدم اللعب في مباراة المريخ هو تقديري واقول بانها مباراة تنتهي
بانتهاء المباراة وفي النهاية هي فوز وخسارة
في رأي الشخصي واتمنى ان تقف فيه معي وهي عندما ينتهي سبب ابتعاد هيثم من كيانه وبيته الهلال
وهي ابعاد هذه العصابة التي تدير الهلال حالياً من ابوبونية وبقية التبع معه وتأتي إدارة جديدة
تليق بمقام الهلال ... أن تقوم إدارة المريخ فواراً باطلاق سراح الكابتن هيثم مصطفى لكي يعود إلى بيته
وعرينه عزيزاً مكرماً


لك ودي

Quote: بالنسبة لي انا كهلالابي, لم يزل حب هيثم القائد موجود في قلبي بل وأتمنى له النجاح مع البطيخاب المفلساب

دا شنو دا
في ناس بالمستوى دا بيكتبوا في سودانيز اون لاين