شهرة ألاسافير حدها ألاسافير

.
الاشخاص والاسماء الموجودين بالقصة من تأليف الكاتب وليس لديهم أى صلة بالواقع .

ذهبنا الى جده أنا وبعض الاصدقاء لحضور حفل يحيه الفنان الكبير ابوعركى البخيت .
الحفل كان معلن عنه فى موقع سوادنييز اون لاين ولذلك كان من المتوقع وجود عدد كبير من اعضاء وبورداب جده بهذا الحفل..
فضلنا الجلوس فى اخر الصاله لعدم معرفتنا بالكثير من الحضور .
ولحضورنا متأخرين عن موعد ابتدأ الحفل .
عرفت بعض الاعضاء بحكم صلتى بهم فى مواقع اخرى.
وعرفت البعض الاخر من خلال متابعتى لهذا الموقع ومشاهدتى لصورهم المنشورة فى عدة مناسبات.

كان من ضمن صُحبتى فى هذا الحفل من له صلة وإهتمام بعالم الاسافير ومن ليس لديهم أى علاقه بهذا العالم .
والمقصود هو عالم الانترنت والمواقع اللكترونية .

اخونا وحبيبنا معاوية الصائم جلس بالقرب مننا وذلك بعد أن قام بالسلام والتحية.
سألت الشباب يا جماعة بعترفوا الزول ده منو .
فلم يعرفه أحد


وسالنى صديقى وهو (أحد المتابعين لهذا الموقع والان هو أحد الاعضاء به) .
هو ....والله انا ماعرفتو ده منو.
انا .... ده معاوية الصائم ياخ.
هو ...... بالله .
هو.....وإنت بتعرفة
أنا.....مابعرفه معرفة شخصية لكن شفته صورتة مره فى بوست كده.
وأحد من الشباب الكانو معانا ....... هو الزول ده مالو بعاين لينا و منطط عيونو كده زى الخايف مننا ولا شاكى باننا بنعرفه.
واحد تانى من الشباب سأل طيب ما قلت لينا الزول ده منو.
وانا بين مصدق وما مصدق معقولة فى زول ما بيعرف الزول ده .
قلت ليهو ياخ ده معاوية بتاع ( فيما يختص بالمدعو ).
قال لى يعنى شنو.
قلت ليهو اسمع خلينا نستمتع بالحفله دى و بكره الصباح إن شاء الله بشرح ليك الحكاية.

لا وايه
بتاع الدكان زاتو مابدينك لانك بتكتب فى الاسافير
يدر سلامات

Quote: لا وايه بتاع الدكان زاتو مابدينك لانك بتكتب فى الاسافير يدر سلامات

وعليكم السلام ودفقير.

ممكن يدينك فى حالة وصلتة قمة الشهرة ووصلته مرحلة ودالباوقة وبقيت تتصور مع الرئيس .

تخيل .....
ودالباوقة شايل مخلايتو وحايم فى سوق الخضار بحرى.
ولد فارش ليهو تبش وبصل وبيكورك يلا علينا جاى علينا جاى.
الكوم بى خمسماية بى خمسماية.
ودالباوقة..... كوم التبش بى كم.
الولد ... ما قلنا بى خمسماية.
ود الباوقة.... مالك لئيم كده خلاص جيب اتنين بى ستماية .
الولد ......إنت قايلنى سارقو ولا شنو.
ود الباوقة .......يا ولد اركز .هسع فى زول قال ليك إنت سارقو .
الولد .....ياعمك الاتنين بى الف عجبك شيل ما عجبك شتت خلينا نشوف رزقنا.
ودالباوقة..... هيع .... اشتت أنا ياولد إنت ماعارف أنا منو.
الولد...... لا ما عارف إنت منو.
ود الباوقة ... انا الشافو خلو أنا ود الباوقة.
الولد عاين لى صاحبو الفارش جنبو وهو متابع للحوار ما بين الاتنين وبدون تعليق فقعوها ضحكه .

..