|
الخرطوم .. عاصمة الضُبّان !!
|
يا دى الكسوف زى ما بقولوا .. الزبالة فى كل مكان فى الخرطوم .. والضبان عامل حفلة فى كل كوم .. والله العظيم تشترى حاجة من السوق الضبان يباريك لغاية البيت .. ويفتح معاك الكيس .. وهاك .. لقمة بى لقمة !! ولو حاولت تعمل حريف وتقوم ترش مبيد حشرى .. يا دوووب إنت تعبت الظاهر ريحة المبيد الحشرى دى الكود المتفق عليه بين الضبابين !! أها ولو عملت فيها شفت وإستعملت الجريدة كسلاح أبيض فى هذه الحرب .. أولادك حا يشكوا فى صحتك النفسية .. ومعاهم حق ! يعنى يشوفوا أبوهم لافى الجريدة زى الماسورة وساكى ليهو ضبانة دايروم يقولوا عليهو شنو ؟ وبالذات لمن الضبانة الثقيلة دى ترك فى قفا أمهم .. طبعاً لو حلفت بدين أبوك إنك قاصد الضبانة ما حا يصدقوك !!
|
|
|
|
|
|
|
|
Re: الخرطوم .. عاصمة الضُبّان !! (Re: صلاح أبودية)
|
قبل يومين إشتريت لى بطيخة .. أصلو أنا بحب البطيخ شديد .. وقلت أخلى البطيخة دى فى ضهرية العربية لغاية ما الضبان ينوم .. قمت بالليل بعد ما حضرت كورة الريال نزلت براااحة وجبت البطيخة .. وغلطتى مشيت جبتا السكينة من المطبخ .. الظاهر الضبان عامل كمين مع السكينة (ذكاء ذبابة).. أها وقولة شخخخخ .. عينك ما تشوف إلا النور !!! لغاية اليوم بحاول أقنع فى الولية إنو أنا خاتى السكينة تحت المخدة عشان الضبان ما قادرة تصدق كلامى !! وقالت لى لو ما رجعت السكينة دى فى المطبخ أنا حا أمشى بيت ناس أمى !
| |
|
|
|
|
|
|
Re: الخرطوم .. عاصمة الضُبّان !! (Re: صلاح أبودية)
|
سلامات عزيزى أبودية,,
فى غرفة عناية مكثفة بمستشفى كبير,, ضبان وناموس وكدايس ,, وحدثنى من لا أشك بحيدثه أبدا أنهم كانو يشاهدون الفيران فى غرفة عناية مركزة فى مستشفى إستثمارى اليوم فيه بالملايين تخرج من الجحور والأركان ومافى زول مالى عينا,,
صحة بيئة منعدمة تماما وبلد عبارة عن كوشة كبيرة وناس النفايات شغالين تش ترش..
تحياتى..
| |
|
|
|
|
|
|
Re: الخرطوم .. عاصمة الضُبّان !! (Re: أيمن الطيب)
|
الأخ أيمن تحياتى
Quote: وحدثنى من لا أشك بحيدثه أبدا أنهم كانو يشاهدون الفيران فى غرفة عناية مركزة فى مستشفى إستثمارى اليوم فيه بالملايين تخرج من الجحور والأركان ومافى زول مالى عينا, |
قبل يومين كان فى بوست مفتوح عن حالة فى أحدى المستفيات .. يقول صاحبه أن الفيران أكلت قدم أحد المرضى الذى أجرى عملية لأحدى قدميه .. عارف الكارثة وين ؟ الفيران أكلت الرجل السليمة !! (اللهم نسألك بكل إسم هو لك أن تشفى هذا المصاب شفاء لا يغادر سقماً )
| |
|
|
|
|
|
|
Re: الخرطوم .. عاصمة الضُبّان !! (Re: صلاح أبودية)
|
Quote: Mohammed Ali يا ابودية انت قصدك عاصمة الضباب هههه ما تنبز لينا خرطومتا ياخي الضبان الفي الدنيا كلو الظاهر ساكن الخرطوم
|
محمد علي من الفيس بوك ساكن ساي !! ده عندو رقم وطني عديل كده ! شكرًا للمتابعة تحياتي
| |
|
|
|
|
|
|
Re: الخرطوم .. عاصمة الضُبّان !! (Re: Elmosley)
|
أستاذنا الكبير الموصلى لك التحية والإحترام
Quote: طبعا الضبان معاهو حق انت قايلو كيشه ولا شنو |
ضبان تفتيحة زى ما بقولوا عينو للطازج البوديهو للفطيس شنو تانى (نسأل الله للمصاب الشفاء التام بإذن واحد أحد) وأن لا يجعل حديثنا هذا فى عداد الإستهزاء بالمرض ولا بالمريض شفاه الله اللهم يا غفور
| |
|
|
|
|
|
|
Re: الخرطوم .. عاصمة الضُبّان !! (Re: صلاح أبودية)
|
Quote: الخرطوم .. عاصمة الضُبّان !! |
المقصود ( الذباب) لسكان الخليج كيما لا تختلط الأمور ويفكر بعضهم لزيارة السودان من أجل ( الضبان) جمع (ضب) وهو من أفضل وجبات البراري لبعضهم. والحق يقال فإن توافر ( الذباب) بالخرطوم لاحظه كبار المستثمرين الأجانب، ومنهم السعودي الشيخ/ سليمان الراجحي، حيث ذكر في جمع من الناس ومنهم سودانيين، بأنك تشتري نصف كيلو لحمة ومعه كيلو من ( الذباب)؟؟، فيا من يفكرون في جلب المستثمرين للسودان، إن لم تهمكم صحة البيئة للسودانيين، فأفعلوها من أجل المستثمرين، وبقية الملاحظات طرف وزير الإستثمار د. مصطفى إسماعيل.
| |
|
|
|
|
|
|
Re: الخرطوم .. عاصمة الضُبّان !! (Re: حماد الطاهر عبدالله)
|
حماد الطاهر تحياتى
Quote: المقصود ( الذباب) لسكان الخليج كيما لا تختلط الأمور ويفكر بعضهم لزيارة السودان من أجل ( الضبان) جمع (ضب) وهو من أفضل وجبات البراري لبعضهم. |
أول مرّة أعرف إنو الضبان جمع ضب ! وكمان أفضل وجبات البرارى ؟ طيب الضبان بياكل شنو عندهم ؟؟؟
| |
|
|
|
|
|
|
Re: الخرطوم .. عاصمة الضُبّان !! (Re: صلاح أبودية)
|
سلامات يا صلاح تعرف مره وانا جايه جديده من السودان للسويد نسابتي أطفالهم جو جارين من غرفه كانو بيحضروا في فليم المهم اخر صريخ وجري يأخالتوا تعالي يا خالتو ا ألحقينا والله افتكرتا في مصيبه والا حاجه دخلتا الغرفة لقيت في زبابه وحيده في روحها المسكينه حاسه بالضياع وبتفتش للبطلعا والله ضحكتا وقلتا ليهم شكلكم ياربي حيكون كيف في السودان وهم من اتولدوا ماجوا السودان.......
| |
|
|
|
|
|
|
Re: الخرطوم .. عاصمة الضُبّان !! (Re: seham Abdeljleil)
|
Quote: أول مرّة أعرف إنو الضبان جمع ضب ! |
دي لغتهم التي سمعنا بعضها، ومنها زعران. والقال ليك ( ضبانهم) جيعان منو، يا أخي باقي الكبسة براهو كافيهو. وبالمناسبة حتى كوشتهم ما فيها (ضبان)، عشان برشوه بمبيدات حشرية فتاكة، ولو عايز تشوف ( الضبان) إلا تمشي ( التندل) على مسافة أميال.
| |
|
|
|
|
|
|
Re: الخرطوم .. عاصمة الضُبّان !! (Re: طارق ميرغني)
|
والبعوض يستلم الوردية من الضبان امام المستشفي الصيني ـ تجري فيه عمليات ولادة ـ تجد سوق للبهائم. في عطبرة ـ امام المطاعم تلقي سوق البهائم واكوام الزبالة امام المحلات والمطاعم تعوج ليك دربك. سألت اولاد عمي ـ وين ناس البلدية وناس المحلية. ليه ما بيمروا من هنا عشان يوقعوا غرامات علي الناس المخالفين.؟ قالوا لي: في مطعم سمك هنا لايرتاده الا موظفي البلدية والشرطة واللبيب بالاشارة يفهم. كنت في استراحة موقف شندي عطبرة بمدينة بحري , شربت زجاجة ماء وخرجت خارج الصالة لالقي بها في صندوق نفايات فلم اجد. سألت احد الشبان : ياخي الزجاجة دي ارميها وين؟ قال لي: انت ما من البلد دي. سألت ثانٍ فقال لي: ياخ انت زول راق خلاس. سألت صهري : وين سلال النفايات أجابني : كانت موجودة لكن الناس بسرقوها . فتأمل كما يقول اخونا ملاسي.
| |
|
|
|
|
|
|
Re: الخرطوم .. عاصمة الضُبّان !! (Re: أمير محمد ادريس)
|
الأخ أمير لك التحية والإحترام
Quote: ياخ حركات الغتاته دي ما تخليها |
المخرج عاوز كده يا أمير !
Quote: بالجنبه : انت من سكان الشعبية شمال أو كنت منهم ولا تشابه علي |
ناس الشعبية شمال حبايبنا وقرايبنا .. بينا وبينهم شارع الزعيم .. نحن ناس جنوب يا أمير !! إنت من شمال ؟
| |
|
|
|
|
|
|
Re: الخرطوم .. عاصمة الضُبّان !! (Re: seham Abdeljleil)
|
سهام عبدالجليل تحياتى وإحترامى
Quote: دخلتا الغرفة لقيت في زبابه وحيده في روحها المسكينه حاسه بالضياع وبتفتش للبطلعا والله ضحكتا وقلتا ليهم شكلكم ياربي حيكون كيف في السودان وهم من اتولدوا ماجوا السودان. |
لا يا سهام نحن هسى إطورنا شوية .. للناس البجوا أول مرة السودان وإنت داخل المطار أثناء ما بتكتب فى الورقة الخدره ديك برسلوا ليك ضبانتين .. واحدة بترك ليك فى آخر القلم والتانية بترك ليك فى طرف نخرتك ! الأولى بتعرفك ساكن وين وبتكلم الجماعة الباقين ! التانية بضوقك وتعمل ليك دعاية حسب طعمك !
| |
|
|
|
|
|
|
Re: الخرطوم .. عاصمة الضُبّان !! (Re: صلاح أبودية)
|
ناس الشعبية شمال حبايبنا وقرايبنا .. بينا وبينهم شارع الزعيم .. نحن ناس جنوب يا أمير !! إنت من شمال ؟ ------------- تحياتي الاخ صلاح معليش ما انتبهت للمداخله بتاعتك انا من مواليد الشعبية شمال بس رحلت منها وكنا ساكنين جنب اسرة المهندس كمال نورالدائم ( ما عارف الاسم صاح ولا انا غلطان لانو الفترة طولت ) وخالهم المرحوم أبودية ( ثنائي العاصمة ) الله يرحمة , علشان كده انا سالتك ختيت احتمال تكون قريبهم .
لك كل الود والاحترام
| |
|
|
|
|
|
|
Re: الخرطوم .. عاصمة الضُبّان !! (Re: أمير محمد ادريس)
|
أمير محمد إدريس لك التحية والإحتــــرام
Quote: انا من مواليد الشعبية شمال بس رحلت منها وكنا ساكنين جنب اسرة المهندس كمال نورالدائم ( ما عارف الاسم صاح ولا انا غلطان لانو الفترة طولت ) وخالهم المرحوم أبودية ( ثنائي العاصمة ) الله يرحمة , علشان كده انا سالتك ختيت احتمال تكون قريبهم . |
نعم كمال نورالدائم الإسم صحيح يا أمير .. وهو إبن خالتى والمرحوم إبراهيم هو خالنا عليه رحمة الله وأنا برضو كنت ساكن فى الشعبية جنوب ورحلت منها !!
| |
|
|
|
|
|
|
|