Post: #1 Title: Happy Valentine Day Author: الامين موسى البشاري Date: 02-08-2013, 09:00 PM Parent: #0
كيتاً في انصار السنة
Post: #2 Title: Re: Happy Valentine Day Author: علي محمد الفكي Date: 02-08-2013, 09:05 PM Parent: #1
ازيك تباً لك وويحك هو الفلانتاين وقتو جاء ؟
Post: #3 Title: Re: Happy Valentine Day Author: الامين موسى البشاري Date: 02-08-2013, 09:07 PM Parent: #2
Post: #4 Title: Re: Happy Valentine Day Author: الامين موسى البشاري Date: 02-08-2013, 09:11 PM Parent: #3
Quote: ازيك تباً لك وويحك هو الفلانتاين وقتو جاء ؟
دي اسمها ضربة استباقية يا علي ياخ ربنا يجعل ايامك كلها اعياد
Quote: عيد الحب أو عيد العشاق أو "يوم القديس فالنتين" مناسبة يحتفل بها الكثير من الناس في كل أنحاء العالم في الرابع عشر من شهر فبراير من كل عام.
Post: #5 Title: Re: Happy Valentine Day Author: علي محمد الفكي Date: 02-08-2013, 09:27 PM Parent: #4
Quote: دي اسمها ضربة استباقية يا علي ياخ ربنا يجعل ايامك كلها اعياد ]
يعني شغال بالمثل البقول يا ايد البدري قومي بدرعي ورشي بدر وشوفي لو تتقدري
ربنا يجعل كل ايامك محبة
Post: #7 Title: Re: Happy Valentine Day Author: عبد الله فقير Date: 02-08-2013, 09:32 PM Parent: #5
الامين سلامات سؤال عندو علاقة بوضوع البوست ليه نحن كشعب مابنعرف نعبر عن حبنا بالكلام معليش عشان مايجى زول يبقى لى فى رقبتى دى انا بتكلم عن الغالب الاعم احييييي ياقلبى الغالب الاعم دى زاتا بتجيب لي قبقبة نحو عندك دليل جيب احصائىة الخ الخ الخ
Post: #11 Title: Re: Happy Valentine Day Author: الامين موسى البشاري Date: 02-08-2013, 09:47 PM Parent: #7
Quote: سؤال عندو علاقة بوضوع البوست ليه نحن كشعب مابنعرف نعبر عن حبنا بالكلام معليش عشان مايجى زول يبقى لى فى رقبتى دى انا بتكلم عن الغالب الاعم احييييي ياقلبى الغالب الاعم دى زاتا بتجيب لي قبقبة نحو عندك دليل جيب احصائىة الخ الخ الخ
أول حاجة يا برلوم كل عام وأنت الحب وتاني حاجة ما تعلم قلملك المهابة ياخ عارف ما قلت الا الصحيح نحن كشعب سوداني ما بنعرف نعبر عن حبنا للطرف التاني زي خلق الله دي مرات بدواعي ما تعرف تبررها زاتو ياخ العواطف عندنا محبوسة بفعل حاجات كتيرة كتيرة جدا مرات بدافع الحب زاتو قلة أدب زي البوسة ومرات بدوافع يا ود عيب ويا بت دي اتقلي وما تخليك خفيفة يعني تربيتنا نفسها لها دور كبير في كدا أها اصحابي الموجه ليهم البوست ديل كمان اصحك تقول ليهم حب والله يدخلوك النار بالمزيكا غايتو دي قصة طويلة خلينا نكتشفها مع بعض
Post: #13 Title: Re: Happy Valentine Day Author: عبد الله فقير Date: 02-08-2013, 10:02 PM Parent: #11
Quote: أول حاجة يا برلوم كل عام وأنت الحب وتاني حاجة ما تعلم قلملك المهابة ياخ عارف ما قلت الا الصحيح نحن كشعب سوداني ما بنعرف نعبر عن حبنا للطرف التاني زي خلق الله دي مرات بدواعي ما تعرف تبررها زاتو ياخ العواطف عندنا محبوسة بفعل حاجات كتيرة كتيرة جدا مرات بدافع الحب زاتو قلة أدب زي البوسة ومرات بدوافع يا ود عيب ويا بت دي اتقلي وما تخليك خفيفة يعني تربيتنا نفسها لها دور كبير في كدا أها اصحابي الموجه ليهم البوست ديل كمان اصحك تقول ليهم حب والله يدخلوك النار بالمزيكا غايتو دي قصة طويلة خلينا نكتشفها مع بعض
الامين سلامات تانى يازول حوشكم دة بلا مهابة القلم بعلمك شنو ياخى تقعد تكتب وتمسح حتى تكتب عند نفسك مسيحا (هى مسيحا دى زاتا حقت المسح ماحاجة تانية ) مايجونى طايرين ناس محب وسودانى عجوز وانا برلوم ماعندى مروة ليهم نرجع لى موضوعنا اسمع القصة دى مرة مشينا الصرافة نحول قروش للوالدة ( الله يطول فى عمرها ) معاى واحد صاحبى برضو حول قروش لامو المهم ماحقت تبارك جينا طالعين من الصرافة لقينا واحد من اخوانا اولاد بمبة بتكلم فى التلفون والظاهر هو برضو محول لامو قروش وبكلم فيها هى الظاهر او حسب الانحنا فهمنا من الكلام انها بتشكر فيهو فبيقول ليها ( على ايه ياماما دة انا لو اطول تراب الارض فلوس ابعتهوملك ) اها صاحبى قال لى قرف يقرفنا ياخى انحنا ليه مابنقول كلام سمح زى دة كل الحنقولو اها ياحجة القروش رسنالهم سكت شوية وقال لى تعرف والله العظيم هسى الزول دة تلقاهو ولا مرسل نص الانحنا مرسلنو لكن مفتح اهو تماها بالكلام السمح (وش ماعارفو عامل كيف )
Post: #16 Title: Re: Happy Valentine Day Author: الامين موسى البشاري Date: 02-08-2013, 10:14 PM Parent: #13
Quote: اسمع القصة دى مرة مشينا الصرافة نحول قروش للوالدة ( الله يطول فى عمرها ) معاى واحد صاحبى برضو حول قروش لامو المهم ماحقت تبارك جينا طالعين من الصرافة لقينا واحد من اخوانا اولاد بمبة بتكلم فى التلفون والظاهر هو برضو محول لامو قروش وبكلم فيها هى الظاهر او حسب الانحنا فهمنا من الكلام انها بتشكر فيهو فبيقول ليها ( على ايه ياماما دة انا لو اطول تراب الارض فلوس ابعتهوملك ) اها صاحبى قال لى قرف يقرفنا ياخى انحنا ليه مابنقول كلام سمح زى دة كل الحنقولو اها ياحجة القروش رسنالهم سكت شوية وقال لى تعرف والله العظيم هسى الزول دة تلقاهو ولا مرسل نص الانحنا مرسلنو لكن مفتح اهو تماها بالكلام السمح (وش ماعارفو عامل كيف )
بديت ليك بالضحكة دي يا عبد الله عارف في حاجات كده مرات الواحد نفسو يعملها بس ما بتقدر زي ما تشوف ليك واحد متأبط ذراع مرتو في نص السوق والله نحن تمشي مع المره يكون بينك وبينها مسافة مترين التقول مصابة الجذام
لالالالالالالالا دا كلو كوم والاستقبال في المطار كوم تاني تشوف الجماعة شغالين احضان وبوس الحســـرة تكتلك والله نحن تمد يد من بعييييييييييييييييد وببرووووووود شديد كأنها بايته معاك غايتو الجفا دا ما عارف جبناهو من وين ياخ
تحياتي
Post: #20 Title: Re: Happy Valentine Day Author: مناهل عبد الله مصطفي Date: 02-09-2013, 10:04 AM
كل سنة وإنت والمدام وكل المحبين الحنان بألف خير
لكن دردقتا لي الكورة في مكاني بالكلام دا :
Quote: بديت ليك بالضحكة دي يا عبد الله عارف في حاجات كده مرات الواحد نفسو يعملها بس ما بتقدر زي ما تشوف ليك واحد متأبط ذراع مرتو في نص السوق والله نحن تمشي مع المره يكون بينك وبينها مسافة مترين التقول مصابة الجذام
لالالالالالالالا دا كلو كوم والاستقبال في المطار كوم تاني تشوف الجماعة شغالين احضان وبوس الحســـرة تكتلك والله نحن تمد يد من بعييييييييييييييييد وببرووووووود شديد كأنها بايته معاك غايتو الجفا دا ما عارف جبناهو من وين ياخ
من تربيتا يا امين التربية السودانية ما شايلة حتته المشاعر والأحاسيس دي ما عارفة ليه
أمين ممكن أهدي الوردة دي ؟؟ ههه
Post: #8 Title: Re: Happy Valentine Day Author: الامين موسى البشاري Date: 02-08-2013, 09:34 PM Parent: #5
Quote: يعني شغال بالمثل البقول يا ايد البدري قومي بدرعي ورشي بدر وشوفي لو تتقدري
بس ياها علي فكي
بعد يومين كدا الفتاوي ما تديك الدرب ولو فتشت بالفتاشة على وردة حمراء زي دي ما بتلقاها والله صحي
اها ود البدري سمين ياخ
Post: #6 Title: Re: Happy Valentine Day Author: احمد حمودى Date: 02-08-2013, 09:30 PM Parent: #4
Post: #10 Title: Re: Happy Valentine Day Author: Balla Musa Date: 02-08-2013, 09:46 PM Parent: #9
Quote: كيتاً في انصار السنة
وناس الهيعة كيف؟
Post: #15 Title: Re: Happy Valentine Day Author: الامين موسى البشاري Date: 02-08-2013, 10:08 PM Parent: #10
Quote: وناس الهيعة كيف؟
بله موسى ما تحرش باللاي ناس ومحتفلين في بيتهم الهيعة ماله ومالنا كمان
Post: #14 Title: Re: Happy Valentine Day Author: الامين موسى البشاري Date: 02-08-2013, 10:04 PM Parent: #9
Quote: اليلة يا ايمنوف بل راسك وارجى عماد
والله صحى
ممكن أهدى
وضاحة
ازيك يا فرده شاحد ربي السنة دي يلم فيك واحد عريس ويخلي ريحتك دلكه دلكه وخمره وخمره قوووووولي آميييييييين والسنة الجاية فارزه عيشتك وتحتفلي معانا بعيد الحب ياخ طبعاً ممكن تهدي ياخ
تحياتي
Post: #12 Title: Re: Happy Valentine Day Author: الامين موسى البشاري Date: 02-08-2013, 09:58 PM Parent: #6
Quote: وكمان يالبشارى فى رواية اخرى بسموهه ناس الصين
HAPPY SNAKE YEAR
مودتى
احمد حمودي
تحياتي ،، ونحن البودينا الصين شنو؟ خلينا في وردتنا الحمره دي آآآآ زول
كل عام وانت والحب
Post: #17 Title: Re: Happy Valentine Day Author: عبد الله فقير Date: 02-08-2013, 10:43 PM Parent: #12
Quote: عارف في حاجات كده مرات الواحد نفسو يعملها بس ما بتقدر زي ما تشوف ليك واحد متأبط ذراع مرتو في نص السوق
انت مسعول من الخير يا الامين يااخوى مش ياها دى تأبط شرا ولا ديك واحدة تانية (وش اخضر )
Post: #18 Title: Re: Happy Valentine Day Author: الامين موسى البشاري Date: 02-09-2013, 08:34 AM Parent: #17
Quote: انت مسعول من الخير يا الامين يااخوى مش ياها دى تأبط شرا ولا ديك واحدة تانية (وش اخضر )
حرام عليك يا عبد الله
دي اسمها تأبط حباً ياخ
Post: #19 Title: Re: Happy Valentine Day Author: أيمن محمود Date: 02-09-2013, 08:55 AM Parent: #18
Quote: كيتاً في انصار السنة
ارفعوا ايديكم عن انصار السنة !! انا يخيل لي السخانة بتاعة بلدنا ليها دور في طبعنا الزفت ده غايتو من تجربتي العابرة للقارات الناعمة - الكلام الحلو زيو مافي !
Post: #21 Title: Re: Happy Valentine Day Author: عادل خياري Date: 02-09-2013, 12:29 PM Parent: #19
بشاري سلام اولا كل فلنتاين وانت بخير ثانيا واحد صاحبنا مامن اولاد الخرطوم جابتو الجامعه ويوم كدة من الصباح لقى ليك ناس شهادة عربيه ديل وبعض الحناكيش كلهم لابسين احمر وخاتين وردة حمرة استغرب وسال بعفوية الليلة في شنو في الجامعه الناس دي مكترة من اللبس زي الموحد ده قالوا ليه يوم الفلنتاين ياخ وببراءة فلنتاين ده منو يعني اكتشف شنو ولا اخترع شنو عشان يعملوا ليه ده كلو تقول لي يمسكها من يدها ركز معانا شوية
Post: #22 Title: Re: Happy Valentine Day Author: عبد الله فقير Date: 02-09-2013, 12:57 PM Parent: #21
يا الامين تانى سلامات ياخ انا البوست دة جانى فى فى جرح ف شنو جيتك تانى ود الخدر بلدياتنا عندو حبيبتو اللهى فى نفس الوقت بت عمتو ساكنة فى قرية من قرى المحس اها لامن ضاقت بيهو الوسيغة وماقدر يعرسة قام جاء الخرطوم يفتش فى الرزق عشان يرجع يعرس حبيبتو دى اها اشتغل طلبة بتاع بناء المهم بعد كم شهر كدة جاء الدكان بتاع الحلة قلب ليهو صندوق بيبسى وقعد فوقو نادى بتاع الدكان يابابكر يابابكر جيب فتيل ببسى باااااااارد وجيب ورقة فلسكاب وقلم وظرف بابكر جاب ليهو طلباتو قال ليهو اكتب يلا بسم الله الرحمن الرحيم الى حبيبتى فى ارض الحجر ...... سكت شوية كدة قال ليهو اشطب ارض الحجر دى اكتب ... ارض دين الحجر وواصل بحبك خااااااالص خاااااااالص ومشتاق ليك خااااالص خالص عما قريب حاجيك عريس اما انا مابطال الحمد لله الشغل كويس وربنا وفقنى واشتريت ليك جونلتين ولباس ..... تقول ليى فالنتاين ووردة حمراء
Post: #29 Title: Re: Happy Valentine Day Author: الامين موسى البشاري Date: 02-09-2013, 09:36 PM Parent: #22
Quote: بعد كم شهر كدة جاء الدكان بتاع الحلة قلب ليهو صندوق بيبسى وقعد فوقو نادى بتاع الدكان يابابكر يابابكر جيب فتيل ببسى باااااااارد وجيب ورقة فلسكاب وقلم وظرف بابكر جاب ليهو طلباتو قال ليهو اكتب يلا بسم الله الرحمن الرحيم الى حبيبتى فى ارض الحجر ...... سكت شوية كدة قال ليهو اشطب ارض الحجر دى اكتب ... ارض دين الحجر وواصل بحبك خااااااالص خاااااااالص ومشتاق ليك خااااالص خالص عما قريب حاجيك عريس اما انا مابطال الحمد لله الشغل كويس وربنا وفقنى واشتريت ليك جونلتين ولباس ..... تقول ليى فالنتاين ووردة حمراء
عبد الله فقير
حبابك تاني وتالت ورابع زاتو وحباب حكاويك الطاعمة دي .. غايتو أمل في رومانسية قريب دا ماف كلو كلو
Quote: واحد صاحبنا مامن اولاد الخرطوم جابتو الجامعه
ههههههههههههه قال واحد صاحبنا قال . . ذكرتني قصة زولنا الهدت ليهو جكسة الخرتوم ببغا عشان كل صباح الببغا تقول ليهو احبك يا خزنزن ( دلع الخزين )
باكر سألتو قالت ليه كيف ببغو اصبح ؟ قالها ما بطال لكن ريحة لحمو جداد جداد هههههههههههههه الللمين قلت لي اسمو شنو ؟ الفليتة الجنب المخروقة قال طابقا قال مع التحية لك ولضيوفك ولصاحبي عادل خياري الذي ذكرني بالقصة المذكورة اعلاه قال صاحبنا قال
Post: #24 Title: Re: Happy Valentine Day Author: الامين موسى البشاري Date: 02-09-2013, 03:47 PM Parent: #23
Post: #26 Title: Re: Happy Valentine Day Author: الامين موسى البشاري Date: 02-09-2013, 09:19 PM Parent: #25
Quote: انا يخيل لي السخانة بتاعة بلدنا ليها دور في طبعنا الزفت ده غايتو من تجربتي العابرة للقارات الناعمة - الكلام الحلو زيو مافي !
يا ابو اليمن السخانة مظلومة معانا صدقني العلة فينا نحن ذاتنا وفي تربيتنا ياخ
عارف في مرة مشرف تربوي في نواحي السعودية وزع ليك كل السودانيين نواحي الجبال ومناطق الشده أها لما جو احتجوا قام قال ليهم: والله انا عارفكم ناس أشداء ومن تجربتي وديت المصريين اول ما شافوا الثعابين قاموا جاريين
Post: #27 Title: Re: Happy Valentine Day Author: الامين موسى البشاري Date: 02-09-2013, 09:27 PM Parent: #26
Quote: من تربيتا يا امين التربية السودانية ما شايلة حتته المشاعر والأحاسيس دي ما عارفة ليه
أ
مناهل يا ستهم تربيتنا دي ما كلها منكم انتوا ديل الحاجة توصي ولدها والأم توصي بتها وعييييييييييييك تضيع الحنيه في الرجلين .. والله صحي
Quote: أمين ممكن أهدي الوردة دي ؟؟ ههه
انداحي يا مناهل ياخ ولا يهمك
تحياتي
Post: #30 Title: Re: Happy Valentine Day Author: الامين موسى البشاري Date: 02-09-2013, 09:41 PM Parent: #23
Quote: ذكرتني قصة زولنا الهدت ليهو جكسة الخرتوم ببغا عشان كل صباح الببغا تقول ليهو احبك يا خزنزن ( دلع الخزين )
باكر سألتو قالت ليه كيف ببغو اصبح ؟ قالها ما بطال لكن ريحة لحمو جداد جداد هههههههههههههه الللمين قلت لي اسمو شنو ؟ الفليتة الجنب المخروقة قال طابقا قال
اتا جيت آآآآ الحبيب؟ رومانسية شنو في سقط الرياض يا ود البوش خليك بعيد أسحن ليك ... والله صحي هســـي أنت تكون قايلها شكولاته ولا ريحة يا زول امشي اشتري ليك وردة حمراء وجيبها للمره غايتو تجار الورود ديل أكثر ناس ما بستفيدوا من السودانيين
تحياتي
Post: #28 Title: Re: Happy Valentine Day Author: الامين موسى البشاري Date: 02-09-2013, 09:32 PM Parent: #21
Quote: تقول لي يمسكها من يدها ركز معانا شوية
يعني ماف أمل يا عادل خياري؟ غايتو عندنا عمنا لينا شاف واحدة من العروسات بترقص اسلو مع عريسها في ليلة زفافها قدام أبوها واخوانها 3 يوم ما أكل الزعل وقال والله راجلتكم دي زايدنها موية الايامات دي
Post: #31 Title: Re: Happy Valentine Day Author: الامين موسى البشاري Date: 02-09-2013, 09:59 PM Parent: #28
Quote: أيمون عماد جاء بجاى
بسال ساى قبل ما اهدى
وضاحة انداحي اندياحك سااااي يا بت .. ..
__ عدة الشغل موجودة صورة بيونسيه وعود وكمنجتين وأورغ وجيتار
Post: #32 Title: Re: Happy Valentine Day Author: Dr. Ahmed Amin Date: 02-09-2013, 10:43 PM Parent: #31
الأمين البشاري ... يا زول انت فاتح البوست ده جااادي ؟؟؟!!!!
قال عليه أفضل الصلاة والتسليم : " تركتكم على المحجة البيضاء , ليلهــا كنهارها؟, لا يزيغ عنها الأ هالكــ"
يا حبيب : أتركـ ما يفارق الكتاب والسنة .. والله يقدرنا نمسك في طريق محمد وهذه لعمري ليست بالسهلة ...
قال فالنتاين قال ....
_____________________
واحد مركب مكينة شنو كده ما عارف
Post: #33 Title: Re: Happy Valentine Day Author: البحيراوي Date: 02-10-2013, 09:39 AM Parent: #32
Happy red Valentine day in words and in deeds in hearts burning till the next one
Post: #34 Title: Re: Happy Valentine Day Author: الامين موسى البشاري Date: 02-10-2013, 10:27 AM Parent: #32
Quote: الأمين البشاري ... يا زول انت فاتح البوست ده جااادي ؟؟؟!!!!
جادي جــداد شديد يا د. احمد أمين ياخ خلينا ننداح شوية في عيد الحب دا ههههههههههههههههه
تحياتي
Post: #35 Title: Re: Happy Valentine Day Author: الامين موسى البشاري Date: 02-10-2013, 10:32 AM Parent: #34
Quote: Happy red Valentine day in words and in deeds in hearts burning till the next one
بحيراوي
أول حاجة ألف سلامة ليك يا حبيب اتصلنا عليك ولم ترد .. أجر وعافية ياخ وكل عام وانت الحب
Post: #36 Title: Re: Happy Valentine Day Author: البحيراوي Date: 02-10-2013, 11:36 AM Parent: #35
العزيز اللمين البشاري
تحياتي وإنشاء الله يوم شكرك ما يجي يا أخي . ودعواتك وسئوالك عني وصل عبر كافة الوسائط . وربنا يلمنا في العافية أم مساير سلب.
بحيراوي
Post: #37 Title: Re: Happy Valentine Day Author: امير طمبل Date: 02-10-2013, 11:59 AM Parent: #28
Quote: كيتاً في انصار السنة
يا حبيبنا كل عيد حب و أنت الحب السنة الفاتت زي الأيام دي كنت في إجازة في السودان عندي أخوي زول حبيب جدا و هو من أنصار الناس البتحتفل بعيد الحب ده عندي اخوي التاني أنصار سنة قاطع جلابيتو زي باب الحمام بتاع العذابة قام اخوي بتاع أعياد الحب قال لازم يحتفل باليوم ده طبعا أنصار السنة وقف ليهو في الزرارة الاخيرة قمت انا إقترحت عليهم يجيبو خروف و نضبحو في البيت في شكل كرامة وافقو الاتنين المهم قمت سلخت ليك للاخ بتاع عيد الحب غيبوبة كده من الجنيهات و زولنا مشي الكمبو و جاب ليهو خروف دعول جدا لما وصل البيت اخوي بتاع أنصار السنة سألو من وين جبت الخروف ده قال ليهو أشتريتو من جمب الكمبو زولنا هاج و سخط و قال هذا الخروف لا يجوز اكله لأنه ناس الكمبو بيرمو (الموشك) بتاع المرايس للخرفان و ان هذا الخروف مخمور ولا يجوز الكيتة قامت بينهم الاثنين المهم قمت انا قلت ليهم عندي ليكم حل بدل اخوي ما يرجع تاني الكمبو و يرجع الخروف و دي زيادة تكاليف زمن و صرف بنزين في الفاضي قالو لي حلك شنو قلت ليهم جيبو سوط عنج و أجلدو الخروف ده 40 جلدة و أخلصو من الفلم ده هههههههههههههههههههههههه أخوي بتاع انصار السنة ترك لنا البيت و حلف ما يرجع الا نعود الي غربتنا طبعا الحل بتاع اخوك هو فسرو قال لي داك بيلعب الزهرة و أنا النيل
Post: #38 Title: Re: Happy Valentine Day Author: الامين موسى البشاري Date: 02-10-2013, 12:43 PM Parent: #37
Post: #39 Title: Re: Happy Valentine Day Author: الامين موسى البشاري Date: 02-10-2013, 01:07 PM Parent: #38
Quote: عندي ليكم حل بدل اخوي ما يرجع تاني الكمبو و يرجع الخروف و دي زيادة تكاليف زمن و صرف بنزين في الفاضي قالو لي حلك شنو قلت ليهم جيبو سوط عنج و أجلدو الخروف ده 40 جلدة و أخلصو من الفلم ده هههههههههههههههههههههههه أخوي بتاع انصار السنة ترك لنا البيت و حلف ما يرجع الا نعود الي غربتنا
أمير يا حبيب ...
كل عام وأنت الحب يا حبيب غايتو أخوك انصار السنة دا بالغ معاكم واقتراحاتك في السلك مرة من زمن الجامعة طلعنا من البركس معزومين فطور رمضان عند واحد زميلنا رمضان الايامات ديك جاي في الصيف والدنيا حر ألف من ضمن الناس المعزومين معانا زميل لينا انصار سنة كااااارب اها الاذان أذن كدا وبدينا الضرب هههههههههههه أخوانك كان الجوع ضاربهم في البركس المهم يا زول ما لحقنا أكلنا لينا بلحتين وشربنا لينا شوية شوربة إلا صاحبنا انصار السنة وقف تب وقال للجماعة الصلاة ما تفوتنا يا ناس :) الفطور كان في الشارع كعادة السودانيين ومن ضمن الناس عمك عجوز كدي الظاهر رمضان كان مسخن معاهو ووقفة انصار السنة دا زعلتو ليك زعل شديد قام عاين للولد (انصار السنة) وقال ليهو: يا ولدي الصلاة بشيلها كلـــب؟ انصار السنة : لا يا حاج. عمك العجوز: اها خلاص أقعد كمل أكلك يا ولدي الأكل دا الكلـــب بشيلو
أمير ياخ خلاص ضميناك لشلة الناس الحكّايين .. والله صحي
عزيزي الصفوي ودالبشاري ومن الفيس طلة.. اليوم الخميس الموافق 14 فبراير عيد الحب.. فالنتاين.. نزف التهنئة لكل الاصدقاء والصديقات ونتمنى أن تمتلئ دواخلنا جميعا بالحب لكل من حولنا..
مساء الخير - والله عليك كرامة - حيث اشاهد قناة أم درمان قبل قليل وهي تستعترض أقوال الصحف لهذا اليوم حيث اصدر الشيخ غازي سليمان إفتاءً بضرب اي محتفل بفالنتاين 100 جلدة. غايتو كان أخدت ليك مية زي الحلاوة بفتوة شيخنا غازي دا .
مساء الخير - والله عليك كرامة - حيث اشاهد قناة أم درمان قبل قليل وهي تستعترض أقوال الصحف لهذا اليوم حيث اصدر الشيخ غازي سليمان إفتاءً بضرب اي محتفل بفالنتاين 100 جلدة. غايتو كان أخدت ليك مية زي الحلاوة بفتوة شيخنا غازي دا .
بحيراوي
شاحد الله يخزّنوها ليك يا البشاري لمن ترجع ما أحلا أن نراك مصلوبا من أجل الحب هههه
Post: #59 Title: Re: Happy Valentine Day Author: الامين موسى البشاري Date: 02-17-2013, 04:03 PM Parent: #57
Quote: شاحد الله يخزّنوها ليك يا البشاري لمن ترجع ما أحلا أن نراك مصلوبا من أجل الحب هههه
يا ظلامي بطل حساده ياخ
Post: #58 Title: Re: Happy Valentine Day Author: الامين موسى البشاري Date: 02-17-2013, 04:01 PM Parent: #56
Quote: الأخ اللمين
مساء الخير - والله عليك كرامة - حيث اشاهد قناة أم درمان قبل قليل وهي تستعترض أقوال الصحف لهذا اليوم حيث اصدر الشيخ غازي سليمان إفتاءً بضرب اي محتفل بفالنتاين 100 جلدة. غايتو كان أخدت ليك مية زي الحلاوة بفتوة شيخنا غازي دا .
