Post: #1
Title: أحلام زلوط..!!
Author: Frankly
Date: 02-08-2013, 12:43 PM
Parent: #0
حكاية أحلام زلوط..!! (قصة سودانية قصيرة)
كتبهااسامة جاب الدين ، في 30 نوفمبر 2008 الساعة: 16:03 م
وهذه هي حكاية (أحلام زلوط ) ..!!
أسامة جاب الدين
(1)
اليوم سنتعرف على (زلوط)..!! نعم (زلوط) شخصياً، الكل يعرفه ويضرب به الأمثال في كل ما يتعلق بـ المستحيل، أنا وأنت والجميع سمع بـ (أحلام زلوط)، ولا أحد يعرفه ولا يعرف بـ ماذا حلم بـ الضبط، ولكن .. اليوم أعتبر نفسك قد تعرفت على المدعو (زلوط)، اسمه الحقيقي (هشام)، فـ هو شاب تخرج منذ خمس سنوات قضاها في رحلة البحث عن العمل ولُقّبَ بـ (زلوط) إثر (زلطة) على جبهته، وهي جُرح أصيب به عندما كان صغيراً. المهم أن (زلوط) كان يقضي النهار في البحث عن وظيفة، ويعود عصراً ليجلس تحت ظل شجرة أمام منزلهم مع أصحابه، وهم في جلساتهم يتحاورون حول الحائل المائل وانتشار العطالة والبطالة بينهم.!
(2)
ذلك اليوم .. كان هو اليوم الذي سار به المثل المشهور (أحلام زلوط)، عندما عاد (زلوط) من رحلة طويلة قضاها في البحث عن عمل، لم يترك باب شركة إلا وطرقه، رمى أوراقه بـ المنزل وخرج لـ الشجرة لينفث عن زهجه بـ الدردشة مع أصحابه، حياهم وجلس بينهم وقال:
- يعنى هسع العلماء ديل .. اخترعوا الطيارة .. والغواصة .. والأقمار الصناعية .. وما قادرين يخترعوا حاجة تنهي العطالة دي؟!!
ضحك صاحبه (محمد) وقال:
- الظاهر دي الحاجة الوحيدة الغلبتم .. لكن رايكم شنو .. تعالوا نفكر لينا في اختراع يقضي على العطالة نهائياً؟!
أجابه (عمر) بـ إحباط:
- مافي .. العطالة دي المشكلة الوحيدة الما عندها حل جذري!!
تدخل (زلوط):
- أنا عندي فكرة اختراع ممكن يقضي على العطالة نهائياً.!!
التفت إليه الجميع، ثم هتف به (محمد):
- شنو؟ .. كدي ورينا اختراعك ده .. يمكن .. يعني والله اعلم .. تحل لينا مشكلة العطالة دي؟!
حمحم (زلوط) ثم قال:
- طبعاً إنتو عارفين إنو نحنا كـ مواطنين مشهورين بالنقة الكتيرة ؟!!
قاطعه (عمر):
- وده علاقتو شنو بالعطالة؟
زلوط: ياخي أصبر نتم ليك ..
ثم أضاف:
- يعني يا جماعة النقة دي ممكن نستفيد منها في حل مشكلة العطالة..!
قاطعه (عمر) مرة أخرى:
- لا .. لا إنتا الظاهر الليلة شارب ليك حاجة!؟
صرخ فيه (زلوط) بـ غضب:
- ما تقاطعني … أصبر أكمل كلامي!!
- خلاص واصل .. نشوف النقة دي حـ تحل مشكلة العطالة كيف؟!
جر (زلوط) نفسه بعمق ثم واصل:
- يا جماعة افترضو مثلاً إنو في شركة اخترعت جهاز يحول (النقة) إلى (كهرباء) .. يعني واحد نقناق زي عمر ده ممكن يولد زي عشرة كيلو واط في دقيقتين .. وفي خمسة ساعات ممكن يولد كهرباء تشغل مصنع نسيج ليوم كامل .. ويطلع مصاريفو بي ارتياح .. أها رايكم شنو في الاختراع ده؟!!
صمت الجميع برهة وهم ينظرون إلى (زلوط) في دهشة وارتياب، وكسر (عمر) حاجز الصمت:
- والله إنتا الليلة ما براك؟!!
قاطعه (زلوط):
- والشركة دي ممكن تعين ملايين الخريجين .. وتخت قدام أي واحد مكرفون بس .. وتخليهم ينقنقوا ويولدوا كهرباء ..وكمان دي مهنة ما دايرة أي مؤهلات .. وكل ما الواحد كان صوتو غليد .. وحلقو مانع .. حـ يكسب أكتر..!!
ضحك (خالد) وقد استهوته الفكرة:
- زاتو نرتاح من الجمرة الخبيثة دي .. يعني لو في الأسرة واحد نقناق ممكن يشغل التلفزيون والثلاجة.. وممكن يكوي بي مكوة الكهرباء .. وزول يسألو مافي .. دي كهرباء جابها بي نقتو.. والله فكرتك سمحة..!!
ثم نحو (زلوط) وقال له:
- لكن يا زلوط .. جهازك ده لازم يكون عندو اسم ؟!
أجابه:
- ممكن نسميهو (جهاز النقناقونيتر)!!!
ثم تكلم (زلوط) بـ رصانة:
- وبعدين ممكن الشغلانة تتطور .. يعني ندمج النقناقونيتر مع التلفزيون مثلاً .. ويجي واحد صوتو غليد زيك كده يا عمر .. وينهر التلفزيون نهرة واحدة .. ويحضر السهرة بي مزاج!!
عمر: هوي .. يا ناس .. هووي .. والله بتبالغو عديل؟!!
خالد: وجهاز النقناقونيتر ده طبعاً ممكن الواحد يشيلو معاهو زي الموبايل .. وفي أوقات فراغك ممكن تنقنق فيهو تولد ليك كم كيلو واط كده بدل تكون قاعد ساي!!
ارتفع صوت (عمر) قائلاً:
- أها يا (زلوط) .. أعمدة الكهرباء دي يودوها وين بعد داك؟!
خلف (زلوط) رجله وقال بـ لامبالاة:
- والله ياخي .. ممكن يقلعوها كلها كده .. ويبطحوها في الواطة دي .. يعملوها شوارع زلط!
صاح فيه (عمر) بـ غيظ:
- طيب والسلوك؟!
- السلوك دي .. يعني .. ممكن يوزعوها على المواطنين .. يعملوها حبال غسيل وللا أي حاجة!
صفق (عمر) بيديه في تعجب وحيرة وقال:
- غايتو جنس أحلام وأوهام .. جهاز النقناقونيتر بتاعك ده حقو تسميهو (أحلام زلوط)!
صرخ فيه (زلوط):
- أها ممكن الجهاز يطور أكتر .. بدل ما يحول (الطاقة النِقيّة) يعني طاقة النقة يحولها إلى (طاقة حركية)!!
- ودي بعملوها كيف؟
- الواحد ممكن يفتح تنك العربة وينقنق فيهو ربع ساعة .. والنقة دي توصلو من العربي لـحدّي الحاج يوسف..!!
ثم أضاف (زلوط):
- يعني النقة بدل الجاز والبنزين ؟!
خالد: بعدين ممكن جهاز النقناقونيتر ده يساهم في انتشار الثقافة وزيادة الوعي العام في المجتمع!!
عمر: كيف؟
خالد: يعني الناس الـ بـ تشحن الجهاز بـ النقة .. ينقنقوا يقولوا شنو .. دقيقتين والواحد راسو بفضى .. لازم يقروا من كتاب .. وبي كده يثقف نفسو على الأقل.. وللا ما كدي؟!
نهض عمر قائلاً:
- أنا ماشي .. إنتو ناس خياليين ساي .. وبعدين جهازكم ده .. الشركة الصنعتو ممكن تشغل ليهو شريط أي فنان وتقلبو بـ الجنبتين .. وتولد الكهرباء .. لا خريجين نقناقين .. ولا يحزنون!!!.
http://osamajab.maktoobblog.com/1480767/%D8%A...5%D9%8A%D8%B1%D8%A9/
|
Post: #2
Title: Re: أحلام زلوط..!!
Author: رانيه محمد الشيخ
Date: 02-08-2013, 05:28 PM
Parent: #1
:)))))))))))))
|
Post: #3
Title: Re: أحلام زلوط..!!
Author: Frankly
Date: 02-08-2013, 09:49 PM
Parent: #2
اضحك الله سنك أختي رانية
|
Post: #4
Title: Re: أحلام زلوط..!!
Author: وضاحة
Date: 02-08-2013, 09:53 PM
Parent: #3
هههههههههههههههههههههههه
هو بالله دى قصة أحلام زلوط..!!
مرات بقول لى امى كلام كده بقطعوا من راسي مرات
تقول لى دى احلام زلوط
|
Post: #5
Title: Re: أحلام زلوط..!!
Author: showgi idriss
Date: 02-09-2013, 06:45 AM
Parent: #4
البنحلم بيهو يوماتي
لولا انو نحن شعب "حلوم"
كان طرشقنا يااخ
99.99% من شعبنا العظيم حالم والله
_____
ابوالشوش
|
Post: #7
Title: Re: أحلام زلوط..!!
Author: Frankly
Date: 02-09-2013, 08:33 PM
Quote: البنحلم بيهو يوماتي
لولا انو نحن شعب "حلوم"
كان طرشقنا يااخ
99.99% من شعبنا العظيم حالم والله
_____
ابوالشوش |
يا أبو الشوش
البنحلم بيه يوماتي دي مشروعة ومطلوبة
ودا هو الأمل
لكن أحلام زلوط دي هي البتضيع الأمل
|
Post: #6
Title: Re: أحلام زلوط..!!
Author: Frankly
Date: 02-09-2013, 04:03 PM
Parent: #4
Quote: هههههههههههههههههههههههه
هو بالله دى قصة أحلام زلوط..!!
مرات بقول لى امى كلام كده بقطعوا من راسي مرات
تقول لى دى احلام زلوط |
هههههههههه
القصة حلوة جداً لكن المثل قديم والزمن داك ما كان في موبايل ونقناقوميتر
|
Post: #8
Title: Re: أحلام زلوط..!!
Author: Frankly
Date: 02-10-2013, 09:54 AM
Parent: #6
تقديم
|
|