كيف ترد علي المداخلات المسيئة من بعض كتاب الفيسبوك؟

؟

عليك الإحتفاظ بحق الرد _ بي فوق، وتقوم تقلّع جلابيتك وتنزل ليهم بي تحِت :)


اللائحة لا تسري عليك

Quote: عليك الإحتفاظ بحق الرد _ بي فوق، وتقوم تقلّع جلابيتك وتنزل ليهم بي تحِت

عايز إورطك الزول دا ... ما تسمع كلامو

Quote: عايز إورطك الزول دا ... ما تسمع كلامو

لالالا ياخ ، أنا بتكلم بالقانون وحسب اللوائح :)

ــــــــــــ

زمااااان ونحن بنلعب كورة، كان غالبين بندق الحكم وكان مغلوبين برضو بندقوا
المهم مرة مزنوقين كده وانا مطرود قلت لي واحد صاحبي كان إحتياطي : أسمع أملص الفنيلة ونبذ الحكم .
صاحبنا بعد أنتهت الكورة طوالي مشى للحكم، وقعد ينبذ فيه
الحكم ما كضب طلع الكرت الأحمر وقشطو ليك كيف خلاه لافّي حول نفسو

ــــــــــــ

أب تفة

أتوكل على الله

اعمل اي حاجة الا كلام حبيب نورا دا :)

Quote: اعمل اي حاجة الا كلام حبيب نورا دا :)

كلام قصيّر ما بنسمع
وعلى راي المثل : ناس أب تفة بترشّوا يخشوا لي الزول في كرشو :)

Quote: Amin M Suliman ياسر طيفور يا وهم !! إنت وكت ما بتقدر علي الاساءات بتقل أدبك مالك ؟! أبقي راجل و تعال لينا بتحت !!

لو بتقصد الوهم دا يا أبو عمار تنزل ليه بي تحت تخربش ليه صلعتو الكبيرة دي و إنت على حق

Quote: لو بتقصد الوهم دا يا أبو عمار تنزل ليه بي تحت تخربش ليه صلعتو الكبيرة دي و إنت على حق

Quote: المديدة الحارة :)

نقلاً عن الفيس بوك :)

طيِّب لو داير إشتكي كاتب من كتاب الفيسبووك، إشتكيهو لي بكري زُكربيرق ولّ إشتكيهو لي مارك أبوبكر؟
___
سأعود ؛)

ناس الفيسبوك قشطتهم لايكات، أما الفارات الفوق ديل بجيهم بعد النوم ؛)
__
تباً لكم ؛)

Quote: طيِّب لو داير إشتكي كاتب من كتاب الفيسبووك، إشتكيهو لي بكري زُكربيرق ولّ إشتكيهو لي مارك أبوبكر؟ ___ سأعود ؛)

أسدِ لنفسك خدمة ولا تعود قريباً _ ربما بعد ألفِ عام :)


تبّاً لك

يا حبيب نورة شكلو كدا هارش منهم...
فاتح ليه بوست بسأل كيف إرد عليهم ,,
قامو رشوه ... مشى عمل ليهم Like و نحن المساكين ديل (تببنا)

Quote: يا حبيب نورة شكلو كدا هارش منهم... فاتح ليه بوست بسأل كيف إرد عليهم ,, قامو رشوه ... مشى عمل ليهم Like و نحن المساكين ديل (تببنا)

يبدو أن الوغد جرّى واطي

حالتي أنا كنت قايلو عب كبيييييييير

Quote: حالتي أنا كنت قايلو عب كبيييييييير

كان زماااااااااااااااااان ......

عليك الله زمان إرشوهو جنس الرش دا بمشي إنوم .....؟؟؟؟

يا ياسر، يعني احنا عرفنا كيف نرد علي المداخلات المسيئة من داخل البورد؟ :)

Quote: كان زماااااااااااااااااان ...... عليك الله زمان إرشوهو جنس الرش دا بمشي إنوم .....؟؟؟؟

هههههههههههههههههههههه والله صاحبك أب تفّة بعد كده شعرو العاجبو ده إلا يخليه منكّش

Quote: يا ياسر، يعني احنا عرفنا كيف نرد علي المداخلات المسيئة من داخل البورد؟ :)

يا دوك ... ياسر أصلح حال المنبر و حل مشاكل الناس الفوق و داير يشوف مشاكل الناس التحت !!
-----------
أبو حسين ... أرفع يدك من صلعتي يا زول !!
-----------
يا كيكي من خارج الأستديو ... قريبك ده متلقي حجج ساي !!

Quote: Ali Omar · Khartoum University داير تطفشنا زي ما طفشته امير الكوشي بشاشا ؟ انت وصحبك شرنقة عادل عباس ديناصورات .في المنبر ما قدمتو شي مفيد غـير الفتن ما عندكم شي

قبل تتم كلامك واحد ردمك اهو انت وعادل
ياسر ازيك
التحية لكل ناس الفيس بوك

زي ما بترد على المداخلات المسيئة من فوق
واحد من تلاتة تسفهها أو تقول لصاحبها الله يسامحك او ترد ليه في ميتينو

سلام ياسر

الله يعينك انت عارف ناس الأخدود ديل لم يأتوا لحوار

كيكى
محمد على
حبيب نورة

الجماعة ديل انزل ليهم تحت فى الخندق أحسن اتفاهم معاهم!!

Quote: يا ياسر، يعني احنا عرفنا كيف نرد علي المداخلات المسيئة من داخل البورد؟ :)

Like

أنا من الذين يأخذون القانون بيدهم في هذا المكان، وذلك لأسباب معروفة للجميع، أولها غياب اللائحة والمحاسبة، وآخرها تحايُل الكتاب على تلك اللائحة؛ وإن أردت أن تحفظ لنفسك حقها، عليك بملاحقة أي معتد، بقدر إعتدائه، والمنبر قبل أن يُفتّح على مصراعيه في تلك "الشراهة الذكية" كان طارداً للكتاب الجادين، وهؤلاء الكتاب لم يجدوا الحماية والتقدير فذهبوا مأسوفاً عليهم؛ الآن وبعد أن أصبّح بمقدور أي كائن أن يكتب عن طريق نفاج الفيسبوك بعد أن يختلق اسم وهمي، أصبّح المكان أكثر عرضة، وقد تأتي إتهامات غليظة للكتاب في شرفهم وفي أسرهم، والكاتب شخص غير معروف، تلك الإتهامات -قبل فتح نفاج الفيسبوك- كانت تقابل بصرامة وملاحقة من الأعضاء، وفي بعض الأحيان عقوبة وحرمان لفترة - غير كافية-، يسترد فيها المتهم "بعص" من حقه؛ عليه، هل بمقدور بكري أن يلاحق كاتب غير معروف، أسّس له صاحب المنبر في أن يُسيء لمن يختلف معهم فيدخل عليهم من نفاج الفيسبوك لتصفية شخصياتهم..
____
لاحظت بعض المداخلات السائبة من بعض كتاب الفيسبوك، وهذه المداخلات لو كان أصاحبها معروفين لصاحب المنبر لتحملوا مسؤوليتها، ولكن البورد السائب يعلم "الشرقة"

ياسر سلام وتحية

Quote: والمنبر قبل أن يُفتّح على مصراعيه في تلك "الشراهة الذكية" كان طارداً للكتاب الجادين، وهؤلاء الكتاب لم يجدوا الحماية والتقدير فذهبوا مأسوفاً عليهم؛ الآن وبعد أن أصبّح بمقدور أي كائن أن يكتب عن طريق نفاج الفيسبوك بعد أن يختلق اسم وهمي، أصبّح المكان أكثر عرضة، وقد تأتي إتهامات غليظة للكتاب في شرفهم وفي أسرهم، والكاتب شخص غير معروف، تلك الإتهامات -قبل فتح نفاج الفيسبوك- كانت تقابل بصرامة وملاحقة من الأعضاء، وفي بعض الأحيان عقوبة وحرمان لفترة - غير كافية-، يسترد فيها المتهم "بعص" من حقه؛ عليه، هل بمقدور بكري أن يلاحق كاتب غير معروف، أسّس له صاحب المنبر في أن يُسيء لمن يختلف معهم فيدخل عليهم من نفاج الفيسبوك لتصفية شخصياتهم..

اتفق معك الاخ ياسر أن منح حق التعليق والرد على أعضاء خارج المنبر دون رقيب لهو خطأ كبير سيفقد المنبر وقاره ومكانته لدي الكثيرين قريبا، وليس من المنطق ان تضع لوائح ونظم لضبط الكتابة وسلوك الأعضاء وتطلق الحبل على القارب لغير الأعضاء، وما أيسر للمرء أن يفتح حسابا وهميا على الفيس بوك ليكيل السب والشتائم وفاسق القول لكل من لا يعجبه او يختلف معه والأغرب ان الباشمهندس وضع عنوانا عريضا يقول فيه " ساهم في نظافة موقعك «سودانيزاونلاين دوت كم» وأبلغ عن أي تعليق مخالف لحذفه " فكيف له أن يضبط مداخلات غير الأعضاء ، مداخلات الفيسبوك ربما تتيح فرصة لغير الأعضاء للتفاعل مع القضايا المطروحة ولكن عيبها انها لا يمكن التحكم فيها على الاقل بالشكل الحالي ، الافضل هو إيجاد آلية يستطيع صاحب البوست من خلالها عرض البوست على صفحته في الفيسبوك اذا اراد وليكن ذلك اختياريا..
ولا شك أن المنبر أصبح غريبا ومريبا في آن، لأن التغيرات الاخيرة التي أدخلها الباشمهندس أضرت بالحوار وافقدت المنبر رونقه، مثل تقليل عدد البوستات بالصفحة الواحدة للمنبر ولذلك يختفي البوست في أقل من ساعة ويغوص في غياهب الجب بنهاية اليوم، بجانب عدد مداخلات الصفحة الواحدة للبوست "20" وهذا لا يساعد المحاور للمتابعة ويكون مملا أن تبحر بين صفحات البوست من أجل تكوين فكرة جيدة ومتسقة مع الحوار واخيرا الزيادة غير المتدرجة للأعضاء الجدد في أول يناير 2013 يوم ضاعف الباشمهندس الأعضاء مرة ونصف.

مودتي...

المداخلات المسيئة دى قريبة الرسوم المسيئة؟

Quote: الله يعينك انت عارف ناس الأخدود ديل لم يأتوا لحوار

يا زول ديل ناس رش بس

أسلم حاجة بكري يعمل خور للناس القاع..
سلامات يا ابتفة..

يا بكري حصل عضوية منبرك ..
وطي عشان تشوف.

Quote: طيِّب لو داير إشتكي كاتب من كتاب الفيسبووك، إشتكيهو لي بكري زُكربيرق ولّ إشتكيهو لي مارك أبوبكر؟

لو داير تشتكي واحد من كتاب الفيس بوك اشتكيهو ل الله بس

ياسر و معتصم ... سلامات
اعتراضكم علي وجود الأخوان و الأخوات من خارج الأستديو لانهم بكتبو بدون قواعد و ضوابط أو أي نوع من أنواع الرقابة مردود عليه بما يحدث في البورد نفسه !!
وين القواعد و الضوابط و أنواع الرقابة ( غير شخيت الكلمات اللي ممكن تتحايل عليه بمليون طريقة !!! ) ؟!!
أكبر منبر سوداني للحوار لا توجد به قوانين و لا لوائح و يدار بمزاج صاحبه زيو و زي أي دكان فول ... و الزايد البل بلة إنو معظمنا ناس ما مسؤلين و ما عندنا عرفة لقصة الحوار.... و أي خلاف في الرأي بتنتج عنو حروب صليبية و حملات تأديبية قد تستمر سنين عددا و تستخدم فيها الألفاظ البذيئة و الكذب و الافتراءات التي لا تحدها حدود .... فعن أي وقار للمنبر تتحدث يا معتصم ؟!
و يا ياسر مافي ( صرامة و ملاحقة من الأعضاء) للكاذبين و المسيئين ... البعض يكذب كما يتنفس, يفتري و يبهت مخالفية و زول - غير المفتري عليه - بفتح خشمو مافي ... لانو كان فتحت خشمك بكرة بتبقي مفتري عليك و ما بتلقي البقيف معاك ... لو كان في ( صرامة و ملاحقة من الأعضاء) زي ما قلت لما سولت نفس احدهم له الكذب و البهتان و الافتراء علي الناس أعضاء كانو أو شخصيات من خارج المنبر ... ما كان بكون في مشكلة أصلا ... المشكلة اننا بناثر السلامة و لا ندري أن بها الندامة !!
الأخوان و الأخوات من خارج الأستديو جودهم مهم لانهم علي الأقل ما بكتبو جميلة و رد جميل للاعضاء.... و ما خايفين من الحملات التاديبية و لا من الناس البتقنص ليك و لا مستنين شكر من زول .
بعدين يا ياسر طالما إنت بتاخد حقك بايدك في المنبر ... لو زول من ناس الخارج أساء ليك ... أخدو بايدك برضو ... سكو في الفيسبوك في نفس مكان ما أساء ليك ... المافي شنو ؟!!
الأعضاء الجدد و الأخوان و الأخوات من خارج الأستديو ديل اخر أمل إنو حال المنبر ينصلح ... .دعو الناس تكتب ..... دعو الأشجار تنمو !!

يا بروف يا بروف
جهجهت باكاتنا بين المفتر(ي) و المفتر(ى)
ما عرفنا ياتو اسي المقصود ههههههههههههههه

اتفق معك في جل مداخلتك و اختلف في الجزئية دي

Quote: الأعضاء الجدد و الأخوان و الأخوات من خارج الأستديو ديل اخر أمل إنو حال المنبر ينصلح

الأعضاء الحاليين ديل كانوا اعضاء جدد يوما ما, و الجدد ديل و الفيسبوكاب ما ملايكة أو جايين من منبر يوتوبيا اونلاين بل فيهم الجاي من منابر الهكر عدييييل كدا حيث هبش أعراض الناس زي قولة "لك الود" مثلا
الحل يا بروف ما في تغيير الناس الحل في القانون, فهمو و تطبيقه, و في الرأي العام, وفي قولة الحق و تسمية الأشياء باسمائها
الكذب يتقال عليه كذب, و البهتان يتسمّى بهتان
الناس ما بتتولد او تجي من بيوتها عايزة تسيئ و تهبش اعراض غيرها و تكسر عينها
لكن يدعوها لذلك ويغريها أمنها من العقوبة أو ان تكون العقوبة خفيفة لا تناسب الجرم وفوق هذا وذاك تاتي شلتك متهافتة تتباكى عليك و تنوح و تندب عليك بسذاجة متناهية كونك ضحية مؤامرة و هاك يا لولوة ما أنزل الله بها من سلطان
جيب اعضاء جدد بأخلاق الأنبياء و فيسبوكاب صحابة عديل و فكّهم بدون قانون أو بقانون سطر آه وسطر لأ و شوفهم بعد سنة,سنة شنو تلاتة شهور بس

سلام يا أبو عمار

الشتيمة نص مكنة ما تشتغل بيها

لكن البغّرق

ترد ليهو فوق وتحت عشان يآمن

هسة انت في التحت كدي عاين الفوق دا

رسالة الى كل الطفيلين الجو سكنو الخرطوم ....

شوف الزول دا رش الروس ديل كيف ؟

ياود طيفور

انت لاعب محترف ما تحتك مع الجمهور يقوموا يضربوك بي قزازة ماتعرف الخبتك منو

بكوري شكلو ح يعمل ترقيات لي ضباط صف من جنود الفيس بوك

تحياتي

زاتوووو

يا أمين وأيم الله ذبحتني بهذا "الكلام الساي"، قرأت بأذنيك وكتبت برجليك، تباً لك ياخ ؛)

Quote: اعتراضكم علي وجود الأخوان و الأخوات من خارج الأستديو لانهم بكتبو بدون قواعد و ضوابط أو أي نوع من أنواع الرقابة مردود عليه بما يحدث في البورد نفسه !! وين القواعد و الضوابط و أنواع الرقابة ( غير شخيت الكلمات اللي ممكن تتحايل عليه بمليون طريقة !!! ) ؟!! أكبر منبر سوداني للحوار لا توجد به قوانين و لا لوائح و يدار بمزاج صاحبه زيو و زي أي دكان فول ... و الزايد البل بلة إنو معظمنا ناس ما مسؤلين و ما عندنا عرفة لقصة الحوار.... و أي خلاف في الرأي بتنتج عنو حروب صليبية و حملات تأديبية قد تستمر سنين عددا و تستخدم فيها الألفاظ البذيئة و الكذب و الافتراءات التي لا تحدها حدود .... فعن أي وقار للمنبر تتحدث يا معتصم ؟! و يا ياسر مافي ( صرامة و ملاحقة من الأعضاء) للكاذبين و المسيئين ... البعض يكذب كما يتنفس, يفتري و يبهت مخالفية و زول - غير المفتري عليه - بفتح خشمو مافي ... لانو كان فتحت خشمك بكرة بتبقي مفتري عليك و ما بتلقي البقيف معاك ... لو كان في ( صرامة و ملاحقة من الأعضاء) زي ما قلت لما سولت نفس احدهم له الكذب و البهتان و الافتراء علي الناس أعضاء كانو أو شخصيات من خارج المنبر ... ما كان بكون في مشكلة أصلا ... المشكلة اننا بناثر السلامة و لا ندري أن بها الندامة !!

أنا يا أميني سألت عن إمكانية المحاسبة لكاتب من كتاب الفيسبوك كتب كلاماً يمس الذمة والشرف والأخلاق، و"المفترى" عليه يريد أن يبريء ساحته كما فعلت منال خوجلي في قضيتها الشهيرة ضد محمّد ناصر، أوصلت قضيتها للمحاكم، ومسئولية الكتابة، جعلت بكري أبوبكر يتعاوّن للوصول لمحمّد ناصر، من يعرفه ومن زكاه، حتى إنقطع الخيط عند وائل طه محي الدين، شخص معروف، صحيح لم تطاله العدالة، ولكن المفترى عليها -أظن- أخذت حقها الأدبي، ووائل أدين "شعبيا"؛ وأيضاً كما حدث في قضية الشاعر الغفاري، كتب عنه كاتب في هذا المكان كتابة تمسه في أخلاقه، فلاحقنا الكاتب "البوقّس"، حتى وصلنا لمن زكاه محمد حامد جمعة، وإنقطع الخيط هناك؛ ومثال ثالث، ما حدث لمحمد البشرى الخضر، أجبّر محمد المفتري عليه، معاوية عبيد بان يعترف بأنه كاذب، والأمثلة كثيرة يا أميني، لقد تمت ملاحقات كثيرة في هذا المكان، صحيح بعضهم فلت بفعلته، ولكن ظل معروف؛ وكاتب الفيسبوك ذاته، إن كان معروف علي الأقل لصاحب المنبر، فليكتب ما يشاء ويتحمل بكري أبوبكر " وسّع الله بورده" مسؤولية كشف شخصيته، إن لزم الأمر.

أما الكتابة -دون ما سبق ذكره- يتحملّ مسؤليتها بكري أبوبكر، وحده لا شريك، لأنه وضع لائحة "همبولية"، والهمبول يا أميني هو قطعة قماش قديمة تُُثبّت على عود، بحيث تكون واضحة للطيور في شكل إنسان، فتبتعد الطيور من المكان؛ حيلة قديمة قليلة المردود يستخدمها أهلنا البسطاء، قد تخيف الطيور مرة، ولكن لن تخيف الطيور كل مرة ولن تخيف كل الطيور، حتى يأتي اليوم الذي تتخذ فيه الطيور الهمبول ذاته منصة إنطلاق، وحتى لا اطيل يا أميني؛) الكتابة الغير مسؤولة المنتشرة في هذا المكان تقع مسؤوليتها على بكري، وبكري يريد منبره أن يكون بهذه الطريقة، والسبب معروف. إن طبّق بكري لائحته، لماكتب كاتب ما يتطلب المساءلة.

Quote: الأخوان و الأخوات من خارج الأستديو جودهم مهم لانهم علي الأقل ما بكتبو جميلة و رد جميل للاعضاء.... و ما خايفين من الحملات التاديبية و لا من الناس البتقنص ليك و لا مستنين شكر من زول .

القال ليك منو؟ أنا ده هسي دي أعمل لي اسم وهمي وأجي أقنص ليك، في كل بوست، وأجي أشكر ود البشرى.. وأنا القدامك ده داخل الأستوديو لا بكتب رد جميل ولا خائف من الحملات التأديبية ولا مستني شكر من زول، وأنت ذاتك -أظنك- كذلك، فلا تكتب يا اميني بهذا التعميم المخل، مادحاً من هم خارج الأستوديو وزاماً من هم بداخله.

Quote: بعدين يا ياسر طالما إنت بتاخد حقك بايدك في المنبر ... لو زول من ناس الخارج أساء ليك ... أخدو بايدك برضو ... سكو في الفيسبوك في نفس مكان ما أساء ليك ... المافي شنو ؟!!

المافي كتير يا أميني، كيف ألاحق شبح؟ شخص ببساطة يمكنه أن يعمل ليك بلوك، ولن تستطيع أن تراه، ناهيك من تسكو؛ سكاك ديك رومي ياخ ؛)

Quote: الأعضاء الجدد و الأخوان و الأخوات من خارج الأستديو ديل اخر أمل إنو حال المنبر ينصلح ... .دعو الناس تكتب ..... دعو الأشجار تنمو !!

قلت لي مالي يدّك منهم تّب
___
المقتبس الأخير ده يا أميني يقع تحت تصنيف الكتابة "المموسرة*" ؛)
* من ماسورة ؛)

الاخ أمين محمد سليمان لك التحية والاحترام

Quote: andiquest;ياسر و معتصم ... سلامات اعتراضكم علي وجود الأخوان و الأخوات من خارج الأستديو لانهم بكتبو بدون قواعد و ضوابط أو أي نوع من أنواع الرقابة مردود عليه بما يحدث في البورد نفسه !! وين القواعد و الضوابط و أنواع الرقابة ( غير شخيت الكلمات اللي ممكن تتحايل عليه بمليون طريقة !!! ) ؟!! أكبر منبر سوداني للحوار لا توجد به قوانين و لا لوائح و يدار بمزاج صاحبه زيو و زي أي دكان فول ... و الزايد البل بلة إنو معظمنا ناس ما مسؤلين و ما عندنا عرفة لقصة الحوار.... و أي خلاف في الرأي بتنتج عنو حروب صليبية و حملات تأديبية قد تستمر سنين عددا و تستخدم فيها الألفاظ البذيئة و الكذب و الافتراءات التي لا تحدها حدود .... فعن أي وقار للمنبر تتحدث يا معتصم ؟!

نحن او أنا لا أعترض على وجود الاخوان والاخوات من خارج الاستديو او المنبر بل العكس فقد قلت ان المداخلات من خلال الفيسبوك تتيح فرصة لغير الاعضاء التفاعل مع القضايا المطروحة في المنبر ، وتحفظي هو أنهم لا يمكن محاسبتهم بعكس الحال في المنبر فهنالك لائحة للكتابة في المنبر ولكن ينقصها التطبيق بفاعلية، ورغم الهوس والخروج عن المألوف الاخلاقي الذي بدأ يطفح للسطح بشكل محزن مؤخرا، الا أن الرقابة المتاحة تضبط بعض هذه الحالات ، وانت تعلم أن هنالك عدد من البوستات حذفت وبعض الاعضاء أوقفوا واخرين حُددت لهم عدد المداخلات ولكن لا شك أن هنالك من يفلت عن العقاب لدرجة يجعل بعض الأعضاء يعتقدوا أن القانون يتم تطبيقه بانتقائية وهذا ما يجب تصحيحه او وضع لائحة اكثر شمولا وإيجاد آلية تطبيق فاعلة.. اما الفيس بوك فيجب لاصحاب البوستات الحق في الموافقة او الاعتراض على السماح لغير الاعضاء اتداخل معهم وحينئذ يتحملوا تبعات ما يترتب على ذلك...
مودتي..

البشرى ... معتصم و ياسر طيفور الوهم ... ساعود للرد كان الله هون !