دعوة لي شكلِ جديد الشَّاعر حنفي حاج الطيب

(لي شكلِ جديد ) الشاعر حنفي حاج الطيب


يا دُرّه لامتين فى الصَدَف يا قمرا لامتين فى البيوت؟
ما تسيبى أحزان الغُرف توصى بيها العنكبوت
يازوله أروع ما تكون لمَن تَقنطِر لَى وأشوت
ضفِّارىْ موروث الوَهَم وباب الحراسات القديم
ما سامعة وكتين تطلعى وساعة طوابيرك تفوت
النّاس بِصافيها الفرح وشارِعنا بِطلَع ليهو صوت
وطربانه بتجيك من بعيد تَعزِف مزازيق الُشفوتْ
الرّصوا احزانهم حِجار ختوها فى الرُكُن اللئيم !
خليها يوم تتهنى بيك تفرح معاكى وتنتشى
وصوت طبْلها ينْقرِش معاك سَر روعة ايقاع المَشى
غير مُتعة التصفير حرام من غــَلَّتِك ما تلقى شى
أكلت ملفاتها الوراك تمــَت غداها الباقى نيم
فى لسته عايز ْ أكتبها ليك مُتمنَّى ما تباريكى يوم
عشق الغوايش والخَتَم والحِنـَّه بى كُلْْ الرّسوم
وتياب مزيعات الغُبار ألوانها ما ليهن لِزوم
إتْخَيَّرى اللبس البسيط وأتحدّى بيك كُل الحريم
مادام كِبرتى على الوشوم
والمدعو نَقَرابى الرشوم
موس الفراعنة تَسيبى كيف يبنيلو اهرام من هموم ؟
ما تخلِّى نَفـَّاج أو دِريب لى طيره فى خدِّك تحوم
دا وكُلُُّ زِيف بِنْدَه عليكْ يوماتى من عِلَب الكريم
أفرح كتير ساعة المغيب لمَن حريق طَلحِك يقيف
وجنب الهشاب فى كم قِطار يتهادى صمغو على الرّصيف
ما الرّاعى والريم والطيور محتاجه لى ضُلُّو الوريف
وين ُ ُإنتصارك لى الورود ؟ ما قلتى إحساسِك رهيف
كيف يِرضَى ليك تِتعَصفرى وتأتمى البرَم البِقوم
ومستنى يوم تتعب رؤاى يرموهو تى شيرتك عَلىْ
ترحل غَشاوات فى العيون بصراً حديد يرتدّا لى
واقراكى بى شوفى الجديد إنسانه خلَت جمرى حَـى
ما عارفه من بسمه بتشيل ْ عَبَادى لو آنستَ ضــَى
بحسب بتوقيت البروق وأفطُر على وجهِك وأصوم
شان ضاوى من قبل الظلال والدنيا بى المكياج تفـــوه
و ماخِد نضارو الما خمَج من التبسـُم فى الوجوه
يا لابسه قى الروح السُوار وعينيك منارات يوم أتوه
وسط الرموش الواققه ما بين همبريبك والسموم
و اتأمّلك واقع مُعاش قدامى من بعد إقتراح
اكثر رشاقة من الفَراش قُمرية فارداهو الجناج
أصدق بشارات الرشاش انسام مِرسلِها الصباح
تطْلَع مَداعى معَ الدعاش تعزِم حناكيش الغيوم
الكانو قانصين من زمان لى حفل ِ ميلاد الورود
من قالو بى اغلظ يمين حالفين خُطاهم ما تَعود
لى ناس بِتستلهم رقيص أفراحها من هَبَل القُرود
وما بتنزل النيل خطوتين تِتأملْ الوز البعوم
واتأبْطِك خيراً وفير فجرا تخاصرينى ونَمِشْ
ميّاده بى خِصراً يدين مَنْ سوّى من جوعِك كَرِِشْ
نفتح بلاغات قى الظلام فى دفتر أحوال الشمش
ومن قلْبَها الضوّاى شديد نجلِب مشاعل لى الديوم
وماضرَّ لوكبس الظلام وإحساسك الصادق أمر
نقرش بساطات الغرام في وَش برنْدَات القمر
واقرا القصايدْ الزاهية بيكْ والساخرة من كم مؤتمر
نطفي النجيمات القريب نتغطي بي الفرحه وننوم
نصْحَى ونَهِد صنم اليسار والزادو مختصر الكلام
واهل الجلاليب القَصار وقُبَة مشايخ كوكدام
ونخْتِم بمشروع الدمار الأصَّل الفقر التمام
المكَّن الهنباته مِن عَرَق المساكين والرسوم


حنفي حاج الطيب 2004

Quote: فى لسته عايز ْ أكتبها ليك مُتمنَّى ما تباريكى يوم عشق الغوايش والخَتَم والحِنـَّه بى كُلْْ الرّسوم وتياب مزيعات الغُبار ألوانها ما ليهن لِزوم إتْخَيَّرى اللبس البسيط وأتحدّى بيك كُل الحريم مادام كِبرتى على الوشوم والمدعو نَقَرابى الرشوم موس الفراعنة تَسيبى كيف يبنيلو اهرام من هموم ؟ ما تخلِّى نَفـَّاج أو دِريب لى طيره فى خدِّك تحوم دا وكُلُُّ زِيف بِنْدَه عليكْ يوماتى من عِلَب الكريم

قد اوافق الشاعر في ترك هذه العادات جلها او بعضها
نفاج او دريب لي طيرة في خدِّك تحوم يقصد الوشم علي الخدين او بما يسمي (درب الطير)
(قصبة وفوق مناصح طينك
ويا المحجورة بجرح فوق فؤادي سنينك
يا القورتي في الناس الكبار من حينك
كمان سويتي مدقاق ود بدر في إيمينك)

Quote: بفرح كتير ساعة المغيب لمَن حريق طَلحِك يقيف وجنب الهشاب فى كم قِطار يتهادى صمغو على الرّصيف ما الرّاعى والريم والطيور محتاجه لى ضُلُّو الوريف وين ُ ُإنتصارك لى الورود ؟ ما قلتى إحساسِك رهيف كيف يِرضَى ليك تِتعَصفرى وتأتمى البرَم البِقوم

عيل في دي ما بنتفق تااااااااااااااااااااب إنت داير تضرنا يازول
هو المغيب طعمو شنو بلا البووووووووخة
شوف الزول دي يعني حطيبات الطلح الشوية ديل بتأتّم البرم والنوار والصمغ
اريتو ما يقوم منها كان شاركنا في الرويحة