هووووي يا الرُجال، أختو الكركدي فإنه رجسٌ من عمل الشيطان. كلمناكم أها.

الكركدي الليلنا الوااااااحد دا،
ما يجي وآحد يعمل فيها ما فاهم.


محمد حيدر المشرف اوووعك تجي هنا،
نحن الكلآم دا مصدقنو تب وقاطعين دابرو...

الكابتن علقلكم الموضوع فوووووق في سقف
العراضة. ما تقولوا ما شفناهو.
واااااااضح إفتكر...

عليكم بمراجعة الصفحة الأُولى من بوست معتز القريش
بتاع الصمغ العربي.


يا معتز يا أخوي أبقى علي الصمغ عشان في ناس أبدو
عليك ملاحظات وكدا.
والله صحي...

Quote: الاخ معتز ربنا يديم عليك الصحه قلل من شراب الكركدي لانه بزيد من هورمونات الانوثه في الجسم . الايام ده المكنه البتخف ما برجعا الا الله ، مش لو شربت صمغ حتي لوشربت قرض ما في طريقه . مع امنياتنا لك بدوام الصحه و العافيه ابن العوام

أها، دا الإقتباس عشان باكر ما يجينا وآحد رافع جلابيتو
وطابقا في صفحتو ويقول لينا: والله ما كلمتوني...

Quote: يقوى ضربات القلب ويقتل الميكروبات مما يجعله مفيدا في علاج الحميات وعدوى الميكروبات وأوبئة الكوليرا حيث أنه حامضى بطبيعته ومن خواصه أنه مرطب ومنشط للهضم. كما بدأت مصانع الأدوية ومستحضرات التجميل والحلوى والصابون تستعمل المواد الملونة المستخلصة من زهر الكركديه في منتجاتها بعد أن استبعدت الألوان الكيميائية لما لها من آثار جانبية ضارة. يستعمل كصبغة طبيعية للأدوية والأغذية وأدوات التجميل التي تستخدمها حواء كل يوم مثل أحمر الشفاه ومساحيق التجميل وشمبوهات الشعر وصابون الحمام.

غايتو ناس ويكيبيديا قالوا ما فيهو شي، لكن حكاية مستحضرات
التجميل دي، واحمر شفايف ماااااا واقعة لي ؟!؟!

Quote: مشروب ملطف ومرطب ومنعش، يساعد على الهضم، مدر للبول وملين خفيف، مخفض لارتفاع ضغط الدم(في حال شربه بارداً)، صناعة الحلوى (الجيلى والمربات)، مضاد للأسقربوط، مفيد في علاج الحميات، زيادة الخلايا الليمفاوية وكرات الدم البيضاء، مصدر للأحماض العضوية وفيتامين ج، تستخدم البذور كعلف للحيوانات (22% بروتين)، مستحضرات التجميل، استخراج الصبغات الطبيعية (الأنثوسانين)، زيادة سرعة دوران الدم ومقوى للقلب، كنبات زينة في الحدائق.ويساعد على انقاص الوزن الجزء المستخدم الاقتصادي: السبلات المتشحمة التي تكون كأس الزهرة.

ديل ناس ويكيبيديا برضو. لحدي الأن كلامهم واضح، لكن برضو جابوا
سيرة مستحضرات التجميل.

أصبروا ما تمشوا تتجوغروا ساكت، لامن نشوف اخرتا شنو ؟؟؟!

Quote: للأسقربوط،

غايتو دي إلا يعرفا ليكم ود الباوقة...

Hibiscu
يا مدير
Hibiscu

خلاص دايرين يشربكوها فى الكركدى!!!!!
ياخ دا محصول قومى وشراب الكركديه يخفض ضغط
الدم المرتفع ويزيد من سرعة دوران الدم ويساعد
في تقوية ضربات القلب ويقتل الميكروبات مما يجعله
مفيدا في علاج الكثير من الأمراض ,,,



والله إنتو


تحياتى..

Quote: عشان باكر ما يجينا وآحد رافع جلابيتو وطابقا في صفحتو

يخرب مظنك يا ود المدير ..
باين كت مشوطن ^- ^

Quote: ياخ دا محصول قومى وشراب الكركديه يخفض ضغط الدم المرتفع ويزيد من سرعة دوران الدم ويساعد في تقوية ضربات القلب ويقتل الميكروبات مما يجعله مفيدا في علاج الكثير من الأمراض ,,,

ما ياهو ده تأثير الاستروجين ذاتو

معاوية المدير, يعني إنت ما كنت عارف

قبل أكثر من عشرة أعوام سمعتها من طبيب سودانى فى ونسة عامة

قال الأفراط فى الكردكى بعمل ضمور فى الخصيتين

وقال فى دراسة ألمانية فى هذا الشأن .


تكون الحكاية إتطورت من ضمور لى ( شيخوخة ) عديل الله إستر


ومن اليوم داك يامعاوية بقيت كلما أشوف كباية كركدى أقول الله أستر

Quote: Hibiscu يا مدير Hibiscu خلاص دايرين يشربكوها فى الكركدى!!!!! ياخ دا محصول قومى وشراب الكركديه يخفض ضغط الدم المرتفع ويزيد من سرعة دوران الدم ويساعد في تقوية ضربات القلب ويقتل الميكروبات مما يجعله مفيدا في علاج الكثير من الأمراض ,,,

يا ايمن يا اخي أصبر، الصابرات روآبح. ما تمشي تكركع ساكت
خلينا نشوف اخرتا شنو ؟!
بالمناسبة، قوقل دا مليان ضلالية...

Quote: بالمناسبة، قوقل دا مليان ضلالية...

صحيح والله لكن غايتو أظن مما بكرى أبوبكر عمل سودانيزأونلاين
دا ضلالية قوقل لملموا عدتهم وشتتوا الإغترب إغترب والهاجر هاجر والبقية وقفوا يتفرجون


ويييييييييييييين ليهم تانى يا حبيب,,
أسياد الشى زاتو جوهم من كل حدب وصوب..

الاخ معاويه
كيف الحال

ليك زمن غائب علي المانع خير .

تحياتي للاسره الكريمه .

نحن القلنا للاستاذ معتز اختا الكركدي ، بالمناسبه هذه المعلومه محفوره في الذاكره من ايام الجامعه ، عزمتنا بت بتقرا في كليه الطب ، اها طلبنا كركدي ، قامت فكت الجوكر ، و نحن كبينا الزوقه .

لك التحيه

ابن العوام

Quote: فوايده : بيخلى كله تمام والسطة . اضراره : بيسبب استبحس فى النابورية .

http://ejabat.google.com/ejabat/thread?tid=2c7626595ee4e6aa

يا جماعة كدي ساعدونا بالترجمة.
يعني الكركدي دا نخليهو، واللآ ما نخليهو ؟؟؟

هسع اللهو الخفي دا قال شنو، والنابورية دي تطلع شنو ؟؟؟

Quote: معاوية المدير, يعني إنت ما كنت عارف

يا ايمن يا أخي تجينا في 2013 !!!
بتبالغ والله.

ما كان تجدع لينا المعلومة دي في ايّ إسفير
في زمن العولمة دا.
غايتو جنس حسادة !!!


مرحبتين حبابك، ولك
مودتي...

Quote: يخرب مظنك يا ود المدير .. باين كت مشوطن ^- ^

أهلنا قالوا، الواضح ما فاضح.


خبرك يا ود الملك ؟

والله يا ود المدير

الكلام ده لو كان صحيح لحدث إنقطاع للسلالة السودانية منذ أمد .

يا خي برد برد في الطرقات منذ الأزل ، ورمضانات كثيرة مرت والشعب يحتسي الكركدA .

Quote: خلاص دايرين يشربكوها فى الكركدى!!!!! ياخ دا محصول قومى وشراب الكركديه يخفض ضغط الدم المرتفع ويزيد من سرعة دوران الدم ويساعد في تقوية ضربات القلب ويقتل الميكروبات مما يجعله مفيدا في علاج الكثير من الأمراض ,,,

نعم ،، دايرين يضربوا الاقتصاد

الكركدي ده لو صحي كده من اول رمضان كان تلقى السودانين ( )


أيمن الطيب بتاع كوستي ؟؟
ولا واحد تاني ؟؟

Quote: نعم ،، دايرين يضربوا الاقتصاد

خلاص درعتوها فى الاقتصاد


وين الاقتصاد يازول

الله هونينى على قول هاشم نوريت

يا ود المدير



اتنيين لو قالو ليك راسك مافي صدقهم


غايتو صدقنا انا زاتي ما بريدو من ولدوني ما بدور خلقتو دي

Quote: نعم ،، دايرين يضربوا الاقتصاد

يا ود المدير الزول المو نافع دا أصلو مو نافع
يا قولات خديجة ست العرقي

اكلو الدريسة واشربوا الكركدي المافي شنو؟

Quote: تستخدم البذور كعلف للحيوانات (22% بروتين)

يعلم الله في سنة كدي الشاي انعدم كلو كلو.
اهلنا قلوها و طلعو منها شئ كده بين الشاي و القهوة. و قالو شال ليهم قرياف الشاي.

هاهاهاهاهاي
عندي صاحبا لي كدا ليهو فتره ضغطو مرتفع ..
المره من الصباح بتظبط ليهو جك كركدي

سلامات يا جماعه .... بركه الشفناكم ( طيبين )

.....

يا مدير انا بعد الشفتو في كسلا وعشرتنا فيها مع الفلاته ومعرفتي إنو فيهم الجاب ليهو اربعين ولد ، تاني ما بصدق كلام ناس الكركدي بسوي وفول الدكوة * بسوي ههههههههههه






............................
* متهم قبل الكركدي

Quote: الفلاته ومعرفتي إنو فيهم الجاب ليهو اربعين ولد ، تاني ما بصدق كلام ناس الكركدي بسوي وفول الدكوة * بسوي ههههههههههه

اها انجهونا فيما قسمه الله لنا ههههههههه

Quote: اها انجهونا فيما قسمه الله لنا ههههههههه

هههههههههه
يا آخوي ده زمن " القدو قدو " يعني ثمانينات القرن الماضي
قبل الذبذبات المالية السما والكيماويات الماليه الواطه
حسي يا الله اتنين
ههههههههههههههههه

Quote: يا مدير انا بعد الشفتو في كسلا وعشرتنا فيها مع الفلاته ومعرفتي إنو فيهم الجاب ليهو اربعين ولد ، تاني ما بصدق كلام ناس الكركدي بسوي وفول الدكوة * بسوي ههههههههههه

الأخ عمران سلام

المقارنة يفترض تكون بين مجموعة إتناولت الكركدي مع مجموعة تانية ما إتناولته

والظروف التانية تكون واحدة

عشان نقدر نقول بيأثر وإلا لا

ده المنهج العلمي بقول كدا

Quote: المقارنة يفترض تكون بين مجموعة إتناولت الكركدي مع مجموعة تانية ما إتناولته

يا أيمن حسي المقارنة ما واضحة في فول الدكوة الفوق ده
حسي فول الدكوة إتلحس وبقى غالي والناس وقعت البوش

Quote: جك كركدي

الله يكون فى العون

تحياتى للجميع

ود المدير سلام
المعلومة العندى انه بيعمل ارتخاء ولا يساعد على الانتصاب

الحمد لله جيهة بربر والباوقة ماعندنا ثقافة قرطعة الكركدى

عشان كده الكل هناك فى السليم وضرب النار يقول يا غربتى

يا زوول (على حسب ما قريت فى مقال الدكتور محمد عبدالله الريح البتاع بتاع البتاع أن الالمان ديل (مابمسكو نار زى ما بنمسك نحنا من غير كركدى!!!) بس الكركدى المسكين الالمان عايزين يسوهو حيطه!! على العموم والله ما بنشرب فيهو بإنتظام لكن لو لقيناهو ما بنفطو والحمد لله الحاله مستوره زى كل الاخوان وربنا ما يضر سودانى بالكركدى لانه محصولنا القومى !!ومعاهو الصمغ العربى .

تحياتي يا ود المدير ومتابع كتاباتك ومواضيعك الممتعة وبالنسبة للكركدي شايف الاراء احتلفت واعتقد الافضل ان ناخذ راي اصحاب العلم والمعرفة من اطباء وباحثين عشان ما نحرم الكركدي من عشاقه لمجرد الظن

Quote: أها، دا الإقتباس عشان باكر ما يجينا وآحد رافع جلابيتو وطابقا في صفحتو ويقول لينا: والله ما كلمتوني...

اوسكار يا معاوية
يديك العافية

Quote: هاهاها هاهاي عندي صاحبا لي كدا ليهو فتره ضغطو مرتفع .. المره من الصباح بتظبط ليهو جك كركدي

  الشئ المره دى قنعت منو     ....! 
اها نجهتوهو يا ود المدير نزلوهو ......!

..


وانا اكوجن سااااكت فيه طول اليوم


الله يستر ويجيب العواقب سليمة http://1.1.1.3/bmi/www.sudaneseonline.com/db/...ention/010_Smile.gif



..

Quote: قبل أكثر من عشرة أعوام سمعتها من طبيب سودانى فى ونسة عامة قال الأفراط فى الكردكى بعمل ضمور فى الخصيتين وقال فى دراسة ألمانية فى هذا الشأن . تكون الحكاية إتطورت من ضمور لى ( شيخوخة ) عديل الله إستر ومن اليوم داك يامعاوية بقيت كلما أشوف كباية كركدى أقول الله أستر

سلآمات يا جمال مصطفى.

عشرة أعوام يا جمال!!!، عشرة !!!
عشرة وإنت والدكتور لابدين !. عليك الله شوف خلال العشرة
سنين دي الدامج الحصل. كمان الموضوع فيهو المان وبيبدأ
بضمور الخصيتين ؟!. مِحن يا زمن .

أها يا ايمن الطيب، أمش إتجوغر دآبك.


حبابك ألف يا جمال مصطفى في
عالم سودانيز...

Quote: صحيح والله لكن غايتو أظن مما بكرى أبوبكر عمل سودانيزأونلاين دا ضلالية قوقل لملموا عدتهم وشتتوا الإغترب إغترب والهاجر هاجر والبقية وقفوا يتفرجون

هههههههههههههههههههههههه،

يا أخي دِيييييش اليوريكم معلومة مفيدة تاني. عالم ما بتقطع
فيها الحسنة.
بعد دا إن شاء الله تصوط ليك برميل كركدي وتغتس فيهو عشان
تكون عبرةً لمن يخشى...

Quote: الاخ معاويه كيف الحال ليك زمن غائب علي المانع خير . تحياتي للاسره الكريمه . نحن القلنا للاستاذ معتز اختا الكركدي ، بالمناسبه هذه المعلومه محفوره في الذاكره من ايام الجامعه ، عزمتنا بت بتقرا في كليه الطب ، اها طلبنا كركدي ، قامت فكت الجوكر ، و نحن كبينا الزوقه . لك التحيه ابن العوام

أريت حالك زين يا إبن العوآم.
خير يا الزبير بس منشدهين في حال الدنيا،
وجريها الماتعرفلوا حد دا.

قلت المعلومة محفورة في الذاكرة، وإنتوا ما قصرتو حفرتولا
ودفنتوها، مُو كدي ؟، وكمان البِنية طلعت طبيبة !!! سجم
الحِلة، الكلآم إتمشهد كان كدي.

المشكلة إنو عصير الكركدي مُنعش ولذيذ،
وفي حراية السودان لا يُقاوم.
الله يستر...

Quote: والله يا ود المدير الكلام ده لو كان صحيح لحدث إنقطاع للسلالة السودانية منذ أمد . يا خي برد برد في الطرقات منذ الأزل ، ورمضانات كثيرة مرت والشعب يحتسي الكركدA .

يا ولياب يا اخي ركّز معانا، وخليك زي بودرة الكركدي المركّز.
الكركدي لا يؤثر ابداً علي الإنجاب لكنه يؤثر علي حاجات تانية.
يعني مُدمن الكركدي ممكن تلاحظ عليهو حاجات كدا مُش ولا بُد،
مثلاً تغيير في الصوت، طريقة الكلآم، وركّز علي المِشية،
بتلقاها ما ياها، وهكذا.
نصيحتي ليك تبرد بأيّ حاجة إلا الكركدي دا ...

Quote: نعم ،، دايرين يضربوا الاقتصاد الكركدي ده لو صحي كده من اول رمضان كان تلقى السودانين

هههههههههههههههه،

الظاهر عليك بتاع كركدي يا ناصر عشان كدا عامل حكاية الضبعة،
قالوا يقطعو فيها وتقول إن شاء الله حِلِم. يعني الكلام يأكدوهوا الألمان
مع كمية لا يستهان بها من الدكاترة، وإنت تقول إقتصاد !!!؟

الدايرين يضربوا الإقتصاد ديل الألمان واللآ الأمريكان ؟
أكان ماك قادر تخليهو خفف شوية.

Quote: أيمن الطيب بتاع كوستي ؟؟

لا، بتاع الكركدي


يا ناصر حسين ألف مرحب
بيك في عالم سودانيز...

Quote: خلاص درعتوها فى الاقتصاد وين الاقتصاد يازول

عليك الله أسعلوا دبُل يا حمودي.
قال إقتصاد قال !!!
يا ناس هوووووي لا تبضعوا في رقبتكم،
الحكاية دي ما لعب...


أهلاً بيك في سودانيز يا حمودي...

Quote: اتنيين لو قالو ليك راسك مافي صدقهم غايتو صدقنا انا زاتي ما بريدو من ولدوني ما بدور خلقتو دي

دا الكلآم البيعشر ويلد يا عباس، الناس ما تقعد تتضارا
ورا مكنة الإقتصاد ساكت.
أهلنا قالوا مداراة المؤمن علي رقبتو حسنة.



سلآم يا عباس...

يا محمد بابكر محمد،
مرحبتين حبابك في سودانيز.

الظاهر عليك بتاع إقتصاد.
احسللللك تسمع نصيحة السناير الزينا، وما تباري
ناس دفعتك بتروح شمار في ونسة.
والله صحي...

Quote: اكلو الدريسة واشربوا الكركدي المافي شنو؟

وييين يا دفعة ؟

يا اخي الكمبنيشن بتاعك دا زي الزول الرابطنو بحبل
من نصو، وكل ناس يجرو بجيهة.
الأمر هكذا لا يستقيم يا تشربوهو يا تخلوهو ...

Quote: يعلم الله في سنة كدي الشاي انعدم كلو كلو. اهلنا قلوها و طلعو منها شئ كده بين الشاي و القهوة. و قالو شال ليهم قرياف الشاي.

يا محجوب إزيّك، ويا زول خُت الكورة وآطة. نحن بنحذر الرجال من هذه
الشجرة الشريرة، وإنت شغال تعمل لها في إمتدادات !؟.
أهلكم ديل يا محجوب كاتلاهم قريفة ساكت، والزول المصروم تسكرو
الموية.

أرجوك لا تهدي الرجال للضلال...

Quote: هاهاهاهاهاي عندي صاحبا لي كدا ليهو فتره ضغطو مرتفع .. المره من الصباح بتظبط ليهو جك كركدي سلامات يا جماعه .... بركه الشفناكم ( طيبين )

سلآمات يا مجاهد،
وألف مرحب بيك.

جك عدييييييل كدا !!!
عليكم الله شوفوا المرا دي نفر حسادتا !!!

دا من المهلكات الموبقات الكباية مِنو تخلي الراجل زي حلاوة قُطُن،
كما قال الألمان. بتاع الجك دا بكرة بيجو يقولولكم ياهو دا ويشيروا
لمكانٍ خالٍ تماماً...

Quote: يا مدير انا بعد الشفتو في كسلا وعشرتنا فيها مع الفلاته ومعرفتي إنو فيهم الجاب ليهو اربعين ولد ، تاني ما بصدق كلام ناس الكركدي بسوي وفول الدكوة * بسوي ههههههههههه

شوف كمان بتاع الطعمية دا !!!
شغل الفلاتة دا شُغل قدو قدو، علي اليمين الكركدي دا يسويكم
حلاوة لبان. يا عمران أخوي احرص، دي تقارير المان ما فيها
هزار...

Quote: اها انجهونا فيما قسمه الله لنا ههههههههه

يا بدر الدين الممسوخ دا داير يسويها ليكم
قسمة كركدي وفول دكوة.
غايتو جنس محن !!!

Quote: ود المدير سلام المعلومة العندى انه بيعمل ارتخاء ولا يساعد على الانتصاب الحمد لله جيهة بربر والباوقة ماعندنا ثقافة قرطعة الكركدى عشان كده الكل هناك فى السليم وضرب النار يقول يا غربتى

سلآمات يا عادل.

عليك الله هسع الإرتخاء دا هيّن ؟

أكان كدي مناطقنا محمية تب، نحمد ربنا...

سلام معاوية
من زول صاحب تجربة قال الكركدي والصمغ عالجو ليهو البروستات
ياخ ومهمتونا عديل يعني نخلي شراب الكركدي الحار ((بدل الشاي)) و ل نستمر ادونا النجيضة

Quote: تحياتي يا ود المدير ومتابع كتاباتك ومواضيعك الممتعة وبالنسبة للكركدي شايف الاراء احتلفت واعتقد الافضل ان ناخذ راي اصحاب العلم والمعرفة من اطباء وباحثين عشان ما نحرم الكركدي من عشاقه لمجرد الظن

حياك الغمام يا طارق الحسن،
وشكراً لحُسن متابعتك.

ليس كل الظن إثم يا طارق، إنما بعضه، واخير الناس إحتياطي كدا
تخليهو لحدي ما يُبت في أمره. بس شايف مُجمل الأراء بتقول
إنه ختري شديد.


حبابك ألف يا طارق في
الحوش...

Quote: يا محمد بابكر محمد، مرحبتين حبابك في سودانيز.

تسلم ياغالى

Quote: الظاهر عليك بتاع إقتصاد.

بتاع اقتصاد ومتحير فى الكلام المكتوب ، البلاوى دى كلها من الكركدى !!
طيب نشرب شنو ؟

Quote: احسللللك تسمع نصيحة السناير الزينا، وما تباري ناس دفعتك بتروح شمار في ونسة.

اليومين ديل قاعد احتياطى ، لكن شايف اخوى أيمن محمود لاعب راس حربه

Quote: قال إقتصاد قال !!!

فعلاً يا باشا الحكاية ليها علاقة بالإقتصاد : مش برضو الإقتصاد مرات بيعاني من الضمور والإنكماش بل والإنهيار الكامل؟؟؟ ولا أنا غلطان؟؟؟

بعدين عندنا في البادية ما بيحبوا أي شيء حامض ...
يعني لو أديت الواحد منهم شيتاً حامض يقول ليك : ترّه مني غادي ... الحميض فدّر الجمال!! .... وللشرح أكثر : فدر الجمل إذا صار خاملاً من ناحية (إجتماعية)

النجيضة : أختوا الحميض أيّاً كان وقد أعذر من أنذر والسلام

Quote: اوسكار يا معاوية يديك العافية

الله يعافيك يا طاهر،
ومشكور علي المرور.




مرحبتين حبابك وأنت
تشرفنا في هذه الدار العامرة بكم...

Quote: يحكي أن في عهد الملك عبدالعزيز وطبعا الملوك مزواجين جدا ... فذهبوا زياره لروسيا في عهد الملك خورشوف ... أها من ضمن المأكولات كان هنالك الكافيار .. فقام مستشار الملك يشرح للملك قال ليهو طال عمرك دا الكافيار البتقول عليهو الناس .. سأله الملك إبش هو قال ليهو طال عمرك دا بيض سمك بيطلعو من نوع معين من السمك هنا في روسيا .. وهو يساعد ويقوي خصوبةا الرجل فقال له الملك ... ياخوي شيتا ما سواهو ليك بيضك .. بيض السمك ماحيسوي ليك شيء ..... وعلى ذلك نقيس الكركدي والصمغ فوائدهم علاجيه بحته .............

تتجازى يا ود محمد عبد الله،
والتحايا عبرك للإخوة الذين أطلوا
علينا خلال الفيس بوك.


الله يقوي الـeggs...

لو بارينا النت معناها لا اكلنا لا شربنا ..

عندنا عمنا بسف من زمن الحقة وقبل ما يخترعو الاكياس اها قلنا ليهو الصعوط قالو بسبب السرطان قام قال نحن السودانين ديل حاجة لو قالو ليك تجيب الايدز ما بتخليها لكن لو لمحو ليك تلميح ساي انها بي ****** ( فيما معناه انها بتكتل رجولتك ) بتخلي امها وابوها .

Quote: الشئ المره دى قنعت منو ....! اها نجهتوهو يا ود المدير نزلوهو ......!

سلآمات يا سامي.

شغالة معاهو بالجك، يا أخي دا حايجك جنس جكّة!!!

أبو صلعة طلع اظرط من المرا.
والله صحي.


ألف مرحب بيك يا سامي في
هذه الديار العامرة بكم...

Quote: وانا اكوجن سااااكت فيه طول اليوم الله يستر ويجيب العواقب سليمة

الله يستر يا محمد عوض.

غايتو إحتياطي كدا خليك مراقب معتز القريش،
ولو ظهرت ايّ حاجة قول لينا عوووك.



لك مودتي...

Quote: من زول صاحب تجربة قال الكركدي والصمغ عالجو ليهو البروستات ياخ ومهمتونا عديل يعني نخلي شراب الكركدي الحار ((بدل الشاي)) و ل نستمر ادونا النجيضة

سلآمات يا الدسيس.

يا ناس إنتوا صبراً يبِل الكركدي ما عندكم ؟؟؟

الكركدي ممكن يعالج حاجة لكن عندو صايد افكت.
أعمل حسابك.


يا اخي مرحبتين حبابك بيننا...

Quote: بتاع اقتصاد ومتحير فى الكلام المكتوب ، البلاوى دى كلها من الكركدى !! طيب نشرب شنو ؟

يا محمد بابكر أشرب جردقة حرجل ينسون، أيّ حاجة، سغرة النفس
في الكركدي عاقبتها الله يكافيكم شرها.

Quote: اليومين ديل قاعد احتياطى ، لكن شايف اخوى أيمن محمود لاعب راس حربه

عجبوني الليلة جو حسين ملآسي ظعمطو ...

Quote: فعلاً يا باشا الحكاية ليها علاقة بالإقتصاد : مش برضو الإقتصاد مرات بيعاني من الضمور والإنكماش بل والإنهيار الكامل؟؟؟ ولا أنا غلطان؟؟؟

عدآك الغلت يا خالد.

أها، دا الكلآم اللُمو بت اعم ابو .

Quote: بعدين عندنا في البادية ما بيحبوا أي شيء حامض ... يعني لو أديت الواحد منهم شيتاً حامض يقول ليك : ترّه مني غادي ... الحميض فدّر الجمال!! .... وللشرح أكثر : فدر الجمل إذا صار خاملاً من ناحية (إجتماعية) النجيضة : أختوا الحميض أيّاً كان وقد أعذر من أنذر والسلام

الله يخدِر ضراعك يا خالد، الحوامض بلا النحّار وسجيم الناس
ما عندهن فايدة.

الحذر يثُمّ الحذر، أها.



ألف شكر علي المرور، والمعلومة الجميلة.
لك مودتي يا رجل ...

Quote: لو بارينا النت معناها لا اكلنا لا شربنا .. عندنا عمنا بسف من زمن الحقة وقبل ما يخترعو الاكياس اها قلنا ليهو الصعوط قالو بسبب السرطان قام قال نحن السودانين ديل حاجة لو قالو ليك تجيب الايدز ما بتخليها لكن لو لمحو ليك تلميح ساي انها بي ****** ( فيما معناه انها بتكتل رجولتك ) بتخلي امها وابوها .

يا محمد جمعة اللكل والشراب شِن طعمِن
كان دي الأعراض الجانبية بتاعتن ؟

خالك صدق.
والله صحي.


مرحبتين حبابك يا محمد جمعة
في دار بكري النورت بيك ومن
حضر معك.

لكم جميعاً مني عاطر التحايا،
وكامل مودتي...

محاذير استعمال الكركديه.
لا يجب تناول الكركديه لدى المرضى الذين يعانون من الإصابة بمرض النقرس، أو مرضى الروماتزم، أو المرضى الذين يعانون من تكون حصوات فى الجهاز البولى لديهم.

Quote: يا زوول (على حسب ما قريت فى مقال الدكتور محمد عبدالله الريح البتاع بتاع البتاع أن الالمان ديل (مابمسكو نار زى ما بنمسك نحنا من غير كركدى!!!) بس الكركدى المسكين الالمان عايزين يسوهو حيطه!! على العموم والله ما بنشرب فيهو بإنتظام لكن لو لقيناهو ما بنفطو والحمد لله الحاله مستوره زى كل الاخوان وربنا ما يضر سودانى بالكركدى لانه محصولنا القومى !!ومعاهو الصمغ العربى .

هوووووي يا ود السقاي، لا تتفوجج فوقنا ساكت، علي الجزيمة
الكركدي دا يقلبك زي الشراب.
قريبك ود الريح دا بيسويها فيك كان باريت كتاباتو.


لك مني الآف التحايا يا بشرى...

الأخوان الأحباب،
من خارج الأستيديو :

الطيب محمد عبدالله
Galal E Omar
Aziz Gorge
Mohamed Ahmed
Osman Ahmed Sharfeldeen Zarroug

ألف شكراً ليكم علي المرور والتعليق، والشكر موصول
لبكري ابصلعة علي جعله هذا ممكنا، ويحلو لنا التواصل
معكم سائلين الله أن يجمعنا بكم في ساعات الخير.


قدر ما تلقوا، أختو الكركدي الباااااارد.

لكم كامل مودتي...

Quote: يا محمد بابكر أشرب جردقة حرجل ينسون، أيّ حاجة، سغرة النفس في الكركدي عاقبتها الله يكافيكم شرها.

بشرب ليمون ، اها الليمون فيهو حاجه برضو

Quote: محاذير استعمال الكركديه. لا يجب تناول الكركديه لدى المرضى الذين يعانون من الإصابة بمرض النقرس، أو مرضى الروماتزم، أو المرضى الذين يعانون من تكون حصوات فى الجهاز البولى لديهم.

هههههههههههههههههههههه،

يا سجم السجم، حجرين بس خلوك تبقى واعظ !!!

سبحان الله...

معاوية المجنون

الكركدى مفيد جدا لنزلات البرد ابقى عليه عشرة الايام دى

اما الموضوع التانى نصيحة عامة للرجال

ممكن تشربواالكركدى مع الزنجبيل

وكدى بتكونوا حفظتوا التوازن ومافى اى سايد افيكت للزنجبيل

Quote: ودبايتور ده شنو؟ اعملو كوبي وبست هنا ماقادر ادخل الرابط

هههههههههههههههههه،

خسمتك يا عثمان زروق الكعوبية دا لا تجيبوا
لينا هنا.


مودتي...

Quote: بشرب ليمون ، اها الليمون فيهو حاجه برضو

ايوا كدا يا محمد بابكر، خليك حويط، ما تسمع كلام الجماعة
البيقولولك منشط، ومهدئ للأعصاب... وهلُمّ جرا...

Quote: معاوية المجنون الكركدى مفيد جدا لنزلات البرد ابقى عليه عشرة الايام دى اما الموضوع التانى نصيحة عامة للرجال ممكن تشربواالكركدى مع الزنجبيل وكدى بتكونوا حفظتوا التوازن ومافى اى سايد افيكت للزنجبيل

الجِن الكلكي، إنت الجِن فضلتي فيهو شئ ؟

الكركدي أنا إتحصبت منو الله، بعد الصايد إفكت الظهر فيهو.

نصيحتك أمسكيها عليك، والكونبنيشن بتاعك دا من هسع ما نافع معاي.

تاني الكركدي دا براهو، أو خالط، أو مخلوط هذا فراق بيني وبينه...

Quote: شكراً للاخ بكرى ابو بكر ان منحنا هذهـ الفرصه لمغازلتك يا ود المدير رد · Mohamed Ahmed · Khartoum, Sudan اوسكاااار يا ود المدير او كما تقولون

بل الشكر الآف، الآف لك أخي محمد أحمد،
وأسأل الله أن أكون عند حُسن ظنّك.


مودتي لك يا صديق...

اها يا ود المدير قلنا نتهور ونطق لينا كم كويساً من الكركدي كان نقدر نلف عدل ...التحيات

Quote: اها يا ود المدير قلنا نتهور ونطق لينا كم كويساً من الكركدي كان نقدر نلف عدل ...التحيات

سلآمات يا حلاوي.

يا اخي ما شاء الله، شايفك في المقصورة
والمدرجات معاً.
يا زول نفسك لا تسغر وتمرق تلقى بتاعين جرادل الكركدي
تلجُن مطفح وتقعد تكتح، علي اليمين الكركدي ما يفضِل
فيك التكتح.

النصيحة لله، طق الأكياس دا لا بيخليك تلف عِدِل،
لا حآجة...

سلام معاوية وضيوفك الأفاضل .
ما شاء الله دائماً مواضيعك جاذبة ......
موضوع الكركدي قتل بحثاً من قبل الزارعيون
وعلى ما أظن هناك فرق بين استعماله ساخناً ، أوبارداً
وأيضاً بسكر ، أوبدون سكر .... حيث الموضوع برمته
يتعلق بارتفاع وانخفاض ضغط الدم .....
على العموم نأمل في مشاركة المختصين برأيهم في
هذا الموضوع الهام ..... ولكن حسب رأيي المتواضع
لا يجب الاكثار منه وشربه بدون سكر أفضل ويا حبذا
لو كان مخلوط بالزنجبيل كما ذكرت الدكتورة : وضاحة .
................. لك مني خالص الود