هل يتأثر المغترب - المهاجر بثقافة بلد هجرته او اغترابه ؟

القصد بالثقافة هنا عاداتك وتقاليدك قناعاتك افكارك علاقاتك بدينك ,,,,, ووووو الخ
هاجر الكثير من السودانييين من بلادهم وانتشروا فى بلاد الله الفسيحة
ولكل اقليم او منطقة فى العالم ثقافتها - بالمعانى الموضحه اعلاه -
ومن انطباع شخصي - صحيح او خطأ - وملاحظات عابره .. انو فى تأثير على المهاجرين من بيئاتهم الجديده
يصل فى بعض الاحيان الى حدوده المعقوله .. وفى احيان اخرى يتخطاه الى التغييير الكامل فى المفاهيم - الثقافة بمعانيها اعلاه -
فمهاجرين اوروبا وامريكا ميالين الى ثقافة بلاد مهجرهم
ومهاجرين الخليج ميالين الى ثقافة مهجرهم
وهذه ملاحظة شخصية وليست دراسة او احصائيات
وقد تفتح الباب للنقاش
عن هموم الاختلاط فى المجتمعات الجديده
واخذ الصالح منها وترك الطالح

والانتباه الى ما يتغلغل فى اللاوعي من تغيييرات بسبب الروتين اليومي واسلوب الحياة
واعتقد انو عندنا الكثير من التجارب فى سودانيز تستحق انو نعرفها
كيف اتفاعل الناس مع بلدانهم الجديده وكيف غيرت فى سلوكياتهم العملية والحياتية

تحياتي اخي وضاح

صراحة انا لي حوالي خمستاشر سنة في السعودية ولقايت هسع ماسك قوي في الثقافة والعادات السودانية وفي لغتي السودانويه يمكن علشان ما اديت نفسي فرصة بالاختلاط مع غير السوداني الا في مجال العمل فقط , حتى في العمل بخاطبم باللغة السودانية , حتى قبل كم يوم في واحد علق على كلامي مع أصحاب العمل بلغتي السودانية .
انا غايتو شايف ومقتنع اني صاح , فما ادري ما هو رايك والاخرين .

مرحب امير

طبعا اللهجة فى السعودية مشكله ... وخصوصا للبجى جديد
ةما بقصد لهجتنا السودانية
لكن اللهجه السائده بين الاجانب والسعودييين
فالواحد فى الاول وبدون ما يشعر بلقى نفسو بتكلم بى طريقة غريبه وامكن الواحد ما ينتبه لى نفسو لكن الناس بتنتبه ليهو
وبمرور الوقت ببدأ الواحد يستعدل ويشعر انو ما فى داعى يستخدم كلمات سعودية او الخلطة الغريبه المنتشره ..

طبعا اللغات واللهجات .. هى اول حاجه بحتك بيها المغترب والمهاجر
وفى تغييرات كبيرة بتحصل فى الانسان .. نمط التفكير ... طريقة الحياة اكتساب بعض العادات الجديدة
وفى اشياء بتدخل فى افكار الواحد من غير ترتيب ومن غير ما يحس بيها
لكن بتنعكس فى تصرفاتو وسلوكياتو ووو .. الخ

تحياتي

الأخ / وضاح لكم التحية

كلامك واقعي والكل يتاثر بمهجره في كافة الثقافات ( كلام ـ لبس - أكل الخ ....)
بالنسبة لي شخصياً قضيت فترة بسيطة في بلاد الرافدين وأجدت اللهجة العراقية وهي ممتعة وجميلة كأهل العراق (الحقانيين) .
وبالرغم من طول الفترة في السعودية إلا انني لم (أتآلف) على اللهجة السعودية بالرغم من بعض المعارف الممتازين وآثرت أن أنقل الثقافة السودانية لهم ، ومن الأشياء الظريفة إتصل علي صباح اليوم باكراً وهو في طريقه للعمل مديري المباشر وقال لي يا زول أسمع ، لقيتو ليك مشغل أغنية ثنائي العاصمة ( مين يعصي أمرك ، أمرك يا حلو) وقال لي شوفت كيف الثقافة السودانية .

الف مرحب الاخ ولياب
طبعا زى دى تأثيرات مقبولة وتتعلق ببعض السلوكيات البسيطة
والشعوب تتأثر ببعضها حتى وان كان تأثير من على البعد

لكن ماذا عن التاثيرات البتكون فى العادات والتقاليد والتفكير والمعتقدات ...

.....

..

....

وضاح ..سلامات ...

اعتقد التاثير بالثقافات الاخرى واللغات تحديداً يكون في المراحل العمرية الصغيرة ومن هم في سن التحصيل اللغوى والثقافي الأول..خاصة من هم في سن الدراسة ، فالمدرسة والشارع لمها تأثير كبير في لسان الطفل والشاب خلاف الذين يأتون في اعمار كبيرة خاصة الذين أتت بهم ظروف العمل وتجاوزوا سن التأثير ..
عندي ولدي عمار امه مصرية ، وحتى سن الرابعة من عمره كان يتحدث بالمصرية فقط خاصة ايام كان في مصر وحتى وهو في السعودية ..بعد داك نزلته السودان سنة والحمدلله جاني (حسب الرسول دفع الله ) والآن معاى في السعودية ويدرس في مدارس غير عربية وفي البيت بنتكلم معاه سوداني عربي وسوداني بيجاوى .
نحن مجموعة من ابناء كسلا عاملين تواصل جميل وصداقات بين اطفالنا ، وكل اربعاء وخميس لنا جلسات ثابتة لهم ، ودي ليها تأثير كبير في ربطهم ببلدهم وثقافتهم واهلهم واعتقد اتوفقنا في ذلك ...
ده دور مفروض تقوم بيهو الجالية السودانية بصورة منظمة بإقامة مهرجانات للثقافات السودانية وملتقيات اسرية دورية ودور للالعاب يلتقى فيها الطلاب والشباب بعيد عن الشارع وتأثيراته الثقافية والاخلاقية ..ولكن كيف يمكن لذلك ان يكون في ظل سفارة لاترى الا بعين السياسة وتمارس العمل الاجتماعي بآليات سياسية مما نفر الكل من الارتباط بجاليته السودانية ..



تحياتي ،،