Post: #1
Title: أغنية أمل!!
Author: Balla Musa
Date: 02-02-2013, 09:04 AM
Parent: #0
أغنية أمل
قوقى قوقى ياقمارى واصدحى
ويامروج سودانا بالخير فتحى
يازمن لو كنت هسه مستحى
خلى بكره يقول لايامنا افرحى
ياقمارى ركى فى الابنوس وقوقى
وبلغى ميرى السلام واغريها شوقى
فى ضريح جون انحنى وصنى وروقى
وابكى بالدم ياقمارى من عروقى
قولى لى واو السماح فى ما عملنا
وقولى لى جوبا لسه خاتين فيك املنا
قولى لدموعنا استفيضى بما حملنا
وقولى للناس لسه مااكتملت جملنا
يابنيه من الشرق برزن ضلوعك
عيبه لو مازلنا جوعك
بكره حين تخضر فروعك
يبقى فى الكون مافى نوعك
بكره راجين يوم جديدك
يوم يتم فرحك وعيدك
لو نسيب خاين يبيدك
تانى ماتدينا ايدك
يا عواصم يارزينه
وانتى يا امدر الحنينة
ياضواحى ويا مدينه
كيف بتنتحب الجنينة
انت يادارفور عريقه
وزينة الدنيا وبريقا
شوفى كيف حوا وفريقا
فيهن اشتعلت حريقه
نغنى فى امدرمان ونهنا
و الجبال بتقاسى محنه
يبدو اتغيرنا نحنا
وصرنا مابنحس جرحنا
النحس غلب الغلابا
أو نزيل ألم التعابا
النسوى الحب سحابه
تسقى بى فرحه ورحابه
بكره فى وقت العصارى
نغنى وتقوقى القمارى
ويفرح الطير الخدارى
وتقلد المدن الحوارى
بكره قولة خير وشيله
من جروف مروى ونخيلا
لى تلودى عروس جميله
نغنى بالزين والعديله
بكره يتعالج ازانا
فى الجنوب او فى البطانه
الكلام عربى ورطانه
والسلام يصبح غنانا
بكره طنبور فى نيالا
يغنى لى كسلا وعيالا
وبكره فى بلد الأصاله
يرقص المردوم شمالا
بكره تكتمل المسيره
وينفتح سجن الأسيره
القيود تصبح حريره
والنفوس صافيه السريره
بلة موسى
2/2/2013
|
Post: #2
Title: Re: أغنية أمل!!
Author: Balla Musa
Date: 02-02-2013, 05:31 PM
Parent: #1
ياناس شلتى مشت وين؟؟
|
Post: #3
Title: Re: أغنية أمل!!
Author: الامين موسى البشاري
Date: 02-02-2013, 05:43 PM
Parent: #2
| Quote: ياناس شلتى مشت وين؟؟ |
بدر دا سافر وين كده ما عارف ياخ! 
وبجي ... بجي ..
ما قال بجي..
الليلة مالو ما جاء ..
أمل بنت من بنات البلد ...
وبدر ولد من أولاد البلد....
وبله دا برضو ولد من اولاد البلد
وأنت يا بله ما برضك حبيبنا
والحنان الفي قلوبنا اصلو نابع من عيونك
فكيف نضيع أحلى ما اهديت يا غالي؟
أها قصرته معاك يا دوك؟
عارف الشلة ما جات ليه؟
لأنك بديت تكتب في العضم وخليت الهشك بشق
والله صحي
ونحن ما اتعودنا نسمعك في الطبقات العالية (التينور)
اللمين البشاري حاضر عن المتهمين (شلة بله) 
|
Post: #4
Title: Re: أغنية أمل!!
Author: على ابراهيم رفاى حمد
Date: 02-02-2013, 05:46 PM
Parent: #2
والله شلتك قاعدة يا دكتور بلة !!
وأى عمل منك جميل !! وفعلا. لم يبقى لنا غير الأمل
|
Post: #5
Title: Re: أغنية أمل!!
Author: الامين موسى البشاري
Date: 02-02-2013, 05:55 PM
Parent: #4
Quote: بكره يتعالج ازانا
فى الجنوب او فى البطانه
الكلام عربى ورطانه
والسلام يصبح غنانا
بكره طنبور فى نيالا
يغنى لى كسلا وعيالا
وبكره فى بلد الأصاله
يرقص المردوم شمالا |
أها نجي للجــد يا حبيب
أنا غايتو شخصياً استمتعت بالكلام أيما استمتاع
والله من قبيل كنت عايز اخش ليك واعلق
لكن تقول شنو؟ السترة والفضيحة متباريات
واصل يا عزيز
|
Post: #6
Title: Re: أغنية أمل!!
Author: Balla Musa
Date: 02-02-2013, 06:22 PM
Parent: #5
الأمين البشارى
شكرا ياجميل ياخيط الشلة
الأمين ياخى ماتتم جميلك وتشوف لى فنان فجراوى يغنيها
بعيد عنك الأيام دى عندى رغبة عارمة للشهرة!!
|
Post: #7
Title: Re: أغنية أمل!!
Author: Balla Musa
Date: 02-02-2013, 07:16 PM
Parent: #6
على ابراهيم رفاى حمد
شلتى كما قال عنهم الشاعر:
نجدتهم/ن غوث وكيبوردهم/ن غيث
التحيات والشكر ياعلى
|
Post: #8
Title: Re: أغنية أمل!!
Author: طه إبراهيم عبد الله
Date: 02-02-2013, 08:39 PM
Parent: #7
أغنية للأمل ..
ما أحوجنا للأمل وسط هذا الركام من خيباتنا السودانية
أو كما قال الطغرائي:
ما أضيق العيش لولا فُسحة الأملِ
..
شكرا لك يا دكتور على جرعة الأمل هذه
فالأغنية جميلة ومعبرة
..
أذكر في مطلع تسعينيات القرن الماضي إنني كنت أعد بحثا صغيرا عن الشاعر المصري صلاح عبد الصبور
فجلست مع أحد أساتذتي - أسأل الله أن يمد في أيامه ويمتعه بالصحة والعافية - أطلعه على أفكاري وآخذ التوجيه والإرشاد
فقال لي: لا أقول لك أترك الموضوع ولكن صلاح عبد الصبور سيتنزل عليك بالهم والغم ..
صلاح عبد الصبور شاعر ظلامي .. شعره مملوء بالظلام .. ظلام النفس .. وظلام الروح .. والخوف من الحياة ..
شعره لا يهديك إلى طريق ولا يمنحك أملا ..
لماذا أقرأ شعرا لا يمنحني الأمل عندما أكون في حاجة ماسة إليه؟
..
أردت أن أقول يا دكتور إن حاجتنا لمثل هذه الأغنية تتضاعف كل صباح
لك الشكر والتقدير
قال السياب في ختام إنشودة المطر:
في كلّ قطرة من المطرْ
حمراء أو صفراء من أجنَّةِ الزَّهَرْ .
وكلّ دمعة من الجياع والعراة
وكلّ قطرةٍ تراق من دم العبيدْ
فهي ابتسامٌ في انتظار مبسمٍ جديد
أو حُلمةٌ تورَّدت على فم الوليدْ
في عالم الغد الفتيّ ، واهب الحياة .
ويهطل المطرْ ..
|
Post: #9
Title: Re: أغنية أمل!!
Author: Balla Musa
Date: 02-03-2013, 06:49 AM
Parent: #8
طه إبراهيم عبد الله
تحياتى
Quote: ما أحوجنا للأمل وسط هذا الركام من خيباتنا السودانية
أو كما قال الطغرائي:
ما أضيق العيش لولا فُسحة الأملِ |
والله ياطه ياخوى ولادة الأمل أصبحت متعسرة
ولكن لامناص من انتظاره مع ابتهالنا لله أن يطلق الصرخة الأولى غير مشوها ودون أن يمزق الرحم الذى احتواه.
شكرا على التعليق الجميل
|
Post: #10
Title: Re: أغنية أمل!!
Author: Balla Musa
Date: 02-03-2013, 08:40 AM
Parent: #9
الأمين يابشارى
لقيتو ول مالقيتو؟
|
Post: #11
Title: Re: أغنية أمل!!
Author: Balla Musa
Date: 02-03-2013, 06:13 PM
Parent: #10
إن شا الله نجرانى يا الأمين!!
|
Post: #12
Title: Re: أغنية أمل!!
Author: Balla Musa
Date: 02-04-2013, 03:30 AM
^*^*^
|
Post: #13
Title: Re: أغنية أمل!!
Author: عزالدين عباس الفحل
Date: 02-04-2013, 05:12 AM
Parent: #12
Balla Musa
لـك مــذاق طــاعـم ،
فـي كـل مـا تـخـطـه أنــامـلك ،
و صـمـتـك الـدفـيـن بين طـيـاتـه ،
مـكـنـون مـن الـسـحــر ،
،،،
عزالدين عباس الفحل
ابوظبي
|
Post: #14
Title: Re: أغنية أمل!!
Author: Balla Musa
Date: 02-04-2013, 07:01 AM
Parent: #13
عزالدين عباس الفحل
تحياتى
وكل الشكر لكلماتك المغسولة ومعطرة..
|
|