Post: #1
Title: اخصائي حفرة الدخان وتحمير الدلكة
Author: عباس الدسيس
Date: 01-30-2013, 01:57 PM
الحياة قديما في الاحياء قبل ما اغطسو حجرنا ناس ال IN GAS كانت هادئة وجميلة حاليا اصبحت حارقة والتركيبه الاجتماعية تغيرت والفئات الوسطية تلاشت يا فوق أو عدمان ما عنك التكتحك ،
ناس عايشة وبقولو ليهم:
ناس الاستراحات والراحات
والمحمر والمشمر
سرقة الوزارات والنوم في العمارات
ناس البارتيات والسهرات والمشتريات من السيوبر ماركات
ما بمشو كداري ولا بركبو اللواري
ناس اللفحي والهبر وركوب الهمر
تعين الوظائف مضمون حتى لو شهادتك في الليمون
والفئة الاخري :
المساكين والمهمشين
ناس ام شعيفة والويكه ... البوش بالرغيف القرقوش
ناس الدين وما معروف اتحلا متين
ناس الرقشات ويا عم وصلني معاك
اقرأ وجيب شهادتك علقا في حيطك
شوف ليك امجاد عيش الاولاد
ثم ظهرت الطفيلية ناس الشعبية.... اللجان والشرطة الفاقدين الهوية.......
تنويه:
الذين شاركو في صناعة القصة يحملون اسماء مستعارة غير مسئولين إن تطابقت الاسماء أو الاحداث
|
Post: #2
Title: Re: اخصائي حفرة الدخان وتحمير الدلكة
Author: حمد عبد الغفار عمر
Date: 01-30-2013, 02:01 PM
Parent: #1
يا عباس مالك نسيت الزول الفي العنوان دا مع الناس التحت
تحياتي
|
Post: #3
Title: Re: اخصائي حفرة الدخان وتحمير الدلكة
Author: عباس الدسيس
Date: 01-30-2013, 02:40 PM
Parent: #2
الشرطة الشعبية اللجان الشعبية مسميات اتت بها الانقاذ مع الخلطه الدينيه للبحث عن الهوية اول ما جات الانقاذ كسرت بيها شعار لا شرقية لا غربية سودانية مية المية
مستعينه بتجربة القذافي في خلط الدين بالكتاب الاخضر ويقال والعهد علي الراوي اول من وضع لبنات الكتاب الاخضر كاتب سوداني مغمور توجهاته اسلاميه
ونتيجة هذه الخلطه كان أول محافظ لمدينة وادمدني محمود صالح في بداية الانقاذ لجان ثورية
غالبية الذين ينتمون للشرطة الشعبية والامن الاقتصادي كانو عطالة قبل الانقاذ لاسباب المؤهلات او اسباب اخري
مع استحداث الامن الاقتصادي والشرطه الشعبيه كل واحد عندو كوز قريبو بقي ليهو واسطه ....
للتنويه ايضاالرواية اجتماعية غير سياسيه: نخش في الموضوع:
السودان قبل قوانيين سبتمبر كانت شكل الحياة تختلف فيه حاليا اتعقدت طه ود ستونه يكبرنا عمرا يسمي مربي الاجيال وصاحب بدع غريبه منذ صغره يعرف كيف يتحصل علي المال تستعين به نساء الحي في حفر حفرة الدخان مقابل قرش احيانا كنا نساعده في استخراج التراب من داخل الحفره بي علبه صلصه فارغه بعد انتهاء المهمة الشاقه واستلامه مبلغ الحفر كان يتجود علينا بكمية من البلي او حلوي حسب مزاجه .
أما عن تحمير الدلكة بالدوكه لا يستعين باحد نسبة لأن المهمة ساهلة له والنساء لا يرغبون في عملية التحمير لأن نار الحطب تغير البشرة.
طه محبوب من نساء الحي للخدمات التي يقدمها لهن نكون بنلعب في الدافوري فجأة تلقي واحده من نسوان الحي نص الميدان ومسكت الكوره بي يدها توقف الدافوري عشان تسأل من طه ود ستونه واكثر سؤال عنه جارتنا التي لم يرزفها الله بابناء.
هذه المرأة كانت تحب الدخان لدرجة ايام رمضان نهارا جهارا الدخان طالع من البيت تقول السكه حديد جابوها بي نص بيت المراة من كثرة الدخاخين دائما لون ايديها أحمر .....
لقد اطلقنا عليها لقب قرد الطلح لارتباط اسم الطلح بالدخان كما ان لون ايادي القرد احمر غامق ....
طه ود ستونه له حس فكاهه ممزوج بالغباوة عندما يتحدث وهو منهمك في عمله في حفرة الدخان تكون هنالك ونسة مع صاحبة الحفره وبين كل جملتين ست الحفره تضحك للتلقائية والسذاجة في الونسه.
في مرة من المرات كان منهمكا في اعماله مع جارتنا وفي هذه اللحظات كنت حضورا.
جارتنا قرد الطلح سالتني؟؟؟
ود الشريف مشيتو حفلة ناس فلانه حضرتو رقيص العروس.؟
جاوبتها..... اي والله بس الحفله ما حلوة وخاصة رقيص العروس ما بتستاهل مننا المجازفة في الطلوع والقعاد علي الحيطه بتاعت الزباله كان ما الله ستر علينا كان وقعت بينا والعريس خزلنا قون واحد ما قبضو العروس جابت الاقوان كلها.
التفتت المرأة قرد الطلح لي طه ود ستونه .... صحي يا طه الكلام ده؟؟؟؟
رد طه: ود الشريف ما ناقش حاجة والله العريس ده احسن من سبت دودو ذاتو لو فكو ليهو حمامه في القون امسكا بس العروس ما عندها حاجة امسكوها منها العريس ما فضل ليهو كان اقبض حمالات الستيانة.......
ضحكت قرد الطلح لما دمعت !!!!!!
نسبة لانتقالنا لحي اخر في المدينة لم اتمكن من مقابلة طه ود ستونه سنين وانشغالي خارج المدينة سبب ايضا، الي ان فتحها الله علينا بالصالح العام ثم الاغتراب .
وفي احدي الاجازات قابلت طه ود ستونه يرتدي ملابس شرطه!!!!!!
اندهشت ...كنت اعرف طه يعمل محصل مالي باحدي مجالس المدينة ولقد علمت بانه التحق بالشرطه الشعبية حسب افادته سألته عن هذا التحول.
اجابني بان الله هداه وبقي كوز. ......
قلت ليهو يا طه حظك بس انشاءالله العتله بتاعتك القوية قاعده (( عتلة حفرة الدخان)) ثم تابعت الكلام في عبارة تهكميه الي انه يحمل مهنتين ...عتله وكوز يا طه تحفر وترش مع الشرطه الشعبيه والكشات.
تغيرت ملامح وجهه غضبا ...
ثم قال: يا عباس انت لا علم لا اغتراب ما بصلحك تقصد شنو من الرش والعتله والكوز. !!!!
يا خوي طه ما تزعل وتفكيرك اكون مريض العتله اقصد حفرك لي حفرة الدخان والكوز تساعد بيهو ست الحفره لما الحطب اعمل لهب. اما الرش تلقط القروش ((رشوشة)) أو في رواية اخري رشوة.
والان طه يعيش في سبات ونعيم،والمواطن يئن في حياة الذل تحت خط الفقر، والتاجر يتجبر ، والدولة في سبات عميق.
انتهت الحكوي......
|
Post: #4
Title: Re: اخصائي حفرة الدخان وتحمير الدلكة
Author: عباس الدسيس
Date: 01-30-2013, 10:14 PM
Parent: #3
Quote: يا عباس مالك نسيت الزول الفي العنوان دا مع الناس التحت
تحياتي |
حمد يا حبيبنا سلام
أهو جيت بباقي القصة وبطلها صاحب الحفر
تحياتي وتقديري للمتابعة
ربنا اديك العافية وطولت العمر
|
Post: #5
Title: Re: اخصائي حفرة الدخان وتحمير الدلكة
Author: علي محمد الفكي
Date: 01-30-2013, 11:05 PM
Parent: #4
الشيخ ود الشيخ
زمن اغبر بقو نجومو العاطلين عن المواهب
في واحدة من اجازاتي وفي مناسبة اجتماعية لقيت واحد من اصدقاء الطفولة والدراسة برضو اتكوزن على كبر .. وكان زمان ملقبنو بي لقب مرتبط بي عمايلو في الحي .. المهم صاحبنا العمة الكبيرة والجلابية بيضاء مكوية .. انا شفتو وناديت عليهو بي لقبو المتعود اناديهو بيهو من زمان .. المهم صاحبي بقى احسن من ود ستونة جاء نحوي هاش باش واخدني بالاحضان واثناء السلام قال لي يا علي انت قديم خلاص الاسم دا مات خلاص ما تحيهو من فضلك وقال الجملة دي مع ضحكة .. وقول للزمن ارجع يا زمان ..
|
Post: #6
Title: Re: اخصائي حفرة الدخان وتحمير الدلكة
Author: عباس الدسيس
Date: 01-31-2013, 09:24 AM
Parent: #5
Quote: الشيخ ود الشيخ
زمن اغبر بقو نجومو العاطلين عن المواهب
في واحدة من اجازاتي وفي مناسبة اجتماعية لقيت واحد من اصدقاء الطفولة والدراسة برضو اتكوزن على كبر .. وكان زمان ملقبنو بي لقب مرتبط بي عمايلو في الحي .. المهم صاحبنا العمة الكبيرة والجلابية بيضاء مكوية .. انا شفتو وناديت عليهو بي لقبو المتعود اناديهو بيهو من زمان .. المهم صاحبي بقى احسن من ود ستونة جاء نحوي هاش باش واخدني بالاحضان واثناء السلام قال لي يا علي انت قديم خلاص الاسم دا مات خلاص ما تحيهو من فضلك وقال الجملة دي مع ضحكة .. وقول للزمن ارجع يا زمان .. |
ود الفكي سلام وتحية
هؤلاء يمثلو شريحة كبيرة جدا من المنتفعين وتستعين بهم الحكومة عند الشدائد الداخلية مثل المظاهرات.
وهذه الشريحه لهم تنظيم خاص بهم داخل الدفاع الشعبي والشرطة الشعبية يحتمون بقوانينها التي هي فوق القوانين التي تنظم عمل الشرطة والقوات المسلحة
ولهم علاقات خاصة ايضا ودورات تدريبيه في كيفية قمع الشعب
يظهرون دائما عندما يكون هنالك تخازل من القوات النظامية حسب تعبيرهم تقديرهم
والحكومة تعلم أن هؤلاء سواقط مجتمع قدمت لهم خدمة بان تكون لهم مكانة معتبرة ومن واجبهم حماية النظام
لذا نجدهم لا يتورعون في ارتكاب اي جرائم في سبيل الدفاع عن النظام بفهم زوال النظام فنائهم
وسوف تكون العواقب سيئة عليهم اكثر من الذين يقودون النظام
وهم عصابة لهم اعمال اخري في نهب المواطنيين بالجبايات تحت غطاء الدولة واشرافها
وهم قوات للنظام تتبع الي جيوب متطرفة سياسيا داخل النظام.
|
Post: #7
Title: Re: اخصائي حفرة الدخان وتحمير الدلكة
Author: إسماعيل حسن
Date: 01-31-2013, 10:14 AM
Parent: #6
يا دسيس سلام
والله متعة انا ضحكت زي صاحبتك قرد الطلح دي
وبمناسبة الدخان وحطبه مرة فى التسعينات قاعد في الحوش مع خال المدام جايينا زيارة لاول مرة من حلفا ومستمتعين بشراب شاي العصر بعد الغداء .. سمعنا دق على باب الشارع بصورة عنيفة جداً زي بتاعت سيد اللبن طيرت الكيف بتاع الشاي من راس الخال.. وخال المدام كان اسرع مني فتح الباب وبعد السلام وانا ماشي عليه سمعته بيقول للطارق : ( يا راجل مش تختشي عامل شنبك الكبير ده وبدون خجلة حايم بالكارو بتاعك ده بتبيع في حطب الدخان روح يا شيخ) بتاع الحطب شتت لكن انا بتعليمات المدام دفعت الثمن في مزازاة ابو شنب عشان احنسه واجيبو راجع
|
Post: #8
Title: Re: اخصائي حفرة الدخان وتحمير الدلكة
Author: عباس الدسيس
Date: 01-31-2013, 09:24 PM
Parent: #7
واحد من الكيزان اشترك في المسابقه وجاوب السؤال الأول بتاع 200 ريال و وصل لي مرحلة السؤال التاني..
جاهو سؤال: أكمل المثل الذي يقول "عصفور في اليد ولا عشرة فوق........" 1) الشجرة.............2)البقرة..................3)الصفراء......................4)الحمراء ..............)
فال لجورج قرداحي: من أولها صعبة. طيب ما نسأل الجمهور، سألو الجمهور
وجاوب 100% للجواب الأول الشجرة،
قال لجورج: مش دايماً الجمهور على حق،نتوكل على الله و نحذف إجابتين...
حذفو ليهو إجابتين بقى الجواب الأول الشجرة..والجواب الثاني البقرة.
قال لجورج: يا الله مشكله ديل الجوابين المتحير أنا فيهم .
طيب نتصل بصديقي ( نافع ابو العفين ) ده راجل فاهم وحرامى مثقف بيعرف الحاجات الزي دي..
أتصل بى ابو العفين: ( إزيك يا دفعة اخبارك ايه ، أمى إزيها والاولاد ازيهم وكيف البلد--) راحت الثلاثين ثانية وما قدر اسأل صاحبو ابو العفين..
سأله جورج قرداحي: وهلا شو بدك تسوي؟؟؟
قال لي جورج قرداحي: عايز أنسحب ياعم و آخد ال 200 ريال بتاعت السؤال الأول وزي مابيقولو : عصفور باليد ولا عشرة على الشجرة...
|
Post: #9
Title: Re: اخصائي حفرة الدخان وتحمير الدلكة
Author: عمران حسن صالح
Date: 02-01-2013, 07:02 AM
Parent: #8
شكراً عباس
درجات خجل ( الرخيصين ) ....!!!
اقتراح لبكري :
وزع باس ويرد ملح لكل واحد يعرف يكتب حكاوي من الأحياء على أن يكون متربي في الحي وما رحل منو وعمرو أكبر من الإنقاذ بخمستاشر سنة .
سنقرأ العجب العجاب
|
Post: #10
Title: Re: اخصائي حفرة الدخان وتحمير الدلكة
Author: عباس الدسيس
Date: 02-02-2013, 11:26 AM
Parent: #9
Quote: يا دسيس سلام
والله متعة انا ضحكت زي صاحبتك قرد الطلح دي
وبمناسبة الدخان وحطبه مرة فى التسعينات قاعد في الحوش مع خال المدام جايينا زيارة لاول مرة من حلفا ومستمتعين بشراب شاي العصر بعد الغداء .. سمعنا دق على باب الشارع بصورة عنيفة جداً زي بتاعت سيد اللبن طيرت الكيف بتاع الشاي من راس الخال.. وخال المدام كان اسرع مني فتح الباب وبعد السلام وانا ماشي عليه سمعته بيقول للطارق : ( يا راجل مش تختشي عامل شنبك الكبير ده وبدون خجلة حايم بالكارو بتاعك ده بتبيع في حطب الدخان روح يا شيخ) بتاع الحطب شتت لكن انا بتعليمات المدام دفعت الثمن في مزازاة ابو شنب عشان احنسه واجيبو راجع |
هلا وغلا ابوالسباع اخبارك يا حبيبنا
ممنون وشاكر للاضافة الثرة
ومحن الغير وقعت فيك خلتك تتجهجه الكوميديا التلقائية جميلة وممتعه
الواحد متخيلك وتحنس في الراجل ...مبالغة
تقديري وشكري
|
Post: #11
Title: Re: اخصائي حفرة الدخان وتحمير الدلكة
Author: عباس الدسيس
Date: 02-02-2013, 01:33 PM
Parent: #10
Quote: شكراً عباس
درجات خجل ( الرخيصين ) ....!!! |
سلام يا حبيبنا عمران
متشكرين علي الرابط
والمتابعة والمرور
مضمون الرابط والذي يحوي المفترع هادف
تحياتي وتقديري
|
Post: #12
Title: Re: اخصائي حفرة الدخان وتحمير الدلكة
Author: Elkalakla_sanga3at
Date: 02-02-2013, 02:03 PM
Parent: #11
تمام واصل كداء
ديل ايامهم قربت
امشعيفة ذاتا بقت في مشكلة
|
Post: #13
Title: Re: اخصائي حفرة الدخان وتحمير الدلكة
Author: عباس الدسيس
Date: 02-03-2013, 04:58 AM
Parent: #12
Quote: تمام واصل كداء
ديل ايامهم قربت
امشعيفة ذاتا بقت في مشكلة |
Elkalakla_sanga3at سلام يا حبيبنا
فعلا خلاس الضنب رق
خرم الابرة ضاق
بسؤ العمايل والظلم
وسوف تأتي ساعة المحاسبة انها لقريبه وهم يرون بانها بعيده ولابد لليل ان ينجلي
شكري وتقديري للمتابعة
|
Post: #14
Title: Re: اخصائي حفرة الدخان وتحمير الدلكة
Author: الزنجي
Date: 02-03-2013, 09:22 AM
Parent: #13
سرد رائع وممتع
|
Post: #15
Title: Re: اخصائي حفرة الدخان وتحمير الدلكة
Author: عباس الدسيس
Date: 02-03-2013, 12:23 PM
Parent: #14
حبيبنا الزنجي سلام وتحية
تقديري وشكري للمتابعة والاطلاع
|
|