هواجس برلوم

سلام ومحبة للمرة التانية
وقفت كتير في العنوان بين يكون خواطر ولا هواجس
وعشان السبب الخلاني افكر كتير في العنوان فضلته هواجس برلوم
البرلوم هنا اقصد بيهو حالة كوني برلوما في المنبر العامر بوجودكم
اتمنى ان أجد خلاصا من بعض هواجسي بمروركم

وسأواصل

في العام 97 تم قبولي بإحدي الجامعات الولائية
ربما كان ترتيبي الثاني في قريتنا (هامش جد ههههههه) يدخل الجامعة
في الحقيقة أن الجامعة لم تكن بإختياري (كانت فرمالة استمارة) والحقيقة ان حتى الكلية غريبة على تخصصي
استعنت ببواقي المغتربين في الحلة (كانت الدنيا فيها فضلة خير) ولقيت لي شنطة (صنصنايت تنطق هكذا) أصلا كانت التكنلوجيا غريبة علينا لكن البركة في (ود أحمد) الذي كحل أعين قريتنا بال(صنصنايت) وشوية كلمات من شاكلة سيارة وايش تبغى وبقية فرمالة مغتربين السبعينات.
يجب أن اشير لأن الوالد كان مغتربا لكنه لم يتبقى من إغترابه سوى بقايا (شال أحمر).
تحركت صباحا مع والدي بكارو جارنا لمحطة البصات
في الطريق الي المحطة لم يمنع والدي تشتت ذهني أن يردد على الوصايا العشرة مع التشديد على الصلاة على النبي وعدم سف التمباك(بقيت بتاع كلو اسي).
خذلتني قرويتي كثيرا في إختيار الوسيلة الأمثل للوصول إلى تلك المدينة البعيدة ومستقبلا صارت تخذلني مدخراتي في ذلك فتدحرجت إلى وسائل أكثر سلحفائية من لواري, شاحنات وتسطيح في القطر
وصلت المدينة مع بدايات الصباح واستفدت من خبرة (رعي الأغنام) بالنوم في أقرب مسطبة (وشبلت) شنطتي حتى أدركني الصباح
استغليت حمامات سوق محطة البصات وقمت بإجراء اللازم من أجل الاستعداد لأول يوم في الجامعة
اتوكلت على الحي القيوم وصليت على النبي عشرة مرات وبقميصى (الكاروهات) الجديد وبنطلون (الكونص) والنضارة (الفوتو) بنص كارب وفي يميني سيجارة برنجي وبشمالي شنطة تظاهرت كثيرا بثقلها على الرغم من أن محتوياتها لم تتعدي (معجون ابو وردة , فازلين, لايفبوي, وتريننق أصفر, وينطلونين بوكي وتلاتة أقمصة) ويبدو ان بنطلون الجينز كان يجعلها مقنعة في الوزن.
دخلت الجامعة وساعدتني النظارة في إخفاء حقيقة إندهاشي بالعالم من حولي وأتاحت لي فرصة التأمل في غالب المرور
خخخخخخخخخخخ الماشة دي بتكون دفعتنا
مستحيل لكن لو طلعت ياني الحبيتها
عاين الود البتمايع دا
عاين عمك السمين دا
وحين إقترابي من ما عرفت لاحقا أنها عزيزي المشاهد لم أجد بدا من اخفاء إرتباكي إلا بترديد
غنمي ترعي طول اليوم
وسط المرعي طول اليوم
في الحقيقة لم أكن أعني النشيد كنت أبحث عن أغنية تلهيني عن نظرات القوم وقد كان هو بلحن خليط


سأحكي هذا الخيط في يوم ما
فدا نظام الشئ بالشئ يذكر

مكرر،:

حبابك اخوي ودحامد واصل في حكاك الطاعم ذكريات صادقة وجميلة واذدادت جمال بااسلوبك الشيق حضور ومتابعة
تسلم

الشئ:
في العام 2005 تحسنت علاقتي كثيرا بالتكنلوجيا بفضل أصدقاء عزيزين وكانت بدايتي مع سودانيزاونلاين كمتابع
في تلك الفترة كانت تنشط الكتابات الأدبية والساخرة وكان النقاش مقبول لي كمتابع ومحفز على انو الواحد يكون (قارئ من الداخل)
بدأت علاقتي بالمنبر وبدأ حلمي بالدخول إليه
كانت محاولاتي متقطعة بحسب توفر المعينات (مرات ما بلقي حق نت) وفي كل مرة اراسل بكري لمن قربت أحقق معاهو الرقم القياسي في عدد الايميلات المرسلة لشخص (مني).
بعض الاصدقاء في الموقع حاولو معي مشكورين ولكن انتهت محاولاتهم الي لا شئ.
شوية شوية بدا الواحد عايش صراع ما بين الدخول ولا الجلوس في مقاعد المتفرجين
في الفترة بتاعت بداية الإحساس دا طبعا الاستطقاب بين الناس وصل مداه
وانتشرت مصطلحات (كربتلوجيا , رشاهو , جلابي , أمنجي , معارض كيبورد , معارض مرطب ووووووو....الخ الخ الخ ).
مرات كتيرة والواحد قاعد بره بيتشكل ليهو موقف من زول قاعد جوه بدون النقاش معاهو
ومرات يتبني احساس ايجابي تجاه زول معين وبدون معرفة برضك
جزء من الناس دي الواحد بفضل (الفيسبوك) لقاهم وتفضلو مشكورين بقبول طلبات الصداقة
وجزء منهم العلاقة معاهم بين الخوف والرجاء
شاءت الإرادة وبكري وافق مشكورا على دخول المنبر

شكرن سليمان القرشي يا دفعة
على التشجيع والمرور

قبل كم يوم جاني إحساس إنو الشغلة دي ممكن تكون متاحة
كل يوم عضو جديد هل من مرحب
كل يوم
قلت لا بد من التجربة
فلا حياة ويأس متلازمان
وإخترت أن اراسل بكري مرة أخرى
وشكيت عديييييييييل كدا المره دي
وقلت ليهو بالحرف لحقنا مولد 2013
لا أخفيكم سرا بأن قمة السعادة لمتابع مثلي أن تجد إيميل من مدير الموقع
وشوية إجراءات روتينية
وكانت كلمة المرور
أول ما أفعله الصباح هو تفقد الإيميل
لدي عشم في وظيفة خارج السودان
وباسويرد في سودانيزأونلاين (ليتها كانت الأولى)
ربما أحتاج وظيفتي في مقبل التصنيفات
فمن هم خارج السودان لا ينالهم شيئا
أما مافي الداخل
فواقع كعب
وتصنيف أكعب!


(ما علينا)

مرحب بيك يا محمد حامد
كتابة ممتعة
متابعين

Quote: (وشبلت) شنطتي حتى أدركني الصباح

ود حامد حبابك و حباب نضمك آزول
لكن انا قايل الشنطة دى مليتا عاشميقا حرة خلاس

هواجس أولى:
أول بوست قاعد قدام الكيبورد تلاتة ساعات
العنوان حيكون شنو
فكرت أكتب من السنترليق سلام
لا ياخ بتزعل زول
عاينت للبرالمة أكثرهم حظا من الترحيب دفعتي كتبت (مسكاقرو) وعينك ماتشوف إلا النور
فكرت في (هييييييييييييع) قلت ود الباوقة ردمها بالمحمولات السالبة
قلت أقول (سلامو عليكم) خفت يطلع فجري كاذب
كل العناوين صارت ذات مدلول
واهتديت الى سلام ومحبة
كل عقبة بعدها عقبة (مثل برلومي)
تبدا بشنو
وأهم حاجة عمك
أغتراب البعض للظروف السيئة دي دخلنا ليك في (حيص بيص)
صارت الألقاب فخمة للغاية
ومثلي لا يقوى على حمل الفخامة
قربت اقول الشكر (لخادم التكنلوجيا)
فهذا خادما للقرآن
وصاحبا للسمو
وطويل العمر
وسئ الذكر
وكل كلمة تخيف أكثر
مع تدهور الخدمة المدنية في السودان صار صعبا أن (تفخم)
فكل مفخما(بكسر الخاء) ما هو إلا (كسارا للتلج)
وناس ود الصايم يشوتو في قون (الصلعة) ولا أحد يعيرهم (توقيفاً)
وأنا أكتب
ثم أمسح
ثم أكتب
ثم أمسح
حتى خلت الكمبيوتر يرسل لي رسالة في إنو (عذبتنا يا خلف الله)
وفي كل مسحة مئة إحساس جميل حملته لكم



خروج : بصراحة كنت مشرك لي لزول يوريني الإقتباس ومادام الناس كلها لابدة وما صدت سوى برلوما
أحسن أنوم ونتلاقى بكرة لو ربنا أراد

ود البشرى سلامات
شكرا لمرورك
كان عارفك بتجي ما كان قلت ماش أنوم (الوش دي مراحل متقدمة)
لكن أجري اللازم

محمد

اثرت فيني شجونا كنت اكتمها
مدادك رائع و ترتيب جميل للخواطر
و بوست موفق و اتمنى تواصل الكلام

يا أمجد
هههههههههههه ماف عاشميق
اشتغلت بي نظرية
الله لي من ناس (الأغنام)
(الجزمة) ورا والقاش قدام
مليتها قاش من النوع أبو 3 جنية(كان) داك


شكرا لمرورك

شكرا على الإطراء محمد قاسم
يا هو من راسنا وبنحاول


شكرا ع مرورك

ياخ انت اكتر من أي حاجة ....الكلام من الدواخل بتطلع شحمان ...

حبابك يا برلوم ،،، ولى قدام

برلوم سابق

مرحب الباشمهندس بكري
وشكرا على الترحيب



شنو بهناك ماتجي ترحب وبي جاي تجي حسيت بي دخنة في البوست دا ههههههههههههههه

شكرا يا عادل على الدعم
انت الأكتر يا صديق


تسلم

حبابك أيمن
يا برلوم يا سابق
أنتم السابقون ونحن اللاحقون

شايف الكربنة بدت وواحد من الدفعة استشهد (وش الضحك دا بيجيبوه من وين)ز


شكرا ع مرورك

يا شخس انت برلوووم؟؟؟

فتتك زي العسل بعد البوش

رش

شوقي
سلامات
شفت حكمة الله كيف برلوم ومهجس كمان
تسلم علي الإطراء


شكرًا ع مرورك

محمد عباس ( يا سنترليق) زي ما قالو زمان
ههههههه
ماف محركة يا صديق
يا هو بنتعلم السواقة وبنختبر في امكانية التداعي

شاكر ليك متابعتك ونتمناك ( مصعد) بجاي