الكُـــــج .. (‏د.عادل المكى) .. هههاي ..

البيشربو الزول ده انا عايز منو .. ..


الكُـــــج

Quote: ناس الكورة..ناس الكوشتينة..... ديل اكتر ناس قاعدين يكجكجو الناس...والاشياء... الجماد والحيوان.... حتى الضُبان ما قاعد يمرق من كجكجتهم....وهدومهم البيلبسوها برضها فيها ما هو كُج.....والكُج هو جالب النحس....والشخص البيخاف من الكُج تلقاهو يعتمد على الحظ في حياتو....قد يكون الكج بالوجود المادي فقط....يعني زول يقعد جنبك يكجك لمن تامن.....والكُج النقنقي. ودا فرع من فروع الكُج الاجتماعي... دا دائما يقولو الزوج المكجوج لزوجته الكجاجة...... المرا دي شفتها بي نقنقتها دي جايبه لي الكُج....وقد يتعدى الكُج الزوجة الي النسيبة او الحماة.... او كل افراد اسرة الزوجة.....والكج الزماني "زول يعتبر انو يوم السبت مثلا يوم كُج" والكُج المكاني"زول يكجج شارع بعينه ..وما يمشي بيهو كلو كلو"..ايضا هناك الكُج الوظيفي.... مدير يكجج احد موظيفيه..ولما يكون عندو حاجة او صفقة وخايف الموظف دا يكجها يرسلو في مهمة طويلة...... او يقول ليهو انت حقو تمشي اهلك ترتاح شوية وشيك دا مختوووووف...زي العندك مراريا...واحد من اصحابي ناس الكورة المشجعين المرضانين....... لاحظ انو كل مرة يدخل...مباراة الفريق البيشجعو الفريق يتغلب....وقعد يكوس للشي الجايب ليهو ولفريقو الكُج دا شنو.... شك في المحل البتقام فيهو المباراه لقى انو ما ليهو علاقة لانها المبارايات في اكتر من استاد...شك في الناس البيمشو معاهو الكورة.... برضو لقى انو كل مرة بيمشي معاهو زول مختلف..... شكا في حاجاتو البيلبسها.... من الجلابية والعراقي والطاقية والنعلات... غيّرن... علا النعلات لانو عندو مركوب جلد دبيب عاجبو ..واصلو ما بيملصو من كرعيهو.... وفي احد المبارايات وهو مستعجل لبس سفنجة ونسى المركوب في اليوم داك ربك حميد كريم فريقو غلب.... وجا مبسوط..... واكتشف انو الكُج من المركوب......... قرر يجدع النعلات... وقد فعل...الكُج الغنائي تلقى فنان اي عرس يغني في حفلتو ..... يكُج العريس والعروس ويطالقو بعد شهرين بس...وقد يمتد كُجو ليشمل والدين العروس ويطالقو برضو..ودا لو جابوهو في حفلة عرس جماعي الرماد كال حماد"فهو من اسلحة الطلاق الشامل" !انا غايتو بعرف اتنين من الفنانين اكجاج وسبق ان طلقو اربعة زيجات.. والكُج الفضائي دا بيكون عند المذيعات والمذيعين في القنوات... تفتح التلفزيون يقابلك الكُج او الكُجاية تتقفّل عليك محل ما تقبل..وشخصي المكجوج خلقة في واحدة مذيعة متخصصة في كُجي... بقيت لو شفتها الصباح وانا لابس داير امرق املص هدومي واحرد المرقة واحتسب اليوم دا لله..وبرضو هناك الكُج السياسي..تلقى سياسي كجيج يدخّل في ااي مفاوضات يكُجها ويرجع اهلو والمفاوضات تفشل...والكج الطبي مستفشى كُج او دكتور كُج او سيستركُجة او تمرجي كُج.... اي زول عيان يخت ايدو فيهو يكجو ويموت....الكُج عندو مقياس زيو وزي المحركات اتناشر حصان تمانية واربعين حصان وهكذا... فالكُج ممكن يكون اطناعشر كُج/يوم....ستطاعشر كُج/يوم....الي تمانية واربعين كُج/يوم.....يعني زول كُج يكون شغال بقوة تمانية واربعين كُج/يوم...دا يكُج الناس من يصحا من النوم لحدي ما يرجع يرقد....!!!ويصحا ويسمِّع نشيد:- ستة صباحا اقوم من نومي اكُج خلق الله.... طول يومي

هنا..