الأستاذة/ سلمى الشيخ سلامة..أحسنتِ يا أصيلة

رأينا في ما يرى النائم..

..

.

البشارة يا بت أبوي الشيخ..

..

.

أمام بوابة غامضة المعالم..

ولكن يبدو أنها مدخل ميناء أو مطار..

حراسها أولي سلطة وصرامة وربما بعض لؤم..

..

جبت سيرة الناس الحُنًان يا محمود ..
واصل ..

حباب دكتور محمد ود المشرف..

كل سنة وإنت طيب يا حبيب..

Quote: جبت سيرة الناس الحُنًان يا محمود .. واصل ..

والله داير الإذن من ستي سلمى..

أرش الرؤية دي على الهواء كدا ساي؟؟

معقولة؟؟

..

.

يا الحبيب قطعت قلبى قلت ياربى بت الشيخ سوت شنو ؟
اقول ليك رش ، عشان الحاحات تبقى كويسة
يسلمك الله ويقويك

إتِّي جيتي آآآلمبروكة؟؟

حبابك والله

Quote: اقول ليك رش ، عشان الحاحات تبقى كويسة

أها أشوف كدي ونحن مروراً بتلك البوابة / المعبر..

دي يا ربي سلمي ولا أنا "غلتان"؟؟

لما جيت قريب منهم.. فهمت من الحوار إنه

بت الشيخ زي داخلة في حالة كونها "ابن سبيل" وقاطعة مرة واحدة..

أنقروا شنو؟؟

هي عاد أمانة ما "ضكرانة" وبت رجال..

الساعة كدي القالوا عايزين يساعدوها بالفيها النصيب..

يكملوا ليها حق تذكرة أفتكر..

وقاااااالت كدي نهرتهم ليك:

أنا ما عايزة قروش ولا حا أمِد يدي أشيل لي قروش من زول..

أنا عايزة boarding..

أها هنا - أخوك آآآسلمي - جيت ناطي ..

- في شنو يا شباب.. الأستاذة دي حلوا ليها مشكلتها الآن..

وأفتكر عملت لي إتصال بوكيل سفر ولا شخص نافذ غايتو..

المهم أمورك سلكت زي الترتيب وكمان معاها "شموخ" تحسدك عليه الجبال..

خير وزين وصلاةً على النبي..

أرح البشارة والبياض..سريييييع..

..

.

سلام يا الحبيب
قالو القلوب عند بعضيها
الحمد لله الذى سخر لنا هذا الحب
الحلم اتفسر تب يا الحبيب
قول لى مبروك
امس فى الليل بعد جيت من الشغل
ربك رب الخير زول صديق كلمنى عشان ارسل ليهو الكتاب للطباعة
احمدك يارب
دا كتاب نشرته قبل 13 سنة ونفد كتر خير الله
ولقيت انه اعيد نشره مش لانه ماعندى غيره لكن لانى بحبه
شفت ليك زول بحب ليهو كتاب ؟
الكتاب حيصدر قريب بتمويل من هذا الصديق
قبله فى زول صديق برضو سالنى لو كتابى التحت الترجمة خلص ؟
قلت ليهو ما خلص لكن على وشك
قوم يالزول الحبيب دق صدرك وقول لى رسليهو بمجرد ينتهى
والنحكى ليك الناس ديل الزول القال عاوز يطبع الكتاب بالانجليزى لاقيتو مرة واجدة فى حياتى
والزول التانى العاوز ينشر الكتاب العربى ماشفتو فى حياتى
متل صحوبيتى ليك دى ... صحوبية صادقة
من القلب وللقلب ، والحبيبة الترجمت الكتاب ما بعرف غير انها كانت زوجة شقيق زول صديقى رحمة الله عليه ...!ما شفتها فى حياتى لكن بعرفها زى جوع بطنى ..
الحمد لله حمدا لا يحد ولا يعد
ياسلام عليك ياخ
احلم لى عشان اعمل المشروع الحارقنى
عاوزة اعمل مدرسة للشماسة والما مشو مدرسة فى حياتهم بسبب الفقر
بديت الفكرة ايام الصبا لكنها ما زالت قائمة
يسلمك الله حبيب

خير وزين وصلاةً على النبي...

نان البياض وينو آآلمبروكة؟؟

..

سعدت كثيراً يا سلمى وأرجو لك المزيد.

..

.

ربنا يسعد ايامك
واكتب لى عنوانك اول ما النسخ تطلع حتكون اول زول تصله
يسلم عمرك وشكرا لاهتمامك

Quote: الأستاذة/ سلمى الشيخ سلامة..أحسنتِ يا أصيلة

شكراً الأخ محمد مصطفى لقد أصبت ..
فعلاً الحبيبة سلمى أصيلة بنت أصول
هذه من حسنات المنبر التي جعلتني أتعرف
عليها من قرب ,,
سعيدة بصداقتها واعتز بها ..

Quote: سلام يا الحبيب قالو القلوب عند بعضيها الحمد لله الذى سخر لنا هذا الحب الحلم اتفسر تب يا الحبيب قول لى مبروك امس فى الليل بعد جيت من الشغل ربك رب الخير زول صديق كلمنى عشان ارسل ليهو الكتاب للطباعة احمدك يارب دا كتاب نشرته قبل 13 سنة ونفد كتر خير الله ولقيت انه اعيد نشره مش لانه ماعندى غيره لكن لانى بحبه شفت ليك زول بحب ليهو كتاب ؟ الكتاب حيصدر قريب بتمويل من هذا الصديق قبله فى زول صديق برضو سالنى لو كتابى التحت الترجمة خلص ؟ قلت ليهو ما خلص لكن على وشك قوم يالزول الحبيب دق صدرك وقول لى رسليهو بمجرد ينتهى والنحكى ليك الناس ديل الزول القال عاوز يطبع الكتاب بالانجليزى لاقيتو مرة واجدة فى حياتى والزول التانى العاوز ينشر الكتاب العربى ماشفتو فى حياتى متل صحوبيتى ليك دى ... صحوبية صادقة من القلب وللقلب ، والحبيبة الترجمت الكتاب ما بعرف غير انها كانت زوجة شقيق زول صديقى رحمة الله عليه ...!ما شفتها فى حياتى لكن بعرفها زى جوع بطنى .. الحمد لله حمدا لا يحد ولا يعد ياسلام عليك ياخ احلم لى عشان اعمل المشروع الحارقنى عاوزة اعمل مدرسة للشماسة والما مشو مدرسة فى حياتهم بسبب الفقر بديت الفكرة ايام الصبا لكنها ما زالت قائمة يسلمك الله حبيب

ألف ألف مبروك يا حبيبة على الأخبار
السعيدة وهذا الإنجاز ومزيداً من التقدم ..
من يزرع الخير يحصده ..
لكم جميعاً تحياتي وتقديري ..

بوست من اصيل لاصيلة

تحايا للاصالة

الحديث عن بت الشيخ عاوزلو زي مليون بوست ...لك الود يا أصيل ...

العزيزة أماني العجب..

دكتورنا وفناننا إبراهيم عبد الحليم

أخونا عادل عبدالرحمن حسن..

حبابكم والله..

بت الشيخ دي مليانة أسرار..أتبركوا ساااااااااااااي..ز

..

.

سلمى ..

أسربع ليك عنوان بوست معلق فووووق؟؟

Quote: هل إنتشر (الترامادول) في السودان

نان كدي ما (الترامادول) كال (حمادول)..

..

.

أي سؤال؟؟

..

حبيبي أحلم لي..وأنا أحلم ليك..

..

.

جات رسايل في الخاص..

لن يُنظر في طلبات الأحلام من شاكلة:

1) أنا عايز أحضر مباراة برشلونة وعيال مدريد..
2) أنا عايز أسافر أستراليا/ أمريكا / كندا..
2) أنا عايز أكسب مليون دولار..

فشنو..رجاء ..الأحلام مش بعزأة..عشان نبعزئها ساي كدا..

..

.

______________
التعديل: (بعزأة) كانت مكتوبة بعزقأة...و(نبعزئها) كانت مكتوبة نبعزقها

ولنا في البياض نصيب
بحكم الجوار
وجدة أم جداد
...



طبعاً
آمال إيه
أوعى البعزأة يا ولد



.....



يا كنز الروح
كيفنك يا اخي
والله فرحنا ليك من القلب
وربك ينولك كل مطلب يا اخي

هي يااااااااااااا بلة
ات جيت؟
حبابك ياخ وليك خراج سنة بياض

شكرا يا أمير الرويس

نان كدي ما (الترامادول) كال (حمادول)..
م

نان كدي ما (الترامادول) كال (حمادول)..
محمود "ينطقه القارئ الكريم ممطوطا
تتذكر الجملة بتاعة محمود يا حبيبى ؟
شويكار وفؤاد المهندس
قالت ليهو "الخروف بتاع الاضحى جا الدباح عشان يأشرو يا محمود
ومحمود دى فيها "مطة " طويلة
الترمادول فى خشمنا كان بقى كلام عاطف صحيح
والترمادول السوتو كريت تلقاهو فى جلدها
والمعنى واضح حيث ان الخيطعور نوع من الخنفشار

ترمدولوا يرحمكم الله
وترمادول ما ترمادولك جر فيهو الشوك
والشوك والريد
والحب البان فى لمسة ايد او كما قال شيخى السرقدور وابو شيوخى الكاشف
قال عم السر فيما خص الشوك والريد
انه كتب الاغنية الصباح وجا شايلاها للكاشف فى ورشة النجارين حقت وزارة الاعلام "زمان "
قال " ركبنا العربية انا والكاشف ماشين الاذاعة ، فى المسافة بين الوزارة والاذاعة الاغنية اتحفظت واتلحنت
لمن وصلنا الاذاعة ، زمان اللجنة حقت النصوص كانت بتقعد اليوم كله
دخلنا على اللجنة ، وبدا الكاشف يغنى الاغنية لمن جا فى المقطع بتاع "والحب البان فى لمسة ايد ، واحد من ناس اللجنة وقف الكاشف وساله
: انت لقيتا وين لمن تلمس ايدها ؟ انتهى كلام عم السر
الحمد لله الما قال ليهو لقيتو وين ؟ بالجد دا سؤال محيرنى ليه الحبيب دايما مذكر مع انه المقصودة الحبيبة ؟
لاحظت الاغانى العربية عموما ترمى بالحبيبة بعيدا رغم انها المقصودة ؟ مش حاجة دايرة قراية ؟
قراية ام دق كمان يا محمود
ابقى عافية

أمممممممك...الشرَكْ قبض..

طبعاً نوع سلمى بت عمي دي..إلا يشركوا ليها كدي..

ملكة السربعة..وأميرة القفشة والخيال..

لا ترضى بدور الوصيفة بتاتاً..

عليكن النبي شوفوا جنس اللذاذة دي..

سربعي يا أميرة عليك الرسول..

وإلى اللقاء في رؤيا قادمة..

بالفال الحسن والزين..

..

.

سربعة مرات
ومرات تجيك بلا إذن او كما قال الزول الغناى محمد النصرى "تندلقى حن "
ودى اغنية اهدانى اياها الراحل الجميل صديقى الذى اظل حزينة عليه طوال حياتى محمد عبد الرحمن المطرطش
يا سلام يا خ
محمد عبد الرحمن
المطرطش ضريب مثل
رحمة الله عليه
عارف الزول دا "براحة جدا "
ولمن رحل لكنته ما اتغيرت سبحان من له الدوام
يتكلم معاى باللهجة حقت اهله السمحة
اول مرة اتلاقينا وحات الله بكينا كنه فى زول مات
قال ـانتى بت الشيخ الواحدة دى ؟
قلت ليهو ـ يانى يا العشا
وحات الله قلدنى متل التقول امه وبكى لمن حننى
وبكيت معاهو بكايا يعزيلو جنازة وما تبدلت جوانيناتنا تب
وكل ما يتصل حتى لو اتصل مرتين فى اليوم اول شى يبكى
بكايا يحنن الطير فى السما
ونضحك بعد كل البكا داك
ضحكنا ضحكا يجيب الرايح
سماحة لمن تحيرك ، وطرافة لمن تتعجب
كان عندنا مراسلة فى جريدة الاتحادى صعيدى "وصعيدى ليلتنا صعيدى "
محمد اخوى رحمة الله عليه هكذا كنت اناديه وينادينى سلمى اختى ...
يوم محمد رحمة الله عليه كان مصحح فى جريدة الاتحادى "طبعا العربى البعرفو رغم انه مهندس زراعى يحيرك "
خت القلم واتمطى فى الكرسى وقال "والله الواحد تعبان لمن نعسان "
طوالى مجدى دخل فى الخط وقال لمحمد
"ياك بتعزق "
محمد دا ضحك لمن دمعو سال ، رحمة الله عليه
محمد عبد الرحمن لمن يسمع محمد كرم الله يبكى ويشهق ولمن يسمع محمد جبارة يبكى
قلت ليهو يا محمد اخوى نان ما نسمعلك جنس غنا ؟
قال
ـ القليب ما بقى رهيف يا سلمى اختى ...
وكان سبب علته رحمة الله عليه وهديتو الله يعلم هديتو من المحبة البتكتل لكنه مات بالحب
وحات الله محمد مات بالحب لانه قلبه ما استحمل الحب
كان يحب الناس والحياة
يوم رحل صديقنا المشترك يوسف ابراهيم المعروف يومها بالعشوائى بكاه كما يبكى طفل امه
ويوسف دا كمان حكاية براها
يوسف دا زول سمح لمن غلط
القلب ابيض من الحليب
كانوا يجو عندى فى البيت يقولو ماشين بيت العمدة
عادة كنت بخبز فى البيت سبب بلا سبب ، اقول امكن يجى ضيف وما يلقى اليسد بيهو عيال الجوع
يشربو معاى الشاى المغربية ويشيلو من الكعك لبيتهم
يوم جات ام العشوائى تزورو كانت اخر مرة يشوفا كانها جات تودعه
العشوائى بتونس مع امه وقدامهم كباية الشاى بعد الغدا ، شرب شايه وولع سيجارة قوم يا ويوسف اطفى السيجارة فى كباية امك
وامه كانت زعلانة من اسم العشوائى
ضحكت وقالت ليهو "يابا السماك العشوائى مو خاتى عليك "
فى رمضان فى القاهرة الفطور عند العمدة يجو الصحاب كلهم رحمة الله عليهم "احمد الطيب عبد المكرم ومحمد عبد الرحمن ويوسف العشوائى
نفطر فطور رمضان ونضحك ونتونس ونشرب الشاى وننزل نمشى الجريدة
يوسف العشوائى دا يا محمود اخوى كان رجل عجيب
حارب مع الفلسطيين فى صبرا وشاتيلا ، وكان صديق مقرب من قيادة الفلسطينيين "جورج حبش على وجه الدقة "
يحكى عن تلك الايام التى ما قتلته لكنها قوته ومنحته المحبة فالموت الذى وقف عليه كان مرعبا لكنه جعل منه انسانا قويا
يحارب الفساد ويقف ضد المفسدين
يقول انه يكره الوظيفة لكنه مضطر لقبولها
كان فراشة تختار رحيقها بعناية
رغم كثرة محبيه لكنه كان يحمل الحب للكل دون مهابة
جمعنا الحب الى يوم رحيله
رحمة الله على اصدقائى السمحين
شكرا ليك ياخ خليتنى افضفض

Quote: شكرا ليك ياخ خليتنى افضفض

نان آآبت أمي تفضفضي لي بسيرة المطرطش عليه رحمة الله؟؟

الكلام دا قاعدين يقروهو ناس لم تنقطع دمعتهم ولا تأملاتهم في ذلك

الرحيل الموجع لحبيبنا محمد عبدالرحمن المطرطش..

ألف رحمة ونور عليك يا صديقنا الجميل..

إنتي أقعدي فضفضي ونحن نجوعر..كويس كدا؟

..

فتك بعافية..

..