Post: #1
Title: المغتربون و ناس نجيضون
Author: Badrudeen Mousa
Date: 01-25-2013, 10:15 PM
Parent: #0
ننوه الى أن احداث الحلقات قد تتشابه مع تجارب مماثلة لبعض القراء كما ان الأسماء الواردة فى جميع الحلقات ليست بالضرورة متطابقة مع الواقع بالرغم من أن الروايات جميعها مقتبسة من تجارب حقيقية . جميع الحقوق محفوظة .
الحلقة الأولى
نا س نجيضون
نجيضون نموذج معاصر يعيش بيننا و ربما كان من أصحاب العلاقة من الدرجة الأولى أو الثانية أو يكون صديق أو حتى جار و ربما معرفة عابرة .
ناس نجيضون شخصيات عاصرناها فترة من الزمن بعضهم لازال ملازما لنا و البعض الآخر ربما اختفى أو أخفيناه بارادتنا. يعنى قطع ناشف .
لا أخال أى من المغتربين ليست لديه تجربة مع ناس نجيضون مع اختلاف المستوبات و لشرح صفات نجيضون سأحكى لكم فى هذه الحلقة قصة من الواقع المعاش و قصدت أن أبدأ بهذه القصة لأنها من ناس نجيضون من الدرجة الأولى .
واحد من أخوننا المغتربين انتو مابتعرفوه من الأقاليم اشترى قطعة أرض فى الخرطوم و اجتهد كثيرا فى اعمارها . و بالفعل تمكن من انجاز بيت العمر خلال 10 أعوام حرم خلالها نفسه و أسرته من الأجازات و الكثير من مباهج الحياة التى كانت فى متناول يده .
المهم صاحبنا المكلوم جاب والده ووالدته و معاهم أخوه الأصغر من الأقاليم و سكنهم فى جزء من بيت العمر . ومع مرور الأيام كبر الأخ الأصغر و تزوج و طبعا صاحبنا قام بى واجب الشيلة و الذى منه , ودارت الأيام و امتلأ البيت بى أولاد الأخ و أصبح لصاحبنا يادوبك منزلة تسعه و أولاده خلال الأجازات و طبعا هى منزلة مؤقته تعود الأمور الى مجاريها مباشرة بعد سفره . و مجاريها دى معناها يرجعوا الجماعة يتوسعوا فيها كما كانوا. صاحبنا المسكين لازال بيحلم بالعودة و باله مرتاح انه بيته جاهز و ما ناقصه غير الفرش .
و فى يوم جاءه اتصال من السودان و دار الحوار التالى :
المتصل : ياولدى والله جيراننا ديل عاوزين يبيعوا بيتهم .
صاحبنا : طيب أهه و أنا مطلوب منى أعمل شنو . أنا ما محتاج أشترى بيت.
المتصل : لازم تعمل المستحيل حتى لو تتدين ولازم تشترى البيت ده عشان تكون جمبنا !!!! .
تخيلوا هو صاحب البيت و عاوزينه يشترى بيت جاره عشان يكون جنبهم .
و الى اللقاء فى الحلقة القادمة
أخوكم بدرالدين أحمد موسى أحمد
|
Post: #4
Title: Re: المغتربون و ناس نجيضون
Author: Badrudeen Mousa
Date: 01-26-2013, 02:14 PM
Parent: #2
Quote: ههههههههههههههههه والله دي قوة عين عجيبة خلاس
ومن اقرب الناس ليهو كمان |
تسلم على المرور الجميل ود سيد احمد
|
Post: #3
Title: Re: المغتربون و ناس نجيضون
Author: Hani Arabi Mohamed
Date: 01-25-2013, 11:17 PM
Parent: #1
بعض من اتكالية .... وباقيه سبهللية أو استغلالية ..
والقصة مكررة في معظم بيوت المغتربين.
يحصد أحدهم من غربته الهم والغم
ويحصد الآخر في مكانه كل شيء دون هم
تحياتي لكم
|
Post: #5
Title: Re: المغتربون و ناس نجيضون
Author: حمد فتح الرحمن
Date: 01-26-2013, 02:39 PM
Parent: #3
مرحبتين حبابك يا ابو البدور
|
Post: #6
Title: Re: المغتربون و ناس نجيضون
Author: حماد الطاهر عبدالله
Date: 01-26-2013, 02:53 PM
Parent: #5
الحقيقة أنهم أناس منجضون.
لو تبقي في العمر بقية سيعرف الأهل النجاضة الحقيقية إن شاء الله تعالى.
فالمغتربون حاليا إتجهوا للعمل الجماعي، شراكات، شركات، عبر محامين،
وعلاقات قانونية، لا تقوم على الصداقة، صلة الرحم أو القرابة. فأبشر يا
حبيب.
|
Post: #9
Title: Re: المغتربون و ناس نجيضون
Author: Badrudeen Mousa
Date: 01-26-2013, 09:23 PM
Parent: #6
Quote: الحقيقة أنهم أناس منجضون.
لو تبقي في العمر بقية سيعرف الأهل النجاضة الحقيقية إن شاء الله تعالى.
فالمغتربون حاليا إتجهوا للعمل الجماعي، شراكات، شركات، عبر محامين،
وعلاقات قانونية، لا تقوم على الصداقة، صلة الرحم أو القرابة. فأبشر يا
حبيب. |
نتأمل ذلك أخى حماد و تبقى التجارب القادمة عبرة لمن يعتبر
تحياتى
|
Post: #8
Title: Re: المغتربون و ناس نجيضون
Author: Badrudeen Mousa
Date: 01-26-2013, 05:04 PM
Parent: #5
| Quote: مرحبتين حبابك يا ابو البدور |
و ينك يا حمد .. والله ليك وحشة كبيرة
تحياتى
|
Post: #7
Title: Re: المغتربون و ناس نجيضون
Author: Badrudeen Mousa
Date: 01-26-2013, 05:01 PM
Parent: #3
Quote: يحصد أحدهم من غربته الهم والغم
ويحصد الآخر في مكانه كل شيء دون هم
|
صدقت يا هانى و بعد ده كلو لاجزاءاً و لاشكورا
تحياتى
|
Post: #10
Title: Re: المغتربون و ناس نجيضون
Author: أحمد الشايقي
Date: 01-27-2013, 00:00 AM
Parent: #7
Quote: الحقيقة أنهم أناس منجضون.
لو تبقي في العمر بقية سيعرف الأهل النجاضة الحقيقية إن شاء الله تعالى.
فالمغتربون حاليا إتجهوا للعمل الجماعي، شراكات، شركات، عبر محامين،
وعلاقات قانونية، لا تقوم على الصداقة، صلة الرحم أو القرابة. فأبشر يا
حبيب. |
|
Post: #11
Title: Re: المغتربون و ناس نجيضون
Author: Badrudeen Mousa
Date: 01-27-2013, 02:40 PM
Parent: #10
الحلقة الثانية
نجيضون مع سبق الإصرار !!!
اهه يا جماعة كدى الليلة نديكم تجربة خفيفة لى ثلاثة من أخواننا المنجضين .
ديل بقى ثلاثة أخوان شغالين بنايين فى احدى مدن المملكة لكن ما الشرقية و ليهم 17 سنة برسلوا لى أخوهم الأصغر و برضوا هو بناء و هو الحارس البيت افتراضا بالسودان .
و طبعا الثلاثة اجتهدوا طوال 17 سنة فى تحسين المبانى و تزويج أخوانهم و أخواتهم و حتى أخوهم الصغير ده عرسوا ليه و أصبح أبو أولاد و سايق عربيه و طبعا شغله الوحيد انه حارس البيت .
يوم أخوهم الصغير ده قا ليهم انتو ليكم 17 سنة عملتوا شنو . شوفوا ناس فلان عملوا و بنوا و اشتروا عربات . انتو مابتعرفوا تلموا القروش . انتوا بس جيبونى السعودية عشان أنا أوريكم القروش بيلموها كيفن .
طبعا فلان العمل ده من ناس نجيضون المغتربين و ديل بنجيهم فى مرحلة لاحقة .
المهم أخوانه الثلاثة اشتروا ليه فيزا و صاحبنا مما جاء ماسكهم ليك . يا أخوانا طلعوا لى الأقامة دى عشان أشتغل و أوريكم القروش بيلموها كيفن . و بعد مرور شهرين تقريبا طلعت الأقامة .
اهه يا شيخنا دى الأقامة و دى هدوم الشغل بكرة بنصحيك صلاة الصبح عشان تمشى معانا الشغل على طول .
صاحبنا تحمس و فى الصباح أخذ عدته و ركب مع الجماعة . و مع البناء البلك ده الجماعة شدوا ليك القده من الصباح نزلوا صلاة الظهر .
صلوا و أكلوا ليهم كبسة و دوروا فى الغرفة و مع أذان المغرب انتهوا من السقف . نزلوا و راحوا البيت استحموا و عملوا ليهم حله ضربوها و صلوا العشاء و ناموا.
تانى يوم الصباح و كالعادة صحو صاحبنا من النوم .
قوم يا أخينا صلى الصبح عشان نمشى الشغل .
صاحبنا الكلام ده حااااار عليه قال ليهم :
و الله تانى واحد يصحينى أديه بنيه فى عينه . انتو مجانين فى غرفة بتموها فى يوم واحد . ؟
و مازال صاحبنا نجيضون لكن بقى من ناس نجيضون المغتربين .
و الى اللقاء فى الحلقة القادمة
أخوكم بدرالدين
|
Post: #12
Title: Re: المغتربون و ناس نجيضون
Author: Badrudeen Mousa
Date: 01-28-2013, 06:23 AM
Parent: #11
الحلقة الثالثة
كديستكم و ثلاجتكم
قبل سنين خلت كان أحد الأخوان يعمل فى مطار الخرطوم وردية ليل . و فى ذات الليلة هبطت طائرة الخطوط البريطانية قادمة من كينيا للتزود بالوقود و بعض أعمال الصيانة العادية قبل الأقلاع الى وجهتها النهائية لندن . و كان على متن الطائرة بعض الحيوانات الأليفة صاحبة الجواز و اللى أمها راضية عنها . ناس المصارين البيض. و كما هو الحال تم انزال جميع القفاص حفاظا على تلك الأروح من الأختناق . و من ضمن الحيوانات الأليفة كديسة مبغبغة ظريفه و لطيفة نزلوها بى قفص مميز و قفل مخصوص .
أخونا من لقافته شاف الكديسه مرخمة من اعياء السفر ربما . و افتكر الكديسة جيعانة جرى فتش لبن مالقاهو . اشترى ليه شاى بى لبن من الكفتريا بتاعة المطار و جابه للكديسة . أول مافتح الباب الكديسة مرقت و كتلت ليك ساحة المطار. صاحبنا جرى ليك ورا الكديسة من مدرج لى مدرج لحد السور . و من تحت السور لقت ليها فتحة و ما أكثر الفتحات بالسلك . ومن هناك برى عدل .
صاحبنا رجع و ماعارف يتصرف كيف . فى طريق العودة لقى ليك كديسة جربانة ضارباها السخانة و خايفة من أنور المطار . ما عاين فى اللون و لا الحجم . لفح ليك الكديسة و ياقفص جاك القدرك . قشط ليك الكديسة فى القفص و شرب ليك شاى الكديسة الهاربة و كمل ورديته .
و أول ما انتهت أعمال الصيانة . المينافيست بى وين و ارفع . كديسة . ###### . عصفور كنارى . كل الحيوانات الأليفة رجعت مكانها و أقلعت الطائرة بأمان . وصلت مطار لندن و كديستنا الجربانة ضربتها ليك الكندشة و أكل أولاد الذوات ما نفع معاها . نزلوا ليك الأقفاص و على الحجر الصحى لقو ليك عندها بهقة كبيره حول العين . و العظام مرضرضة و الضهر مظعوط و سمعها بقى ضعيف و العيون مابتفتح و الضنب قصر وحاجات أجارك الله يعنى حالتها حالة .
و فى المطار من الصباح التلكسات دورت بين الخرطوم و لندن . كديستكم ... ما كديستنا .. ياها كديستكم . ما يا ها كديستنا ..
و أصحابنا بى جاى .. يا أخوننا تصدقوا النصارى و تكضبونا نحن . على الطلاق ياها كديستم . و مازال الخواجة منجض و كديسته منجضة و نجيضون فى شغله . و قيدت القضية ضد مجهول .
أهه أنا يوم بعد ما تميت البيت اشتريت لى ثلاجة كلفانيتور 24 قدم بيضاء زى اللبن بتاع الكديسة . و رحت شاحنها بالطيارة شد كرتونة و دفعت عليها الجمارك و نزلوها الجماعة جزاهم الله خير فى غرفة بالبيت الجديد . ما ثلاجة جديدة بى كرتونتها . لازم نحافظ عليها و كل ما أمشى اجازة لازم أتأكد من وجود الثلاجة و خصوصا الكرتونة ما يكون فى كمان زول شرطها تقوم الثلاجة تصدى .
بعد سنه و نص مشيت اجازة عشان أطلع الأجهزة الكهربائية و أكمل فرش البيت . أروح فاتح ليك كرتونة الثلاجة و ألقى ليك ثلاجة 10 قدم لونها أصفر باهت لا يسر الناظرين و فوق ده كله قديمة . جريت لى ناس الجمارك قلت ليهم ياجماعة الظاهر فى خطأ فى التسليم . الكرتونه ياها . و المقاس و البضاعة ثلاجة لكن مواصفاتها بتختلف . و طبعا الباقى انتو عارفينو ..
قالوا ليها يازول ياها كديستكم . قصدى ثلاجتكم . و قيدت القضية ضد مجهول و أنا لحقت نجاض الخواجة .
و الى لقاءفى حلقة قادمة .
بدرالدين أحمد موسى
|
Post: #13
Title: Re: المغتربون و ناس نجيضون
Author: ابوحراز
Date: 01-28-2013, 07:16 AM
Parent: #12
صديقي مرافق لزوجته التي تعمل محاضرة هنا بالجامعة
يشهد الله رغم راتبها العالي ولكن حرموا انفسهم من اجمل متع الحياة
كل ذلك لأجل ان يشيدوا بيت المستقبل
وكان البيت يشكل هاجس كبير
وامنية تريد الستاذة تحقيقها حتى تستقر بالوطن
ومن ثم تعمل محاضرة بهدوء بعد ان انفكت عقدة البنيان
وبالفعل بنوا البيت بالأزهري
واقترح عليها اهلها ان يسكنوا بالبيت
لأنهم كانوا يسكنون بالايجار وبرروا لها ذلك بسببين :
السبب الأول ان يوفروا عليها الايجار لأن المسكينة هي التي كانت تدفع
بالمناسبة أخوانها مثل دجاج فقيه
من الشحم الرقبة ماتشوفا !!!!
والثلاثة شغالين برواتب فوق المليونين
والسبب الثاني قبل ما أنساه أنهم قالوا لها حتى لايتعرض البيت للتلف
أما ابو القدح صديقي فلايستطيع ان يرفض او يوافق
لأنه عريس حنك سااااااااااااااااكت
ولم يساهم ماديا في بناء المنزل
رغم انه كان يحمل كل يوم الشبابيك والأبواب على كتفه لارسالها للسودان
الظريف ان اهل الزوجة لم يقصروا
وقالوا لها 00 حانفضي ليكم غرفة إنتي وراجلك عشان تقضوا فيها اجازتكم
ومن ثم تتوكلوا على الله !!!!
المهم نزلوا اجازة ووجدوا غرفة واحدة رغم ان لهم اربعة أطفال
وبقية الجماعة قد احتلوا الغرف احتلالاً كاملا
بل مرات يسمعهم صديقي يقولون
غرفة هيثم
يابت شوفي وصلة الكهرباء في غرفة وليد
وعمك الشايب ومرتو حاجزين غرفة ومانعين حتى ابليس مايدخل
قال لي صديقي اجازتي الـ 45 يوم كانت أسوأ من عام الرمادة
لاتوجد اي خصوصية
لاحياة زوجية
ولاوضوء
ولاتيمم
ولا اي اشياء من هذا القبيل
لدرجة أنهم ذهبوا لأسرتهم في اهل العوض حيث الحيشان بمساحة وسماحة العالم !!!
وأظرف شيء أنه قال لي
ياخي مرات أخوانها يصحونا من الصباح
مش عشان يقولوا ليهم اصبحتوا كيف
بل يقولوا لهم : الكهرباء كملت !!!!!
قال كملت قال !!!
|
Post: #14
Title: Re: المغتربون و ناس نجيضون
Author: زول ساكت
Date: 01-28-2013, 07:38 AM
Parent: #13
سلاملت يابدر
والله الحكاية بقت غربة وخراب ديار
وكما قيل ظلم ذوي القربى اشد مضاضة على المر من وقع الحسام المهند
أبوحراز يامليونير
عشان الحكاية دي انت خلي القطعة بتاعتك سهلة ساي
العندو خيمة يجي يكجها
|
Post: #15
Title: Re: المغتربون و ناس نجيضون
Author: ابوحراز
Date: 01-28-2013, 08:23 AM
Parent: #14
زول ساكت 00 تحية ومشتاقين
Quote: أبوحراز يامليونير
عشان الحكاية دي انت خلي القطعة بتاعتك سهلة ساي
العندو خيمة يجي يكجها |
القطعة الله يرحمها
بعناها منذ زمن بعيد
وقلنا نصلح علاقتنا مع جماعة { هي لله هي لله }
عسى ولعل أن نجد لنا موطيء قدم في غزة {1}
أو غزة {2}
أو أضعف الايمان حي المجاهدين
ولانتطلع البته للسكن في كافوري
والمنشية
وقد بدأنا بحمد الله في حفظ أجزاء من القرآن الكريم
واللحية تسير بخطى جيدة وملموسة !!
وهي في طريقها لبلوغ الهدف { دعوني أعيش } !!!
قال حي الجامعة قال !!!
جميعهم بنوا ثلاث واربع طوابق
واقل واحد من الجيران تاجر بالسجانة
وهؤلاء يصعب العيش معهم
يعني انت لو قلت تشرب ليك معاهم فنجان قهوة تتكلم تقول شنو ؟؟؟
مرة جونا جماعة من الخرطوم مناسبة بكاء في اهل العوض
اها جماعتنا ضربوهم ليك بالونسة
الحواشة مويتها اتكسرت
والعيش مادقيناهو
وحمارتي راحت
واصحابنا الضيوف مافاهمين اي شيء
قلنا أخير نفرز الكميان وديناهم ديوان قريب من ناس أختك
وهناك عينك ماتشوف الا النور
الونسة اتقلبت 360 درجة
بقت حديد وسيخ وسجانة والطابق التاني !!!
المهم قلنا يازول نسكن صالحة
وحي الجامعة مبروك عليكم انت ويوسف الزين
صالحة دي اهم شيء فيها انها بلا مقابر !!!
يعني لو جاء قدر الله بس الواحد يوصيهم يدفنوا في المنشية
|
Post: #16
Title: Re: المغتربون و ناس نجيضون
Author: جمال عبد الناصر محمد
Date: 01-28-2013, 08:37 AM
]
در الدين وضيوفه سلام وتحية
مشهد أول :
في البلد ..
الشفع قدامك جارين ماشين بيتنا الفوق متحركين من بيت جدهم طبعا
الولد الكبير :يا بابا البيت الوسيع الفيهو حديقة دا حق منو
انا : حقنا الولد الصغير : قلت حق منو ?
أنا : حقننننننننننا .. حقكم يعني
البت : طيب يا بابا ما دام دا كلو حقنا خاشرنا في الشقة الصغيرة ديك في الرياض ليه ?
أنا : طيب داك ما محل شغلي
الولد الصغير خالص : طيب ما تجي تشتغل هنا يا بابا
أنا : كويس السنة الجاية
مشهد آخر :
في الخرطوم ..
وفي شارع رئيسي وقبل أن ننزل من الأمجاد
جاين من البلد طبعا
الولد الماكبير : يا بابا دا حقنا
أنا : ايوة
الولد التاني : العمارة دي كلها والدكاكين دي كلها
انا : ايوة ياخي
البنت : طيب يا بابا ما خلاص نجي نقعد والله المدارس قريبة والمسجد كمان
أنا : خلاص السنة الجاية
مخارجة : لسة السنة الجاية ما جات لحدي الآن
|
Post: #17
Title: Re: المغتربون و ناس نجيضون
Author: Badrudeen Mousa
Date: 01-30-2013, 11:16 AM
Parent: #16
Quote: وقالوا لها 00 حانفضي ليكم غرفة إنتي وراجلك عشان تقضوا فيها اجازتكم
|
ابو حراز اخوى دى بالذات عندى ليك فيها حلقة .. طبق الأصل العلقة اللى فاتت
تحياتى
|
Post: #18
Title: Re: المغتربون و ناس نجيضون
Author: Badrudeen Mousa
Date: 01-30-2013, 11:22 AM
Parent: #17
أحمد الشايقى
مرورك اسعدنا
Quote: سلاملت يابدر
والله الحكاية بقت غربة وخراب ديار
وكما قيل ظلم ذوي القربى اشد مضاضة على المر من وقع الحسام المهند |
صدقت يا زول ما ساكت
|
Post: #19
Title: Re: المغتربون و ناس نجيضون
Author: Badrudeen Mousa
Date: 01-30-2013, 11:26 AM
Parent: #18
تحياتى Quote: القطعة الله يرحمها
بعناها منذ زمن بعيد |
أبو حراز
ان شاء الله قبضت القروش يا اخوى .. ما يكونوا قايطوك بى حالفة و سخلتين و جهاز فيديو
|
|