Post: #1
Title: شايفك بقيت ود كـلـب خالص فى السياسة ! .
Author: shaheen shaheen
Date: 01-24-2013, 08:34 PM
1
ثوابت وطنية
ثوابت .. ثوابت
احب الثوابت بـ زيت مع بطاطس
وحبة شمار
خلطة مبادئ بـ شطة وطماطم
حلة كوارع
شوربة خضار
مواطن يا صالح
صباح الثوابت
بلاش المساخر
ثبت ثوابتك .. مسامير مفاصلك
واوعك تعارض
بنعرف مصالحك .. ونعرف نفاوض
حـ تعمل مناضل ؟ .. بتتعب ونزعل
و زيتك حـ يطلع
صلاح البلاد والعباد فى الثوابت
فـ ظبط مسائلك .. حالك ومالك
وشيل هم عيالك
وجيب عيشة سخنة لدكوة طناشك
واهتف معايا
- يعيش الوطن ثابت مثبت بلصقة ثوابت .
عزيزى المواطن
بطاقتك بتثبت بانك موله وعاشق مثابت
وارباب ثوابت
فشكراً جزيلاً لهذا الكرم
بنشكر مدامك
نضالها الصبور
بـ دلكة وعطور
ورطلين بخور
اضاف ليل خميسكم فى بند الثوابت
فشكراً مدام
شكراً مواطن
شكراً شباب
وعاش الوطن .
شاهين شاهين
|
Post: #2
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 01-25-2013, 04:35 AM
Parent: #1
2
ولد البلد
يا ولد .. كل فردة من بلد
مدد
مدد
مدد
ماركسى لو مركست .. كوز خطير لو أسلمت .. كاس طويل حين مغربت
مدد
مدد
مدد
ضد وضد الضد .. وصاحب الضد , اذا درجة مناخ اتغيرت
كل كرت فى ايده قاشى .. ( اتحادى ) , ( امة ) ماشى
( بعثى ) ممكن .. ( جبهة ) جبهة
المهم صالح معاشى
يا ولد
عسكرى لو عسكرت .. ثورجى لو ثورجت .. ديك كبير يوم بيضت
يا زعيم يا زئبقى .. دولة سيادتك زئبقت
يا ولد
ضم كراعك انتباه .. سيجة سياستك صفرجت
واجرى ضلك سخنت .
شاهين شاهين
|
Post: #3
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 01-27-2013, 05:44 AM
Parent: #2
3
يا ذات العجاج
1
ومظاهرات .. مظاهرات
اندلعى يا ذات العجاج
عالى الهتاف .. شاقى العنان
افتح ترابيس اعتقال
بوليسنا اب بومبان تعال
- دايرين دروس فى حب حكومتنا العروس .
كهربنا .. او اضربنا فى الراس والكراع
لعلع رصاص
اصقعنا بالخطب الرئاسية الكبار
اندلعى يا ذات العجاج .
2
خوفنا انشرخ
ضرساً مُسوس ينقلع
ومتى المسدس بنفعو ؟
لما الجماهير تندلع .
3
اتكلمى .. وتحركى
او ارفسيهم واصهلى .. وتصهللى
اخر الطريق راح توصلى
وتوضىء
قرب اذان الفجر يصدح بالخلاص
فـ تخلصى
من عبء رعبك
واركضى
نحو انتصار .
4
وضعوا اللجام شان يركبوك
يا مهرتى البرية .. يا بدر التمام
يا درس فى التاريخ سلام
يا ارم يا ذات العماد
(اتراك) سلام
يا (انجليز)
(عبود) سلام
(جعفر امام العرش) كيف ؟
ما قلتوا انتوا نهاية التاريخ !
يا القلتوا رب الكون خلق مهرتنا بس شان تركبوا !
فلماذا يعنى ودون مؤاخذة يا شباب ؟
لما الحثالة فى بيت ابوكم تنتفض
بتجقلبوا ؟ .
5
نوارة النوار سلام
يا مهرة ضد هذا اللجام
برسيم بيرسم ليك طريق
نحو السحاب
اندلعى يا ذات العجاج
زهج انتظار من انتظار
لا رجعة تانى الى الوراء
ولا فرار
الشارع المفتوح وراك .. والبحر قدامك فسيح
والحل فى الشارع صريح
فلماذا يعنى ودون مؤاخذة يا شباب
لما الحثالة ولاد شوارع تنتفض
بتجقلبوا ؟ .
6
ارفع مسدس عسكرى
اضربنا فى الراس والركب
بس ذاكر التاريخ كويس
وافهمو
هو اللى بشرح فى ذكاء
سر العلاقة بين المسدس .. والجماهير الغفيرة
كلمة السر .. (اندلاع)
اندلعى يا ذات العجاج .
شاهين شاهين
|
Post: #4
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 01-27-2013, 04:57 PM
Parent: #3
4
وشوش
يا عمى بياع الوشوش
الدنيا عيد .. والعيد سعيد
ما عندى ليك يا عم قروش
بدلنى
هاك وشى الأليف
ادينى وش شيطان مُخيف
عايز أعيش بين الوحوش
العندو وشين بستريح
والعندو خمسة بكون مُريح
ما قدرتا
فى الريح
بنكسر .
شاهين شاهين
|
Post: #5
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 02-01-2013, 12:31 PM
Parent: #4
5
شايفك بقيت
شايفك بتمشى على الحبال
يا بهلوان سيرك الكلام
مبروك شديد
يا صديقا كان صدوق
مبروك شديد
شايفك بقيت ود كــلب خالص فى السياسة
يا من صعدتا على الصديد
معقول نسيت !
يرحم زمان البنطلون الكلو زيت
ايام كلامنا عن اليسار
(ماركيز) و (هارون الرشيد)
مبروك عليك دقن التيوس
توبتك نصوح ؟
يا بدلتك .. وتبدلك
كرشك وصل حد ركبتك
كلمات مقالاتك بتنزل زى مطر من صلعتك .
شاهين شاهين
|
Post: #6
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 03-02-2013, 05:16 AM
Parent: #5
6
أنوثة
نزلت مظاهرة من انوثة على الشوارع فرفشت
شجرة جوافة حوشنا بالضىء فرهدت
يا ضجة فيك روعة جمال
الرملة بالزحمة انتشت
التماثيل خلت المتحف مشت
بكت الرياح من خطوتك
عن سر دلالك للسحابات وشوشت
شاهين شاهين
|
Post: #7
Title: Re: شايفك بقيت ود كـلـب خالص فى السياسة ! .
Author: ولياب
Date: 03-02-2013, 05:57 AM
Parent: #6
سلام تعظيم لشاهين
كأنك إقتبست (العنوان) من عبد الله علي صابر ذلك الشاب ( آنذاك) المزارع الأمي الذي يكد في حواشته بالقرية 6 ، حيث قالها قبل أكثر من ثلاثون عاماً لزميله عبد الدايم أحمد هيكل ، حيث كان الأخير لم يكمل السادس الأبتدائي ولكن دوماً يخالط طلاب القرية ، وفي موقف سأل عبد الدايم عبد الله سؤلا ، ولم يستطع عبد الله الاجابة .
وكان تعليق بالرطانة :-
واللهي يا أبدو طلبنجيدن تنجوسا سياسي إبن ###### بيرنقا دوفونما.
ولغير الناطقين : يا عبدو بقيت تمشي مع الطلبة وبقيت سياسي إبن ###### .
|
Post: #8
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 03-02-2013, 01:12 PM
Parent: #7
أ/ ولياب .
مودتى النوبية التى تعرف .
|
Post: #9
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 03-21-2013, 10:20 AM
Parent: #8
7
مجنون
ومساء الخير .. يا زميل يا جميل
يا اصيل فى الزمن الوجعو كتير
يا وديع وبديع
زول مابى يبيع
وبشيل .. شيال ان نخوا الشيالين
معجون من طين الاستفهام
مجنون بـ بكرة وما هو أت
وعنيد احلام
احلام اكبر من سنه ونضارته وجيبه الفاضى من الاموال
درويش فى كلامه الدرابات
مدمن بومبان ... وزبون معروف للمعتقلات
بيعشى حبيبته سياسة وفول .. ويحلى بموية وكيس تمباك
مليان اصرار
اصر , يصر , بقى ملحاح
شغال كى ياتى علينا صباح
وصباح الخير على شجرة نيم قصوها تطول
متفائل .. مؤمن انو الليل بيزول ! .
شاهين شاهين
|
Post: #10
Title: Re: شايفك بقيت ود كـلـب خالص فى السياسة ! .
Author: Emad Eldeen Ali
Date: 03-21-2013, 03:09 PM
Parent: #9
| Quote: متفائل .. مؤمن انو الليل بيزول ! . |
|
Post: #11
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 03-23-2013, 05:43 AM
Parent: #10
8
طفل صغير
اننى طفل صغير
اتخذت العلم نور
يا ترى ماذا اصير عندما اغدو كبير ؟
هل ترى اغدو وزير , ثم فى التعديل اطير ؟
ام صحافياً شهير , اكتب الكلمات حسب رأى الرئيس ؟
ام محامى بيستلف حق الفطور ؟
ام حرامى ؟ , ولا اخصائى اجتماعى ؟
يمكن ابقى ظابطاً فى الشرطة , بعد الصالح العام انقلب سمسار اراضى !
او رجل اعمال مثالى , يضرب الكيزان نجاحى ؟
ولا احسن اتوظف , واعرس , واخون مراتى واطلق , واسب الملة سراً للمدير ؟
يا ابنى احسن تبقى شافع
اوعا تكبر
عالم الاطفال جميل
عالم الناس الكبار عالم حقير
اوعا تكبر أيها الجحش الصغير
البلد مليان حمير
اوعا تكبر .
شاهين شاهين
|
Post: #12
Title: Re: شايفك بقيت ود كـلـب خالص فى السياسة ! .
Author: shaheen shaheen
Date: 03-23-2013, 09:36 AM
Parent: #11
تحياتى التى تعرف عمدة .
|
|