فحص الايدز للسوداننين حتي لو مقيم و ماسفرتة السودان فترة 10 سنوات

ياجماعة الله قبل ايام قدمته الإقامة للتجديد
المعقب رجعها لي بعد 3 يوم قال لي ناقص فحص الايدز
قلت ليه انا مابفحص أي ايدز قاعد 5 سنوات مامشيت السودان
وجددتة 4 مرات قبل كدا وانأ قاعد هنا

المهم في النهاية الواحد مشي مستوصف للفحص
والفلبينية ماقصرت عبت حقنة القدر الكتلة دم
قلت في نفسي كدا أكيد دمنا بخلص عديل في البلد دي

خدر يا دفعة ،، تحياتي

غايتو انا وقت كنت مقيم في الرياض لم افحص الايدز عند تجديد الاقامة اطلاقا تصدق 9 سنوات بجدد من غير فحص لكن بمجرد ما جيت جدة اصبح الايدز والسحائي اساسي جدا في فحص التجديد

عكسة :- اشمعنى بقية الجنسيات التانية ما عندها فحص للايدز ايدز .. ده سؤال ممكن يفتح باب للنقاش

مودتي

الرحـــال

تعظيم سلام اشرف

كل الجنسيات ماعندها فحص ايدز ........ الناس ديل خلاص دخلوا في راسهم السودان منبع الايدز

تاني لا فحص لا جن احمر
اهلنا وبس

Quote: ياجماعة الله قبل ايام قدمته الإقامة للتجديد المعقب رجعها لي بعد 3 يوم قال لي ناقص فحص الايدز

الاخ خضر تحياتي

السبب هو ان الحكومة اعلنت رسميا ان السودان ضمن حزام الايدز في افريقيا و طلبت رسميا من المنظمات التي تكافح الايدز مسعدتها في محاربته. و البرلمان قد ناقش انتشار الايدز في السودان اكثر من مرة. فلا تتعجب اذ من المتوقع ان تضيف السعودية شروطا اخرى اقسى من ذلك لتجديد اقامة السودانيين.

كيف لاينتشر الايدز وحدود السودان مفتوحة من القبل الاربعة

شكرا لجميع المتداخلين اعلاه

انا مستقرب في الواحد قاعد 5 سنوات ومقيم مع عائلتة وماسافر من السعودية
برضو كل سنة يفحص دي العاملة لي فقع مرارة

خضر والحضور سلام

اظن الشغلة مرتبطة بالكفيل والمعقب فقط

انا لي 20 سنة وما حصل طلبو مني فحص الايدز الا عندما تبرعت مرة بالدم

الشفيع هوي

دي مبالغة ..... الا تكون شغال مع امير كبير

Quote: خضر والحضور سلام اظن الشغلة مرتبطة بالكفيل والمعقب فقط انا لي 20 سنة وما حصل طلبو مني فحص الايدز الا عندما تبرعت مرة بالدم

السعودية بلد مفتوح لكل الدول ويخدم فيه اكتر من 150جنسية ولا يوجد فحص مع تجديد الاقامة الا للسودانيين فقط لماذا ؟
من اين للسعودية بمعلومات تزايد مرض الايدز فى السودان بهذا العدد المخيف.
وهل السودان اكثر اصابة بالمرض من اثيويبا واندنوسيا وووو

حكومتنا الرشيده وراء بحثها لجلب الدعم العالمى لمكافحة الايدز كل يوم بتطلع لينا بيان بنسب جديدة لتزايد اعداد المصابين والمعرضين لمرض الايدز.



تقديم
هنالك إتفاق عام في العالم بأن وباء فيروس/ مرض الأيدز أصبح أحد أهم الأمراض التي تسبب النسب العالية في الوفيات خاصة
في وسط الشباب وهم القطاع المنتج وسط السكان. و هذا الوباء يشكل تهديداًَ كبيرًا للتنمية في الدول النامية. و عليه فهنالك حاجة لتقوية
وتعزيز محاولات مكافحة المرض على المستويين القومي والعالمي.
وفي السودان، فإن مكافحة فيروس/ مرض الأيدز هي إحدي أهم أولوياتنا في الخطة القومية. كما إن الوكالات الحكومية المعنية
تبذل جهدًا كبيرًا وقد توصلت إلى نتائج مقدرة في مكافحة المرض رغم التحديات الكبيرة التي تواجهنا والإمكانات المحدودة.
ومع حلول السلام وتوقعات رجوع اللاجئين السودانيين المنتشرين في الدول المجاورة فإن حكومة السودان قد وضعت خطة
خمسية لدعم الأدوية الضرورية ومساعدة مرضي ومصابي الأيدز، وحماية حقوقهم وتغيير الصورة القائمة التي أوجدها الوباء وحل
المشكلات الناتجة عن الوصمة والتميز المرتبطة بالأيدز. وستعمل عدد من الوزارات الهامة، والمنظمات غير حكومية ومنظمات المجتمع
الوطني بطريقة شاملة وبالتعاون مع المجتمع الدولي والمانحين والشركاء لضمان التنفيذ الفعلي لهذه الخطة الاستراتيجية وفي هذا الإطار
فإننا نأمل في دعم ومصادر إضافية من المجتمع الدولي لتقوية جهودنا القومية في مكافحة الأيدز.
وبي رغبة أكيدة لأري هذا الوباء قد تم اجتثاثه بنهاية هذه الخطة إن لم يكن في القريب العاجل.
المشير/عمر حسن أحمد البشير
رئيس جمهورية السودان الديمقراطية


جمهورية السودان المجلس القومى لمكافحة الايدز

بدر الدين ... اسعدني حضورك المتالق


اتمني ان يتم القضاء علي هذا المرض تماما داخل سوداننا .... لو مافي عهدنا الشتت خلاص في عهد اولادنا

سلام سيد البوست وضيوفه الكرام، عملية فحص الإيدز محرجة لنا كسودانيين دون الجنسيات الكثيرة التي نعمل معهم وأنا شخصيا لدي قناعة تامة ان أهل هذه البلاد لا يريدننا نحن السودانيين. تحديدا ووصلت لهذه القناعة واصل إليها كلما ذهبت إلى دائرة حكومية لإجراء أي معاملة خصوصا الشرط والمرور والعجب الجوازات. الحمدلله رزقنا هنا وطول ما نحن راضين بهذه المعاملة فعلينا الرضوخ (.........) وبس والماعاجبو يركب السلام.

الصادق التحايا


الماعاجبو يركب والسلام .... الي حين ينقطع رزقنا هنا ... يكون شطفوا دمنا كلوا ... الله غالب

سلام أخوي خضر

وكل المتداخلين

أعتقد أن الأمر ليهو دخل بي حاجات زي المهنة - الكفيل كما ذكر الأخ الشفيع - طبيعة عمل ملف صاحب العمل .. الله أعلم

ظللت أجري الفحص وأنا في الرياض طوال سنين

جددت كفالتي من فترة 5 شهور

لم يطلبو مني فحص

قد يكون للأمر صلة برضو بعدم السفر بعد التجديد السابق

ما ضايقني فعلاً - ليه يعني الجنسيات التانية ما بتفحص؟ الايدز ما ليهو دخل بحدود بس..

هذه هى شروط تجديد الاقامة الرسمية و المعتمدة لدى الجوازات، أما مسألة فحص الايدز أو السحائى فتخضع لضوابط أخرى منها مثلا إلان البلد نفسه بأن المرض الفلانى متفشى أو منظمة الصحة العالمية .. الخ

Quote: تجديد الإقامة: بنفس الشروط السابقة مع إرفاق رخصة الإقامة المنتهية وتجديد رخصة العمل + فصيلة الدم وبدون فحص طبي عدا العمالة المنزلية والسائقين المسجلين على سجلات فردية والعاملين في القطاع الصحي ودور النقاهة والرعاية الاجتماعية والحلاقين فيلزمهم فحص لأمراض الالتهاب الكبدي الفيروسي (ب،ج) والايدز والدرن والزهري (كل سنتين).

الزعل فى شنو؟؟؟

فى الامارات لابد من فحص الايدز لكل من يبلغ من العمر 18 عاما

وتجدد الاقامات كل ثلاثة سنوات للعاملين فى القطاع العام وكل عامان للعاملين فى القطاع الخاص

يعنى كل سنتان او ثلاثة ببتعمل فحص ايدز غض النظر تماما عن انك سافرت ولا ما سافرت

المصريون مطلوب منهم فحص البلهارسيا
الناس ديل لايصدرون قراراتهم الا بعد دراسات متأنية تقوم بها بيوت خبرة استشارية على مستوى

والله أعلم
انا قبل ثلاث سنوات مطلوب مني فحص الأيدز والبلهارسيا
قبل سنتين البلهارسيا بس
و السنة دي رجعو تااااني للأيدز

الفحوصات دى ما ثابته
سنه بتشددو فى الايدز
سنه بتشددو فى السحائى
مره فى التهابات الكبد وووووووووو

وزى ما قال واحد من الشباب فوق .. خاضعه للاعلانات الحكومية من الدول وتقارير المنظمات وووووووو
وما بيعلن عن طلب الفحوصات .. تمشى انت وحظك تلقى الفيهو النصيب

Quote: الفحوصات دى ما ثابته سنه بتشددو فى الايدز سنه بتشددو فى السحائى مره فى التهابات الكبد وووووووووو وزى ما قال واحد من الشباب فوق .. خاضعه للاعلانات الحكومية من الدول وتقارير المنظمات وووووووو وما بيعلن عن طلب الفحوصات .. تمشى انت وحظك تلقى الفيهو النصيب

أتفق مع رأيك دا يا وضاح

ولا ليه مثلا كانوا بطلبوا مننا فحص فيما سبق .. والسنة دي ما عملنا فحص .. أمر يحيّر ..

شكرا لكل من شارك من واقع تجاربة الشخصية في عملية الفحص الاجباري دا

الاخ خضر صيام تحياتى

الفحص دة موجود فى جدة قبل 7سنوات وفعلا جنسيات معينة
هى التى تقوم بالفحص /يا اخوى خضر السودان بقت فوقه الحمى الصفراء
الايدز هين / ولك مودتى