تديُن الرئيس !!!!!!

هل له علاقة برخاء الشعب؟ وهل علاقة الرئيس بربه علاقة عبد بربه ام علاقة عبد بشعبه وربه؟ بالمختصر الشعب بستفيد شنو من معرفة مدى حجم ومتانة العلاقة بين رئيسه وربنا؟
السبب في السؤال
الاسبير الماعندو شغلة غير العمرات والصلاة في الجوامع ومن ضمنها الصلاة في مسجد باريس الكبير في فبراير القادم وكانه الكانو حاكمين قبله كلهم كفرة وكانه لازم الشعب يعرف انه الرئيس بصلي الفجر كاش داون
يا اخي ان شاء الله كرعيه يتورمن من صلاة الليل دخل الشعب بالموضوع دا شنو؟
تجي تقول لهم دا الرئيس فاشل ، يقولو لك "دا راجل بيخاف ربنا وحافظ المصحف" !!!!!!!!!!
سياسة اعلامية اخوانية بحتة لتغبيش وعي الشعوب
الغريبة نفس البروباجاندا انعملت قبل كدا لخنزير لبنان وشيطان ايران قبل ان يرتد كثير من المغشوشين على اعقابهم

Quote: تجي تقول لهم دا الرئيس فاشل ، يقولو لك "دا راجل بيخاف ربنا وحافظ المصحف" !!!!!!!!!! سياسة اعلامية اخوانية بحتة لتغبيش وعي الشعوب

حبيبنا و قريبنا ود الفكى ...
U MY FAVORITE
.........
عبدالماجد

والله يا عبد الماجد حاجة تحير
والله بعرف ناس ليهم عشرات السنين ما بنومو من قيام الليل وما بفوتو فرض في المسجد ويوم واحد ما اتشبورو بدينهم قدام زول
يعني الرئيس لما يكون مؤمن نجي نحن يوم القيامة تابعين له الى الجنة؟ يعني شفيع لينا؟
هو زول ما وفر لي ابسط مقومات الحياة داير يضمن لي جنة كمان؟
بالله خلو علاقة الرئيس بربه علاقة خاصة وعلاقته مع الشعب علاقة قدمت شنو ولا لانه الرئيس بصلي في المسجد وحافظ القران لافي زول يساله عن حوادث قطارات ولا عن انفلات امني ولا عن تدهور عملة وغيرها مما اتت به النكسة الكبرى التي نحتفل بعام رمادتها الثاني بعد ايام

Quote: علاقة الرئيس بربه

مافادته هو زاااتو في حاجة خليهو الشعب المسكين قولي كيف؟؟؟

بوريك
مخافة الله كان ما منعتو من الظلم تبقى رياء
مخافة الله كانت ما رجعت للناس حقوقم تبقى رياء
مخافة الله اللي ما منعتو يبني لأهله في كافوري من مال الشعب بدون وجه حق رياء
مخافة الله اللي ما خلتو يسأل أقرب الأقربين من أين لك هذا تبقى رياء
والقائمة على شاكلة دارفور وجنوب كردفان والنيل الأزرق والصالح العام والشرق وغيرها تطول

ربنا سبحانه وتعالى قال(إن الصلاة تنهى عن الفحشاء والمنكر)

فواجباتو الدينية المفترض تؤدي للصلاح والعدل ...غير كده تبقى رياء ساااي
ولا كان لسه بيجاهد في نفسو وما أنصلحت اليقعد كنب



معليش نسيت أسلم على صاحب البوست وبديت أستفتي قلبي
فلك العتبى

الله يسلمك يا مصعب وشكلك عضو جديد فمرحباً بك
تظليل الرؤساء بهالة ايمانية الهدف منه هو عدم مساءلتهم وغالب الظن ان من يقوم بهذا مستفيدون هم ايضاً بحيث يكون الهدف هو جعل الرئيس ستارة لهم حيث ان المؤمن لا يختار الا المؤمن ولو كان الهدف هو اظهار الجانب الانساني للرئيس فمن باب اولى انه يقولو ان الرئيس اكل شنو وشرب شنو والاكل ما عجبو عشان جابو طباخ جديد والرئيس ولدو سقط في امتحان الرياضيات ومشى المدرسة يشوف الحاصل شنو.
الرئيس و وتصرفاته وافعاله الشخصية دي حاجة بتخصو هو ولا اعتقد ان الشعب سيستفيد حاجة من تدين الرئيس او الحاده اللهم الا اذا طلعت نظرية جديدة ونحن ما جايبين خبر

تسلم على الترحيب ياسيدي

ده بالضبط اللي بيخلي الزول يقول أنه لازم تمنع تماما الأحزاب الدينية والطائفية لأنها بتخاطب مشاعر وبس وأكيد ردها تجاه أي إلتزام حيكون عاطفي على شاكلة الرئيس بيصلي والوزير مشى العمرة

وقس على ذلك