ويلُُُُ للبنايين والطُلب ... من شرٍ قد اقترب

عادي جدا في السودان ممكن المقاول أو البناء أو الصنايعي يديك مواعيد عشان يخلص شغلك وبعد داك يلطعك لامن تعرف حاجة !!! ومرات بكون شايل عربون تحت الحساب ... وطبعا الاعذار جاهزة ... والله جانا خبر بكا فجأة وسافرت !! والله الولد كان عيان !! والله قريبنا في المستشفى تعبان بين الحياة والموت !! واحدين ممكن يشاكلوك لو سألته ليه ما جيت وللا ليه الشغل ما خلص ويقول ليك : يا زول انت ما عارف حاجة ساكت .... ياخي أنا قربت اموت !!! ويبدا يدخلك في حاجاتو ومشاكلو الخاصة التي ليس لك فيها ناقة ولا عَز !! وفجأة ظهر المصريين والهنود والبنقالة والباكستانيين والصينيين في سوق العمل السوداني .. وقلبو الطاولة فوق راس العامل والمقاول السوداني !! مواعيد شارب ... اتقان في العمل ... سرعة في الانجاز !! وبقت المنافسة زي السم .... وشعر اخوانا السودانيين بالخطرالحقيقي الذي اتاهم في عقر دارهم وبدأ كثيرين منهم في تغيير سياساتهم وأساليبهم القديمة وظهرت بعض الجدية بعد ان وجدوا ان الناس اتجهت للعمالة الأجنبية ... ولكن هيهات الناس اتلدغت كتير وما عندهم مانع يدفعوا زيادة في سبيل السرعة والانجاز والاتقان !! قبل شوية كان قعد يتكلم معاي قريبي شغال في بيتو في السودان قال لي امس جابو واحد يشتغل السيراميك في البيت والليلة خلص الشغل ... طبعا قريبي استغرب وسأل الزول المتابع الشغل في في السودان : والله ما شاء الله الزول البشتغل سريع دا جبتو من وين ... فكان الرد : دا بنقالي !! بنقالي والبيت في كسلا !!
غايتو شيلو شيلتكم البنقالة ديل لم تنجوا منهم حتى (كوش السعودية) حتى نقبوها وفلفلوها وطلعوا منها قروش جد !
وتحياتنا للعامل الجاد اينما كان وكيفما يكون !

سنظل نراوح مكاننا ما دمنا نعتقد أن (السايقة واصلة) وأن أي مشكلة حلها في (باركوها)

انا ما في شيئ بيرفع ضغطي غير
البلاده و عدم الجدية و تعطيل مصالح الناس
............................... .........................
العامل البحترم مواعيده ...انسان حريص على
اكل عيشه....نرفع ليه القبعة ....مش لو بنقالي لو إسرائيلي زاتو.


تقبل مرورنا يا ابو شيبة.

البلادة وعدم الجدية زيد عليهم الاستهتار والسبهللية اعتمادا على طيبة الزبون
مع كامل الاحترام للفئة القليلة الجادة التي تحترم عملها وتحترم الزبون

تحياتي محمد يوسف