أخطاء التشخيص الطبي في السودان مسؤولية من يا تري؟

موجه للاخوة الاطباء بالبورض وناس التحاليل الطبية خاصة الموجودين بالسودان بالله افتونا وافيدونا افادكم الله
تكرر وصول مرضى من السودان طلبا للعلاج ولكن نسبة كبيرة منهم في اول زيارة لاي مستشفى تصيبهم الخلعة والدهشة بمجرد مقابلة طبيبهم الجديد الذي قد يخاطبهم بكلمات منمقة ( يا سيدي انك لست مصاباً بالمرض المذكور في تقريرك ده) او (الدكتور في بلدك اخطأ التشخيص اذ ان علتك الاساسية هي كذا وكذا )... ولدي من الامثلة الكثير والكلام ده مش مرة ولا مرتين ولا تلاتة ولا اربعة ومش اليومين ديل والشهر الفات او السنة الفاتت لا الحكاية دي بتكرر كتير للاسف .
مما يجعل المرء يتساءل هل عدم كفاءة او كلفتة ساكت كده ؟ وهل المشكلة مشكلة تحاليل طبيبة يعني ناس المعامل المسؤولين عن ده ولا المشكلة في عدم توفر المعدات اللازمة سواء للطبيب او بالمعامل
والحاجة التي تفقع المرارة وتعمل ليك التواء وتقد عينك وعين من يعاين ليك كمان ان معظم الحالات التي اشهد عليها جاية من مستشفيات خاصة مشهورة ومعروفة فى الخرطوم لا مش كده وبس تكلفة العلاج بها تقارب تكلفة العلاج هنا .. لا اريد ان اصدر احكاما ولكن الحكاية مخجلة ومسيئة ومهينة كمان ..
ممكن نفهم الاطباء عندنا هناك تواجههم مشكلة المعينات والمعدات الحديثة والامر مثله ينطبق على ناس المعامل لكن لما التقرير الطبي من السودان يكون محدد ليك مرض من النوع البيقتلك بالهم بمجرد معرفتفك بانك مصاب به ولما تقابل الطبيب في مستشفى خارج السودان ويقول ليك انت لست مصاباً بذاك المرض مش تصيبك الحيرة احتمال تقع من طولك من المفاجأة للوهلة الاولى .. ولو المرضى ديل جايبين تقارير من اطباء حديثي التخرج او من جامعات الفكة - والذنب مش ذبهم الذنب ذنب حكومة السجم والرماد - كان شوية كده الزول بيقنع نفسه بعذر يحفظ ليهو موية وشه لكن لما تسمع من الواحد يا اخي انا مشيت للمستشفى الفلاني وللطبيب الفلتكاني بالمستشفي العلاني وهم من هم في السودان نفخة وعنطظة ما تعرف تعلق تقول شنو ولا تعمل شنو
مصيبة والله ربنا يعين الناس هناك