صديق أحـمد.. هذه لم يسبقك عليها أحد!

.
أن تؤدي دور المرددين "الشيالين" و انت المُغني، وأن يؤدي الشيالين دورك.. دي ماف زول سبقك عليها.

بقدر، بل، بأضعافٍ مضاعفة، من ما أمتعت به مسامعنا من فنون سكبت فيها روحك المبدع و نفسك الخلاق، تمنياتي لك بتمام الصحة و العافية.



كفارة يا زول و عاجل الشفاء. لك منا الحب و السلام.

عدلان.

.
كلمات الشاعر ابراهيم ابنعوف عمر



لحن الفنان الراحل يسن عبد العظيم

لا تفارق من عيناً ليهو خالق
يا خالق

في جمالا متعجب في جمالا .. يا خالق
في هيبتها في دلالها .. يا خالق
في نورها الفوقها لألأ بسمتها الليلها بارق
يا خالق
***
وِجيها البدر المكمل .. يا خالق
والضفائر طال ليلها و أليل .. يا خالق
وفاها كريزاً مبلل يخلي الشبعان يتاوق
يا خالق
***
صديرا ال يادابو رمىّ .. يا خالق
الضمير حذّا و أخدلو زمة .. يا خالق
ساقها الما شُفنا ضُمة و قِديمها الما شالو عالق
يا خالق
***
القديلة العجب كان شوفتو القديلة .. يا خالق
مبهدلي خلقو بهديلا .. يا خالق
واطي قلوب ديك وديلا و خصوص المتلي و مشالِق
يا خالق
***
تشيق الزول في كلامها .. يا خالق
في نظرتها في سلامها .. يا خالق
شقي اليزهد في غرامها و يروح زي الضاربو فالِق
يا خالق
***
سِميحة و أخلاقها طيبة .. يا خالق
العفاف لابسها هدوم وهيبة .. يا خالق
ما لقى الشناف فيها ريبة غير حميدو و شكرو المطابق
ياخالق
***
شبيه القام في جناينو .. يا خالق
ما نجض واتحبكت زباينو .. يا خالق
بعيد يا الدايرين تعاينو ده فد وِحيد ما هو حايق
ياخالق
***
الجمال كلو أدوهو ياها .. يا خالق
ما فضل للجايين وراها .. يا خالق
بقت فوق الفوق براها شن تسون يا بنات شايق
***
الغريبة قِليبي يا خِلة .. يا خالق
لا فتر من ريدها لا كلَّ .. يا خالق
قال لي دي ما بتتخلى حتى كان اتقطع شقايق
ياخالق
***
شِن حيلتي بلا التمني .. يا خالق
أو أقول في عيونها و أغني .. يا خالق
المرضني أريت كان كتلني أصلي من الموت ماني مارق
يا خالق

سلامات عدلان
صديق هنا كـ ميسي حين يكون سخياً مع رفاقه

الله يديهو العافية ام جضيمات

يا سلام
لك و له التحية

والتحية للشاعر يا عدلان وكوستاوي

شوفو الزول دا عمل شنو ..

المربع من ثلاثة وكل القافية النهائيات بالقاف .. لكن بيديك قافية تانية للبيتين الأوائل مصحوبات باللازمة يا خالق..
لكن في البيت التالت بيجيب كلمة مناسبة ومتماشية مع وزن الخالق مع تدبيل القافية في ذات البيت دون أن يخل بالتوازن الموسيقي.. لتكون يا خالق في البيت الرابع براها تشكل مساحة كبيرة وزنية
لتسليم بداية قافية جديدة اللحن او الموسيقى البدائية .
الأمر الذي يسهل الأمر على الملحن المغني يسن عبد العظيم هذا الإنسان المتخم بالآلحان وبالإيقاع .. ويجعله أكتر مرونة يصل فيها الي أقصى احتمال الصوت في الحاد وفي القرار ..
ويكمن أيضا في إختياره للكلمات ذات الابعاد المنسجمه مع إيقاع الدليب
كتراث للشايقية...
صديق أحمد مغني يمتاز بالاداء الرائع بالذات للألحان التي صاغها يسن عبد العظيم .
كما لو كان إمتدادا لتوصيل التراث حتى يرتبط بالميديا العالمية إبتداء من الحفلات التي كانت تقام على مدينة نوري
ولغاية كل براحات الشايقية عبر بابور البحر وحتى إمتداد الرباطاب في أبي حمد متخذا القاطرة، أو متابعتها حتى الخرطوم المركز
الذي يبث لكل بقاعه السودان والعالم ..

التحية لصديق أحمد
ولياسين عبد العظيم هذا المضيف للتراث السوداني .. ولشاعر الاغينة في تكنيكه المعالج للتراث.
والتحية ليك يا عدلان لذوقك الرتبك بين حالة صديق الصحية التي لا تمكنه من أداء الأغنية بما هو معروف فيلجأ للكورس
ليحقق اقصى حالة للمركز وللهامش في أروع تجلياتها حيث الجماعة تكون أساسية والفرد يكون دوره ثانوي حتى ولو كان يمتلك ناصية الإبداع المركزي التأريخي..
وهذه التي لم يسبقه عليها أحد تعني تماما حالة التطور في التراث
حيث المؤدي لا يشكل بعدا مركزيا كخلاصة ...بدليل أن كوستاوي إستمتع بهذه الأغنية في حالتها الكورالية..
صحيح أنا بسمع لصديق ولكن هذا الكورال الإبداعي يحكي تماما عن روح المشاركة والمشاعة
فيخرج الأداء الجماعي متميزا عن الأداء الفردي .. ومن هنا ينسجم التراث مع الفكرة اللامركزية وللشراكة في الأداء الفني.

تعديل ضروري.

عزيزنا عدلان
سلامات
قال :
ده الولد المخضر ... أرضو وكتين البلد محلاني
وده الولد البيكرم ضيفو أيدو ... أن فاضي و الا ملاني
..
صديق ده يا عدلان ربنا يديه العافية هو القلب الطمبور جيتار وهو الدخل عجاج الدليب
من الشمالية للخرطوم .
..
لك التحية أخي عدلان

عدلان أحمد عبدالعزيز

التحيه ليك ولضيوفك الكرام المبدع صديق أحمد ربنا يديهوا الصحه والعافيه

قبل ايام كان زواج أبنه أمجد 3 او 4 من الابداع المتواصل كل فنانين الطنمبور كانوا حضور


ان شاء الله بفتح بوست في الايام الجايه واحاول انزل كل اغاني الرائع / صديق أحمد

يا سلام يا اخي عدلان

المطرب صديق احمد من اعذب الاصوات الغنائية السودانية

وله اداء رائع لا يجاريه فيه الا عمالقة اهل الفن

هو فناني الاول بلاشك ومعظم الاشرطة التي استمع اليها للمطرب صديق

ربنا يمتعه بالصحة والعافية


شكرا عدلان

بوست اكثر من رائع

ياسلام ياااخى
صديق ابداع متناهى
متعه الله بالصحة والعافية
وكذلك صاحب البوست

التحيات الطيبات،

حيدر حسن ميرغني
نصر الدين هجام

عبدالمنعم إبراهيم الحاج، ملاحظاتك حول البناء الشعري للقصيدة أضفت بعد جمالي واجب الانتباه له. الشاعر ابراهيم ابنعوف متفرد وفعلاً استخدم تقنيات غير مألوفة لكن لا يقدر عليها سوى شاعر مجيد، لحنّها عبقري، أداها مطرب طبقات صوته قادرة على التحليق في كل المستويات، وقرأت في منتديات أرقي، أن مجموعة المرددين كانت تتكون من صابر، مقداد، و مصفح.. لا بد أنهم سحرة، و سيدرك كلامي كل من حاول أن ينسق حركات ضرب الأرجل مع الدوران في الحلقة مع ايقاع الصفقة وزد عليها ترديد كل كلمات الأغنية، في مستوى التبادل الجماعي. إنه السحر!

عثمان موسى، وين بلودك ياخ من فارقت جوارنا تاني ما شفناك.
سيدأحمد شامي، مبروك لأمجد و ما ظنيت صديق أحمد حوّجه ليغني "ريدكم لي شديد يا يابا"، وعقبال يفرح بي أحفادو.

ودالباوقة
عبدالحكم ابراهيم الحاج

يعطيكم العافية ورحمة تغشى الفنان بابكر ود السافل فخيراتنا نوع نوع، في المعيشة وفي السحنات وفي الثقافة و الطرب.

تحياتى يا عدلان...باالله شوف الكلام دا:
ما نجض واتحبكت زباينو ..
بعيد يا الدايرين تعاينو ...ده فد وِحيد ما هو حايق

كلام يوزن الراس.... السلام من عين شمس لا حد فلسطين يغشى الفنان المجيد المجدد صديق والشاعر الرقيق ود ابنعوف وشابيب الرحمة تتنزل على يس

شكرا على الامتاع

يا سلام على صديق احمد استمعت اليه لاول مره فى شريطه سعاد ومن يومها اصبحت اشرطته ملازمه لى فى حلى وترحالى
نسأل الله له الصحه والعافيه بقدر ما امتعنا بفنه الجميل

التحية لك عزيزى

والتحية عبرك لهذا المتفرد الصداح صديق أحمد

والدعوات الصادقة له بالشفاء التام ..

من أمتع اللحظات تلك التى كانت لنا فى منزله العامر وقتها بشمبات الأراضى

فى رفقة أحبابه معتصم { المصفح } والمقداد .. حديث عذب

ودندنات و لطف بلا حدود ..

ليس سهلا ان يدرجك العظيم محمد وردي ضمن فنانيه المفضلين او الافضل لديه ربما .. الزول ده عندو صوت بطوعو بطريقة غريبة جدا بذكرني لعب ميسي ..
العندو البانة بصوت صديق احمد ووردي ياخوانا يلحقنا بيها ..
تحياتي لكم وللكبير جدا صديق احمد ربنا يحفظو ..

يا سلاااااااام يا أ.عدلااان

زمممن ما سمعت لصديق احمد
والمقطع ده عجبنى شديييييييييييييييد

Quote: شيق الزول في كلامها .. يا خالق في نظرتها في سلامها .. يا خالق شقي اليزهد في غرامها و يروح زي الضاربو فالِق

واافر ودى،،

سلام يا صاحبي و اشواق كتيره و حكايات اكتر و متابع دراستك سطر سطر
و سلامي لضيوفك في البوست
و صديق احمد فنان كبير و صل لكافة السودانيين/ات رغم انه يغني أغاني مجموعة اثنية محدده
وهذا شأن العباقرة الشعبيين .

يا جماعة ركزوا لينا برضو في الراحل الخالد (ياسين عبد العظيم)... هذا الفنان العجيب و الذي غنى من اشعار حميد
ما يدهش كل عشاق حميد .

ـــــــــــــــــــــــ
يا عدلان ياخ اعمل إي حركة
بتاعة تلفون ياخ .

شغل يرد الروح ياخي

الأعزاء

ابن النخيل، زمان كان في محل ملابس جاهزة شمال الجامع الكبير الخرطوم أظن اسمه كان "ابن النخيل"، أي علاقة؟ ذكرتني بالأحباب الضو البشير و صديقه الحاج، محمد و عثمان أبو القاسم من أهاالي الأراك، فلو كنت على علاقة بذلك الدكان فستعرف الذين ذكرتهم.

سامي عبدالمطلب،
طه كروم، يا دكتور، سمعت عنك من الأصدقاء من جامعة جوبا أوائل تسعينات القرن الماضي، عساك وعساهم طيبين.
عبد الله إدريس، "زي البانة ميالة" دويتو جميل بين وردي و صديق للأسف لا أملك التسجيل.
ابراهيم الفاضل، أشاركك الإعجاب بالمقطع، فيه حميمية وقُرب لا تتوفر للمتاوق على الجمال عن بعد.
سفيان بشير نابري، و الله في البال و في يوليو الماضي ذهبت للبناية في الشهداء حيث محلكم القديم فلم أتعرف عليه. رسل لي تلفونك في الخاص.
طارق جبريل، عساك طيب و ناس الامتداد من جم.

محبتي،