إنتباه !!! أجمع سريع يا مستجد

ربما أكون أكبر البرالمة سنا في هذا البورد الشامخ .. أقول ربما حتى لا يأتي من ينشب في حلقى .. وبرانا عندنا وجع حلق .... لم يكن التسجيل في هذا المنتدى الكبير والشهير بالأمر السهل فأنا مثلا احاول ذلك من العام 2004م .. وقد أخبرت من الأصحاب والأخوان ما قد يكون نصف سكان هذا الحوش . هذا وقد من الله علينا بالدخول .. وحيث أننا اصبحنا من ساكني هذا المكان الكبير الشهير فأوصيكم ونفسي ببعض الوصايا علها تكون لنا معينا ودالا على فعل الخير والسير في طريق السؤدد . اخوتي الاعزاء : أولا : عليكم بتقوى الله فيما تكتبونه وتنقلونه الي هذا الموضع .. فما تقوم بكتابته سيظل معلقا في حبال هذا الأسفير الواسع ما بقيت الدنيا وربما تموت وينقضي حياتك وتقفل صفحتك بالضبة والمفتاح وتظل كلمة المرور الخاصة بك في علم الغيب وسيقرأ القاصى والداني .. الكبير والصغير المتعلم والجاهل والغني والفقير ما كتبته وكن عزيزي كمن حاله القول : وما من كاتب إلا سيبلى ويبقي الدهر ما كتبت يداه فلا تكتب بكفك غير شيء يسرك في القيامة ان تراه ثانيا : قد نختلف في آرائنا السياسية والرياضية والدينية ولكن ، ليكن هذا الاختلاف معينا لتطوير ذاتنا وتعميق معرفتنا . ولنستفيد من اختلاف الآراء ووجهات النظر وليكن تجمعنا في نقاشاتنا تجمعا محمودا لا ساحة للتعارك والتخاصم ولنكن عباد الله أخوانا . وننتهج سبيل الحوار واحترام الآخر وعدم الإقصاء فالناس هنا سواسية بعلمهم وأدبهم ودينهم . فكلنا قد بلغ من العلم والمعرفة مبلغا . فليس الأمر فردا للعضلات وتباهيا وإنما فوق كل ذي عليم عليم . ثالثا : لنعمل من أجل وطن شامخ . ونتكاتف جميعا .. رغم علمي باختلاف آرائنا وإنتمائاتنا . هذه الاختلافات التي ملأت ثوب الوطن ثقوبا وكل ما زادت حدة خلافاتنا كلما اتسعت تلك الثقوب وتلاقحت وانفرط نسيج الثوب فيصبح من الصعب رتقه حينذاك . لنغني لوطننا كما غنى الخليل وكما غنت مهيرة . ولنكن كما استشهد من خلف مدفعه عبد اللطيف . فنحن أبناء نيل من سليل الفراديس وساكنوا النيل سمار وندمان .. وأرضنا أرض الحضارات ومهد الانسانية . فمن العار ان يكون هكذا حالنا والناس من حولنا يمتطون قطار النمو والتحضر السريع . رابعا : أوصيكم ونفسى في تحرى الدقة في الكتابة وعدم الاستعجال في النشر .. فالموقع يتيح لك التمعن والمراجعة لما كتبت قبل النشر . فتكن كتاباتنا رصينة خالية من الأخطاء النحوية والإملائية ولنركز على كتابة الحروف في مواضعها ونحن نعلم فقرنا عند حرفي الذال والزاى والقاف والغين .. فليعلم الكاتب ان ما يكتبه يقرأه الملايين فلتكن كتاباتنا مرآه لتحضرنا وعلمنا . فلنكن للوطن أبناءه في الفرح الجميل ولنشتري له ولنا المجد بأغلا ثمن .. أقول ما تقرؤون واصلي وأسلم علي المبعوث رحمة للعالمين وآخر دعوانا أن الحمد لله رب العالمين .

جمال عبد الناصر : الرياض في 13 يناير 2013م

تحياتي اخي جمال
بوست جميل كلمات رائعة بروعة
صاحبها نحن موعودين بقلم
لايشق له غبار
سلمت اخي ومرحب بك في دارك

أخي سليمان شاكر جدا تفضلك بالمرور والتعليق وشاكر ترحيبك وأتمني ان أكون كما تحب وترضى

كلمات خطت بمداد من ذهب .... ألف مرحب بك جمال ...وبكل الأخوة الجدد ...

وحقيقة أتمنى أن يلتزم جميع الأخوة هنا قديمهم وجديدهم بما قلت أخي جمال .....

مع خالص ودي وتقديري ؛؛؛؛

حبابك مليون

عبد الناصر


والظاهر أنك من إندنا

تماااااااااااااام يافندم
الجميل ياجمال أن تقع العين على ما يعني دواخلنا ، فتلتقط ما وراء الكلمة لتُبحر في المعنى..
لا يفعل هذا الا الأقل والأجمل..
كلام جميل من انسان اجمل
تسلم ياحبيب وانا بما بين السطور لفاعلون
مودتى

Quote: تماااااااااااااام يافندم الجميل ياجمال أن تقع العين على ما يعني دواخلنا ، فتلتقط ما وراء الكلمة لتُبحر في المعنى.. لا يفعل هذا الا الأقل والأجمل.. كلام جميل من انسان اجمل تسلم ياحبيب وانا بما بين السطور لفاعلون مودتى

العمدة خيري سطور مريحة وتسسلم انت اخي الحبيب

Quote: والظاهر أنك من إندنا

عبد اللطيف السيدح
يا جميل
شاكر ترحيبك واهتمامك

من انديكم والله من أنديكم

Quote: كلمات خطت بمداد من ذهب .... ألف مرحب بك جمال ...وبكل الأخوة الجدد ... وحقيقة أتمنى أن يلتزم جميع الأخوة هنا قديمهم وجديدهم بما قلت أخي جمال ..... مع خالص ودي وتقديري ؛؛؛؛

إدريس محمد ابراهيم
اخي الحبيب
اشكر ترحييبك يا غالي
فلنتحد ونبقي اخوة كما نحن
أمامنا الكثير المثير الخطر

طبعا انا من البرالمة
وهي الحروف ملح التواصل
وصايا في عقل كل الناس وتزكيرها جيد ونتمني من الله التوفيق

ماعونك مليان دسامة

Quote: طبعا انا من البرالمة وهي الحروف ملح التواصل وصايا في عقل كل الناس وتزكيرها جيد ونتمني من الله التوفيق ماعونك مليان دسامة

محمد حسن عبد القيوم
محمد يا ود حسن الزين
يخليك لي ربي
ومبروك دخولك لهذا المكان الواسع الإنتشار
فلنعمل سويا لنوصل للناس فكرتنا , حضارتنا . صورة وطننا الأجمل

القي الي قميص هواك يرتد قلبي بصيرا

فكرة جيدة


غدا نكون كما نود

Quote: القي الي قميص هواك يرتد قلبي بصيرا فكرة جيدة غدا نكون كما نود

وغدا حبيبي حتما يعود
راقت لك الفكرة اخي حسن
فلتكن كذلك

اول مرة اشوف لى برلوم (بلغ من العمر عتيا)
بعدما شاب , ودوا سودانيزاونلاين
انتا يا زول غاطس وين


* غايتو , يمكن سودانيز اون لاين يبقى احسن من الدرب العديييل
تحياتى

Quote: * غايتو , يمكن سودانيز اون لاين يبقى احسن من الدرب العديييل تحياتى

منصووووووووووووووور
يا هندسة معقولا ياخ
انت عارف بيني وبينك شارع الخرج بس
والله ليك وحشة وترانا مقصرين
جارين ورا الريال سبقنا ابو بكر كاكي زاتو
هههههههه
ما قلت ليك من 2004
والزمن داك عمري عشرين سنة بس
تحية ومودة ليك وللعيال

Quote: ... فأوصيكم ونفسي ببعض الوصايا علها تكون لنا معينا ودالا على فعل الخير والسير في طريق السؤدد . اخوتي الاعزاء : أولا : عليكم بتقوى الله فيما تكتبونه وتنقلونه الي هذا الموضع .. ..

كلام موزون و وصية مقبولة

الف مرحب بيك


يا عمنا

عمدة يا لطفي
قبلك الله فيمن عنده
خالص تحياتي وشكري اللامحدود

جمال .. ذاك ما ينقصنا كل بنت شفه تؤثر على الرأى العام فأما بعد..
حيكومات تجى وحيكومات تغور
ويبقى الوطن متنفسا لمن هم فى أمريكا او من يفصلهم البحر عن ترابه
ولكل من علا يبقى وجه الوطن ذو الحنان والأرحام
فلنقل خيرا للوطن أو لنصمت

Quote: فلنقل خيرا للوطن أو لنصمت

عمدة يا لطفي
تصدق جبت من آخر سطر
ومن آخر سطورك نبدأ
مودتي واحترامي


جمال

أخي جمال حقيقة انا احد هؤلاء البرالمة الذين كانوا دائمي الحضور في حوش بكري وكنت اقرأ الكثير منها ما يعجبني ومنها مايستفزني ويجعلني اتحسر على أنني لست عضوا لارد على كاتب البوست وأغضب كل الغضب عندما اجد من يستبيح اعراض الناس ومن ينشر الاحاديث المضللة وينسون ان القلم أمانة مهما ومنهم اعضاء تفخر بهم وتفخر بأنهم ينتمون لهذا البلد العظيم اتمنى أن نكون اضافة لهذا الحوش الكبير الذي يتسع لنا نحن أبناء السودان العظيم وسوف نكون قدر المسئولية وبلدنا لو كعبة ولا كان سمحة.

العم جمال /
الف مرحب بيك وانت من بورداب الرياض رسميا ....
انت والاعضاء الجدد ما تجيكم عوجة بس لو ختيتو صديق الموج ...




يا زول الرياض دي فيها احلى بورداب عبرك تحياتي ليهم كلهم ..... وتحياتي لكل الاخوة الجدد

مليون مرحب بيك يا جيمي


................. منور والله

Quote: ................. منور والله

بي زيارتك
بيتنا نور
والله زينة
يازينة الشباب
يا ناصر يا حبيب
منور الصفحة بطلتك
مع اني عارفها صورة قديمة جدا

Quote: انت والاعضاء الجدد ما تجيكم عوجة بس لو ختيتو صديق الموج ... يا زول الرياض دي فيها احلى بورداب عبرك تحياتي ليهم كلهم ..... وتحياتي لكل الاخوة الجدد

علاء الدين
الحبيب
ياخي نحن بلا صديق الموج دا ما عندنا اي وجهة
صديق دا قائد ركبنا وتاج راسنا وفاكهة وجودنا
شاكر ومقدر
ولك ان اوصل لبورداب الرياض تحياتك
بس خلني الألم فيهم أول
تحية وتقدير

Quote: ينسون ان القلم أمانة

عمر ابراهيم الخضر ت
حية ليك من غير حدود
هؤلاء هم من ضلو السبيل
ولكن علينا ان نعيدهم إلي جادة الطريق
بلدنا حلوة ...
مافي شيء اسمو كان حلوة كان كعبة
نحن من نحدد ذلك
يقيني لا يوجد صنو لهذا الوطن
نحن من فرطنا عقده
مسئوليتنا يا عمر

Quote: يا عمنا

أمين والله فعلا عمك عجز انت عارف والله جلت مني وانا برد علي الاصحاب معليش يا ايني العزيز

ولا يهمك ياحبيب

العزيز جمال خطوة أولى في هذا الحوش الكبير كمشاركين وليس (متاوقين) فقط . معليش للجية المتأخرة : ( والله ما سمعت الصفارة)

مليون مراحب ،،

يالهذه البشريات .. مليون مراحب اخى جمال .. كنت اتوقع حضورك مع هذا الجيش الجرار الى ان وقعت عيناى على هذا البوست ..

تحياتى لك ولكل الاسرة الكريمة ..

مليون مرحب .. وحقيقة بكرى اتلوم معاك ... لكن الله غالب ...

ولى عودة،،،

Quote: ( والله ما سمعت الصفارة)

آخر مرة ليك يا مصعب
تاني بعد دا تخت ليك صفارة جنبك حتى لو ما صفرنا ليك تصفر براك وتجي
مجموعة مقدرة من الشباب الجدد ..
يرجى منهم الكثير
فشكرا علي الحضور
عندما تأتي متأخرا .. خير من عدم الحضور تحيات ناضرات يا حبيب

Quote: مليون مراحب ،، يالهذه البشريات .. مليون مراحب اخى جمال .. كنت اتوقع حضورك مع هذا الجيش الجرار الى ان وقعت عيناى على هذا البوست .. تحياتى لك ولكل الاسرة الكريمة .. مليون مرحب .. وحقيقة بكرى اتلوم معاك ... لكن الله غالب ...

علي محمد الخير
يا إبن خالتي يا عزيز
شاكر لك ولبكري أبو بكر مع انو سلا روحنا ولكل الأخوة الذين وقفوا بجانبي حتي دخلت بالباب الفسيح لهذا المكان الفسيح
شكرا كثيرا علي
وتحياتي للعيال

أها


ما ناوي العمرة ....

مرحب بيك ياجمال والدار دارك

ونتظر مساهماتك

Quote: مرحب بيك ياجمال والدار دارك ونتظر مساهماتك

مرحب اختي العزيزة غادة
وانا اتذكر حسرتك علي عدم تسجيلي في هذا المكان الكبير بوجودكم
تقديرى الكامل لك ولكل الاخوان الذين وقفوا بجانبي
شكرا غادة
شكرا غادة
شكرا غادة

وين البرالمة ما سامعين الصفارة دي ولا الحاصل شنو ؟؟؟