Post: #1
Title: تسوق براحة تصل سريع ( ارشادات للسائقين الجدد )
Author: عبدالله ود البوش
Date: 01-07-2013, 08:21 AM
مثل حقي براي مولد من المثل السوداني الاصيل في التأني السلامة وفي العجلة الندامة
نصائح عامة لكل السايقين الجدد عامة وفي شوارع السعودية خاصة وشوارع الرياض على وجه الخصوص
.
.
أعتبر كل مستخدمي الطريق مجانين الا انت
.
.
والنصائح والطرائف والقسس تأتي تباعا
واعمل حسابك من ساهر
|
Post: #2
Title: Re: تسوق براحة تصل سريع ( ارشادات للسائقين الجدد )
Author: عبدالله ود البوش
Date: 01-07-2013, 08:33 AM
Parent: #1
كيف يعني تسوق براحة تصل سريع ؟
ايوااااااااااااااااا
لو افترضنا المسافة من مكان العمل للبيت 60 كيلو متر
لو فكرت تمشي براحة بسرعة 80 كليو في الساعة تصل بعد 45 دقيقة
ولو فكرت تمشي سريع بسرعة 160 كيلو في الساعة اول مكان تصلو المستشفى ولو سلمت تصل البيت بعد سنة
اها الوصل سريع منو ؟
الساق براحة وصل بيتو بعد 45 دقيقة بس
والساق سريع وصل بيتو بعد سنة ودا لو وصل .........
.
.
ونواصل المحن والاحن في شوارع الرياض الله لاوراكم محن ولا إحن
.
.
البعاين ليك وانتي ماشي براحة عشان اديك عين حقارة اصلك ما تهببو ليهو ولا تعاين ليهو عشان تغيظو
وامكن بعد شوية تلقاهو مقلوب قدامك ومعطل الناس كلهم ويوصلهم بيوتهم بعد ساعتين ونص
|
Post: #3
Title: Re: تسوق براحة تصل سريع ( ارشادات للسائقين الجدد )
Author: عبدالله ود البوش
Date: 01-07-2013, 08:38 AM
Parent: #2
عزيزي السائق السوداني
أصلك ما تنفعل كلو كلو من الكلام البقولوهو انو السودانيين بمشوا براحة
وتقوم تتهور وتجاري المجانين ديل
آآآآآي طبعنا كلو براحة وبهداوة والداير اطير اطير طوالي افتح ليهو الشارع وقوليهو طير
|
Post: #5
Title: Re: تسوق براحة تصل سريع ( ارشادات للسائقين الجدد )
Author: عبدالله ود البوش
Date: 01-07-2013, 08:41 AM
Parent: #3
أسلك المسار الاوسط وعاين قدامك بس ما تشتغل بالوراك وكشح النور والكنتكة
ياخي ديل الواحد اموت ولا إصبر
أصلك ما تشتغل بيهن
|
Post: #4
Title: Re: تسوق براحة تصل سريع ( ارشادات للسائقين الجدد )
Author: عادل خياري
Date: 01-07-2013, 08:39 AM
Parent: #2
سلام ودالبوش وصباحك زين وسوداني
ياخوي الكلام شكلو لاطشو من ناس الهدى لانو يوم سايق بسرعه ماشين الحصاحيصا والكلام ده في نهاية التمانينات عمنا
قال لي امشي براحة عشان نصل سريع
وشرح نفس شرح منطقك ده قال انو لو مشيت براحة بتصل ولو مشيت بسرعة احتمال كبير تعمل حادث او وقفك البوليس واخرك ساعه كاملة
وفي النهاية تصل متاخر
شكلك كدة المثل ده شلتوه مع العفش لمن رحلتو
دمت بالف خير
|
Post: #6
Title: Re: تسوق براحة تصل سريع ( ارشادات للسائقين الجدد )
Author: عادل خياري
Date: 01-07-2013, 08:47 AM
Parent: #4
شفت كيف ماطلع حقك براك
لكن بس يكون يادوب انتهيتو من فرتيق العفش ولقيتو في اخر كرتونة
ههههههههه
|
Post: #7
Title: Re: تسوق براحة تصل سريع ( ارشادات للسائقين الجدد )
Author: عبدالله ود البوش
Date: 01-07-2013, 08:53 AM
Parent: #4
| Quote: ياخوي الكلام شكلو لاطشو من ناس الهدى |
عادل خياري يا حبيب
سلام وشوق
هو أنا كمان الهدى بلطش منها ؟
الهدى هي الثدي الذي رضعت منه وتربيت عليه
فأنا تربية الهدى وأفتخر
بيتنا هو بيت ناس المختار ود الصباحي الحالي يا عادل خياري
في هذا البيت نلت الشرافة من الفكي المرضي
|
Post: #8
Title: Re: تسوق براحة تصل سريع ( ارشادات للسائقين الجدد )
Author: أيمن دياب
Date: 01-07-2013, 09:39 AM
Parent: #7
سلام يا بوشكاش..
أغرب حاجة الاشارة تفتح أخضر.. ولحدي ما تقفل ما تكون اتحركت ولا خطوة..
اشرح لينا دي بالله يا شيخ؟؟
|
Post: #9
Title: Re: تسوق براحة تصل سريع ( ارشادات للسائقين الجدد )
Author: عبدالله ود البوش
Date: 01-07-2013, 02:17 PM
Parent: #8
أيمن دياب يا حبيب
مافي أئ خيارات ؟
في الحالة دي السائق القدامك لمن احس بيك مضايق بيأشر ليك بيدو اقوليك طير بفوق طير
ياخي مرة شافع سعودي صغير ونحن طالعين من صلاة الجمعة والشافع عاكس السير عايز اشيل نعلاتو جنب الباب
قلت ليهو يا ولدي اصبر خلي الناس تطلع وانت ادخل
قالي : ما أقدر أصبر ههههههههههه
قلت ليهو خلاص كابس اصلو القلق حابسك من اسع لحدي تبقى كفيل
.
.
ايمن ... الحكاية شنو مافي لمة ربيع قريبة ... خلاص المدارس اجزت واولادنا كلهم جو اللول نحتفل بيهم ياخي
|
Post: #10
Title: Re: تسوق براحة تصل سريع ( ارشادات للسائقين الجدد )
Author: عبدالله ود البوش
Date: 01-07-2013, 02:42 PM
Parent: #9
أحذروا الترلات وخاصة لمن تكون دايرة تلف واوعك تكون يمين سائق الترلة
طوالي يعفصك وانت الغلطان ........................
.
.
وخلي جنك وجن التكسي خاصة لمن اكون فاضي اشوف زبون فجأة اقيف وتدقشو وتكون غلطان
|
Post: #11
Title: Re: تسوق براحة تصل سريع ( ارشادات للسائقين الجدد )
Author: حمد عبد الغفار عمر
Date: 01-07-2013, 03:22 PM
Parent: #10
سلام عبدالله
| Quote: وعاين قدامك بس ما تشتغل بالوراك |
كيف ما تشتغل بالوراك ياخي القدامك انت شايفو بعمل في شنو لكن الوراك دا ما عارفو حيعمل شنو ممكن تتخيلوا حيتخطاك بيسارك فجأة تلقا جا بيمينك وخصوصا في هالبلد الاسمها الرياض
نصيحتي تشوف قدام وورا وجوة العربية ذاتها
بعدين السرعة تعرف في مسافة 400 كيلو لومشيت 120 و140 الفرق 27 دقيقة تقريبا
لكن فرق كبير لما السيارة تكون ماشة 120 و140 من حيث وزن السيارة ومقاومتها للرياح ودرجة تحكمك انت فيها
عشان كدا المهلة كويسة دي قناعة انا وصلتها أخيرا خصوصا مع الإشارات كلها دقيقة واحدة
|
Post: #12
Title: Re: تسوق براحة تصل سريع ( ارشادات للسائقين الجدد )
Author: عبدالله ود البوش
Date: 01-08-2013, 07:06 AM
Parent: #11
أخونا حمد عبدالغفار
سلام واحترام
| Quote: كيف ما تشتغل بالوراك ياخي القدامك انت شايفو بعمل في شنو لكن الوراك دا ما عارفو حيعمل شنو |
سوري حمد كان قصدي عدم الاهتمام بالوراك يعني لمن تكون ماش صاح ما تشتغل بيهو كان جن
يعني انا مثلا اكون ماشي بالسرعة النظامية المحددة في الشارع المعين وفي المسار الوسط
اجي واحد وراك اكشح فيك النور كشح عشان تسرع اها الزي دا بخليهو اجن في جنو ولا بشتغل بيهو
لكن برضو بالتأكيد زي المجنون دا بكون شايفو ومراقبو عشان ما اعمل معاي حادث حتى ولو هو غلطان
.
والله يا حمد انا مرة طالع من البيت يعني في وسط الحي
ويا داب بس امتار من البيت والشارع كان فيهو صيانة ضيق يعني بشيل عربية واحدة
وكان في واحد وراي وفجأة كدا احس بالعربية اهتزت وعرفت انه خبطني من وراء
وقفت ونزلت ووقف هو طبعا دقشة خفيفة مالها تأثير على العربية ولا حتى ظاهرة
ونزل هو زعلان قال لي تمشي براحة لشنو
وفي الاخر قال لي لو متضرر اتصل على المرور !!!!!!!!!!!
غايتو البلد دي الله استرنا فيها يا حمد
شكرا حمد واتمنى لك في كل خطوة سلامة
|
|