(الحور العين) و أزواج و زوجات سودانيز اون لاين

Post: #1
Title: (الحور العين) و أزواج و زوجات سودانيز اون لاين
Author: يحي قباني
Date: 01-05-2013, 05:31 PM
Parent: #0

قصة الرجل و زوجته الاتنين في سودانيز اون لاين دى

ذكرني ليها بوست حمد حق " عائلات سودانيزاونلابن "

زمااااان ... واحد اخونا الله يطراهو بالخير ...

زوجته قالت ليهوا انت عارف انو يوم القيامة كل واحد فيكم

حيلقي ( مرته ) الفي الدنيا هي زاتها ( الحور العين ) حقته ...

صاحبنا هاج و ماج ... قال ليها يعني انا بعد الاجتهاد الفي الدنيا ده كله

اطلع الآخره ... القاكي انتي زاتك ؟؟؟؟

Post: #2
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-05-2013, 05:34 PM

طبعا ملابسات القصة دى جميلة جدا و دايره ليها رجعة ...

جاييكم يا حلوين

انتو و حوركم العين ...

Post: #3
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-05-2013, 06:01 PM
Parent: #2

لا وفرحانين !!!

كل واحده جات عرفت زوجها بالاسم الثلاثي ...

الظاهر خايفات عليهم من قصة العرس التأني

Post: #4
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-05-2013, 06:39 PM
Parent: #3

طبعا كل زوج الان داير يرد لي

ويقول كل ألفي تفسه

وما قادر لأنو ( حوره العين )

محمره ليهو وراجياهو بس يغلط و يكتب حرف

Post: #5
Title: Re: (الحور العين) و أزواج و زوجات سودانيز اون لاين
Author: سيف الدولة كامل
Date: 01-05-2013, 06:54 PM
Parent: #4

سلامات يا دفعة ,,, مالك جايب سيرة البحر . استعد للطوفان .

Post: #6
Title: Re: (الحور العين) و أزواج و زوجات سودانيز اون لاين
Author: منير عثمان
Date: 01-05-2013, 07:02 PM

Quote: حيلقي ( مرته ) الفي الدنيا هي زاتها ( الحور العين ) حقته ...

بالله ده خبر تجيبه , الزمن ده كلو قافلين على الموضوع ده طلع فشنك ساكت!!!!

Post: #8
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-05-2013, 07:19 PM
Parent: #6

Quote: سلامات يا دفعة ,,, مالك جايب سيرة البحر . استعد للطوفان .

هابي نيو يير يا صديقي

والله يا سيف قال ليك ومعاها فرحة كمان

مريم بت الحسين قالت في بوست العائلات

( مريم و نادر )

جات راجعه تاني وختت اسم نادر صاحبي بالكامل

يعني المسكين لو داير يعيش ليهو يومين حلوين ما يقدر

انكتم نفسو ...

Post: #7
Title: Re: (الحور العين) و أزواج و زوجات سودانيز اون لاين
Author: عاطف عمر
Date: 01-05-2013, 07:15 PM

Quote: زمااااان ... واحد اخونا الله يطراهو بالخير ...
زوجته قالت ليهوا انت عارف انو يوم القيامة كل واحد فيكم
حيلقي ( مرته ) الفي الدنيا هي زاتها ( الحور العين ) حقته ...
صاحبنا هاج و ماج ... قال ليها يعني انا بعد الاجتهاد الفي الدنيا ده كله
اطلع الآخره ... القاكي انتي زاتك ؟؟؟؟

تحياتي وسلامات عزيزنا يحيي

أعادتني هذه الطرفة لقصة حقيقية أحد أبطالها عضو معنا في البورد تعود للنصف الأول من التسعينات

ربطتني صداقة أسرية متينة بالأخ الحبيب ( ع . ع ) ، هو رجل موسوعي بمعنى الكلمة ، قارئ نهم ، لقاءاتنا الإسبوعية كانت خصبة وجميلة ، قال لى مرة أنه يريد أن يعرف عن الأستاذ محمود محمد طه و( الفكرة الجمهورية ) من المصادر الأصلية ... أجبته على الفور أنه من حسن الحظ أن صديقي الجمهوري - عضو هذا البورد - د. حيدر بدوي صادق كان يعمل أستاذاً في جامعة الإمارات في مدينة العين .. بسرعة تمت الترتيبات .. وبسرعة عرفتهم على بعضهم .. سر وأعجب د. حيدر بصديقنا ( ع ع ) وإطلاعه العميق .. تكررت اللقاءات مرة عندي في دبى أو عند ( ع ع ) في الشارقة أو عند د. حيدر في مدينة العين ..
على الدوام كان ( ع ع ) هو المبادر بطلب هذه اللقاءات .
في أحد اللقاءات تطرق د. حيدر لمفهوم ( الزوجة في الحقيقة ) في الفكرة الجمهورية وهو مفهوم قريب من جملة صاحبك هذا
إنصدم صديقنا ( ع ع ) وهو يسمع هذا المفهوم ورد منزعجاً

" يعني يا دكتور أنا لو بقيت جمهوري ودخلت الجنة تقوموا تلصقوا لى ( ... ) تااااااني ؟ "

أعتبرناها قفشة وأنهينا بها ذلك اللقاء

لاحظت لاحقاً أن صديقي ( ع ع ) قد بدأ يتكاسل عن قراءة الكتب التي كان يزوده به د. حيدر .. بل و لا يحضر لقاءاتنا في دبى ويعتذر عن الذهاب للعين
ذات مرة صارحته
يازول إنت مالك ؟؟ ما كنت متحمس لمعرفة الفكره الجمهورية .. الحصل ليك شنو ؟؟

فرد على بقنبلته

" والله ما أكضب عليك أنا من د. حيدر قال أنو ( ... ) دي ح تباريني تاني في الآخرة ،الأستاذ محمود وفكرتو مرقوا لى من نفسي "

________________

حبيبنا د. حيدر سلامات
إن مررت على هذا البوست أرجو أن لا تذكر إسم صاحبنا فقد تعمدت إخفاؤه

Post: #9
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-05-2013, 10:26 PM
Parent: #7

Quote: بالله ده خبر تجيبه , الزمن ده كلو قافلين على الموضوع ده طلع فشنك ساكت!!!!

اخونا منير سلامات ياخي ...

الخبر ازعجك ؟ ... خايف من السنفكة دنيا و آخره يا حبيب ؟؟؟

يا زول اتطمن و نوم قفا ... و حياتك ما يبارونا شبر ...

Post: #10
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-05-2013, 10:28 PM
Parent: #9

Quote: " والله ما أكضب عليك أنا من د. حيدر قال أنو ( ... ) دي ح تباريني تاني في الآخرة ،الأستاذ محمود وفكرتو مرقوا لى من نفسي ".

حسي عليك الله يا سيف الدولة

الجاب سيرة البحر انا و لا عاطف عمر ده ...

انا جني جن السياسة ...

Post: #11
Title: Re: (الحور العين) و أزواج و زوجات سودانيز اون لاين
Author: عبد الله كسلا
Date: 01-06-2013, 08:44 AM
Parent: #10

Quote: يا زول اتطمن و نوم قفا ... و حياتك ما يبارونا شبر ...

والله يا قباني إنت زول لذيذ خلاس .. والقراية ليك ممتعة ..

شكلك مالي يدك وواثق من الحكاية دي ... الله يستر بس ...

ما تتمقلب .. ونتمقلب معاك ...

Post: #12
Title: Re: (الحور العين) و أزواج و زوجات سودانيز اون لاين
Author: نجوان
Date: 01-06-2013, 09:35 AM
Parent: #11

Quote: و حياتك ما يبارونا شبر ...
والقاليكم منو هن عايزات يباروكم؟

____
غايتو التحية ليك وللمعاك يا قباني على التفاؤل المدهش..

Post: #13
Title: Re: (الحور العين) و أزواج و زوجات سودانيز اون لاين
Author: محمد عبد الماجد الصايم
Date: 01-06-2013, 09:41 AM
Parent: #12

هههههههههههههههههههههههههههه
متعة والله .. متعة يا قباني كالعادة!!

Post: #14
Title: Re: (الحور العين) و أزواج و زوجات سودانيز اون لاين
Author: مريم بنت الحسين
Date: 01-06-2013, 09:56 AM
Parent: #13

Quote: مريم بت الحسين قالت في بوست العائلات

( مريم و نادر )

جات راجعه تاني وختت اسم نادر صاحبي بالكامل

يعني المسكين لو داير يعيش ليهو يومين حلوين ما يقدر

انكتم نفسو ...

انت يا عمو قبّاني ما تقول مريم الحسين عديل، معمم الشغلانه مالك... انا الوحيدة الجيت اتبرعت وقلت اسمو ندورات.. قلت لي كتمته نفسه... غايته النطمّنك عليهو، انا زاتي ما ظنّيتني اخش الجنة.....

نادر، الغدا شمار بي مرقه الليلة! (وش بريء وغيّر رأيه من حلّة المحشي بتاعت الليلة)

النشوف الصحوبية دي بتستمر لمتين...(الوش لسه بريء)

Post: #15
Title: Re: (الحور العين) و أزواج و زوجات سودانيز اون لاين
Author: الزبير بشير
Date: 01-06-2013, 11:03 AM
Parent: #14

الاخ عاطف عمر
لك التحيه
حبيبنا د. حيدر سلامات إن مررت على هذا البوست أرجو أن لا تذكر إسم صاحبنا فقد تعمدت إخفاؤه

بالغت .
اللبيب بلاشاره يفهم .
احرز الاخ الدكتور حيدر بدوي المرتبه الاولي علي ولاية النيل الابيض في امتحانات المرحله المتوسطه .
كان طالبا مميزا اكاديميا في جامعه الخرطوم .

لك ودي

صاحب البوست الاخ قباني
ان عرفت الفرق بين الحور العين الائي يعشن الان في الجنه و بين النساء اللائي نعش معهم الان ، حا تكنكش بيديك و رجليك في زوجتك الحاليه ، و تبكي بدعموعك و تقول للملائكه في شان الله تدخلوها معاي .
اخوك
الزبير

Post: #16
Title: Re: (الحور العين) و أزواج و زوجات سودانيز اون لاين
Author: عاطف عمر
Date: 01-06-2013, 11:18 AM
Parent: #15

تحياتي وسلامات عزيزنا الزبير
Quote: الاخ عاطف عمر
لك التحيه
حبيبنا د. حيدر سلامات إن مررت على هذا البوست أرجو أن لا تذكر إسم صاحبنا فقد تعمدت إخفاؤه

بالغت .
اللبيب بلاشاره يفهم .
احرز الاخ الدكتور حيدر بدوي المرتبه الاولي علي ولاية النيل الابيض في امتحانات المرحله المتوسطه .
كان طالبا مميزا اكاديميا في جامعه الخرطوم .

لك ودي

حبيبنا د. حيدر هو ماذكرت أنت وزيادة
أنا ما عارف إنت آخر عهدك بيهو متين
لكن أقول ليك

" عندو شوتات ضفارية تجعل الحليم حيران "

أسميناها في أيام وصالنا " الحيدريات "

وبرضو فيك الخير

Post: #17
Title: Re: (الحور العين) و أزواج و زوجات سودانيز اون لاين
Author: عبد الله كسلا
Date: 01-06-2013, 11:34 AM
Parent: #15

Quote: صاحب البوست الاخ قباني
ان عرفت الفرق بين الحور العين الائي يعشن الان في الجنه و بين النساء اللائي نعش معهم الان ، حا تكنكش بيديك و رجليك في زوجتك الحاليه ، و تبكي بدعموعك و تقول للملائكه في شان الله تدخلوها معاي .

الأخ الزبير بشير .. سلامات .. وكل سنة وإنت طيب يا حبيب ..

معليش .. وبالرغم من إنه كلامك الفوق ده موجَّه لصاحب البوست ..

بس يا ريت والله تورينا الفرق الإنت قاصدو في مداخلتك دي .. بين الحور العين .. والنساء اللائي نعيش معهن الآن ..

لتعم الفائدة .. (مع ملاحظة تفضيلك لنساء الحياة الدنيا ...على الحور العين ) ...

وعشان نكب الزوغة من قباني .. ونخليهو يتمقلب براهو ..

Post: #18
Title: Re: (الحور العين) و أزواج و زوجات سودانيز اون لاين
Author: Asim Fageary
Date: 01-06-2013, 11:48 AM
Parent: #17

يا يحيى قباني

الله يجازي شياطنك

ذكرتني مناقشة دارت بين إتنين بخصوص الحور العين

والإتنين ما سودانيين بس من جنسية كدا أشكالهم زي ما بيقولوا جميلة

واحد قال التاني طيب لمن نحنا بعدين نتزوج الحور العين نسوانا ديل يمشوا وين

رد عليهو التاني قال ليهو نسوانا ديل حيتزوجوهم السودانيين لأنهم حيكونوا بالنسبة للسودانين زي الحور العين

Post: #19
Title: Re: (الحور العين) و أزواج و زوجات سودانيز اون لاين
Author: وضاحة
Date: 01-06-2013, 11:49 AM
Parent: #17

غايتوا يا يحيى الله يديك العافية

النسوان ديل زاتوا بكون زهجانين من ازواجن الفى الدنيا

ان شاء كية فيك ربنا يديهم اولاد حور يملوهم رومانسية

-------------------------------------------
يا عاطف انت مخطط تلاقى مدامك ولا برضوا عاوز من الحور العين هههههههه

Post: #20
Title: Re: (الحور العين) و أزواج و زوجات سودانيز اون لاين
Author: Asim Fageary
Date: 01-06-2013, 12:03 PM
Parent: #19

Quote:

ان شاء كية فيك ربنا يديهم اولاد حور يملوهم رومانسية

يا وضاحة إزيك

صدقيني بعد العيال وناس سيك ميك والمدارس والذي منه

لا في رومانسية لا يحزنون كل الرومانسية تنقلب إلى مسؤوليات ينوء أولو العصبة من الرجال تحملها

قال رومانسية قال

رومانسية دي في الشاشة والسينما الغشاشة

Post: #22
Title: Re: (الحور العين) و أزواج و زوجات سودانيز اون لاين
Author: مهيرة
Date: 01-06-2013, 12:22 PM
Parent: #20

عام سعيد عليك ياود قبانى

انت مالك علينا ياخوى ؟؟

ما مريحنا لا دنيا ولا آخرة !!!!
__________________

فى زيارة قريب دة لدبى لاقانى شاب يشبهك شبه شديد ( طبعا صورتك الكنت خاتيها فى الأول )

لمن افتكرته دة انت، وفى دبى مول ألاقىليك لافتة كبيرة : ( افتتاحفكتوريا سيكرت قريبا ) , اتذكرتك وضحكت

تحياتى

Post: #21
Title: Re: (الحور العين) و أزواج و زوجات سودانيز اون لاين
Author: الامين موسى البشاري
Date: 01-06-2013, 12:03 PM
Parent: #19

يحى قباني

تحياتي ،،
زمان (قبال بوستك دا) النسوان كانوا حائرات
الرجال حيتزوجوا الحور العين حسب وعد ربنا سبحانه وتعالى
طيب نحن حنعرس منو(أو كما قالن)؟
واحدة من الناشطات مرة في ندوة قالت: وطيب نحن نعمل شنو؟
أها طيب الما عرست في الدنيا تعمل شنو برضو؟

عندي صاحبي كان لامن يسكر شديد بقول:

نار مضمونه ولا جنه مجهجهة

هسي بوستك دا جهجه باكاتنا ياخ!

دم بخير

Post: #23
Title: Re: (الحور العين) و أزواج و زوجات سودانيز اون لاين
Author: عاطف عمر
Date: 01-06-2013, 01:01 PM
Parent: #19

Quote: يا عاطف انت مخطط تلاقى مدامك ولا برضوا عاوز من الحور العين هههههههه

هسع يا وضاحة في داعي للأسئلة التعسفية دي ؟؟

Post: #24
Title: Re: (الحور العين) و أزواج و زوجات سودانيز اون لاين
Author: Muna Khugali
Date: 01-06-2013, 01:37 PM
Parent: #23

والله مشكلة!

نفس الرجال برضو وراهم هناك؟!

طيب في حالة التعددية هايحصل شنو؟؟
وكمان الواحدة الإتزوجت أكتر من مرة..هاتكون لياتو زوج؟؟

لازم يا يحي وكل الرجال هنا تردوا لينا..
مش علشان نعرف بس..
لكن كمان علشان نجتهد أكتر نخش الجنة!

.........
.........

Post: #25
Title: Re: (الحور العين) و أزواج و زوجات سودانيز اون لاين
Author: Asim Fageary
Date: 01-06-2013, 01:41 PM
Parent: #24

Quote:

والله مشكلة!

نفس الرجال برضو وراهم هناك؟!

طيب في حالة التعددية هايحصل شنو؟؟
وكمان الواحدة الإتزوجت أكتر من مرة..هاتكون لياتو زوج؟؟

لازم يا يحي وكل الرجال هنا تردوا لينا..
مش علشان نعرف بس..
لكن كمان علشان نجتهد أكتر نخش الجنة!

.........
.........

يا منى إزيك

تعرفي بالنسبة للمرأة الإتزوجت أكتر من واحد حيكون آخر واحد في ذمتها

وبالنسبة للراجل المتعدد الزوجات كلهن وراهو

يعني الشغلة زي حساب الجبر

أو زي القوائم المالية

أحسبيها بالطريقة البتريحك وفكري كويس قبل القيم ما ينتهي

هههههههههههههههههه

Post: #26
Title: Re: (الحور العين) و أزواج و زوجات سودانيز اون لاين
Author: وضاحة
Date: 01-06-2013, 01:47 PM
Parent: #23

Quote: هسع يا وضاحة في داعي للأسئلة التعسفية دي ؟؟

بهظر ياخى يمكن بخطط القيك بعدين فى الجنة ههههههههههههه

Post: #27
Title: Re: (الحور العين) و أزواج و زوجات سودانيز اون لاين
Author: الزبير بشير
Date: 01-06-2013, 02:07 PM
Parent: #23

الاخ عاطف عمر
لك التحايا
صلتي وصداقتي لم تنقطع بلاخ حيدر منذ ان تقابلنا في جامعه الخرطوم ، وكنا نسكن سويا ، له طرايف كثيره فيما يتعلق بتطبيق الفكر الجمهوري ، الدكتور حيدر بدوي يعمل الان محاضر بجامعه الملك فهد للبترول و المعادن ، الظهران ، السعوديه .
ربنا اديك و اديه العافيه .
لك ودي

الاخ عبدالله كسلا
من الاخير كده ، اتخيل نفسك راكب بص مكندش من بورتسودان الي الخرطوم عبر كسلا . و الكرسي الجنبك تجلس فيه احدي حفيدات تاجوج موديل 2013 ، و هاك يا ونسه ، نزلتو الخياري للفطور ، و الناس تعاين و تتشهد وانت تتونس مع كل لقمه و جقمة ماء ، اتخيل المنظر و عيش الاحساس ، ضربتو حاجه بارده و كبايت شاي حار ، و بعد داك البص اتحرك ، وهاك يا ونسه مع حفيدة تاجوج ، وصلتو الكاملين ، نزلتو الغداء ، الناس تعاين و تتشهد ، ضربتو الغداء و البارد و الشاي ، و انتظرتو شويه عشان البص اتحرك ، و ركبتو البص ، وصل الخرطوم ، تفارقتم بود و طيبه ، علي امل اللقاء . بالله مش متعه .

خليك من ده هاك التانيه : في قاعه المحاضرات ، جلست بقربك قنبله ، وبدت تتونس ، و انت غير مصدق ، هل الجمال يتكلم ، انتهت المحاضره ، عقبت بخلطه ، بارد و شاي ، هاك يا ونسه ، بعد داك طرحه حتي الداخليه . برضو متعه .

اذن المتعه ليست جسدا فقط هنالك الروح . ( هذا الحديث للشعراوي : لا توجد للانسان فضلات في الجنه ، فالداخل غير خارج ، لذلك لا توجد مراحيض) و علي ذلك قس .
ويضا لعلمك ان الحور العين اللائي يقسمن لك لا يرهن بالعين احد الا لك انت الزوج فقط ، مع ان سكان الارض يتزاورون في الجنان نساء و رجال . و من اعجب ما يكون ان اهل الجنه يسمعون اصوات الحور عند الكلام و لكن لا يروهن بالعين ( كلام من بيت الكلاوي ) .

نواصل لاحقا

الزبير

Post: #28
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 05:47 PM
Parent: #27

Quote: والله يا قباني إنت زول لذيذ خلاس .. والقراية ليك ممتعة ..

شكلك مالي يدك وواثق من الحكاية دي ... الله يستر بس ...

ما تتمقلب .. ونتمقلب معاك ...

حبيبنا عبدالله كسلا

تحياتي و احترامي يا رجل ...

يازول نوم قفا ....

من نعم ربنا سبحانه و تعالي انو فصّل حكاية الجنة دي تفصيل في القرآن

السدندس و الاستبرق و انهار الخمور والفواكه بالإسم ......

طيب ما جاب سيرتهم ليه ؟

داير يعمل لينا مفاجأه يعني ؟؟؟

Post: #29
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 05:56 PM
Parent: #28

Quote: والقاليكم منو هن عايزات يباروكم؟

____
غايتو التحية ليك وللمعاك يا قباني على التفاؤل المدهش..

نجوان ...

بركة الجابت لينا ... والله مشتاقين ...

ما في تشاؤم ابدا وحياتك ...

امس حكيت الحكاية لواحد صاحبي ...

كان زمان بيحب الشراب و بطّل من 20 سنة

وكل ما تجي سيرة الشراب ريقو يجري لي حسي

فقال لي يا قباني انا ما فارقه معاي تكون هي ( حوري العين) ولا غيرها

اخوك حيكون راقد اليوم كلو جنب انهار الخمر ومغبّي ...

خليها تكون هي زاتها .. مع السكرة ديك الفارق معاهو منو !!!

Post: #30
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 06:03 PM
Parent: #29

Quote: انت يا عمو قبّاني ما تقول مريم الحسين عديل، معمم الشغلانه مالك... انا الوحيدة الجيت اتبرعت وقلت اسمو ندورات.. قلت لي كتمته نفسه... غايته النطمّنك عليهو، انا زاتي ما ظنّيتني اخش الجنة.....
نادر، الغدا شمار بي مرقه الليلة! (وش بريء وغيّر رأيه من حلّة المحشي بتاعت الليلة)
النشوف الصحوبية دي بتستمر لمتين...(الوش لسه بريء)

بت الحسين يا صديقة ...

عليك الله غديهو كويس ... الدنيا ويك اند ...

بعدين انتي الشفقه العليك شنو ؟؟؟

يعني نادر ما عنده كيبورد ؟؟؟ ولا ماشاف البوست ؟؟؟

مالو ما جا وقال نادر ومريم ؟؟

اها انا ما عرفت انو نادر " صاحبي " زوجك الا من البوست ده ...

وما كنت عارفك متزوجة زاتو ....

الاخيره دى طبعا كضبه عشان اخش النار " احتياطياً "

Post: #31
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 06:05 PM
Parent: #30

Quote: هههههههههههههههههههههههههههه
متعة والله .. متعة يا قباني كالعادة!!

ود الصايم ياخ الله لا يحرمنا من ضحكاتك دي

امس في سيرتك مع سيف الدولة كامل ...

بالخير طبعا ....

Post: #32
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 06:08 PM
Parent: #31

Quote: صاحب البوست الاخ قباني
ان عرفت الفرق بين الحور العين الائي يعشن الان في الجنه و بين النساء اللائي نعش معهم الان ، حا تكنكش بيديك و رجليك في زوجتك الحاليه ، و تبكي بدعموعك و تقول للملائكه في شان الله تدخلوها معاي .
اخوك
الزبير

والله يالزبير ياخوي الا نكون صعايده بس ...

قالوا الصعيدي مشي اتزوج علي مرته ...

طلعت هي زاتها ...

Post: #33
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 06:21 PM
Parent: #32

Quote: يا يحيى قباني
الله يجازي شياطنك
ذكرتني مناقشة دارت بين إتنين بخصوص الحور العين
والإتنين ما سودانيين بس من جنسية كدا أشكالهم زي ما بيقولوا جميلة
واحد قال التاني طيب لمن نحنا بعدين نتزوج الحور العين نسوانا ديل يمشوا وين
رد عليهو التاني قال ليهو نسوانا ديل حيتزوجوهم السودانيين لأنهم حيكونوا بالنسبة للسودانين زي الحور العين

ود فقيـــري يا صديقي ...

قالوا واحد سوداني عايش عمره كلو في السودان

ما مرق ولا شبر ... وما شاف اي جنس حريم ( آخَرْ ) غير الانته عارفهم ديلاك ...

المهم ربنا كتب ليهو يمشي الحج ...

اهااا ... جماعته قالو ليهو كمان كان الله كتب ليك موته في اثناء المشاعر

جنتك مضمونة مية في المية ... وهناك بنات الحور و الخمور ...

المهم صاحبك حاجي في الصيف و الموضوع لافي ليهو في راسو ...

ومع حراية السعودية ديك جاتو ضربة شمس

نقلوهوا اقرب مستشفي بره مكه كانت المستشفي الامريكي

الممرضات الامريكيات حوالينو ... بيفوقوا فيهوا ...

عمك فتّح عينوا شافهم ليك بالشعور الصفرا و العيون الزرق زي موية البحر ...

و قنب يكورك ....

صدق وعده ...صدق وعده ...صدق وعده ...

Post: #34
Title: Re: (الحور العين) و أزواج و زوجات سودانيز اون لاين
Author: عاطف عمر
Date: 01-06-2013, 06:26 PM
Parent: #33

Quote: ما مرق ولا شبر ... وما شاف اي جنس حريم ( آخَرْ ) غير الانته عارفهم ديلاك ...

أبن أفصح يا هذا

______________

إنت أصلك ما بتوب ؟؟

Post: #35
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 06:28 PM
Parent: #33

Quote: غايتوا يا يحيى الله يديك العافية

النسوان ديل زاتوا بكون زهجانين من ازواجن الفى الدنيا

ان شاء كية فيك ربنا يديهم اولاد حور يملوهم رومانسية

وضاحة ياخ انتي لسه صغيرونه ...

واعمامك ديل بيهضربوا ساكت ...

عايني عمك ود فقيري قاليك بل رومانسية بلا زفت ....

وانشالله ياخ " الزوجات " ديل ربنا يديهم " اولاد حور " مالو ... يستاهلو ....

بس دي مكافأه و اجر ليهن و لا عقاب لوليدات الحور المساكين ديل ؟؟؟

اما انتي ... فانشالله ربنا يديك ود حور دنيا و اخره عشان تبقي لي في رقبتو ...

Post: #36
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 06:35 PM
Parent: #35

Quote: عام سعيد عليك ياود قبانى

انت مالك علينا ياخوى ؟؟

ما مريحنا لا دنيا ولا آخرة !!!!
__________________

فى زيارة قريب دة لدبى لاقانى شاب يشبهك شبه شديد ( طبعا صورتك الكنت خاتيها فى الأول )

لمن افتكرته دة انت، وفى دبى مول ألاقىليك لافتة كبيرة : ( افتتاحفكتوريا سيكرت قريبا ) , اتذكرتك وضحكت

تحياتى

دكتورة مهيرة

انتي ما معاهم ... بس معقول ..؟

بعدين شفتي كلامي جاب نتيجة ... و قصة فيكتوريا سيكرت ما زالت في البال ....

إذاً جنتك مضمونة .... اعتمدى علي كده ....

Post: #37
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 06:45 PM
Parent: #36

Quote: يحى قباني

تحياتي ،،
زمان (قبال بوستك دا) النسوان كانوا حائرات
الرجال حيتزوجوا الحور العين حسب وعد ربنا سبحانه وتعالى
طيب نحن حنعرس منو(أو كما قالن)؟
واحدة من الناشطات مرة في ندوة قالت: وطيب نحن نعمل شنو؟
أها طيب الما عرست في الدنيا تعمل شنو برضو؟

عندي صاحبي كان لامن يسكر شديد بقول:

نار مضمونه ولا جنه مجهجهة

هسي بوستك دا جهجه باكاتنا ياخ!

دم بخير

ود البشاري ... لا تخف يا رجل ...

ربنا رحيم بعباده ...

انت قايل تفسير " الرجال قوامون علي النساء " ده شنو ؟؟؟؟

يعني قيامتنا قبال قيامتهم بكتيييير ...

اول شي الرجل السوداني عمره قصير جدا ...

و90 بالمية من الرجال السودانيين بيموت قبال زوجته بي زى 20 سنه كده ....

ال 20 سنه مع طول المده تكون جيهت امورك فوق ...

ولما تحصلك تتغابي فوقها العرفه بس ....

Post: #38
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 06:50 PM
Parent: #37

Quote: والله مشكلة!

نفس الرجال برضو وراهم هناك؟!

طيب في حالة التعددية هايحصل شنو؟؟
وكمان الواحدة الإتزوجت أكتر من مرة..هاتكون لياتو زوج؟؟

لازم يا يحي وكل الرجال هنا تردوا لينا..
مش علشان نعرف بس..
لكن كمان علشان نجتهد أكتر نخش الجنة!

تعرفي يا مني ...

المتعدد الزوجات ده بالذات يستاهل يودو ليهو كل " حريم السلطان " الاتعددو ديل

يكونو كلهم ( حور عينه ) عشان يطلعوا عينه ...

لانو حمار ... ما فهم من اول مره ... و قام عرس تاني ....

Post: #39
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-06-2013, 08:29 PM
Parent: #38

Quote: ويضا لعلمك ان الحور العين اللائي يقسمن لك لا يرهن بالعين احد الا لك انت الزوج فقط ،
مع ان سكان الارض يتزاورون في الجنان نساء و رجال .
و من اعجب ما يكون ان اهل الجنه يسمعون اصوات الحور عند الكلام
و لكن لا يروهن بالعين ( كلام من بيت الكلاوي )

الناس العينها طايره حقها راح ...

Post: #40
Title: Re: (الحور العين) و أزواج و زوجات سودانيز اون لاين
Author: محمد أبوالعزائم أبوالريش
Date: 01-06-2013, 09:18 PM
Parent: #39

Quote: حيلقي ( مرته ) الفي الدنيا هي زاتها ( الحور العين ) حقته ...

ده شنو يا هندسة؟

يعني ما حيكون في فك تسجيلات؟

ذكرتني واحد صاحبنا طشمنجي درجة أولى. في بداية التمانينات تاب ووقف الشراب. قام عمك نميري لما اكتشف الإسلام ومنع الخمور، لقيت زولك واقف (لط) .... سألتو بدهشة ... قام قال لي: شوف .. أوقف الشراب بي مزاجي ... لكن بي أوامر من نميري لأ.

فدحين .... ما تمرقنا من الجنة وصقطا.

Post: #41
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-07-2013, 03:46 AM
Parent: #40

Quote: أبن أفصح يا هذا
______________

إنت أصلك ما بتوب ؟؟

اتوب من شنو يا دفعه ؟

انت بس اتذكر فلم ( Papillon) سنة 73

Steve McQueen &, Dustin Hoffman

محكوم عليهم مؤبد مدي الحياه ...

عمك دستن هوفمان بعد 25 سنة بقي بيعمل الدايره في السجن و السجانين ما شغالين بيهو الشغله

اها انحنا قضينا الخدمة الاجبارية ... و الاعمال الشاقة ... ووصلنا مرحلة دستن هوفمان ده ...

نقزل الدايرنه و مافي زول يقول كلمة ...

وعارفين لو نقنقنوا ...

بنعمل زى ستيف ماكويين ... ونشوف طريقة الهروب كيفن ...

Post: #42
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-07-2013, 03:49 AM
Parent: #41

Quote: ده شنو يا هندسة؟

يعني ما حيكون في فك تسجيلات؟

ابوالريش ... جدى التاريخ ...

وينك يا رجل ...

فك التسجيلات في الاخره علي ضمانتي ...

احنا بنحاول في الدنيا حسي ...

لو لقينا لينا طريقه نعملها زى الكوشتينة ...

نشكها و نوزعها من اول جديد ...

Post: #43
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-07-2013, 10:36 PM
Parent: #17

قلت لي نكب الروعة و انا اتمقلب براي؟

ده جزاي النبهتكم !!!

Post: #44
Title: Re: (الحور العين) و أزواج و زوجات سودانيز اون لاين
Author: محمد أبوالعزائم أبوالريش
Date: 01-08-2013, 07:21 AM
Parent: #43

Quote: لو لقينا لينا طريقه نعملها زى الكوشتينة ...

نشكها و نوزعها من اول جديد ...

طيب عملت شنو؟ ما ياهم زاتهم .... العندك والعندي والعند زيد وعند عبيد.

أنا كنت قايل موعودين بي حاجة كده زي عروس البحر (Mermaid)

Post: #45
Title: Re: (الحور العين) و أزواج و زوجات سودانيز اون لاين
Author: يحي قباني
Date: 01-09-2013, 01:44 AM
Parent: #44

Quote: طيب عملت شنو؟ ما ياهم زاتهم .... العندك والعندي والعند زيد وعند عبيد.

أنا كنت قايل موعودين بي حاجة كده زي عروس البحر (Mermaid)

دي صدقت فوقها يا ابوررريش

تعرف مره من كم سنه كده ... كنا بنتعشي سوا في مطعم ...

مجموعة اصدقاء اعمارنا متقاربه ووقتها كنا خلاص علي مشارف الخمسين

في نص الاكل كده قام واحد من المجموعة سألنا ...قال لينا ياخوانا ممكن اسالكم سؤال ؟

قمت انا قلت ليهو اتفضل ...

قال لينا يا جماعه لو في واحد فيكم زوجته ماتت ... حيتزوج تاني ؟؟؟

قلت ليهو ده شنو حسي ؟ ده سؤال تسأله و الناس بتاكل ؟؟؟

قال لا ... بس لانو في موقف امس مع زوجتي و ما عرفت اتصرف كيف ؟؟

قال ...زوجته سالته ..يا فلان انا لو ( اتوفيت ) انت حتتزوج من بعدي ؟

قال بسرعة شديدة جدا قلت ليها ...

لأ طبعاً ...

اها المدام قامت تنطط ... وقالت ليهو انا كنت متأكده من كده ...وعشان كده انا بحبك ....

قمت سالته طيب المشكله وين ؟

قال ...هي ما خلتني اكمل كلامي ...

انا لما قلت ليها لا طبعاً ... كنت قاصد اني ما ممكن اعمل عمليه زي دي تاني ...

لأنه اصلا بعد العمر ده ما ينفع اجيب لي واحدة ...وتااااني اتعود علي رزالتها و تتعود علي رزالتي ؟؟!!!!