Post: #1
Title: بيان هام للأعضاء الجدد (موديل 2013)
Author: Balla Musa
Date: 01-03-2013, 07:57 PM
أول حاجة مبروك
ومبروك دى للنجاح فى تحقيق رغبتكم فى عضوية سودانيزاونلاين..
تانى حاجة شفت البروفايلات بتاعتكم
كلها فاضية
ماعدا واحد كاتب إسمه حتى جده الخامس
وواحد كاتب مهنته..
بالله كملوا بروفايلاتكم
عنوان إقامتك ومهنتك عشان لو فى زول عايز يقطع عيشك..
تاريخ ميلادك لزوم صراع الأجيال وكدا
مكان الميلاد عشان نعرف انت هامش أو جلابى
قبيلتك ممكن تضيفها فى الهامش مهمة جدا
مراحل دراستك عشان نشوفك تربية خليج ول فافى بتاع شهادة لندن ول زول ساكت
لونك السياسى عشان نعرفك سودان جديد ول قديم
وجبتك المفضلة عشان نعرف بتاكل بالشوكة ول بتخمج بيدك..
الحالة الإجتماعية دى خانة مهمة وبتختص بالمسنجر!
صورتك عشان قوقل عايزا
والله ولى التوفيق
صدر تحت توقيعى........
|
Post: #2
Title: Re: بيان هام للأعضاء الجدد (موديل 2013)
Author: عبدالوهاب علي الحاج
Date: 01-03-2013, 08:14 PM
Parent: #1
| Quote: صورتك عشان قوقل عايزا |
حامض حموضية يا بلة
دا الحالة قلت تبت ؟
|
Post: #9
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 09:40 PM
Parent: #2
وهبة والله مشتاقين
يظهر ضرس العقل بعد ماقام بدا يسوس ياصاحبى
خخخخخخخخخخخخخخ والحقوق محفوظة.
|
Post: #3
Title: Re: بيان هام للأعضاء الجدد (موديل 2013)
Author: عاطف عمر
Date: 01-03-2013, 08:33 PM
Parent: #1
| Quote: بيان هام للأعضاء الجدد (موديل 2013) |
| Quote: بالله كملوا بروفايلاتكم |
كمان الحقارة ما سمحة يا دكترة
يعني هسع البورداب ( البهزوا وبرزوا ) من موديل 2002 لحدي موديل 2012
كملوا بروفايلاتهم ؟؟
وبهذه المناسبة السعيدة
مرحباً بجميع الأعضاء الجدد موديل 2013
والله ( هرمنا ) وما بنقدر نتحاوم بالليل
فاعتبروا هذا بمثابة ترحيب مني ومن صاحبي بلة ومن صاحبنا وهبة
وكل عام وأنتم بخير
|
Post: #4
Title: Re: بيان هام للأعضاء الجدد (موديل 2013)
Author: آدم عبد الكريم رمضان
Date: 01-03-2013, 08:41 PM
Parent: #3
السلام عليكم يا سناير،،
1. علم يا دكتور بلة، ينظر و يفاد بعد التشاور مع المجموعة
2. شكراً مهندس عاطف و الأستاذ عبد الوهاب على الترحيب
تحياتي
|
Post: #5
Title: Re: بيان هام للأعضاء الجدد (موديل 2013)
Author: elsawi
Date: 01-03-2013, 08:57 PM
Parent: #3
سلام اخي بلة وسلامات لضيوفك
Quote:
وبهذه المناسبة السعيدة
مرحباً بجميع الأعضاء الجدد موديل 2013
والله ( هرمنا ) وما بنقدر نتحاوم بالليل
فاعتبروا هذا بمثابة ترحيب مني ومن صاحبي بلة ومن صاحبنا وهبة
وكل عام وأنتم بخير |
سلامات يا عاطف
عليك الله دخلني معاكم انت وبلة ووهبة ياخي
انا امبارح كنت عايز ارحب بي واحد برلوم فجأة لقيت ليك الصفحة
الأولى كلها برالمة موديل 2013 ياخي ديل بكونوا حوالي 2013 واحد كده
فقلت مافي داعي للفرز احسن الواحد يعمل نايم
تعرف يا بلة بدل كثرة البوستات احسن اي بلوم يجي في بوستك ده
ويجيب على اسئلتك الفوق دي و يتخارج، على الأقل نحن نرحب بيهم
بالجملة برضو ونتخارج تشوف شغلتنا
|
Post: #6
Title: Re: بيان هام للأعضاء الجدد (موديل 2013)
Author: عاطف عمر
Date: 01-03-2013, 09:17 PM
Parent: #5
سلامات يا الصاوي
زمااااان
سنة 2004 عمك بكري عمل تسجيلات جماعية زي دي
ناس نحنا وأخوي بلة دا
جينا فرحانين زى الجماعة ديل وطااااخ ... طااااخ ....
رحبوا بنا .. برلوم جديد ...
إحتلينا الصفحة الأولى ( الكانت ممهولة ) في أمان الله
أختنا الحبيبة رجاء العباسي ( نعمنها زولة واجب ) قامت حامت على البوستات دي بوست بوست ترحب و ( تواجب )
في النهاية قامت رجعت لى بوست حقها وقامت كتبت تعليقها الخالد
" والله حاسة كأنو اليوم هو يوم العيد العصر "
___________
يا أحبابنا البرالمة
ضيفوا أخونا الصاوي لقائمة المرحبين بكم
|
Post: #8
Title: Re: بيان هام للأعضاء الجدد (موديل 2013)
Author: معاذ الدخري
Date: 01-03-2013, 09:39 PM
Parent: #6
مرحب كتير بالإخوة الذين نالوا العضوية مع حلول العام الجديد و أتمني لهم التوفيق .... الدكتور بلة بدأ الترحيب و لكن بدايىته فيها رائحة الإرهاب الفكري عندما طلب منهم البيانات و القبيلة و الذي منه , الدكتور قاصد يرسل لهم رسالة فحواها أنه دا حال المنبر كدا يا جماعة الخير اعتقد يا دكتور كان تقدم لهم نصائح و انت سيد العارفين و تقول ليهم : أبعدوا من الشلليات التي تبث العنصرية و تستقوي بالقبيلة في هذا المنبر عشان ما يجونا و فيهم ملامحنا القبلية و الجغرافية .... و البداية تكون جميلة
|
Post: #7
Title: Re: بيان هام للأعضاء الجدد (موديل 2013)
Author: showgi idriss
Date: 01-03-2013, 09:29 PM
Parent: #5
موديل 2005
مكينة معدلة 2013
لوحات جديدة 1/1/2013
بوهية وسمكرة
في ورشة اليرموك للصناعات اليدوية "دا تمويه عشان الرادارات وكدا"
مع صندوق اضافي لحفظ الباسوورد مشفر
|
Post: #11
Title: Re: بيان هام للأعضاء الجدد (موديل 2013)
Author: الامين موسى البشاري
Date: 01-03-2013, 09:47 PM
Parent: #7
Quote: تانى حاجة شفت البروفايلات بتاعتكم
كلها فاضية
ماعدا واحد كاتب إسمه حتى جده الخامس
وواحد كاتب مهنته..
بالله كملوا بروفايلاتكم
عنوان إقامتك ومهنتك عشان لو فى زول عايز يقطع عيشك..
تاريخ ميلادك لزوم صراع الأجيال وكدا
مكان الميلاد عشان نعرف انت هامش أو جلابى
قبيلتك ممكن تضيفها فى الهامش مهمة جدا
مراحل دراستك عشان نشوفك تربية خليج ول فافى بتاع شهادة لندن ول زول ساكت
لونك السياسى عشان نعرفك سودان جديد ول قديم
وجبتك المفضلة عشان نعرف بتاكل بالشوكة ول بتخمج بيدك..
الحالة الإجتماعية دى خانة مهمة وبتختص بالمسنجر!
صورتك عشان قوقل عايزا
والله ولى التوفيق
صدر تحت توقيعى........ |
اها خلاص يا دكتور قمته على الوصاية
هســـي نقوم نرشك ببوست كااااارب .. والله صحي
بعدين المرة دي شايف الريس شخصياً حايم بالشربات والحلاوة والكعك
..
..
يا برالمة اصلو ما تكملو بروفايلاتكم خلوها كده بس
عشان الترحيب بيكم يكون لذاتكم وليس حسب تصنيفكم القال عليهو بله موسى دا
|
Post: #10
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 09:44 PM
Parent: #3
ياعاطف
ياخى انت نديدى فى الجامعة وفى المنبر؟
نيابة عنك واصالة عن وهبة أقول للبرالمة
اعتبروا العضوية لسودانيزاونلاين تكليف لا تشريف!
وقد نثر بكرى كنانته وعجم أعوادها ووجدكم الأصلب أعوادا فرماكم بنا..
|
Post: #12
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 09:57 PM
Parent: #10
آدم عبد الكريم رمضان
مرحب بيك
وشكلك كدا كنت بتلعب دافورى فى منبر تانى من منابر الليق هههههه
المهم ياسيدى
كانت هناك عادة التبشيع بالبرالمة فى جامعة الخرطوم
والعادة نفسها إسمها البرلمة (برلمنى وبرلمتو)
كنا فى تانية وجونا البرالمة فى كلية الطب للتسجيل
وقلنا نضحك شوية
جانا ود كدا نضييييف وخشينا فيهو شمال
قام رشانا ليك انجليزى من النوع التقول أبوه وأمو خواجات
نحنا طبعا بانجليزينا بتاع ذا بوت كط ذا رفر اطرطشنا
نط واحد قبطى من بتاعين كمبونى وهو سنير علينا عملنا مضحكة
وعينك ماتشوف إلا المزاوغة.
والله انا خايف يوم يسجل الطيب صالح معانا ونقوم نحاول نبرلمو ونبقى فى خانة ضيقة!!
|
Post: #13
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 10:04 PM
Parent: #12
يابرالمة خليكم شاهدين الصاوى رحب بيكم مجانا مادفع حق المسرح..
مرحب بيك يا الصاوى
|
Post: #14
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 10:10 PM
Parent: #13
معاذ الدخرى
تحياتى
البرالمة ديل أذكياء وبفهموا مابين السطور
ودا المخلى بكرى المرة دى برحب بيهم فى البوستات..
أو يطلعوا زى القصة دى:
مرة العميرى الله يرحمو عمل أغنية فى محطة التلفزيون الأهلية ينتقد فيها الأغانى الهابطة..
الأغنية تحولت لأغنية سباتة برقصوا بيها العروس..
جانا فى الكلية فى ليلة استماع
قام واحد سألو عن هذه الواقعة والسؤال يفهم منه أنه يلوم الفنان العميرى.
كانت إجابة العميرى:
يعنى كدا يكون العيب فينى أنا ول فى الناس السمعوها؟
|
Post: #15
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 10:13 PM
Parent: #14
| Quote: مجموع المشاركات: 327 |
شوقى ادريس
ياخوى انت ما عالزيرو
كدى شوف عدادك
المهم نعتبرك دخلت الأوكشن بحادث ضياع باسويرد.
وبرضو مرحب بيك
|
Post: #16
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 10:18 PM
Parent: #15
| Quote: هســـي نقوم نرشك ببوست كااااارب .. والله صحي |
البشارى
بتهدد مالك ماترش طوالى
أصلو البوست دا فتحتو للشهرة وكدا فلا يضير شيئا أن ترشنى ببوست
دا لو مابقيت حاسد وقلت ابيييييت!
لكن يا الأمين فات عليك الهدف من البوست ( دى طبعا من مكنات سودانيزاونلاين, وتدخل فى باب: ماذا استفدت من سودانيزاونلاين)
تحياتى يا الأمين البشارى
|
Post: #19
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 10:27 PM
Parent: #16
المحيرنى
واحد من البرالمة
من البروفايل كلو ماملا إلا المهنة (طبيب)
ذكرنى زمان لما كنا فى الكلية
لما نمشى الفرع من أجل الخلط ونحن على شناتنا
كنا بنعرف نفسنا خصوصا قدام البنات: طالب طب فلان الفلانى..
والأولاد العندهم مؤهلات بعرفوا نفسهم فلان الفلانى
نكتة خارج النص بس من وحى الطب:
كنت طالب فى خامسة وقاعد فى حوادث الخرطوم جمب طبيب كنوع من التريننق
جوا شباب من الفرع معهم بنت فى غاية الجمال
عندها أعراض زائدة دودية
الطبيب بعد ماكشف عليها عايز يدخلا العنبر
قام سأل من البيانات الشخصية
الإسم فلانة
العمر: قالوا ليهو 19
قال: 19 شنو
واحد من زملاها قال ليهو: يعنى حايكون 19 شهر يادكتور
أنا غلبنى أمسك الضحكة وفقعتها بصوت عالى
والجميع ضحك بما فيهم الدكتور
بعد مافاتوا
قال لى: عليك الله مالى حق؟
|
Post: #17
Title: Re: بيان هام للأعضاء الجدد (موديل 2013)
Author: Rawia
Date: 01-03-2013, 10:19 PM
Parent: #12
ماقاعدة أسلم على البرالمة
مامسيخة
ولا كعبة
والله من النوع البيزيل الحواجز ويتفاهم مع الجن الازرق بعد دقيقتين بس
لكن عندي سببين وجيهات
الاول كسلانة
الكسل الواحد دا
لو فتحت بوست مابدخلو عشان ارد فيهو
فمابالك بي بوستات الناس
السبب التاني أوجه من الاول
مرة بكري سجل مليون وخمسمية نفر كدا
دفعة ناس محمد حامد جمعة ونادية مختار
آها كان فيها مجموعة بنات سممممحححححات
طلعن هكر
تصدق!!
الهكر العديل دا
وبعد داك بقت عادة
حكاية الهكر دي
فقررت اني أصبر
لتبدي لك الايام
وآدينا قاعدين
حنمشي وين وإنتو يالبرالمة تمشوا وين؟
______
عاطف رجوية دي أصلها كدا
حبوبة وبتريد الناس وهميمة بتشاكلني تقول لي ردي على الناس
ولو بخاترها ترد هي على ناس بوستي
|
Post: #26
Title: Re: بيان هام للأعضاء الجدد (موديل 2013)
Author: آدم عبد الكريم رمضان
Date: 01-04-2013, 12:30 PM
Parent: #12
طالب الطب سابقاً : دكتور بلة
لقيتك خطيييير لكن ، أنا فعلا كنت لاعب في مكان آخر ( بس ما أظنه ليق) و لاقيتك فيهو و لحسن الحظ لعبنا في فريق واحد و لعبت ليك تمريرات حلوة كمان عشان كدة بتكون عرفت طريقة لعبنا،، المهم شكراً على الترحيب و الترهيب معا.
|
Post: #18
Title: Re: بيان هام للأعضاء الجدد (موديل 2013)
Author: امير بوب
Date: 01-03-2013, 10:27 PM
Parent: #1
شكرا أخى Balla Musa على الترحيب ... وعلى مباركة النجاح !
وشكرا كذلك على الارشادات ... والبخرات المجانية قبل الشروع فى المزاولة
.... ولكن نحن كمان شفنا بروفايلك ... ولم نتوصل لمكان اقامتك ومهنتك ... اما تاريخ ميلادك فيبدو انو قد ختفو الدودو !
اما مراحلك الدراسية فلم نتوصل منها لمعرفة هل انت تربية خليج ... لندنست ... او زول ساكت
ولونك السياسى كذلك لم نستدل عليه ... نخشى ان يكون لون زينب
هذا مل لزم توضيحه ... بعد الاطلاع على ملفكم الشخصى
كل سنة وانت طيب ياخى
|
Post: #20
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 10:31 PM
Parent: #18
والله ياراوية انت متلومة
عاد نجاملك؟
البرالمة ديل.....
المهم ماقادر أمدحم أكتر من كدا
|
Post: #21
Title: Re: بيان هام للأعضاء الجدد (موديل 2013)
Author: Balla Musa
Date: 01-03-2013, 10:35 PM
Parent: #20
أمير أيوب
مرحب بيك
يا أمير أنا ماقلت تخليها مكتوبة
أنا قلت تكتبا وبعد داك انت براك حاتبدا تسحب خانة خانة
يعنى مثلا تاريخ الميلاد أنا خجلان منو عشان تسنين قمتا سحبتو
لكن يا أمير لقيتك بترضع فوق الخلال..
|
Post: #22
Title: Re: بيان هام للأعضاء الجدد (موديل 2013)
Author: Amir Omer
Date: 01-03-2013, 10:54 PM
Parent: #21
Quote: آها كان فيها مجموعة بنات سممممحححححات
طلعن هكر
تصدق!!
|
حاجَّة حريصة 
|
Post: #23
Title: Re: بيان هام للأعضاء الجدد (موديل 2013)
Author: heba Elmahi
Date: 01-04-2013, 06:29 AM
Parent: #22
Quote:
شكرا أخى Balla Musa على الترحيب ... وعلى مباركة النجاح !
وشكرا كذلك على الارشادات ... والبخرات المجانية قبل الشروع فى المزاولة
.... ولكن نحن كمان شفنا بروفايلك ... ولم نتوصل لمكان اقامتك ومهنتك ... اما تاريخ ميلادك فيبدو انو قد ختفو الدودو !
اما مراحلك الدراسية فلم نتوصل منها لمعرفة هل انت تربية خليج ... لندنست ... او زول ساكت
ولونك السياسى كذلك لم نستدل عليه ... نخشى ان يكون لون زينب
هذا مل لزم توضيحه ... بعد الاطلاع على ملفكم الشخصى
كل سنة وانت طيب ياخى |
صادوه صادوه ههههههه ( الوشوش راحت مني ياخ ! )
شكراً امير ايوب البرلوم الشفت
مرحب بكل التسيجلات الجديدة
و تحياتي يا دكتور بلة
|
Post: #25
Title: Re: بيان هام للأعضاء الجدد (موديل 2013)
Author: امير بوب
Date: 01-04-2013, 11:45 AM
Parent: #23
شكرا هبة الماحى على الترحيب
واتمنى ان تكون اقامتى بينكم طيبة
.........
بالمناسبة اسمى امير بوب وليس ايوب
كونى بخير ...
|
Post: #24
Title: Re: بيان هام للأعضاء الجدد (موديل 2013)
Author: امير بوب
Date: 01-04-2013, 11:42 AM
Parent: #21
اخى بلة ...
شكرا ليك على الترحيب مرة تانية
طبعا اذا كان الزول ح يكتب المعلومات فى الاول ثم يبدأ فى سحب ما يخجل منه ... فمن باب اولى ان لا يكتبها منذ البداية
ولا شنو ؟
ثم....
ياخى ( بندحّك) معاك ليس اِلا
تحياتى
|
Post: #27
Title: Re: بيان هام للأعضاء الجدد (موديل 2013)
Author: ابوحراز
Date: 01-04-2013, 02:53 PM
Parent: #18
أكثر شيء محيرني في الدنيا دي القيمة والمكانة الوهمية للبكسي موديل 81
يعني معقول عربية عمرها 32 سنة لمن تدور نفسها يقوم
وبرضو يقولوا ليك الموديل بتاع 81 احسن من 2013
اها ياناس 2002 و2001 وكل قدامى المحاربين لازم تأخذوا استراحة محارب
وتمنحوا الفرصة للموديلات الجديدة عسى ولعل ان يتغير حال البورد للأحسن
مرحب بكل الأعضاء الجدد
وفي انتظار ان تبداوا عزفكم عبر اوتار سودانيز
لكن وبيعدا عن الترحيب
و2013
وكل ماهو جديد فإن الموديلات القديمة من النساء لازالت تحتفظ باصالتها
والقها
وبراءتها
وصدقها العفوي
وكل واحدة منهن لها من الإحترام والأحاسيس بقدر مساحة وطن
فهن صناعة يابانية وايطالية اصلية
فأظفر باليابانية يرتاح بالك !!!
يشهد الله لدينا وصلة كهرباء ايطالية لها أكثر من 13 عام لم نغير فيها اي شيء
بعدها اشترينا 18 وصلة صينية
كلها الان في عداد الموتى !!!!
لهذا تبقى الأقلام اليابانية هنا بكل القها وبهجتها وضياءها أياً كان عمرها
وتذهب الأقلام الصينية والتايوانية
فاغمسوااقلامكم في دواة من الألق والجمال
لتخرج لوحاتكم في ابهى صورها
|
Post: #28
Title: Re: بيان هام للأعضاء الجدد (موديل 2013)
Author: Balla Musa
Date: 01-04-2013, 07:38 PM
Parent: #27
| Quote: ياخى ( بندحّك) معاك ليس اِلا |
يا أمير بوب
عشان اضحك معاك براحتى ورينى المكتوب فى الرد عليك أعلاه باللون الأحمر معناه شنو؟
ولو ماعرفت مابضحك معاك عشان كمان ماتقول لى طقم اسنانك وقع هههههه
بالجد يا أمير بوب
البوست للترحيب أولا وبطريقة خاصة
وثانيا به تلميحات عن علل المنبر
وعشان الناس الجدد يشكلوا تغيير لازم يشخصوا هذه العلل ويعالجوها أو على الأقل ياخدو مصل منها.
وتانى بكرر ليك الأحمر القانى: شكلك كدا بترضع فوق الخلال
هبة الماحى بطلى تحريشات
وبرضو مرحب بيك
*والله بصراحة أنا ماعارف العضوية نعمة أم نقمة عشان كدا التهنئة كانت فقط لنيل الحلم ليس إلا.
|
Post: #29
Title: Re: بيان هام للأعضاء الجدد (موديل 2013)
Author: هشام كمال عبادي
Date: 01-04-2013, 09:43 PM
Parent: #28
يا دكتور ما عصرت على الجماعة ديل ..
من هسع وريتهم العين الحمرا ..
وعبر بوستك نرحب بي كل برالمة المنبر ..
ومرحبا الف بي كل بوردابي جديد في الحوش الوسيع ..
ونوصيكم اختو ابو حسين وما بتجيكم عوجة ..
|
Post: #30
Title: Re: بيان هام للأعضاء الجدد (موديل 2013)
Author: امير بوب
Date: 01-04-2013, 10:13 PM
Parent: #28
دكتور بلة ازيك ياخى
لاكين والله جهجهتنى بسؤالك عن معنى العبارة المكتوبة بالاحمر دى ... ودخّلتنى فى ركن ضيّق
ومن قال لا أعلم فقد أفتى ... ولكنى سأفتى ليك
حسب ما أعتقد انو ( الخلال) دا حاجة كدا بختوها للبهيمة فى خشمها عشان تمنعها من الرضاعة ...
والبرضع فوق الخلال دا أكيد بحاول تجاوز المانع الموضوع لمنعه من انجاز فعل الرضاعة ... هذا بصورة عامة
ويمكن استخدام العبارة على المستوى المجازى لتوصيل عدة معانى أخرى
ويمكن فهمها بمعنى تجاوز الخطوط الموضوعة ... او بمعنى التغلب على حاجز موضوع او التكيّف معه
وربما دليل شفتنه !
والله أعلم
أها لقيتنى كيف ؟
حا تضحك معاى ولّا لا ؟
شكرا على الترحيب بطريقتك الخاصة ... واتفق معك فى ان المنبر به الكثير من العلل وهذا مما لاحظته من خلال متابعتى له من (القيفة) وقبل دخولى له
وهذا يتطلب جهود الناس كلهم لاِنقاذ مايمكن اِنقاذه ... وارجاعه لسيرته الأولى
لك خالص التحايا .... و أضحك الله سنك ياخى
كن بخير
|
Post: #31
Title: Re: بيان هام للأعضاء الجدد (موديل 2013)
Author: Balla Musa
Date: 01-04-2013, 10:23 PM
Parent: #30
نعم نعم يا أمير بوب
والله جاوبت تمام
المثل يقال للزول التفتيحة رغم أنه جديد..
يازول انت خطير
ومرحب بأمير عمر
وابوحراز
وهشام كمال عبادى
ياهشام البوست بوست محبة
|
Post: #32
Title: Re: بيان هام للأعضاء الجدد (موديل 2013)
Author: Rawia
Date: 01-04-2013, 11:50 PM
Parent: #31
Quote: والله ياراوية انت متلومة
عاد نجاملك؟ |
متلومة ساي
أنا لقيت روحي كعبة عديل
خاصة بعد بوست أستاذ بشرى أبو قصائد
_____
يا أمير نشوفكم قريب إن شاء الله
|
Post: #33
Title: Re: بيان هام للأعضاء الجدد (موديل 2013)
Author: heba Elmahi
Date: 01-05-2013, 06:01 AM
Parent: #32
Quote:
بالمناسبة اسمى امير بوب وليس ايوب
كونى بخير ... |
معليش يا أمير العتب علي النظر و القراية بسرعة ... مرحب بيك حبابك يا بوب
|
Post: #34
Title: Re: بيان هام للأعضاء الجدد (موديل 2013)
Author: عبدالعزيز حسين عبدالرحيم
Date: 01-10-2013, 10:33 AM
Parent: #18
دكتور بله أزيك ياخ حبينا ننصح اخوانا الجداد ديل هنا
الناس الجداد وكان في ديوك برضه مافي مشكلة
ما تكضب الكضب حا يجيب ليك الهوى وغير يضرك ما بنعفك وهنا في شفوت وعندهم رادارات بتكشف الكضب وممكن يشوفوا كضبك يعملوا ميتين وهم خبراء غطس في الارشيف يوم تدقس يغطسوا ينكتوه كله يجيبوه ليك قدامك ما تصدق انك زاتك كضبته
ما تهبش خصوصيات الناس لو شفت ليك بسوي السبعة وذمتها وما سألك ما تجي تفته هنا وخلي كل حاجه في مكانها ما للفيس بوك وما للبورد للبورد وأوعك من الرسائل والماسنجر ما تجي تفتها هنا وأمشي أعمل ليك خط أحمر كبير حول خصوصيات اهلك اسرتك اولادك زوجتك اخوانك اصحابك وما تخلي زول يتحشر في خصوصياتك ومن دربك امشي أمن صورك وناسك في الفيس بوك
وتأكد عدم هبيشك لخصوصيات الناس بحمي خصوصياتك ، وأنت زاتك كون حريف ما تجي تحكي عن خصوصيات هنا لأنه يوم ممكن يبتزوك بيها ويبقى ليك الموضوع بمبي ، تاني زح من قدام كمرات البورداب وأتحاشاها قدر ما ممكن
ما تشفق البورد دبنقا بدور ويجيك نصيبك وخليك تقيل ما تنجلط او تندلق وحاول تدفن دقن قدر ما تقدر وزي ما قال الشاعر (دقنك المدفون بدوايك محل ما يلاقيك)
وما تتسرع في نقل الأخبار اتريث واصبر وأتاكد وجيب مصدر قوي لأنه مسك ضنب الككو حار والجرسة بعدين ما بتمرقك وأقلها لو زنقوك ناس وين المصدر
زح من أبوحسين قدر ما تقدر فهو كالطاعون وما تخش بوستات ودالباوقة حا ترفع ضغطك وتجيب ليك السكري أو على الاقل تفقع مراتك او تهيج مصرانك العصبي وما تغشى صلاح جادات حا يشيب بي راسك
لسه في نصايح حا اجيكم بيها
|
Post: #35
Title: Re: بيان هام للأعضاء الجدد (موديل 2013)
Author: حسبو عكاشة
Date: 01-10-2013, 10:46 AM
Parent: #34
هههههههههههههههههههههه
قال ليك عزو بدي ارشادات كمان
النقة الكتيرة دي لو كنت مشيت بيها ما كان بقيت عزو اعتذارات :)
|
|